မိုးမင်းသိမ်း- ဘာသာပြန်ကဗျာ (တုဖူ - နယ်ခြား ဟိုမှာဘက်-( ကဗျာ ကိုးပုဒ် ))

နယ်ခြား ဟိုမှာဘက်

( ကဗျာ ကိုးပုဒ် )

တုဖူ 

( ၁ )

မချိတင်ကဲ ခံစားရမှုတွေ အပြည့်။

အိမ်ကနေ 

ဝေးကွာလှမ်း အနောက်နယ်ခြားဆီ 

စေလွှတ်ခံခဲ့ရ။

အချိန်ကာလ အကန့်အသတ်နဲ့မှန်းတော့

အသိသားလေ။

အမိန့်နာခံဖို့ ပျက်ကွက်ရင်တော့ဖြင့်

အပြစ်ပေးခံရဖို့သာ။

ထိန်းကွပ်ထားတဲ့ ကျယ်ပြော ပိုင်နက်နယ်မြေ ချဲ့ထွင်လိုသူ ဧကရာဇ်ကို အံ့ဩတကြီးဖြစ်မိရဲ့။

အိမ်သူအိမ်သားတို့ရဲ့ ချစ်မေတ္တာနဲ့ 

အဆက်ပြတ်ခဲ့ရ။

မျက်ရည် ထိန်းထားရပြန်တဲ့ကြားက

လှံတံတွေ ပခုံးထမ်းကာ 

အဝေးတစ်နေရာဆီ ချီတက်ဖို့သာ

အတင်းအကျပ် စေခိုင်းခံနေကြရ။

( ၂ )

အိမ်က ထွက်လာတာ ကြာလှပေါ့။

လူမဆန်တဲ့ တပ်သားသစ်စုဆောင်းတာမျိုး

နောက်ထပ်မကြုံမတွေ့။

မိသားစုရဲ့ နွေးထွေးတဲ့ ချစ်ခြင်းမေတ္တာကတော့

ကျုပ်နဲ့အတူ ကျန်နေသေးရဲ့။

ဘယ်အချိန်ဖြစ်ဖြစ် သေသွားနိုင်မှန်း သိပါရဲ့။လက်ထဲကနေ မြင်းဇက်ကြိုးပြုတ်ကျသွားပေတဲ့

မြင်းကိုတော့ဖြင့် ထိန်းထားနိုင်သေးရဲ့။

ဒါမှမဟုတ်ရင်လည်း

အောက်ဘက်က ရန်သူအလံရှိရာမှာ

ဖမ်းဆီးချုပ်နှောင်ခံရဖို့

တောင်ကမ်းပါးက ခုန်ချလိုက်ရုံသာ။

( ၃ )

ရေစီးသံညံတဲ့ စမ်းချောင်းထဲမှာ

ကြိတ်ခြေဖျက်ဆီးခံနေရတဲ့ လက်နက်တွေ။

ရေလမ်းကြောင်း ပြောင်းသွားရတဲ့အထိ

အသံထွက်လာချေပေါ့။

ဓားသွားနဲ့ လက်တွေကိုဖြတ်လိုက်သလို 

စမ်းချောင်းဟာ နီရဲရဲ အရောင်ပြောင်းသွားရဲ့။

ကျုပ်ရဲ့ ခါးသီးနာကြည်းမှုတွေဟာလည်း

စူးရှရှ ဝေဒနာတွေဖြစ်လာရဲ့။

ကျုပ်တို့ဟာ

ဧကရာဇ်ကို အမှုတော်ထမ်းပါမယ်လို့

ကတိကဝတ်ပြုသူတွေမို့

အသေအချာ ရွေးထုတ်ခံထားကြရသူတွေ။

ဒါကြောင့်လည်း 

ဘာ့ကြောင့် ညည်းညူနေ‌တော့မှာလဲ။

စစ်မြေပြင်မှာ 

မြေမှုန့်အဖြစ် မြန်မြန်ဆန်ဆန် ပြောင်းလဲသွားမယ့်

အရိုးတွေ ထားရစ်ခဲ့ရတဲ့တိုင် 

ထင်ပေါ်ကျော်ကြားမှုရဖို့အတွက်

စွမ်းစွမ်းတမံ တိုက်ရခိုက်ရပေဦးတော့မယ်။

( ၄ )

