ခေါင်းကြီး - နွေဦးခုံရုံး

ခေါင်းကြီး - နွေဦးခုံရုံး

မိုးမခ ၊ ဇူလိုင် ၂၇ ၊ ၂၀၂၅

*(၁၉၃၈)ခုနှစ် (၁၃၀၀) ပြည့်အရေးတော်ပုံ...

*(၁၉၈၈) ခုနှစ် ရှစ်လေးလုံး (၁၃၅၀) ပြည့်အရေးတော်ပုံ...

*(၂၀၀၇) ခုနှစ် ရွှေဝါရောင်တော်လှန်ရေး...

*(၂၀၂၁) ခုနှစ် နွေဦးတော်လှန်ရေး...။

*သမိုင်းအဆက်ဆက်မှာ...

တိုင်းပြည်ပျက်ရလောက်အောင်...

မမြင်ရက် မနှစ်သက်စရာ အဖြစ်အပျက်များစွာကို...

ရက်ရက်စက်စက် လုပ်ရက်ခဲ့ကြ...

အခုထိ လုပ်ရက်နေကြဆဲသူတွေရဲ့...

မသမာတဲ့ ရာဇဝတ်မှုအမိုက်အမဲတွေထဲမှာ...

စိတ်ပါလက်ပါ ကိုယ်တိုင်လည်း တိုက်ရိုက်ပါဝင်နေပြီလား?

ဒါမှမဟုတ် မသိလိုက်မသိဘာသာပင်...

မပါချင် ပါချင်နဲ့ သွယ်ဝိုက်ပါဝင်သွားခဲ့ပြီလား?

*ရာဇဝင်အဆက်ဆက်မှာ...

စာတင်သွေးပျက်လောက်စရာ...

အပြစ်မဲ့ဘဝ အိပ်မက်ပေါင်းများစွာ...

အကောင်းချည်းတွေကနေ ထောင်းထောင်းကြေပျက်စီးခဲ့ကြ...

အခုထိ နင်းခြေဖျက်ဆီးခံနေကြရဆဲသူတွေရဲ့...

ငရဲတွင်းပမာ အကြောင်းခြင်းရာများကို...

ကိုယ်ချင်းစာတရားခေါင်းပါးစွာနဲ့... 

နှလုံးသားမှာ မခံစားမသိနိုင်ကြတော့တာလား?

ဒါမှမဟုတ် တမင်တကာများ...

မသိချင်ယောင်ဆောင်နေကြတာလား?

*ခေတ်ကာလအဆက်ဆက်မှာ...

ဘယ်လိုမှ မပစ်ရက်နိုင်စရာ...

မျိုးဆက်သစ်ရတနာ အသက်ပေါင်းများစွာ... 

ရက်ရက်ရောရောနဲ့ မမက်မောဘဲ နှင်းဆက်ခဲ့ကြ... 

အခုထိ နှင်းဆက်နေကြဆဲသူတွေရဲ့...

ရဲရဲတောက်မျက်နှာတွေကို...

​မထောက်မညှာ အတ္တ၊မောဟကြီးလွန်းစွာနဲ့... 

မီးထွန်းကြည့်သည့်တိုင် မမြင်နိုင်ကြတော့တာလား?

ဒါမှမဟုတ် တမင်တကာပင်...

မမြင်ချင်ယောင်ဆောင်နေကြတာလား?

*စနစ်ဆိုးအဆက်ဆက်မှာ...

အလွန်နှစ်သက်မြတ်နိုးဖွယ်ရာ ...

တန်ဖိုးကြီး ခန္ဓာကိုယ်အစိတ်အပိုင်းများစွာ... 

လိုလိုလားလားနဲ့ အပိုမကြွားဘဲ ပေးဆပ်သွားခဲ့ကြ... 

အခုထိ ပေးဆပ်ထားနေကြဆဲသူတွေရဲ့...

မာန်ပါပါစကားသံတွေကို...

အမှန်တကယ် ကရုဏာတရားကင်းမဲ့စွာနဲ့...

လားလားမျှမဆိုင် မကြားနိုင်ကြတော့တာလား?

ဒါမှမဟုတ် တမင်တကာတောင်...

မကြားချင်ယောင်ဆောင်နေကြတာလား?

*လူမဟုတ်တဲ့ လူ့တိရစ္ဆာန်တွေကိုတော့...

အချိန်ကုန်ခံပြီး ဘယ်တော့မှ ဖျောင်းဖျလို့လည်းမရ...

လောဘမီးတွေကများ ဒေါသအမှားတွေလည်းဝန်မခံ...

နောင်တတရားဆိုတာလည်း တစ်ခါမှမကျန်...

အသိတရားအမှန်ကနေ အမြဲတစေလွတ်ကင်းလျက်...

