ကိုရွေး - အရပ်သတင်း
အရပ်သတင်း
ကိုရွေး
(မိုးမခ) ဧပြီ ၃၀၊ ၂၀၂၅
ပါးစပ်သတင်းလိုလို ဇာတ်သီချင်းလိုလို
နတ်မင်းဟာ မတ်တပ်ရပ်ရင်း ဈာန်ရနေတာတဲ့
အရပ်ထဲမှာပြောနေကြတာ
လိုရင် ခြင်ထောင်ထဲ
မလိုရင် ဂါတ်တဲ
မမကြီး ဆိုတာလည်းပါရဲ့
အချစ်တစ်ခြမ်း စစ်တစ်ခြမ်းမှာ
မြစ်ကမ်းကိုဖြတ်ကူးသွားကြတာလည်းပါရဲ့
တချိန်က အက်ကြောင်းလေးဟာ
အခုတော့
ခုန်ကူးလို့မရတော့တဲ့ငလျင်ကြီးဖြစ်လာတယ်ဆိုတာလည်းပါရဲ့
သွပ်လိုတာကဆယ်ချပ်
ဝယ်နိုင်တာက ငါးချပ်ဆိုတာလည်းပါရဲ့
ငွေတစ်သောင်းပါသွားတာ
ငပိရည်နဲ့တို့စရာတောင်
မလောက်ချင်တော့ဘူးဆိုတာလည်းပါရဲ့
ဒါ့ထက်ချွေတာရရင်လည်း
အငတ်ခံဖို့ပဲရှိတော့တယ်ဆိုတာလည်းပါရဲ့
ချစ်သဲနဲ့နီးခါနီးမှ
စစ်ပွဲကပြီးမှပြန်ခဲ့မယ်ဆိုတာလည်းပါရဲ့
အချစ်ခါးခါး မခါးခါး
စစ်ခါးတယ်သား
ရေခြားမြေခြား ပညာရှာသွားဆိုသူလည်းပါရဲ့
ဒီအရပ်မှာပဲဝေပြီး
ဒီအရပ်မှာပဲကြွေမယ်ဆိုတဲ့ပန်းကလေးတွေလည်းပါရဲ့
နိုင်ငံမခြားသော်လည်း
နံရံခြားနေတဲ့ မိသားစုထမင်းဝိုင်းတွေလည်းပါရဲ့
ဒေါင်းအလံတစ်ဝက်ကို
ကျောင်းပြန်တက်မှဆက်ထူမယ်ဆိုတဲ့အဖြူထည်လေးတွေလည်းပါရဲ့
တချို့ရွာတွေရေနစ်ပြီး
တချို့ရွာတွေ မီးဖုတ်ခံနေရတာလည်းပါရဲ့
အတိတ်ကိုလည်းမေ့မရ
အနာဂတ်ကိုလည်းမတွေးရဲ
လောလောဆယ် ပိုက်ဆံအိတ်ဇစ်ပြဲနေပြီဆိုတာလည်းပါရဲ့
ငလျင်ခဏခဏလှုပ်သလို
ရင်ခဏခဏလှုပ်တယ်
တပြည်လုံးအပူကို
ရင်ထဲမှာယူသိမ်းထားရသလိုပဲဆိုတာလည်းပါရဲ့
အိပ်မရတဲ့ညတွေများလာသလို
ညလိုမှောင်တဲ့နေ့တွေများလာပြီဆိုတာလည်းပါရဲ့
.
အပူလှိုင်းတွေလည်းဖြတ်ဦးမယ်တဲ့
မုန်တိုင်းတွေလည်းလာဦးမယ်တဲ့
ရန်ကုန်ရေ ရန်ကုန်
ဟေးးး ရန်ကုန် သွေးမအေးနဲ့
ပြန်ဆုံရင်ကံကောင်းဖို့
ရန်ကုန်ရေ
ဆန်မကုန်အောင်ဉာဏ်ကောင်းကြဦးစို့။
28 Apr 2025
-
t.me@moemaka
#MoeMaKaMedia
#WhatsHappeningInMyanmar
Posts
