ခက်ဦး - ပျော်နေတဲ့လမ်းကလေး

ပျော်နေတဲ့လမ်းကလေး

ခက်ဦး

(မိုးမခ) မေ ၁၄၊ ၂၀၂၀

ရပြီလေ ပူလို့ရပြီ

ညနေမှာသုံးရက်စာတစ်ပါတည်း

ရှင်းမယ်ဆိုတာကြားပြီးကတည်းက

ခြေထောက်အောက်ကကျောက်ပူကြမ်းတွေ

ကောက်ရိုးဘဝပြောင်းသွားပြီ

ထပ်ပူလိုက်စမ်း ထပ်ထပ်ပူလိုက်စမ်း

အကြွေးလေးဆပ်ပြီးညနေလွှေးမယ့်

ကြက်ဆီပြန်ဟင်းနံ့လေးက

ကတ္တရာတွေအညှော်ဝေးအောင်

mask လေး လာတပ်ပေးသွားပြီ

ထပ်ပူလိုက်စမ်း ခြေပျော်ကျအောင်ပူလိုက်စမ်း

ကျောက်လာချတဲ့သနားခါးထူထူလေး

အပြုံးဖွဖွလေးပေးပြီးကတည်းက

ရင်ပူကြီးထဲရှဲခနဲ

အပျော်မိုးတွေရွှဲသွားပြီ

ဖုန်ထူထူထဲအေးခနဲ

မြေသင်းနံ့လေးဝှေ့သွားပြီ

ပူပူကြီးထဲပျော်ပျော်ပဲ

သီချင်းလေးတောင်ဟဲလိုက်သည် ။  ။

ခက်ဦး

  12.5.2020