မိုးမခကဗျာ - ညိမ်းအေးသာ၊ ကျော်ဇင်ငထင်
မိုးမခကဗျာ
(မိုးမခ) သြဂုတ် ၂၄၊ ၂၀၂၁
" ရာဇဝင်တွင်မယ့် အမှိုက်’’
ညိမ်းအေးသာ
အစထဲက မရှိထိုက်တဲ့ အမှိုက်ပါ။
အမှိုက်ကို အမှိုက်မှန်းသိလျက်
မပစ်ဘဲထားတာ
ခင်ဗျားတို့လည်း မှားတယ်။
အမှိုက်အမှားလေးမို့ သည်းခံနေမိကြပါသတဲ့။
အမှိုက်က သူ့ကိုယ်သူ
အမှိုက်ဖြစ်နေတာ ခုထိမသိဘူး
အမှိုက်ရေးခဲ့တဲ့ အမှိုက်ရဲ့သမိုင်းတော့
လူတိုင်းဖတ်ပြီးသွားပြီ။
အမှိုက်က မဏ္ဍပ်တိုင်တက်ပြတယ်။
အပေါ်ရောက်လေ အနံ့ကထွက်လေ
အမှိုက်ဟာ တီဗီစတားဖြစ်မလားလို့
အမှိုက်စကားလည်း မကြာမကြာပြော။
အမှိုက်နားနီးအမှိုက်
အမှိုက်ရဲ့နောက်လိုက်တွေနဲ့
အမှိုက်တွေ ရွှေလိုပြောင်ချင်လို့
ပြဿဒ်အထိ ချုပ်ကိုင်ပစ်ရေး
ဟစ်ကြွေးနေလည်း
အမှိုက်က အမှိုက်ပါပဲ။
အမှိုက်ဆိုတာ တခါတုန်းကလည်းအမှိုက်
အခုလည်းအမှိုက်
နောင်လည်းအမှိုက်ဘဝနဲ့
အမှိုက်ဇာတ်သိမ်းသွားမှာ။
ပတ္တမြားမှန်ရင် နွံမနစ်ပေမယ့်
အမှိုက်ဆိုတာ ကမ္ဘာတည်သရွေ့
ဆိုးရွားညစ်ပေ
ဆယ်ပြန်ဆယ်ကုဋေ
ရွှေမဖြစ်တဲ့ အမှိုက်အစစ်တွေ။ ။
...
'' စစ်အေးခေတ်ထဲကရေနည်းငါးများ ''
ကျော်ဇင်ငထင်
ဘောင်းဘီချွတ်တွေဟာ
တိုက်ပုံဝတ်ပြီး
တောနက်ထဲ
သတ်ဖြတ်စားသောက်နေကြတယ်
လသားကလေးငယ်တွေဟာ
သူတို့ပါလာတဲ့သတင်းစာ စက္ကူတွေခေါက်ခေါက်ပြီး
မြစ်ထဲမှာ စက္ကူလှေလေးတွေမျှော
UNHCR ဟာ အဲ့ဒီမြစ်ထဲမှာပဲ ငါးမျှားရင်း
ဖန်ငွေလေးတွေ ချိတ်ချိတ်ဆွဲပြ
စက္ကူလှေလေးတွေကို သူတို့ စာနာဝမ်းနည်းနေကြကြောင်း
စားနေကျအိမ်နီးချင်းကြောင်ဖားကြီးနဲ့
ပိုလာဝက်ဝံကြီးတွေဆီက တဆင့်
သတင်းလှမ်း ပေါက်နေတယ်..
ဧပရယ် ဝမ်းတူးသရီး အသံကောင်းလား
ရထားပါ အဘ ရထားပါ ။
ချောင်းဆိုးအမောဖောက်နေတဲ့လူဝံကြီးဟာ
သူ့ကျင်းသူတူးပြီး
ငရဲလမ်းကိုဆက်ဖောက်နေတယ်
သူတော်စင်တွေနေတဲ့ တိုင်းပြည်ဟာ
ခုတော့ ပြည့်တန်ဆာတွေတောင်
ဈေးဦးမပေါက်ဘူး
ငါ့ရှင်တို့ ကတုံးတုံးကြ ပရိတ်ရွတ်ကြ....
လေဒဏ်မိုးဒဏ်ခံနိုင်အောင်
စစ်သည်လေးသိန်းဟာ ခေါင်းပြောင်တွေတုံးပြီး
စစ်ဘီလူးကိုခစားနေလိုက်တာများ
အာနန္ဒာတောင် ငိုရမယ့်ပုံမျိုး
ဂန်းစာသရဏံ ခေါင်းကိုထိ ။
တချို့ အိပ်မက်တွေဟာ
အဲ့သွေးမြစ်ထဲမှာ ကူးလူးနေကြတာ
ခြေပြတ်လက်ပြတ် ခြေတုလက်တုတွေ
ပညာရှင်ဆန်ဆန် ဂုဏ်သိက္ခာရှိရှိ ကယ်တင်တတ်တဲ့
ကမ္ဘာ့ရွာကြီးကို ဒုက္ခသည်တွေက ဖျော်ဖြေနေတာမျိုး
လူဖြူတွေစာအုပ်စင်ထဲက ကိုယ်ချင်းစာတရားကို
ထိုင်ထိုင်ရယ်နေရတာ နှစ်ပေါင်း ခုနှစ်ဆယ်
ဟာသပဲ ငါ့လူတို့
ရီပစ်စမ်းပါ
ငါတို့ဟာ အိပ်မက်ရထားပေါ်တက်နေတာမဟုတ်ဘူး
လည်ချောင်းသွေးဖောက်ပြီး
ကိုယ့်အနာဂတ်ကို သွေးခင်းလျှောက်တာ
သက်သေပြစရာမလိုတော့ဘူး ။
ရှေ့မှာ ...
ငါတို့ဘူတာရုံကို မြင်နေရပြီ
ရေဒီယိုကို ဖွင့်ထား ။ ။
-
t.me@moemaka
#MoeMaKaMedia
#WhatsHappeningInMyanmar
.png)
Posts