ခင်ဗျားက စစ်မှုမထမ်းမနေရ အတင်းအကျပ်စေခိုင်းတာကို ကြီးကြပ်ကွပ်ကဲသူ။

ကျုပ်ကတော့ဖြင့် ဝေးကွာလှမ်းတဲ့ နယ်ခြားဆီ

သွားရပေတော့မယ်။

ဒီလောက်ပါပဲ။ ဒါကြောင့်လည်း ချီတက်‌တော့

မယ်၊ အသက်ရှင်ရှင် သေသေပ။

ခင်ဗျားကို မျက်မှောင်ကြုတ်ကြည့်နေဖို့လည်း 

မလို၊ အနိုင်ကျင့် ခြိမ်းခြောက်ဖို့ ပိုပြီးတောင် မလို။

ကျုပ်နဲ့သိကျွမ်းသူတစ်ဦးနဲ့ ဆုံလို့မို့

အိမ်အပြန် စာတစ်စောင် ပါးလိုက်ရဲ့။

ဆင်းရဲဒုက္ခတွေ အတူတကွ ဝေမျှနေထိုင်ကြဖို့

လုံးဝမျှော်လင့်လို့ မရတော့တဲ့တိုင်

မိသားစုကို ထားခဲ့ရတော့မယ်ဆိုတဲ့အကြောင်း

ဝမ်းနည်းကြေကွဲမှုတွေနဲ့ပေါ့လေ။

( ၅ )

နယ်ခြားစောင့်တပ်တွေနဲ့ ပူးပေါင်းဖို့

အဝေးကြီးကနေ သူတို့တစ်တွေ ချီတက်လာကြ။

နယ်ခြားပယ်ခြားမှာက

ပူးပေါင်းရတာက တချို့သောကိစ္စတွေထက်

လွယ်လင့်တကူ ပိုဖြစ်ရဲ့။

ဒါတွေအကုန်လုံး တပ်မှူးက ဘယ့်နှယ်သိမှာတုံး။

တပ်ဖွဲ့ပေါင်းမြောက်မြားစွာနဲ့

မျိုးနွယ်စုတွေကို 

မြစ်တစ်စင်းမှာ ရုတ်တရက် မြင်တွေ့ကြရ။

ဝေးလွန်းလှသမို့ အနည်းအကျဉ်းလောက်သာ

တွေးမိခဲ့။

ကျုပ်အနေနဲ့လည်း ကိုယ့်မြေအတွက် 

ဘယ်လိုများရဲဝံ့စွန့်စားတိုက်ရမလဲ၊

ဘယ်အချိန်ကာလကျမှ 

အရည်အသွေးပြနိုင်ပါလိမ့်မလဲ ဆိုတာကိုပေါ့။

( ၆ )

လေးတို့ကို ကောက်ယူကာ

လေးညှို့တွေကို တင်းတင်းငင်ကြ။

အရှည်ဆုံးသော မြားတံတွေကို

ရွေးချယ်ယူကြ။

ရန်သူရဲ့မြင်းတွေကို အစကနဦး 

သတ်ဖြတ်ပစ်နေကြပြီ။

ဦးဆုံးရမိတဲ့ တပ်မှူးတွေကို

အကျဉ်းသားအဖြစ် ဖမ်းဆီးနေကြပြီ။

အရေအတွက် အကန့်အသတ်နဲ့သာ

သတ်ဖြတ်ပစ်ဖို့သာပဲ။

တိုင်းပြည်တစ်ပြည်မှာ 

နယ်မြေအပိုင်းအခြားရှိရပေမယ်။

ဒီနယ်မြေကို ထိန်းချုပ်ကွပ်ကဲရပေမယ်။

အောင်ပွဲတစ်ခု ဖန်တီးဖို့အတွက်

လူပေါင်းမြောက်မြားစွာကို

ရက်ရက်စက်စက် သတ်ဖြတ်ပစ်တယ်ဆိုတာ 

အချည်းနှီး အလဟဿ လုပ်ရပ်သာ။

( ၇ )

နှင်းထဲ ဖြတ်သန်းသွားဖို့ မြင်းကို ဆွပေးလိုက်တယ်

ကျုပ်တို့တပ်တွေက တောင်တန်းလျှိုမြောင်ထဲ

ဝင်ရောက်နေကြပြီ။

ချောက်ကမ်းပါးတွေကို ဝေ့ကာဝိုက်ကာ

ဖြတ်သန်းရင်း ကျောက်တုံးတွေကို

အေးခဲနေတဲ့ လက်တွေနဲ့ ဆုပ်ထားကိုင်ထားကြရ။

အိမ်ကထွက်လာကတည်းက စလို့

ဟောဒီတံတိုင်းကြီးကို ကျုပ်တည်ဆောက်နေတာ

ဘယ်ကာလကျမှ အပြီးသတ်မှာပါလိမ့်။

ဘယ်ကာလကျမှ အိမ်ပြန်ရမှာပါလိမ့်။

ညနေခင်း၊ တောင်ဘက်ဆီ တိမ်တွေရွေ့လျားလို့

လက်နှစ်ဖက်နဲ့ ဖမ်းဆုပ်လို့တောင်ရနိုင်ရဲ့။

အတူလိုက်ပါသွားလို့တောင် ရနိုင်ရဲ့။

( ၈ )

