ခန့်ဝါငြိမ်း - ကျားဖြန့် ကြောင်ဖြန့်

ခန့်ဝါငြိမ်း - ကျားဖြန့် ကြောင်ဖြန့်

မိုးမခ ၊ နိုဝင်ဘာ ၂၃ ၊ ၂၀၂၅

ကျွန်စနစ် စလုပ်တာလည်း

အင်္ဂလိပ်တွေပဲ

ကျွန်စနစ် တိုက်ဖျက်ရေး စလုပ်တာလည်း

အင်္ဂလိပ်တွေပဲ။

ကျားဖြန့်စလုပ်တာလည်း

တရုတ်​တွေပဲ

ကျားဖြန့်နှိမ်နင်းရေးစလုပ်တာလည်း

တရုတ်တွေပဲ။

ငယ်ငယ်တုန်းကလည်း

တရုတ်သေနတ်တွေနဲ့

စစ်တိုက်တမ်း ကစားကြတယ်

ကြီးလာတော့လည်း

တရုတ်သေနတ်တွေနဲ့

စစ်တိုက်တမ်း ကစားကြတယ်။

တစ်ဘက်ကလည်း

အချင်းချင်းကျ သတ်ရဲဖြတ်ရဲ

ဂက်စ်ပိုက်လိုင်းပွန်းမှာကျ ​သေအောင်ကြောက်

တစ်ဘက်ကလည်း

တော်လှန်သွေးတွေ ရဲရဲနီ

ဂက်စ်ပိုက်လိုင်းနား ရောက်ရင်

သွေးရောင်က ပန်းရောင်ဖြစ်သွားပြီ။

ပျော်ချင်လို့

Happy water သောက်မိပါတယ်

ဘယ်သူနဲ့ ရမှန်းမသိတဲ့ ကိုယ်ဝန်ရယ်

ဘယ်သူ့ဆီက ကူးမှန်းမသိတဲ့

အေအိုင်ဒီအက်စ်ရောဂါရယ်

အဆစ်ရလိုက်တယ်

ဒီနိုင်ငံမှာ

ပျော်ရွှင်မှုကလည်း

ငြိမ်းချမ်း​ရေးလို

တရုတ်ထုတ်ကုန်ပစ္စည်းတမျိုးပဲလား

ကြာကြာမခံလို့။    ။

Join Us @ MoeMaKa Telegram
t.me@moemaka
Please show your support, donate with Zelle
Like and Subscribe MoeMaKa YouTube Channel
#MoeMaKaMedia
#WhatsHappeningInMyanmar