မောင်မောင်စိုး - မြန်မာ-တရုတ်ဆက်ဆံရေးနှင့် မြန်မာ့အရေး (၂)
(မိုးမခ) အောက်တိုဘာ ၃၊ ၂၀၂၁
မြန်မာတရုတ်ဆက်ဆံရေး ဒုတိယပိုင်း
၁၉၆၀ စုနှစ်ကာလများတွင် တရုတ်ပြည်တွင်းနိုင်ငံရေးသည် မုန်တိုင်းထန်သည့်ကာလဖြစ်သည်။ အနောက်အုပ်စု၏ ဖယ်ကျဉ်ခြင်းခံရသည့်အပြင် ကွန်မြူနစ်မဟာမိတ်ဖြစ်သည့် ရုရှားနှင့်သဘောထားကွဲလွဲသည်။ တရုတ်ပြည်တွင်း၌ စီးပွါးရေးအကြပ်အတည်းများကြုံရသည်။ ထိုအခြေအနေအောက်တွင် တရုတ်ကွန်မြူနစ်ပါတီတွင်းအယူအဆကွဲ ပြားမှု များပြားပြီး ပါတီတွင်းတိုက်ပွဲပြင်းထန်သည်။ ဖေါက်ပြန်ရေးသမားများ၊ လက်ျာအချောင်သမားများဟုသတ်မှတ်ထားသူများကို ပါတီတွင်း၌ ပြင်းပြင်ထန်ထန်တိုက်ပွဲဆင်သည့်ကာလဖြစ်သည်။ ထိုတိုက်ပွဲသည် ပါတီတွင်း၌ တိုးတိုးတိတ်တိတ်ဖြစ်သော တိုက်ပွဲမဟုတ်၊ တပြည်လုံးအနှံ့ဖြန့်ကျက်သွားပြီး ယဉ်ကျေးမှုတော်လှန်ရေးဟုခေါ်သော လှုပ်ရှားမှုကြီး ၁၉၆၆ တွင် ဖြစ်ပွါးသည်။တပ်နီလူငယ်များ၏ တပြည်လုံးအနှံ့လှုပ်ရှားမှုကို တွေ့မြင်ရသည်။ ထိုလှုပ်ရှားမှုတွင် တရုတ်ကွန်မြူနစ်ပါတီ၏ နိုင်ငံတကာမူဝါဒအား ကျယ်ကျယ်လောင်လောင်ဖေါ်ထုတ်လာသည်။ ၎င်းမှာ နိုင်ငံတကာ ပစ္စည်းမဲ့များနှင့်အဖိနှိပ်ခံပြည်သူများ သွေးစည်းကြဟူသည့်ကြွေးကြော်သံဖြစ်သည်။ ထိုကြွေးကြော်သံသည် ကွန်မြူနစ်တို့၏ ယေဘုယျကြွေးကြော်သံဖြစ်၍ မထူးဆန်းဟုဆိုနိုင်သည်။ သို့သော် ထိုအချိန်ကာလက တရုတ်ပါတီ၏ထုတ်ပြန်ချက်သည် သူတို့၏အခြေအနေနှင့်လည်း သက်ဆိုင်သည်။ ထိုကာလက အမေရိကန်နှင့် အနောက်နိုင်ငံများက တရုတ်ပြည်အား ကမ္ဘာ့ကုလသမဂ္ဂတွင် ပါဝင်ခွင့် ငြင်းပယ်ထားပြီးအထီးကျန်ဖြစ်အောင် ပိတ်ဆို့ထားသည့်ကာလဖြစ်သည်။ တရုတ်တို့ အယူဝါဒရေးရာ မဟာမိတ်ဖြစ်သည် ရုရှားနှင့် သဘောတရားရေးအရ ပြင်းပြင်းထန်ထန်ကွဲလွဲတိုက်ခိုက်နေသည့်ကာလဖြစ်သည်။ သို့ဖြစ်ရာ တရုတ်တို့အနေနှင့်သူ့အား ထောက်ခံသည့်အင်အားစုများကိုစည်းရုံးသိမ်းသွင်းရန်၊ နိုင်ငံတကာတွင် သူအင်အားစုကိုစုစည်းရန်အတွက် လက်တွေ့ခြေလှမ်းလှမ်းရန် ကြံရွယ်ခဲ့သည့် ကြွေးကြော်သံလည်းဖြစ်ခဲ့သည်။ ထိုကြွေးကြော်သံသည် ပြည်ပနိုင်ငံများရှိ ပင်လယ်ရပ်ခြားတရုတ်အမျိုးသားများအသိုင်းအဝိုင်းသို့လည်း ပျံ့နှံ့သွားသည်။ ထို့ပြင် တရုတ်ကွန် မြူနစ်နှင့် အဆက်အဆံရှိသော တရုတ်ကွန်မြူနစ်ပါတီ၏အောင်ပွဲကို အားကျသော အာရှ၊ အာဖရိက၊ လက်တင်အမေရိကရှိ ကွန်မြူနစ်ပါတီ၊ အလုပ်သမားပါတီ၊ လက်ဝဲပါတီ၊ ဒီမိုကရက်တစ်ပါတီများသို့ပါ ဩဇာသက်ရောက်သွားသည်။ ထိုကာလအား အရှေ့လေတိုက်နေသောကာလ၊ အရှေ့လေအားကောင်းသောကာလဟု ဆိုကြသည်။
ဤအရှေ့လေသည် မြန်မာပြည်သို့ပါရောက်လာသည်။ ထိုကာလတွင် မြန်မာပြည်တွင်း၌ ဗမာပြည်ကွန်မြူနစ်ပါတီသည် မြန်မာအစိုးရ၏ အဓိကရန်သူဖြစ်နေသည်။ မြန်မာပြည်တွင်း၌လည်း လက်ဝဲလေထု အတော်အတန်အားကောင်းသည်။ ထိုအချိန်တွင် မြန်မာပြည်တွင်း၌ မြန်မာ တရုတ် အဓိကရုဏ်း (၁၉၆၇) ဖြစ်ပွါးသည်။ ပင်လယ်ရပ်ခြား တရုတ်နွယ်ဖွါးကျောင်းသားများအလွန်ဟု တဖက်ကဆိုကြသကဲ့သို့ တဖက်ကလည်း မြန်မာပြည် ပြည်တွင်းဆန်ပြသနာကြောင့်ဖြစ်ပေါ်နေသည့် လူထုမကြေနပ်မှုအား လမ်းလွှဲရန် အစိုးရက လူမျိုးရေးအဓိကရုဏ်းဖန်တီးခြင်းဖြစ်သည်ဟု ဆိုကြသည်။ သေချာသည်ကတော့ တရုတ်သံရုံးတွင်းရှိ တရုတ်သံအဖွဲ့ဝင်တဦးအား ပြင်ပကကျူးကျော်ဝင်ရောက်သတ်ဖြတ်ခြင်းအပါအဝင် လူသေဆုံးမှုများ၊ မီးလောင်ဆုံးရှုံးခြင်းများ အများအပြားဖြစ်ပွါးသည့် အနီးခေတ် မြန်မာ တရုတ်အဓိကရုဏ်းကြီးဖြစ်ပွါးသည်။ တဆက်တည်းတွင် မြန်မာအစိုးရတာဝန်ရှိသူများက တရားမဝင်ကွပ်ကဲသည့် တရုတ်ကွန်မြူနစ်ပါတီဆန့်ကျင်ရေး၊ ဗမာပြည်ကွန်မြူနစ်ပါတီဆန့်ကျင်ရေး၊ တရုတ်ဆန့်ကျင်ရေးလှုပ် ရှားများ မြန်မာပြည်အနှံ့ဖြစ်ပွါးခဲ့သည်။ မော်စီတုန်းနှင့် သခင်သန်းထွန်းသည် တရုတ်ဆန့်ကျင်ရေးလှုပ်ရှားမှု၏ ပစ်မှတ်ဖြစ်ခဲ့သည်။ မြန်မာအစိုးရပိုင်သတင်းစာ၊ အသံလွှင့်ဌာနများများမှလည်း တရုတ်ဆန့်ကျင်ရေး တွင်တွင်ပြော၍ လှုံ့ဆော်ခဲ့သည်။ တရုတ်တို့ ဘေကျင်း (ပီကင်း) အသံလွှင့်ဌာနကလည်း မြန်မာအစိုးရအား အတိအလင်းဗြောင်ကျကျတိုက်ခိုက်ခဲ့သည်။ ထိုစဉ်ကာလ ဘေကျင်းအသံလွှင့်ဌာနအားဖွင့်လိုက်ပါက "ထလော့ အငတ်ဘေးကျရောက်သူတို့တတွေ၊ ထလော့ ကမ္ဘာတဝှမ်းက ကျေးကျွန်တွေ" ဟုအစချီသည့် အင်တာနေရှင်နယ် သီချင်းသံကို ကြားရမည်။ ပြီးလျင် "နေဝင်း၊ စန်းယု စစ်အစိုးရ" ဟု အစချီသည့် တရုတ်မလေးတယောက်၏ ခပ်စွာစွာမြန်မာစကားပြောအသံကို ကြားရမည်ဖြစ်သည်။ ထိုကာလသည် ဆယ်စုနှစ်တစုကျော်ကြာမြင့်ခဲ့သည်။
တရုတ်ကွန်မြူနစ်ပါတီ၏ ယဉ်ကျေးမှုတော်လှန်ရေး အယူအဆကြောင့်သော်၎င်း၊ မြန်မာ တရုတ်အဓိကရုန်းကြောင့်သော်၎င်း၊ ကမ္ဘာ့ကုလသမဂ္ဂတွင် ဖယ်ကျဉ်ထားခြင်းခံထားရသည့် တရုတ်အတွက် ရနိုင်သမျှ သူ့အားထောက်ခံသည့် အင်အားများကို စုစည်းခြင်းကြောင့်သော်၎င်း ၁၉၆၇ မှစ၍ ဗမာပြည်ကွန်မြူနစ်ပါတီအား လက်နက်ခဲယမ်းနှင့်တကွ လိုအပ်သည်အားလုံးကို ဖြည့်ဆည်းပေးပြီး မြန်မာအစိုးရအား နယ်စပ်ဒေသတလျောက် လက်နက်ကိုင်တိုက်ခိုက်နိုင်ရန် တရုတ်တို့က ပံ့ပိုးကူညီခဲ့သည်။ အချိန်တို သုံးလေးနှစ်အတွင်းအတွင်း နမ့်ခမ်း၊ မူစယ်ဒေသမှသည် ကျိုင်းတုံ၊ တာချီလိတ်အထိ တရုတ်မြန်မာနယ်စပ်တလျောက်နှင့် ကချင်ပြည်နယ်အရှေ့မြောက်နယ်စပ်ဒေသတွင် ဗမာပြည်ကွန်မြူနစ်ပါတီက အခြေခံစခန်းတည်ဆောက်ခါ မြန်မာအစိုးရအား ကြီးမားသည့်စစ်မျက်နှာ ဖွင့်လှစ်နိုင်ခဲ့သည်။ မြန်မာအစိုးရ၏ အဓိကတပ်များဖြစ်သည့် တပ်မ ၉၉/ ၈၈/၇၇ စသည့် တပ်မ ၃ ခုနှင့် ကွန်မြူနစ်တပ်များအား ရင်ဆိုင်ထားခဲ့ရသည်။ ပြင်းထန်သော တိုက်ပွဲကြီးများဖြစ်ပွါးခဲ့သည်။ ဗမာပြည်ကွန်မြူနစ်ပါတီသည် နယ်စပ်ဒေသတလျောက် အခြေခံစခန်းများ တည်ဆောက်နိုင်ခဲ့သည်။ မြန်မာနှင့်တရုတ်အစိုးရချင်းဆက်ဆံရေးသည် ပိုမိုဆိုးဝါးသည့် အခြေအနေသို့ဆိုက်ရောက်ခဲ့သည်။
