မြန်မာပြည်မှာ စစ်တပ်အာဏာသိမ်းပြီး ၅ လ ၁၅ ရက် မြောက်နေ့ မြင်ကွင်း

(file photo - U Hla Shwe, U Win Tin, Photo credit - Hnin Hnin Hmway)

မြန်မာပြည်မှာ စစ်တပ်အာဏာသိမ်းပြီး ၅ လ ၁၅ ရက် မြောက်နေ့ မြင်ကွင်း

(မိုးမခ) ဇူလိုင် ၁၅၊ ၂၀၂၁

ဒီနေ့လည်း နံနက်ကတည်းက အရေးပေါ်လူနာတင်ကား အသံတွေ နဲ့ အိပ်ယာက နိုးထလာရတဲ့ နေ့တွေထဲက တနေ့ ဖြစ်နေဆဲပါ။

နံနက် စောစော ၇ နာရီမထိုးခင်ကတည်းက လူနာတင်ကား ဥသြသံကို ကြားပြီးအိပ်ယာက နိုးထခဲ့ရပါတယ်။ ကိုယ်ကတော့ ကိုယ်တိုင်ရော မိသားစုထဲကပါ ကျန်းမာနေဆဲမို့ အိပ်ရေးဝဝ နိုးထနိုင်ပေမယ့် မိသားစုဝင်တွေထဲက ကိုဗစ်နဲ့ နာမကျန်းဖြစ်နေသူတွေ အဖို့ ပြုစုရ ၊ စောင့်ကြည့်ရ၊ ဆေးဝါး၊ အောက်စီဂျင်လိုအပ်ချက်တွေအတွက် ဟိုပြေးရ သည်ပြေးရ နဲ့ စိတ်ပင်ပန်းဆင်းရဲမှု ရုပ်ပင်းပန်းဆင်းရဲမှု နှစ်မျိုးလုံး ခံစားရတဲ့ ဘဝတွေကို တွေးကြည့်မိပြီး ကိုယ်ချင်းစာမိပါတယ်။

နံနက်စျေးမှာတော့ နံနက် ၇ နာရီခွဲ ၈ နာရီရှိနေသည့်တိုင် ခါတိုင်းလို ဝယ်သူအများအပြားနဲ့ စည်စည်ကားကားမဟုတ်ပါဘူး။ ဟင်းရွက်၊ ကုန်ခြောက်တန်း ထဲက တချို့သော ဆိုင်ခန်းတွေ မခင်းနိုင်ပဲ ပိတ်ထားတာတွေ့ရတဲ့အခါ ဒီဆိုင်မှာ ရောင်းသူ နေမကောင်းဖြစ်လို့လား ဆိုတဲ့ အတွေးပေါ်လာပါတယ်။ အရင် ပထမလှိုင်း၊ ဒုတိယလှိုင်း လိုမျိုးတုန်းကတော့ ပေါ့ဇတစ် ဖြစ်တဲ့ လူနာတွေ့တဲ့ ဆိုင်၊ နေအိမ် ၊ တိုက်ကို ကျန်းမာရေးကလာပြီး တိတ်ကြိုးတွေနဲ့ ကာရံကာ အများကို မဝင်အောင် ကန့်သတ်တာမျိုး လုပ်ခဲ့ပေမယ့်လည်း ခုတတိယလှိုင်းမှာတော့ အဲလို လုပ်ဆောင်တာတွေ မတွေ့ရသလောက် ဖြစ်နေတာပါ။

စျေးထဲမှာတော့ တနေ့က စလိုက်တဲ့ ကြက်ဥစားခြင်းဖြင့် ကိုယ်ခံအားကောင်းမယ် ဆိုတဲ့ ပြောဆိုမှုတွေကြောင့် ကြက်ဥ ၊ ဘဲဥရောင်းတဲ့ဆိုင်တွေမှာ ကြက်ဥ တင်ပြီးရောင်းတာ မတွေ့ရလောက်အောင် ရှားပါးသွားပါတယ်။ ဘဲဥတွေသာ တင်ရောင်းနေပြီး ကြက်ဥကတော့ သူ့အဆက်အသွယ်နဲ့ သူ ဝယ်ယူကြရတာမျိုး ဖြစ်သွားပါတယ်၊ စျေးနှုန်းလည်း ၁ဆခွဲ ၂ဆနီးပါး မြင့်တက်သွားပါတယ်။ အလားတူ ကြက်သားစျေးလည်း ရုတ်တရက် မြင့်တက်ပြီး ဗမာကြက် လို့ခေါ်တဲ့ သဘာဝအတိုင်းမွေးတဲ့ အိမ်ကြက်တွေရဲ့ စျေးနှုန်းက တခြားစီပီ မွေးမြူရေးကြက်ထက် ရာခိုင်နှုန်း သိသာစွာ မြင့်တက်သွားပါတော့တယ်။

ကူးစက်ကပ်ရောဂါ ပထမလှိုင်းမှာတုန်းကလည်း စားသောက်ကုန် ပစ္စည်း၊ ဆေးဝါး ၊မက်စ်၊ ​ဒက်တောလ်လို ပိုးသတ်ဆေးရည်တွေ အလုအယက် ဝယ်ယူကြလို့ စျေးမြင့်တက်သွားတာတွေ ဖြစ်ခဲ့ဖူးပါတယ်။

