ကမ္ဘာမှာ စစ်ပွဲများ ပဋိပက္ခများ ၂၀၂၆မှာ အမြင့်မားဆုံးအဆင့်ကို ရောက်နေပီ

ကမ္ဘာမှာ စစ်ပွဲများ ပဋိပက္ခများ

၂၀၂၆ မှာ အမြင့်မားဆုံးအဆင့်ကို ရောက်နေပြီ

(မိုးမခ) NPR News ဇွန် ၁၀၊ ၂၀၂၆

ဆွီဒင်နိုင်ငံရှိ တက္ကသိုလ်တခုမှ သုတေသီများ၏လေ့လာမှုအသစ်တရပ်အရ ကမ္ဘာလုံးဆိုင်ရာ ပဋိပက္ခ များ၏အရေအတွက်သည် ဒုတိယကမ္ဘာစစ်ပြီးနောက်ပိုင်း အမြင့်ဆုံးအဆင့်သို့ ရောက်ရှိလာခဲ့ကြောင်း သိရသည်။

ကမ္ဘာလုံးဆိုင်ရာအကြမ်းဖက်မှုနှင့် ပဋိပက္ခဆိုင်ရာအချက်အလက်များကို စုဆောင်းပေးနေသည့် ထိပ်တန်းအဖွဲ့အစည်းတခုဖြစ်သော ဆွီဒင်နိုင်ငံ အုပ်ပဆလာတက္ကသိုလ် (Uppsala University) ၏ အုပ်ပဆလာ ပဋိပက္ခအချက်အလက်အစီအစဉ် (UCDP) အရ ၂၀၂၅ ခုနှစ်တွင် ကမ္ဘာတစ်ဝန်း၌ ဖြစ်ပွားဆဲ ပဋိပက္ခပေါင်း ၆၅ ခု ရှိခဲ့သည်။

ယင်းပဋိပက္ခများအနက် နိုင်ငံအချင်းချင်း တိုက်ရိုက်ဖြစ်ပွားသည့် ပဋိပက္ခအရေအတွက်မှာ ယခင်နှစ်ထက် နှစ်ဆတိုးလာပြီး ၈ ခုအထိ ရောက်ရှိခဲ့ကာ UCDP က ၁၉၄၆ ခုနှစ်မှစ၍ အချက်အလက်များ စတင်ကောက်ယူခဲ့ပြီးနောက်ပိုင်း အမြင့်ဆုံးစံချိန်တင်ခဲ့သည်။ ယင်းပဋိပက္ခများတွင် ရုရှား–ယူကရိန်း စစ်ပွဲ၊ အီရန်–အစ္စရေး စစ်ပွဲများအပြင် အိန္ဒိယနှင့်ပါကစ္စတန်တို့အကြား အငြင်းပွားမှုများလည်း ပါဝင်သည်။

ထို့အပြင် ၂၀၂၅ ခုနှစ်အတွင်း ပဋိပက္ခများကြောင့် သေဆုံးသူဦးရေမှာ ခန့်မှန်းခြေအားဖြင့် ၂၄၄,၆၀၀ ဦးအထိ မြင့်တက်ခဲ့ပြီး ၁၉၉၄ ခုနှစ်နောက်ပိုင်း အမြင့်ဆုံး သေဆုံးမှုအရေအတွက်အဖြစ် မှတ်တမ်းဝင်ခဲ့ကြောင်း လေ့လာမှုက ဖော်ပြထားသည်။ ယင်းပမာဏမှာ ၂၀၂၄ ခုနှစ်တွင် မှတ်တမ်းတင်ခဲ့သည့် သေဆုံးသူ ၁၈၇,၀၀၀ ဦးထက် သိသိသာသာ မြင့်မားလာခြင်းဖြစ်သည်။

မြန်မာပြည်တွင် ၂၀၂၁ မှ ၂၀၂၆ အတွင်း ဖြစ်ပွားဆဲပြည်တွင်းစစ်တွင် ၅ နှစ်အတွင်း၊ တိုက်ပွဲပေါင်း ၂ သောင်းကျော် ဖြစ်ပွားခဲ့ပြီး လူပေါင်း ၃.၅ သန်း နေရပ်စွန့်ခွာခဲ့ရသည်။ ၁.၁ သန်းက နယ်စပ်ဖြတ်ကျော်ထွက်ပြေးကြရသည်။ လူပေါင်း ၁ သိန်းခန့် စစ်မက်ကြောင့် သေဆုံးကြရသည်ဟု သတင်းများတွင် ဖော်ပြထားပါသည်။