ထိုကာလသည် ၁၉၆၆ ခုနှစ်မှ ၁၉၇၆ အထိ ၁၀ နှစ်ကျော်မျှကြာမြင့်ခဲ့သည်။ ရန်ကုန်ရှိတရုတ်သံရုံးဧည့်ခံပွဲများတွင် အစိုးရအရာရှိများကို မတွေ့ရ။ လက်ဝဲသမားများ၊ ဒီမိုကရက်များသာ တွေ့နိုင်ကာလဖြစ်သည်။ မော်စီတုန်း၏ ဩဝါဒ၊ မော်စီတုန်း၏ လက်ရွေးစင်ကျမ်းများကို တရုတ်သံရုံးတွင် ရရှိနိုင်သည်။ တရုတ်သံရုံးက ကွန်မြူနစ်ဝါဒအတွေး အခေါ် ၊သဘောတရားများကို ဗြောင်အတိအလင်းဖြန့်ဖြူးသည်။ နယ်စပ်တွင်လည်း ဗမာပြည်ကွန်မြူနစ်ပါတီအား အကူအညီပေးသည်။ မြန်မာ တရုတ် အဓိကရုဏ်းကာလထဲက မြန်မာပြည်အား အစိုးရချင်း ပေးနေသောအကူအညီအားလုံးရပ်ဆိုင်းသွားသည်။ မြန်မာတရုတ်အစိုးရချင်းဆက်ဆံရေး အဆိုးဝါးဆုံးကာလဖြစ်သည်။ အစိုးရချင်းဆက်ဆံရေး အေးခဲသောကာလဟု ဆိုရမည်။
တရုတ်တို့၏အပြောင်းအလဲ ပထမအဆင့် မော်စီတုန်းကွယ်လွန်ပြီး တိန့်ရှောက်ဖင် ပြန်လည်အာဏာရရှိပြီးနောက် တရုတ်တို့ အပြောင်းအလဲစတင်သည်။ အစောပိုင်းက တဖြေးဖြေးစတင်သော်လည်း ၁၉၈၀ ခန့်မှစ၍ အရှိန်ဟုန့်ပြင်းပြင်းနှင့်ပြောင်းလဲသည်။ ၁၉၈၀ မှစ၍ တရုတ်တို့သည် နိုင်ငံတကာ ကွန်မြူနစ်ပါတီများအား ကူညီထောက်ပံ့ခြင်းအား တဖြေးဖြေးချင်းလျော့ချရပ်ဆိုင်းသည်။ အစိုးရချင်း ဆက်ဆံရေး၊ ကုန်သွယ်ရေးကို တိုးချဲ့သည်။ ယဉ်ကျေးမှုတော်လှန်ရေးကာလက ကြွေးကြော်ခဲ့သည့် နိုင်ငံတကာပစ္စည်းမဲ့များသွေးစည်းကြဆိုသည့် အသံတဖြေးဖြေးမှေးမှိန်သွားပြီး ကမ္ဘာ့ပြည်သူများသွေးစည်းကြဟူ၍ ဖြစ်လာသည်။ မြန်မာ တရုတ် နှစ်နိုင်ငံပြည်သူများ ချစ်ကြည်ရေးဆိုသည်က ရှေ့တန်းရောက်လာသည်။ တိန့်ရှောက်ဖိန်၏ "ချမ်းသာတာ မင်္ဂလာပါ" "ကြောင်ဖြူဖြစ်ဖြစ် ကြောင်မဲဖြစ်ဖြစ် ကြွက်ခုတ်နိုင်ရင် လိမ္မာတာဘဲ" ဟူသည့် စကားသံများလွှမ်းမိုးလာသည်။