ခု တတိယလှိုင်း စလာတဲ့အခါမှာလည်း ဆေးဝါးတွေ အလုအယက်ဝယ်ယူတာ ၊ စားသောက်ကုန် ထဲက အမျိုးအမည်အချို့ကို အလုအယက် ဝယ်ယူကြတာတွေကြောင့် စျေးမြင့်တက်လာတာတွေ တကျော့ပြန်ဖြစ်လာပြန်ပါတယ်။ ခုတကြိမ်ကတော့ အရင်နှစ်ထက်ကို ကူးစက်နှုန်းများ ဖြစ်ပွားနှုန်းများတော့ ပိုပြီး စိုးရိမ်ကြောက်လန့်ကြတာတွေ့ရပါတယ်။

ရန်ကုန်မြို့ထဲမှာတော့ အသွားအလာက သိသိသာသာကြီး ရှင်းသွားတာမဟုတ်သေးပါဘူး၊ လျော့နည်းသွားတာတော့မှန်ပေမယ့် အရင်နှစ် စက်တင်ဘာလတုန်းကလို အပြင်ထွက်ခွင့် ကတ်ပါမှ ကားတွေ တမြို့နယ်နဲ့ တမြို့နယ် ကျော်ဖြတ်ခွင့်ရှိမယ်ဆိုတာမျိုး ကန့်သတ်တာတွေ မလုပ်လို့ စားသောက်ကုန်၊ ဆေးဝါး၊ လောင်စာဆီ မဟုတ်တဲ့ အချို့သော စီးပွားရေးလုပ်ငန်းတွေလည်း လည်ပတ် လုပ်ကိုင်နေကြဆဲဖြစ်ပါတယ်။

စီးပွားရေး က ကိုဗစ်ရော၊ စစ်အာဏာသိမ်းမှုကြောင့်ပါ လနဲ့ နှစ်နဲ့ချီ အထိနာထားတာကြောင့် ဝယ်မယ့်သူ မှာမယ့်သူ အလုပ်အပ်မယ့်သူ ရှိနေသေးသရွေ့ အတိုင်းအတာတခုထိ လည်ပတ်ဖို့ ကြိုးစားနေကြတဲ့ သဘောလို့လည်း မြင်ပါတယ်။ တကယ်တော့ ခုတကြိမ် တတိယလှိုင်းက ပိုပြီး ကာကွယ်မှု လုပ်ဖို့ လိုအပ်ပေမယ့် အရင်နှစ်က ကိုဗစ် ကန့်သတ်မှုတွေ လနဲ့ချီကြာမြင့်ခဲ့လို့ ထိခိုက်နေတဲ့ စီးပွားရေးကျဆင်းမှုကို ဆက်တောင့်မခံနိုင်ကြတာမို့ အခုနှစ် ပိုကူးစက် ပိုသေဆုံးကြတဲ့ တတိယလှိုင်းမှာ အရင်နှစ်လောက်တောင် မလိုက်နာနိုင်ကြတော့တဲ့ အနေအထားလည်း ဖြစ်ပါတယ်။ စီးပွားရေး ထိခိုက်မှုမှာ ကိုဗစ်တခုထည်းတော့မဟုတ်ပါ စစ်အာဏာသိမ်းမှုကလည်း အတော်ကြီးမားတဲ့ သက်ရောက်မှု ထိခိုက်မှု ရှိထားတာလည်း ဖြစ်ပါတယ်။

အခုလို ကိုဗစ်ကူးစက်မှု မြင့်မားနေချိန် အသေအပျောက်အရေအတွက် မြင့်တက်လာနေချိန်မှာ နိုင်ငံရေးအရ လှုပ်ရှားမှု ဆန္ဒပြမှုတွေလည်း ရှိနေဆဲဖြစ်တာတွေ့ရပါတယ်။ ရန်ကုန်၊ မန္တလေး၊ မုံရွာ နဲ့ စစ်ကိုင်းတိုင်းက အချို့သောမြို့တွေမှာ ဆန္ဒပြမှုတွေ နေ့စဥ်နီးပါး ရှိနေတာ သတင်းတွေထဲ တွေ့ရပါတယ်။

ဒီနေ့အခြားဖြစ်ရပ်တခုကတော့ ယခင်မွေးမြူရေးနဲ့ ရေလုပ်ငန်း ဝန်ကြီးဌာနရဲ့ ဘဏ်ဖြစ်ခဲ့ပြီးနောက်ပိုင်း ကမ္ဘာ့ရတနာဘဏ်အဖြစ် အမည်ပြောင်းခဲ့တဲ့ ဘဏ်ရဲ့ တောင်ဥက္ကလာဘဏ်ခွဲကို သေနတ်ပစ်ဖောက်ပြီး ဓါးပြတိုက်မှု ဖြစ်ပွားခဲ့တာပါ။ တောင်ဥက္ကလာပမြို့နယ်ထဲက လူစည်ကားတဲ့ နန္ဒဝန်စျေးအနီး ဗြဟ္မစိုရ် လမ်းပေါ်မှာ ရှိတဲ့ ဘဏ်ခွဲကို ဘဏ်လုပ်ငန်းလုပ်ကိုင်ချိန် နံနက် ၁၁ နာရီလောက်မှာ ဓါးပြတိုက်ခဲ့တာလို့ သတင်းဖေါ်ပြချက်တွေအရ သိရပါတယ်။

