ဦးစိုးထွန်းရှိန် DVB အား သိန်း ၁၀၀၀ ချေးဖူးပြီး ကမ္ဘောဇဘဏ်အား ဘီလျံချီအကြွေးတင်

DVB သတင်းဌာနက ပြုလုပ်သည့် အထူးသီးသန့် တွေ့ဆုံမေးမြန်းခန်းတစ်ခုတွင် တွေ့ရသော ဦးစိုးထွန်းရှိန်

ဦးစိုးထွန်းရှိန် DVB အား သိန်း ၁၀၀၀ ချေးဖူးပြီး ကမ္ဘောဇဘဏ်အား ဘီလျံချီအကြွေးတင်

Myanmar NOW ၊ အောက်တိုဘာ ၃၀၊ ၂၀၁၉(မိုးမခ) အောက်တိုဘာ ၃၁၊ ၂၀၁၉

ထိုင်းနိုင်ငံသို့ ထွက်ပြေးသွားပြီဖြစ်ကြောင်း မြန်မာအစိုးရအရာရှိများက အတည်ပြုထားသည့် တရားခံပြေး ရွှေသူဌေး ဦးစိုးထွန်းရှိန်၏ အမျိုးသားကြီးပွားတိုးတက်ရေးကုမ္ပဏီသည် လွန်ခဲ့သည့် သုံးနှစ်အတွင်း ပြည်တွင်း DVB သတင်းဌာနအား ကျပ်သိန်းထောင်ချီ ချေးငွေအပါအဝင် ငွေကြေးအကူအညီများ ပေးခဲ့ပြီး ကမ္ဘောဇဘဏ်နှင့်လည်း ကြွေးမြီပြဿနာများ ရှိနေသည်။

ဒီမိုကရက်တစ်မြန်မာ့အသံ (Democratic Voice of Burma/DVB) ကို အမျိုးသားကြီးပွားတိုးတက်ရေးကုမ္ပဏီက ၂၀၁၆ ဒီဇင်ဘာ ၁၂ ရက်တွင် ဘဏ်တိုးနှုန်းအတိုင်း တစ်နှစ် ၁၃ ရာခိုင်နှုန်းဖြင့် ကျပ်သိန်း ၁၀၀၀ကို စာချုပ်ချုပ်ဆို ငွေချေးခဲ့ခြင်းဖြစ်သည်။

Myanmar Now က DVB သတင်းဌာနထံမှ ရရှိခဲ့သည့် အမျိုးသားကြီးပွားတိုးတက်ရေး နှင့် DVB တို့၏ နှစ်မျက်နှာပါ စာချုပ်တွင် DVB Multimedia Company Ltd က “ ၎င်း၏လုပ်ငန်းတွင် ငွေကြေးများ လိုအပ်နေသည့်အတွက် ” ဘဏ်တိုးနှုန်းရယူပြီး ကျပ်သိန်း ၁,၀၀၀ တိတိ ခေတ္တခဏ ထုတ်ပေးရန် အကူအညီတောင်းခံရာ အမျိုးသားကြီးပွားတိုးတက်ရေး ကုမ္ပဏီလီမိတက်ကလည်း “ မိမိတို့ကုမ္ပဏီ နှင့် လုပ်ငန်းဆက်စပ် လုပ်ကိုင်ဖူးသူ ဖြစ်သည့်အတွက် ကူညီရန် သဘောတူပါသည် ” ဟု ရေးသားထားသည်။

ငွေချေးတာ ခေါင်းဆောင်ပိုင်းမသိ

DVB ထိပ်ပိုင်းခေါင်းဆောင်များက ယင်းငွေကြေးချေးငှားမှုသည် ယခု အလုပ်ထွက်သွားပြီးဖြစ်သည့် DVB ကြော်ငြာအရောင်းဌာနကို ဦးဆောင်သည့် ဦးခင်မောင်ဝင်းက ချေးယူခဲ့ခြင်းဖြစ်ပြီး ငွေထုတ်ချေးသူမှာ ဦးစိုးထွန်းရှိန်၏ အမျိုးသားကြီးပွားတိုးတက်ရေး ဖြစ်ကြောင်း အချိန်လွန်မှ သိခဲ့ရသည်ဟု ဆိုသည်။