ဤကာလတွင် တရုတ်နှင့် မြန်မာအစိုးရ ဆက်ဆံရေးလည်း ပြန်လည်အစပြုသည်။ ဗမာပြည်ကွန်မြူနစ်ပါတီအား အကူအညီများ စတင်လျှော့ချသည်။ ၁၉၈၀/၈၁ ခန့်တွင်ဗိုလ်နေဝင်း တရုတ်ပြည်သို့ အလည်အပတ်ခရီးသွားသည်။ တရုတ်တို့က မြန်မာအစိုးရနှင့် ဗမာပြည်ကွန်မြူနစ်ပါတီ အတိုက်အခိုက်ရပ်ပြီး တွေ့ဆုံဆွေးနွေးအဖြေရှာရန်တိုက်တွန်းသည်။ မြန်မာပြည်ရှိ ဆန့်ကျင်ဖက်နိုင်ငံရေးအင်အားစုများအား တွေ့ဆုံဆွေးနွေးအဖြေရှာရန် တရုတ်တို့က ပထမဆုံးတိုက်တွန်းသည့်အကြိမ်ဖြစ်သည်။ တရုတ်တို့၏ တိုက်တွန်းသဖြင့် ဆွေးနွေးပွဲဖြစ်မြောက်ခဲ့သော်လည်း အောင်မြင်ခြင်းမရှိခဲ့ပါ။ သို့သော် လည်း မြန်မာအစိုးရက မြန်မာပိုင်နက် နယ်မြေအများစုအား တည်ငြိမ်အောင်ထိမ်းချုပ်နိုင်သည့်အခြေ အနေအောက်တွင် တရုတ်တို့က မြန်မာအစိုးရနှင့် အစိုးရချင်းဆက်ဆံရေးကိုတိုးမြှင့်သည်။ မူစယ်-၁၀၅ မိုင် နယ်စပ်ကုန်သွယ်ရေးလမ်းကြောင်းအား ထိပါးနိုင်သည့် ဗမာပြည်ကွန်မြူနစ်ပါတီထိမ်းချုပ်ရာ ရွှေကျင်ဝမ်-တာပန် (စီစီဝမ်-တာပန်) တောင်ကြောနှင့် မုန်းပေါ်ဒေသအားမြန်မာအစိုးရတပ်များက ထိုးစစ်ဆင်သိမ်းပိုက်ရာတွင် တရုတ်တို့နှင့်ညှိနှိုင်းမှုများရှိခဲ့သည်ဆိုသည့်သတင်းများထွက်ပေါ်ခဲ့သကဲ့သို့ ဗမာပြည်ကွန်မြူနစ်ပါတီတပ်များ ထိုဒေသမှဆုတ်ခွါပေးရန် တရုတ်တို့သွယ်ဝိုက်ဖိအားပေးမှုများရှိခဲ့သည်။ ထို့ နောက် နယ်စပ်ကုန်သွယ်ရေးအပါ နှစ်နိုင်ငံကုန်သွယ်ရေးကို မြှင့်တင်ရန် တရုတ်တို့ တောက်လျောက်ကြိုးစားခဲ့ရာ ထိုမှစ၍ မြန်မာတရုတ် နှစ်နိုင်ငံကုန်သွယ်မှုသည် တဖြေးဖြေးမြင့်တက်လာခဲ့တော့သည်။
ဆက်လက်ဖေါ်ပြပါမည်။
မောင်မောင်စိုး
t.me@moemaka
#MoeMaKaMedia
#WhatsHappeningInMyanmar
Posts
