မိုးမခအက်ဆေး - ဆာသော်ဒိုး 'ရွှေဥသြက တွန်သံသာ"
ဆာသော်ဒိုး
(မိုးမခ) သြဂုတ် ၂၄၊ ၂၀၂၁
မိုးကား သည်းလျက်။ လေပါ ပါလေ၏။
" မိုးနှင့် လေနှင့် နှစ်ပါးဆိုင်၊ သိကြားကိုယ်တိုင် မမယ့်ယောက်ျား..." ဆိုတာကို ဘာမဆိုင်ညာမဆိုင် သွားပြီး သတိရမိသည်။
နွေဦးပေါက်ကတည်းက ရောက်ရှိခိုနားရှင်သန်အားမွေးခဲ့ရာ ရွာစဉ်ရွာဆက်များထဲမှယခုရွာကလေးမှာ အခြားရွာများထက် ပိုသာ၍ ရက်စွဲတွေများခဲ့ပြီ ဖြစ်၏။ သူငယ်ချင်းများမိတ်ဆွေများနှင့် မိုင်ရာချီဝေးသည့်အရပ်ဒေသမှာ မိတ်သစ်ဆွေသစ်များ တိုးပွားလျက် ရှိပါ၏။
ယာတဲအတွင်းပေါက်နေသော အင်ဖက်အမိုးကြားမှနေ၍ အေးစက်သော မိုးပေါက်တို့ခုန်ဆင်းလာကာ လူကို ကြည်စယ်နေလေ၏။
မိုးနှင့်လေကား တူပြိုင်ဂူလှိုင် နှစ်ပါးသွားလျက်။
ယာတဲအတွင်း ဝါးထရံမှ ၂၀၂၁ ပြက္ခဒိန်ကို အကြည့်ရောက်တော့ သြဂတ်စ်လတောင်ကုန်တော့မည်ကို တွေ့ရ၏။ မိုးသံလေသံတွေကြားထဲမှာ ပီပီသသပေါ်ထွက်နေတာကတော့ " ဥသြ . . . ဥသြ . . . ဥသြ " ဆိုသည့် နားဝင် ချိုဖွယ်ရာ အသံလေးများသာတည်း။
တစ်ကောင်ထဲမဟုတ်။ လေးငါးဆယ်ကောင်။ လေးငါးဆယ်နေရာ လေးငါးဆယ်ပင်ပေါ်မှ မိုးရေချိုးရင်း မြည်တမ်းနေတာ ဖြစ်၏။
ရုတ်တရက် သတိရမိလိုက်တာကတော့ " နွေဦးချိန်ခါ " မဟုတ်တာကိုပဲ ဖြစ်၏။ ငယ်ငယ်တုန်းက " ရွှေဥသြက တွန်သံသာ၊ နွေဦးရောက်တော့မှာ " ဟူသည့်ကဗျာပိုဒ်ကလေးကို သတိရမိသွား၏။ အခုက မိုးတွင်းကာလစစ်စစ်ကြီး။ သည်အချိန်အထိ "ဥသြသံ" ကိုကြားနေရတုန်း။ ဥသြငှက်ကလေးတွေ အော်မြည်နေကြတုန်း။
ရာသီဓလေ့အရ "ဥသြ" တွေဟာ "နွေဦး" ကို ကြိုဆိုကာ အော်မြည်ကြတာပဲ ဖြစ်၏။ ဥသြလေးတွေ၏ သံပြိုင်တေးနှင့်ကြိုဆိုပြီးမှ အနှီ " နွေဦးစစ်စစ် " ကို ရောက်တာပဲ ဖြစ်၏။
ငယ်ဘဝကတည်းက ဖတ်လာမှတ်လာခဲ့ရသည့် စာတွေကဗျာတွေ ပန်းချီပုံတွေထဲမှာတော့ ဥသြငှက်ရယ် အရွက်တွေ ပင်လုံးကြွေနေသည့် ရိုးတံပြိုင်းပြို င်း သစ်ခြောက်ပင်ရယ်ပူပြင်းလှသည့် နေမင်းရောင်ခြည်ရယ် အနီပေါ်က ကြယ်ဖြူတစ်ပွင့်ရယ်ကို လှပအောင်ပေါင်းစပ်ပြီး ဖန်တီးရေးဖွဲ့ခဲ့ကြတာကလား။
အခုတော့ မိုးကသည်းသည်းမည်းမည်း၊ စိုစိုစွတ်စွတ်အပင်တွေပေါ်မှာ သစ်ရွက်စိမ်းစိမ်းဝတ်စုံတွေက ဖား ဖားလျားလျား၊ နေရောင်ခြည် လုံးဝဥဿုံ ကင်းပျောက်နေသည့် ရွှဲရွှဲစိုစိုကာလကြီးမှာ "ဥသြသံတွေ" ကို မပြတ်မလပ် နားဆင်ခံစားခွင့်ရနေတာသည်ကား တကယ့်ပဲကို ထူးခြားလှပါပေ၏။
ပြက္ခဒိန်ထဲက နေ့တွေ ညတွေ ရက်တွေ လတွေ နှစ်အပိုင်းအခြားတွေကား သပ်သပ်ဖြစ်ကာလက်ရှိ ပြင်ပကမ္ဘာကား သီးခြားဖြစ်ပုံရပါ၏။
မိတ်ဆွေကြီး စောတယ်ဆေး "မျှ" ခဲ့သည့်ချေသားအပိုင်းထဲမှတမျှောင်းလှီးပြီး ယာတဲအတွင်းရှိထင်းမီးဖိုမှာကင်ကာ လှည့်လှည့်ပေးနေရင်း၊ ရေနွေးပူပူကို မှုတ်ကာမှုတ်ကာသောက်နေရင်း၊ မိုးရေတွေရွှဲရွှဲစိုနစ်နေသည့် စိမ်းရင့်မှောင်မှောင် တောင်တန်းကြီးများကို လှမ်းကြည့်ကာ မျှော်ငေးနေရင်း၊ "နွေဦး" ကို ကြိုဆိုနေသည့် ဥသြကလေးများ၏သံပြိုင်တေးသံကိုနားဆင်နေရင်း နှလုံးသားထဲသို့ အလွမ်းစုံပေါင်းစပ်ထားသည့် အလွမ်းတပ်ပေါင်းစုကြီး တွားတက်၍ ချီတက်ဝင်ရောက်လာတာကို ခံစားရပါလေတော့၏။
ဘာပဲဖြစ်ဖြစ် ဥသြကလေးတွေကား "နွေဦး" ကို အရောက်လာဖို့ ခေါ်နေကြဆဲ။ မိုးရေစိုစို မိုးရေရွှဲရွှဲ သစ်ပင်ကြီးတွေ၏ သစ်ကိုင်းသစ်ခက်သစ်ရွက်တွေကြားမှာ ပုန်းခိုနားနေရင်း တမ်းတမ်းတတ တစာစာ ခေါ်ကာ ခေါ်ကာ မျှော်နေကြဆဲ။
" "နွေဦး" ကား ရောက်လာမည်မှာ မလွဲဧကန်ပါ "
ဟု ယုံကြည်သည့်စိတ်ဓာတ်တွေ ခိုင်ခိုင်မာမာရှိနေသူတွေထံသို့ " နွေဦး " ဟာ အမှန်တကယ်ကို ရောက်ရှိလာတော့မှာကား ယုံမှတ်မှားစရာမလိုပါ ။ ။
ဆာသော်ဒိုး
21-8-21(Sat) 12:30 Pm
t.me@moemaka
#MoeMaKaMedia
#WhatsHappeningInMyanmar
.png)
Posts