ငွေးချေးယူသည့် အချိန်သည် ယခု တရားမဝင်ကြေညာခံထားရသည့် အမျိုးဘာသာသာသနာ စောင့်ရှောက်ရေးအဖွဲ့ (မဘသ) နှင့် ဦးစိုးထွန်းရှိန်တို့အကြား ဆက်နွှယ်မှုအကြောင်းကို လူသိထင်ရှားဖြစ်နေသည့် အချိန်ဖြစ်ပြီး ဦးစိုးထွန်းရှိန်ကဲ့သို့သောသူထံမှ ငွေချေးယူခဲ့ခြင်းသည် DVB ကဲ့သို့သော သတင်းဌာနအတွက် ရုပ်ဆိုးစရာကောင်းသည့် ဖြစ်ရပ်ဟုတ်မဟုတ် Myanmar Now က မေးသည့်အခါ


“စိုးထွန်းရှိန်ဆီက ယူမယ်လို့ ကြိုသိရင် ကျွန်တော်တို့လည်းတားမှာ။ ဒါပေမဲ့ သိတဲ့အချိန်မှာ ယူလည်းယူပြီးပြီ။ ကျွန်တော်တို့က တစ်လလောက်ကြာမှ သိတာ” ဟု

DVB ၏ အမှုဆောင်ဒါရိုက်တာ နှင့် အယ်ဒီတာချုပ် ဦးအေးချမ်းနိုင်က ရန်ကုန် DVB ရုံး၌ Myanmar Now နှင့် ဩဂုတ်လ ၃၀ ရက်က တွေ့ဆုံမေးမြန်းမှုအတွင်း ဖြေကြားခဲ့သည်။

အဆိုပါချေးငွေကို ရန်ကုန်မြို့လယ် အနော်ရထာလမ်း၊ ၃၉ နှင့် လမ်း ၄၀ ကြားရှိ ကွန်ဒိုအခန်းတစ်ခန်းတွင် DVB က ကြော်ငြာရုံးခန်းဖွင့်ရန် အခန်းငှားခအဖြစ် အသုံးပြုခဲ့ကြောင်း ၎င်းက ဆိုသည်။ အဆိုပါချေးငွေ ရယူခဲ့သည့် ၂၀၁၆ ဒီဇင်ဘာ ကာလများသည် DVB အနေဖြင့် ၎င်းကို ငွေကြေးထောက်ပံ့နေသည့် အဖွဲ့အစည်းများထံမှ ထောက်ပံ့ငွေအချို့ ထပ်မံမရသေးခင်စပ်ကြား ဘဏ္ဍာရေးအခက်အခဲရှိသည့် ကာလဖြစ်ကြောင်း၊ DVB ထိပ်ပိုင်းခေါင်းဆောင်များက ဆိုသည်။

ချေးငွေကြောင့် DVB ၏ဘက်မလိုက်ဘဲ မျှတစွာ သတင်းဖော်ပြမည်ဆိုသည့် စံနှုန်း ပြောင်းလဲခဲ့ခြင်း မရှိဟုလည်း ၎င်းတို့က ဆိုသည်။ သို့သော် ယင်းချေးငွေ ရယူခဲ့ပြီးနောက် DVB က ဦးစိုးထွန်းရှိန်နှင့် အနည်းဆုံးနှစ်ကြိမ် အထူးသီးသန့် တွေ့ဆုံမေးမြန်းများကို DVB သတင်းဌာနရုံးနှင့် လှည်းကူးမြို့ရှိ အမျိုးသားကြီးပွားတိုးတက်ရေး ကုမ္ပဏီဌာနချုပ်တို့တွင် ပြုလုပ်ခဲ့သည်။

ယင်းတွေ့ဆုံမေးမြန်းမှုတစ်ခုအတွင်း ဦးစိုးထွန်းရှိန်ဘက်က ၎င်းတို့မေးစေလိုသော မေးခွန်းများကို ကြိုပေးခဲ့သော်လည်း ပယ်ချခဲ့ပြီး မိမိတို့မေးလိုသည့် မေးခွန်းများကိုသာ မေးမြန်းခဲ့သည်ဟု ၎င်းမေးမြန်းခန်းကို ပြုလုပ်ခဲ့သူ DVB သတင်းဌာနမှ ကိုနေသွင်ညိဏ်းက ဆိုသည်။

