ကိုတင်ထွန်းနိုင် - ပြန်လည်ပြင်ဆင်ရေးသမား
ပြန်လည်ပြင်ဆင်ရေးသမား
ကိုတင်ထွန်းနိုင်
(မိုးမခ) စက်တင်ဘာ ၅၊ ၂၀၂၀
လွဲနေတာလေးတွေပြန်စီဖို့
တောင်ကုန်းထိပ်ပေါ်တက်လိုက်ပြီ။
ရပ်နေဖို့လား သတ်သေမလို့လား
သချင်္ာတစ်ပုဒ်ကိုအစကပြန်တွက်ဖို့ စာမျက်နှာအသစ်ကိုဖွင့်
လေ့ကျင့်ထားတဲ့အစတွေ ဦးခေါင်းထဲကပြန်ထုတ်
လေတဟူးဟူးနဲ့တောင်ကုန်းက ပုံမှန်အတိုင်း။
ရှေ့ကိုတလှမ်းတိုးလိုက်ဖို့ ငါ့မှာသံသရာနဲ့ချီပြီးစဉ်းစားရ
နောက်ဖက်က ဒဏ်ရာတွေကို ဘယ်ခလုတ်နဲ့ပိတ်ပါ့မလဲ
ဘယ်လိုပဲဖြစ်ဖြစ်လေ လေတဟူးဟူးနဲ့တောင်ကုန်းပေါ်မှာ
ငါရယ် ငါ့အသက်ရှူသံရယ် တဖျတ်ဖျတ်လွင့်နေတဲ့ငါ့ဆံပင်တွေရယ်။
တိတ်ဆိတ်မှုငြိမ်သက်မှုတွေအားကြီးလွန်းလို့ ငါ့နားကိုပိတ်ထားရ
ခပ်လှမ်းလှမ်းလယ်ကွင်းတွေမှာ ခေတ်အဆက်ဆက်သိမ်းထုတ်ထားတဲ့ချွေးစက်တွေတဖိတ်ဖိတ်
ခုနေအခါမတော့ ရပ်နေမလား သတ်သေမလားဆိုတာလည်း
လေတဟူးဟူးနောက်
ငါ့ဆဲလ်တစ်ခုချင်းစီဟာလည်းလေတဟူးဟူးနောက်
လွဲနေတာလေးတွေတော့တည့်ကုန်ပြီ တောင်ကုန်းထိပ်ပေါ်မှာ။ ။
Posts
