ခန့်ဝါငြိမ်း - မြေအောက်စာသင်ကျောင်း

ခန့်ဝါငြိမ်း - မြေအောက်စာသင်ကျောင်း

မိုးမခ ၊ ဩဂုတ် ၁၂ ၊ ၂၀၂၅

ဗုံးမိုးတွေတရစပ်ရွာလွန်းလို့

ပညာပျိုးခင်းလေးကို

မြေအောက်မှာစိုက်ပျိုးထားရ။

သစ်ဥတွေလို

ကြီးထွားလာကြတဲ့ကလေးတွေ

သစ်မြစ်တွေလို

ဖွဲ့ဖြိုးလာကြတဲ့ကျောင်းသားတွေ။

နေရောင်ခြည်မရှိပေမဲ့

ပညာအလင်းရောင်နဲ့

စာသင်ခန်းလေးတွေဟာ

လင်းလို့ထိန်လို့။

အခု

မြေလျှိုးနိုင်ပြီဆိုတော့

နောက်တော့

မိုးပေါ်ပျံနိုင်မှာပေါ့။      ။

Join Us @ MoeMaKa Telegram
t.me@moemaka
Please show your support, donate with Zelle
#MoeMaKaMedia
#WhatsHappeningInMyanmar