SOE_HTUN_SHEIN_AND_DVB_CONTRACT.JPG


DVB နှင့် အမျိုးသားကြီးပွားတိုးတက်ရေးကုမ္ပဏီတို့အကြား ချုပ်ဆိုခဲ့သည့် စာချုပ်
DVB သည် ချေးငွေ အရင်းနှင့်အတိုး အားလုံးကို ပြန်လည်ပေးဆပ်ခဲ့ပြီး ယနေ့အချိန်တွင် အမျိုးသားကြီးပွားတိုးတက်ရေးကုမ္ပဏီထံမှပင် ကျပ်သိန်း ၃၂၀ ရရန် ရှိသေးသည်ဟု DVB တာဝန်ရှိသူများက ဆိုသည်။ ယင်းငွေကြေးသည် DVB နှင့် အမျိုးသား ကြီးပွားတိုးတက်ရေးကုမ္ပဏီတို့အကြား ပြီးခဲ့သည့်နှစ် ဧပြီလက ချုပ်ဆိုထားသည့် ရုပ်သံထုတ်လွှင့်မှုဆိုင်ရာ သဘောတူစာချုပ်တစ်ခုမှ စခဲ့ခြင်းဟု DVB ဘက်က ဆိုသည်။

DVB ကထုတ်လွှင့်မည့် ‘တစ်ယောက်တစ်လက် (FIX IT)’ အမည်ရှိ ရုပ်သံအစီအစဉ်အတွက် ၂၀၁၈ ခုနှစ် ဧပြီလမှ စက်တင်ဘာလအထိ ထောက်ပံ့ရန် နှစ်ဖက်သဘောတူခဲ့ကြခြင်း ဖြစ်သည်။ Myanmar Now က DVB သတင်းဌာနထံမှ ရရှိခဲ့သည့် အဆိုပါ စပွန်ဆာသဘောတူညီချက်တွင် ခြောက်လကြာ ထုတ်လွှင့်မည့် ရုပ်သံအပိုင်း ၂၄ ပိုင်းအတွက် တစ်ပိုင်းလျှင် ကျပ်သိန်း ၂၀ နှုန်းဖြင့် သိန်း ၄၈၀ ထောက်ပံ့ရန် သဘောတူထားကြသည်။

သို့သော်လည်း ငွေကြေးအပြည့်အဝ မရရှိသေးဘဲ အမျိုးသားကြီးပွားတိုးတက်ရေးထံမှ ကျပ်သိန်း ၃၂၀ ရရန် ရှိသေးသည်ဟု DVB ဘက်က ဆိုသည်။ ၂၀၁၉ ဧပြီလတွင် ငွေပေးသွင်းရန် အမျိုးသားကြီးပွားတိုးတက်ရေးထံ စာပို့အကြောင်းကြားခဲ့ရာ “မိုးထိမိုးမိလုပ်ငန်းကြီး ပြန်လည်ဖွင့်သည့်အချိန်တွင် ပေးအပ်သွားမည်” ဟု ကြောင်းပြန်ခဲ့သည်ဟု ပြန်စာကို ကိုးကားပြီး DVB ဘက်က ဆိုသည်။

၁၉၉၂ ခုနှစ်တွင် စတင်တည်ထောင်ခဲ့သည့် DVB သတင်းဌာနသည် စစ်အစိုးရလက်ထက် လူ့အခွင့်အရေးချိုးဖောက်မှုများအကြောင်း အလေးပေး ဖော်ပြလေ့ရှိသည်။ မြန်မာနိုင်ငံအတွင်း တရားဝင်ရုံး မဖွင့်လှစ်နိုင်သည့် ကာလများတွင် နော်ဝေနိုင်ငံ အော်စလိုမြို့ နှင့် ထိုင်းနိုင်ငံ ချင်းမိုင်မြို့တို့မှတစ်ဆင့် ရုပ်သံနှင့်ရေဒီယိုအစီအစဉ်များ ထုတ်လွှင့်ခဲ့သည်။

