မိုးမခကဗျာ - ခင်လွန်း " တိုက်ပွဲထဲကလာတဲ့ကဗျာ"
မိုးမခကဗျာ
အောက်တိုဘာ ၄၊ ၂၀၂၁
-
" တိုက်ပွဲထဲကလာတဲ့ကဗျာ"
ခင်လွန်း
တောထဲကလာတဲ့
ကဗျာဖြစ်တယ်
တောင်ပေါ်ကလာတဲ့
ကဗျာဖြစ်တယ်
တိုက်ပွဲထဲကနေ
ကဗျာကို ရေးပို့လိုက်တယ်
ယမ်းနံ့သင်းလို့
ပစ်မှတ်ဆီ ပစ်ခွင်းလိုက်တဲ့ကဗျာတွေ
ရန်သူတွေ အပြိုပြိုအလဲလဲ
စစ်မိစ္ဆာတွေ တပ်လုံးပြုတ်ပဲ
ကဗျာဆရာကိုယ်တိုင်ဟာ
စစ်ပွဲထဲမှာ သေနတ်ပြောင်းကို
ကလောင်လုပ်ပြီး ရေးတော့တာပဲ
ငါ အဲဒီကဗျာတွေဖတ်ရတာ
အောင်ပွဲဆီ တက်လှမ်းနေသလိုပဲ
မင်းကပြောပါရဲ့
ကဗျာတွေသွေးစွန်းနေခဲ့ရင်
တရားမျှတလွတ်လပ်ခြင်းအတွက်
တိုက်ပွဲဝင်ကဗျာအဖြစ်
ခေတ်ဆိုးကြီးကတောင်းဆိုရာအတိုင်း
ရေးသားလိုက်ရတာဖြစ်လို့ပါ... တဲ့
မြို့ပြမှာ ကဗျာနဲ့တိုက်ပွဲဝင်ခဲ့သူက ဆိုတယ်
မြို့ပြကလာတဲ့ကဗျာ
တောထဲကလာတဲ့ကဗျာ
တောင်ပေါ်ကလာတဲ့ကဗျာ
ကတုတ်ကျင်းထဲကလာတဲ့ကဗျာ
တိုက်ပွဲထဲ သေနတ်ပြောင်းဝက ထွက်ကျလာတဲ့ကဗျာ
ကဗျာဆရာဟာ တော်လှန်ရေးသမားဖြစ်တယ်
ကဗျာဟာ တော်လှန်ရေးဖြစ်တယ်
ကဗျာဟာ စာရွက်ပေါ်
ဖုန်းမျက်နှာပြင်ပေါ်ကနေ
စစ်မြေပြင်ပေါ် တိုက်ပွဲဝင်ခဲ့ပြီ။ ။
အောက်တိုဘာ ၃၊ ၂၀၂၁
၀၈:၂၀ နာရီ
-
t.me@moemaka
#MoeMaKaMedia
#WhatsHappeningInMyanmar
Posts