စဉ်လာမပျက် ဆက်ပြီးမိုက်တွင်းနက်နေကြဆဲ...

အဝီစိငရဲကိုသာသွားကြမှာ တကယ်ပဲသေချာလှတာမို့...

ဘာဆိုဘာမှ ပြောနေစရာမလိုတော့လို့...

ခွေးသားရေပုရပိုက်မှာ အချိန်ကိုက်ပြီး...

ပြစ်မှုကြီးများအလိုက် စာရင်းပြုစုရေးသား...

မျဉ်းပိတ်မှတ်တမ်းတင်ထားလိုက်ပြီးဖြစ်ပေမဲ့...။

*စံပြအမှန်တရား ဓမ္မဘက်တော်သားကြီးများလိုလို... 

ဟန်ပြအကြံသမား သီလဖက်ပျော်သမားကြီးများလိုလို...

နိုင်ငံရေးကို စိတ်မဝင်စား ကြားနေနိုင်ငံကြီးသားများလိုလို...

ဘာသာရေးကိုသာ အာရုံထား သူတော်ကောင်းကြီးများလိုလို...

ကိုယ်လုပ်မှ ကိုယ်စား ရိုးသားကြိုးစား စီးပွားရေးသမားကြီးများလိုလို...

ဟိုလိုလို ဒီလိုလို ငါနဲ့မဆိုင်သလို နေနိုင်ပြန်တဲ့...

ခံယူချက်တွေ မမှန်ကန် ဆရာကြီးများဟန်ပန်နဲ့...

အမည်ခံမြန်မာနိုင်ငံသားတွေ...။

*ဝေဖန်လေကန်သံတွေ ဆူညံ မူရင်းသန္ဓေမမှန်တဲ့...

ရောင်တော်ပြန် တော်လှန်ရေးသမားကြီးတွေ...

ဟန်ပါပါညာဝါးဖြီးဖြန်း ဆီးသီးဗန်းတွေ သိန်းသန်းကုဋေတွေးထားကြမဲ့...

အမြဲတမ်းကဝေ ငြိမ်းချမ်းရေးပွဲစားကြီးတွေ...

စားဖားတွေ မျက်နှာစုံညီစုရုံး ပွဲလန့်တုန်းဖျာအမီခင်းကြတဲ့...

ခါတော်မီ နိုင်ငံရေးသမားကြီးတွေ...

စီးပွားဥစ္စာတိုးတက် ခေတ်ပျက်မှာ လက်ခမောင်းခတ် အားရနေကြတဲ့...

လူရည်လည်ပညာတတ် တောကြောင်ပါးကြီးတွေ...

စည်းကမ်းကျင့်ဝတ်တွေရွတ်ပြ ဇွတ်ဖြူစင်တဲ့စိတ်ထားနဲ့ မျက်ရည်ချူပြစားနေကြတဲ့...

မုချအဖြူရောင်ပညာရှင် ဆရာသမားကြီးတွေ...။

*စသည် စသည်ဖြင့်...

ဉာဏ်မီသမျှ အကုန်အစင်...

အမျိုးအမည်စုံလင်စွာရေးထားတဲ့...

အခွင့်အရေးသမား ရေပေါ်ဆီလူတန်းစားများစွာအပြင်...။

*ပြည်ထောင်စုတိုင်းရင်းသား ညီနောင်သွေးချင်းတွေကြားမှာ...

အချင်းချင်းသပ်လျှိုသွေးခွဲ သွေးကွဲအားနည်းစေရန်ကြံ...

အချိန်တန်လည်း အိမ်မပြန်နိုင်အောင်...

ကလိမ်ဉာဏ်များစွာနဲ့ မရိုးမသားအကွက်ဖော်စားပြီး...

ကွက်ကျော်ကစားနေတဲ့သူတွေ အားလုံး(အားလုံး)ကို...။

*ပြတ်ပြတ်သားသားနဲ့ အတည်ပြောချင်နေတာက...

ကြည်လင်ပြေပြစ်တဲ့ ကြေးမုံပြင်မှန်တစ်ချပ်ရှေ့မှာ...

အပြန်ပြန်အလှန်လှန် ထပ်ခါထပ်ခါမရွှေ့...

ဂုဏ်သိက္ခာအပြည့် လုံခြုံတဲ့လိပ်ပြာမမေ့ဘဲ...

ကိုယ့်မျက်နှာကိုယ် စေ့စေ့ကြည့်လျက်...

မကွယ်မဝှက် မရှက်စတမ်း မေးလိုက်စမ်းပါ...

ငါဟာ လူလား? တိရစ္ဆာန်လား?

ဒါမှမဟုတ် လူ့တိရစ္ဆာန်လား?

Join Us @ MoeMaKa Telegram
t.me@moemaka
Please show your support, donate with Zelle
#MoeMaKaMedia
#WhatsHappeningInMyanmar