မျိုးနွယ်စုတွေက 

အင်အားခိုင်မာတောင့်တင်းလေအောင် 

လူသူစုဆောင်းထားကြ၊

ကျုပ်တို့ရဲ့ ခံစစ်ကို လှဲဖြိုပစ်နေကြ။

ဝန်းကျင်တစ်ခွင်တစ်ပြင် 

ကြည့်နိုင်မြင်နိုင်တဲ့ အကွာအဝေးမှာတော့ဖြင့်

သူတို့မြင်းတပ်က ဖုန်မှုန့်တွေနဲ့အတူ

လေပြင်း ထန်နေသေး။

ဒါပေတဲ့ ကျုပ်တို့အင်အားက စွမ်းဆောင်နိုင်ပ။

သူတို့တစ်တွေကို လွယ်လင့်တကူ

မွှေနှောက်ချောက်ချားပစ်လိုက်တော့တယ်။

သူတို့ရဲ့ခေါင်းဆောင်ကြီးလည်း

အကျဉ်းသားဖြစ်သွားရ။

လည်ပင်းကို ကြိုးတုပ်ကာ ခံတပ်ဂိတ်တံခါးထဲ

ပို့ဆောင်လိုက်ကြ။

ဒါပေတဲ့ ကျုပ်တို့ဟာ စစ်သည်တွေမျှသာ၊

တိုက်ဖို့ခိုက်ဖို့သာ ဝန်တာရှိလို့မို့

အောင်ပွဲတစ်ခု အလေးအနက်ရဖို့ဆိုတာ

ဆင်ခြင်တုံတရား ကင်းမဲ့ကြသပေါ့။

( ၉ )

ဆယ်နှစ်ကာလကျော် စစ်သည်တစ်ဦးဖြစ်ခဲ့လို့မို့

အနည်းအကျဉ်း အသိအမှတ်ပြုခံရ။

တခြားသူတွေ အထူးအခွင့်အရေးရဖို့

ရှာဖွေနေကြချိန် ကျုပ်မှာတော့ဖြင့် အဆောင်အယောင် ဘွဲ့တံဆိပ်ချီးမြှင့်ဖို့တောင်

တားဆီးပိတ်ပင်ထားရ။

ခုတော့ အလယ်ပိုင်းလွင်ပြင်ဒေသမှာ

စစ်ပွဲတွေ ထိန်းမနိုင်သိမ်းမရ ဖြစ်ပွားနေပြန်ရဲ့။

နယ်ခြားမှာ မျိုးနွယ်စုတွေနဲ့ ပြင်းပြင်းထန်ထန် တိုက်ခိုက်နေတာပဲပေါ့။

ဒီအချိန် ဒီကာလမျိုးမှာ 

စစ်သည်တော်တစ်ဦးအနေနဲ့ ရာထူးဌာနန္တရနဲ့

သက်သောင့်သက်သာဘဝထက်

တခြားကိစ္စတွေ တွေးရ‌တော့မယ်။

ပိုက်စိပ်တိုက် တိုက်ခိုက်နေရင်း

ခါးသီးနာကြည်းမှုကနေ 

ဘယ်လိုများ လွတ်မြောက်နိုင်ပါ့မလဲလေ။

၁၉၆၂ ခုနှစ်မှာ ပီကင်း၊ နိုင်ငံခြားဘာသာပုံနှိပ်ထုတ်ဝေရေးက ထုတ်ထားတဲ့ Tu Fu Selected Poems ကနေ မြန်မာဘာသာပြန်ပါတယ်။

ဖုန်ကျီး စုစည်းပြီး ရီဝီအယ်လ်လေ ဘာသာပြန်တဲ့ Beyond  The Frontier ( Nine Poems )ကို ဘာသာပြန်ပါတယ်။

မိုးမင်းသိမ်း

၉ ဇူလိုင် ၂၀၂၁

-

Join Us @ MoeMaKa Telegram
t.me@moemaka
#MoeMaKaMedia
#WhatsHappeningInMyanmar