၂၀၀၇ ရွှေဝါရောင်တော်လှန်ရေး၊ ၂၀၀၈ နာဂစ်မုန်တိုင်းနှင့် မြန်မာ-မြောက်ကိုရီးယား စစ်ရေးဆက်နွယ်မှု စသည့် လျှို့ဝှက်စုံစမ်းဖော်ထုတ်သည့် သတင်းများကြောင့် DVB သည် စစ်အစိုးရလက်ထက်တွင် မြန်မာနှင့် နိုင်ငံတကာ ပရိတ်သတ်များအကြား ဩဇာကြီးမားသော သတင်းဌာနတစ်ခု ဖြစ်လာခဲ့သည်။

DVB သတင်းဌာနသည် ဝန်ထမ်း ရာနှင့်ချီ ရှိပြီး နှစ်စဉ် လည်ပတ်သုံးစွဲမှု ပမာဏမှာ ဒေါ်လာသန်းနှင့်ချီ ရှိသည်ဟု သိရှိရသည်။

ကမ္ဘောဇဘဏ်နှင့်ဖြစ်သည့်အမှု

တစ်ချိန်က မိုးထိမိုးမိတောင်ပေါ်တွင် အသေးစားဘဏ်ခွဲ ဖွင့်ရန်အထိ အမျိုးသားကြီးပွားတိုးတက်ရေးနှင့် ကမ္ဘောဇဘဏ်တို့အကြား ဆက်ဆံရေး ကောင်းမွန်ခဲ့သော်လည်း နှစ်ဖက်အကြား ရန်ကုန်တိုင်းဒေသကြီးတရားလွှတ်တော်တွင် တရားမကြောင်းအရ တရားရင်ဆိုင်ရန် ရှိနေသည်။

ကမ္ဘောဇဘဏ်က အမျိုးသားကြီးပွားတိုးတက်ရေးကုမ္ပဏီကို ရန်ကုန်တိုင်းတရားလွှတ်တော်တွင် တရားမကြောင်းအရ တရားစွဲရန် ကြိုးစားလျက်ရှိကြောင်း ယင်းအမှုအတွက် အမျိုးသားကြီးပွားတိုးတက်ရေးဘက်မှ ရှေ့နေလိုက်ရန် ပြင်ဆင်နေသည့် ဦးသိန်းသန်းဦးက မေလအတွင်းက ပြောသည်။

အမှုသည် ဘဏ်ချေးငွေနှင့် ပတ်သက်ဖွယ်ရှိသော်လည်း အမှုအသေးစိတ်နှင့် ငွေကြေးပမာဏကိုတော့ သီးခြား အတည်မပြုနိုင်ပါ။

Myanmar Now က ရရှိထားသော အမျိုးသားကြီးပွားတိုးတက်ရေး ရွှေတူးဖော်ရေးအုပ်စုလီမိတက်၏ ၂၀၁၆ -၂၀၁၇ ဘဏ္ဍာနှစ် နှစ်ပတ်လည်အစီရင်ခံစာတွင် ကမ္ဘောဇဘဏ်ထံမှ ကျပ် ၁၀ ဘီလျံ (ကျပ်သန်းတစ်သောင်း) ချေးယူထားကြောင်း ဖော်ပြထားသည်။

ကမ္ဘောဇဘဏ်ဘက်ကတော့ အဆိုပါအမှုအတွက် ထင်မြင်ချက်မပေးဘဲ တရားစွဲရန် ကြိုးစားနေခြင်း ဟုတ်မဟုတ်ကိုပင် ထုတ်ပြောရန် ငြင်းဆန်သည်။