ကိုဗစ်ကြောင့် တနေ့တနေ့ လူအသက်ပေါင်း ရာနဲ့ ချီသေးဆုံးနေကြရတဲ့ အခုသီတင်းပတ်တွေထဲ စာပေနယ်ပယ်ထဲက နိုင်ငံရေးနယ်ပယ်ထဲက ပုဂ္ဂိုလ်တွေလည်း ပါဝင်နေပါတယ်။ ဒီနေ့ ကွယ်လွန်သူတွေအထဲ ဖဆပလ ခေတ်ကနေ မဆလ အာဏာသိမ်းပြီး ၁၉၆၂ ခုနှစ်ဆဲဗင်းဂျူလိုင် ကျောင်းသားအရေးအခင်းရဲ့ ခေါင်းဆောင်တဦးဖြစ်သူ ဦးလှရွှေ ခေါ် အောင်သာ (ပီသုံးလုံး) လည်းပါဝင်တာကို ဝမ်းနည်းဖွယ်ကြားသိရပါတယ်။

ကိုဗစ်က တိုင်းပြည်အတွက် တန်ဖိုးရှိတဲ့သူတွေကိုလည်း ငဲ့ညှာခြင်း အလျင်းမရှိပဲ ခေါ်ဆောင်သွားတယ်လို့ ခံစားလိုက်ရပါတယ်။

ပြီးခဲ့တဲ့ ငါးလကျော် အတွင်း ဒီလိုအဖြစ်အပျက်တွေ ဖြစ်ရပ်တွေ ဖြစ်လာရတဲ့အကြောင်းကို ပြန်မတွေးကြည့်ပဲ မနေနိုင်ပါဘူး။

အကယ်၍သာ ရွေးကောက်ပွဲ မဲစာရင်းကို အကြောင်းပြပြီး ဖေဖေါ်ဝါရီလ ၁ ရက်နေ့မှာ စစ်အုပ်စုရဲ့ လက်ရှိခေါင်းဆောင် မင်းအောင်လှိုင် အနေနဲ့ အာဏာမသိမ်းခဲ့ရင် ၊ ကိုဗစ်ကူးစက်မှုက ခုလောက် ပြင်းထန်လာစရာမမြင်သလို လူအချင်းချင်းအကြား ပူးပေါင်းဆောင်ရွက်မှု ဖေးမမှု၊ ကူညီမှု၊ ကျန်းမာရေး စောင့်ရှောက်မှုစနစ်လည်း အခုလို ပြိုလဲနေမှာမဟုတ်လို့ ပြီးခဲ့တဲ့ ၅ လအတွင်းမှာ ဆုံးရှုံးသွားတဲ့ ထောင်နဲ့ချီတဲ့ လူ့အသက်တွေက ခုချိန်ထိ ရှင်သန်နေထိုင်နေကြရမှာ ဖြစ်ပါတယ်။

ဒီဆုံးရှုံးမှုတွေက ဘာနဲ့မှ တန်ဖိုးဖြတ်လို့မရနိုင်ဘူးလို့ပဲဆိုချင်ပါတော့တယ်။

ဒီဆုံးရှုံးမှုတွေကို ဘာနဲ့မှ ပြန်အစားထိုးလို့ မရနိုင်ဘူးလို့လည်း ဆိုချင်ပါတယ်။

သည်အတွက်ကြောင့် ကိုဗစ်လှိုင်းကို ဖြတ်ကျော်နေတဲ့ မြန်မာပြည်သူတွေ နောင်အနာဂတ်တချိန်ကျရင် သည်ကမ္ဘာကျေသော်လည်း ဥဒါန်းမကြေတဲ့ သည်သမိုင်းမှတ်တိုင်ကို ဘယ်လိုလက်ကမ်းသယ်ဆောင်သွားကြမလဲဆိုတာကိုလည်း စောင်ကြည့်ပိုင်းဖြတ်ကြရဦးမှာ ဖြစ်ပါတယ်။ စစ်အုပ်စု စစ်အာဏာရှင်တို့နဲ့အတူ ဆက်လက်ယှဉ်တွဲနေထိုင်နေကြဦးမှာပဲလား၊ သည်စနစ်ဆိုးကို မြန်မာပြည်မြေပေါ်က အပြီးတိုင် တိုက်ထုတ်ချေမှုန်းလိုက်ကြမည်လားဆိုတာ အနာဂတ်မှာ အဖြေရှာကြရမှာ ဖြစ်ပါတယ်။

Join Us @ MoeMaKa Telegram
t.me@moemaka
#MoeMaKaMedia
#WhatsHappeningInMyanmar