ကြယ်တာရာဝင်း - ကမ္ဘာမြေကြီး ပြန်လည်နေကောင်းတဲ့နေ့ရောက်တဲ့အခါ
KT# |
ကမ္ဘာမြေကြီး ပြန်လည်နေကောင်းတဲ့နေ့ရောက်တဲ့အခါ
ကြယ်တာရာဝင်း
(မိုးမခ) ဧပြီ ၃၀၊ ၂၀၂၀
တို့တွေမိသားစုလိုက် လမ်းလျှောက်ထွက်မယ်..
တသက်မခွဲကြေးဆိုတဲ့အပြုံးနဲ့ ပခုံးချင်းဖက်
လက်ချင်းမြဲမြဲ ဆုပ်ကိုင်ထားမယ်။
ကမ္ဘာမြေကြီး ပြန်လည်နေကောင်းတဲ့နေ့ရောက်တဲ့အခါ. .
ငယ်သူငယ်ချင်းတွေနဲ့ ခရီးထွက်မယ်
မိတ်ဆွေကောင်းတွေနဲ့ ပွေ့ဖက်မယ်..
မင်းဟာ ငါ့ရဲ့အကောင်းဆုံးသူငယ်ချင်းပါ ပဲ..လို့
မျက်ရည်တွေ ဘာတွေလည်း ဝဲလို့**
စိုင်းစိုင်းခမ်းလှိုင်ရဲ့ သီချင်းကို သံပြိုင်ဆိုကြမယ်။
ကမ္ဘာမြေကြီး ပြန်လည်နေကောင်းတဲ့နေ့ရောက်တဲ့အခါ. .
ကျေးဇူးရှင်တွေကို လက်ဆယ်ဖျာမိုးလို့
ကျန်းမာရေးစောင့်ရှောပေးသူတွေကို ပုခုံးပေါ်ထမ်းလို့
ရှေ့တန်းပြန်လာတဲ့ ဆရာဝန်၊သူနာပြုနဲ့စေတနာ့ဝန်ထမ်း
သူရဲကောင်းတွေကို လက်ခုပ်တီးလို့ တို့ဂုဏ်ပြုမယ်။
ကမ္ဘာမြေကြီးပြန်လည်နေကောင်းတဲ့ နေ့ရောက်တဲ့အခါ..
နောင်တတရားတွေကို ပြင်ဆင်မယ်..
လစ်ဟာမှုတွေကို ဖြည့်စွက်မယ်..
လူသားချင်း ချစ်ခင်လေးစားတတ်ဖို့
တို့ရင်သွေးငယ်တွေကို သွန်သင်ကြမယ်။
ကမ္ဘာမြေကြီး ပြန်လည်နေကောင်းတဲ့နေ့ရောက်တဲ့အခါ. .
အမှန်တရားကို ချစ်ခင်၊ သစ္စာတရားကို မြတ်နိုး
စာပေကိုတန်ဖိုးထားတတ်တဲ့ လူငယ်တွေရဲ့လက်နဲ့
ကမ္ဘာမြေသစ်ကို ချစ်စရာကဗျာတွေနဲ့ ရှေ့ဆက်
ငါတို့တွေ အခုထက်ပိုပြီး ချစ်ကြမယ်။
ကြယ်တာရာဝင်း
23.April.2020 (20:02)
(**စိုင်းစိုင်းခမ်းလှိုင်ရဲ့ သီချင်းစာသား)