KBZ.JPG


အမျိုးသားကြီးပွားတိုးတက်ရေး ရွှေတူးဖော်ရေးအုပ်စုလီမိတက်၏ ၂၀၁၆ -၂၀၁၇ ဘဏ္ဍာနှစ် နှစ်ပတ်လည်အစီရင်ခံစာ
Myanmar Now က မိုးထိမိုးမိရွှေတွင်းနှင့်ပတ်သက်ပြီး အမျိုးသားကြီးပွားတိုးတက်ရေးထံ ပြီးခဲ့သည့် လများအတွင်းက အကြိမ်ကြိမ် ဆက်သွယ်ခဲ့သော်လည်း ပြန်လည်ဖြေကြားခဲ့ခြင်း မရှိပါ။

ဦးစိုးထွန်းရှိန်၏ အမျိုးသားကြီးပွားတိုးတက်ရေးကုမ္ပဏီသည် မန္တလေးတိုင်း၊ ရမည်းသင်းမြို့နယ်ရှိ ဧက ၆၀၀၀ ကျော်ရှိသော မိုးထိမိုးမိရွှေလုပ်ကွက်ကြီးတွင် နိုင်ငံတော်နှင့် စာချုပ်ချုပ်ပြီး လုပ်ကိုင်ခဲ့ရာ နိုင်ငံတော်အား သတ်မှတ်ရွှေပိဿာများ မပေးဆောင်မှု၊ တရားမဝင် ဆက်လက်ရွှေတူးဖော်မှု စသည့် စွပ်စွဲချက်များဖြင့် အစိုးရက ၎င်းနှင့် ၎င်း၏ကုမ္ပဏီ တာဝန်ရှိသူအချို့အား ရာဇဝတ်ပုဒ်မများဖြင့် အမှုဖွင့်ထားသည်။

ထောင်ဒဏ် ၁၀ နှစ်အထိ အမြင့်ဆုံးပြစ်ဒဏ်ထိုက်သော သတ္တုတွင်းဥပဒေ ပုဒ်မ ၃၀ (က)အပြင် ပြည်သူပိုင်ပစ္စည်းဖျက်ဆီးမှု ပုဒ်မ ၆(၁) တို့ဖြင့် အမှုဖွင့်ခံထားရသော ဦးစိုးထွန်းရှိန်သည် ထွက်ပြေးတိမ်းရှောင်လျက်ရှိပြီး ၎င်းကို တရားခံပြေးအဖြစ် မြန်မာနိုင်ငံရဲတပ်ဖွဲ့က ယခုနှစ်ဆန်းပိုင်းတွင် ကြေညာခဲ့သည်။

ထိုင်းနိုင်ငံတွင်နေထိုင်သည့် Myanmar Now ၏ သတင်းရင်းမြစ်တစ်ဦးက ဦးစိုးထွန်းရှိန်အား အောက်တိုဘာ ၁၄ နေ့လယ်ပိုင်းတွင် ထိုင်းနိုင်ငံ သုဝဏ္ဏဘူမိ အပြည်ပြည်ဆိုင်ရာလေဆိပ်တွင် တွေ့မြင်ခဲ့ရသည်ဟု ဆိုသည်။

ထိုသတင်း ထွက်ပေါ်လာပြီး နောက်ပိုင်းတွင် ဦးစိုးထွန်းရှိန်သည် မြန်မာ -ထိုင်း နယ်စပ် တာချီလိတ်မှတဆင့် ထိုင်းဘက်ခြမ်းသို့ ကားလမ်းဖြင့် ထွက်ပြေးသွားပြီဟု သမ္မတရုံး ပြောခွင့်ရအရာရှိက အောက်တိုဘာ ၂၅ တွင် အတည်ပြုခဲ့သည်။ ၎င်းအား ရှာဖွေရန် မြန်မာရဲအရာရှိများ ထိုင်းသို့ သွားမည်ဟုလည်း ဦးဇော်ဌေးက ဆိုသည်။

ဦးစိုးထွန်းရှိန်ကို ရှာဖွေဖမ်းဆီးမှု နောက်ဆုံးအခြေအနေများကို သိရှိရန် မြန်မာနိုင်ငံရဲတပ်ဖွဲ့ ပြောရေးဆိုခွင့်ရှိသူ ရဲမှူးကြီးမျိုးသူစိုးအား ဖုန်းဖြင့်ဆက်သွယ်သော်လည်း ၎င်း၏ဖုန်းမှာ စက်ပိတ်ထားသည်။