မိုးမခအနုပညာရေးရာ - သန်းထိုက်(မြန်မာစာ) '' ချစ်သော ဆရာ ကြီး (ဆရာ ကြီးမြင့်စော) ''
မိုးမခအနုပညာရေးရာ
အောက်တိုဘာ ၄၊ ၂၀၂၁
'' ချစ်သော ဆရာ ကြီး (ဆရာ ကြီးမြင့်စော) ''
သန်းထိုက်(မြန်မာစာ)
' ပထမ မြန်မာများ' ...
ဆရာမင်းယုဝေ စာတအုပ်ဖတ်ဖူးသည်။
မြန်မာပြည်တွင် ဦးစွာ စွန့်စား တီထွင်တတ်သောသူများအကြောင်း ...။
မှတ်မိသမျှထဲမှ ... ' မီးပုံးပျံ ဦးကျော်ရင်' .. ။
သည်ဖက်ခေတ်လို စက်ကိရိယာအကူအညီနှင့် မီးပုံးကို စီးသူမဟုတ်။ သာမန်မီးပုံးကို အထက်ပျံနိုင်အောင် မီးပုံးကို လေပူဖောင်းတင်းနေအောင် မီးမြိုက်ကာ မီးပုံးလေဝအထက်ပျံနိုင်မှ မီးပုံးအောက်ကတန်းကိုကိုင်ကာ အထက်ဝေဟင်ကို လိုက်ပါ စီးနင်းသူ ... ။
မီးပုံးက ကောင်းကင်ပေါ်ပျံသန်းနေပြီး မီးပုံးအတွင်း လေအဟုန်လျော့ ပြန်ကျလာလျှင် ပဲ့ကိုင်သူမရှိ၊ မြေပြင်ကို စုန်ဆင်းတော့မည်။
ငယ်ငယ်က သီတင်းကျွတ်၊ တန်ဆောင်တိုင် မီးပုံးလွှတ်ပွဲ ကြည့်ဖူးသည်။ မီးပုံးပျံကြီးကိုတွေ့လျှင် ပျှော်ရွှင်ကြသည်။ မီးပုံးပျံ ပြန်ကျလာ၊ တဲအိမ်ပေါ်ကျပြီး... မီးစွဲလောင်သော် ... ဝိုင်းဝန်းငြိမ်းသတ်ကြသည်။
'မီးပုံးပျံ ဦးကျော်ရင်' က စွန့်စွန့်စားစား လုပ်တတ်သူ ... ...။
စာအုပ်နာမည်က ...
' ပထမ မြန်မာများ' ...
ဆရာ ကြီ း(ကြီးမြင့်စော)က ရန်ကုန်စီးပွားရေးတက္ကသိုလ်မှာဆရာလုပ်ရင်း ရန်ကုန်ဝိဇ္ဇာသိပ္ပံတက္ကသိုလ် ကံ့ကော်ရွာပန်းချီပြပွဲမှာ ပြသတတ်သည်။ ရန်ကုန်တက္ကသိုလ်စာကြည့်တိုက်မှ ပန်းချီစာအုပ်များကိုငှားရမ်းဖတ်ရှုကာ ကံ့ကော်ရွာအဖွဲ့သားများကို ကမ္ဘာ့ပန်းချီများကို ရှင်းပြတတ်သည်ဟု ကွယ်လွန်ခဲ့ရှာပြီဖြစ်သော ချစ်သောအကို ကိုမျိုးမြင့်လေးက ပြောပြဖူးသည်။
၈၈ အရေးအခင်းမှာ ဒီမိုကရေစီချစ်သော မြန်မာပြည်သားများ နိုင်ငံအနှံ့ ဆန္ဒပြကြသည်။ မြန်မာ့အသံမှ 'နိုင်ငံတော် ငြိမ်ဝပ်ပိပြားရေးအတွက် တပ်မတော်မှ အချုပ်အခြာအာဏာကို ထိန်းသိမ်းလိုက်ကြောင်း ကြေညာသည်။"
အသက် ၆၀ မပြည့်ခင် ... အလုပ်ကပင်စင်မှမရသေး၊ ဆရာ ကြီးကို ဆန္ဒပြခဲ့သည်ဆိုပြီး အနားပေးလိုက်သည်။
စတော့ရှယ်ယာပွဲစားဘဝကနေ ပန်းချီကိုစုံပစ်ရေးလိုက်သော ပန်ချီဆရာကြီးဂေါ်ဂင်ရဲ့ဘဝကို မှတ်တမ်းတင်သူစာရေးဆရာက ' ပင်လယ်ထဲ ပစ်ချခံရသူ' ဟု ရေးထားသည်။
ဝန်ထမ်းဘဝဖြင့် ပန်းချီအနုပညာကို မြတ်နိုးခဲ့သူ ဆရာ ကြီးလည်း 'ပင်လယ်ထဲ ကန်ချခံရသူ' ပန်းချီဆရာစစ်စစ်ဖြစ်လာခဲ့ပြီ။
ဆရာ့အိမ်ရှိရာ ဌာနလမ်းနားက စျေးသည်များ ပန်းရောင်းသူများကို ဓာတ်ပုံမှတ်တမ်းယူကာ ပန်းချီကားရေးသည်။
Orient Gallery ကိုသန့်ဇင်ပြခန်းမှာ တင်သည်။
စျေးသည်များ၊ ပန်းသည်ပန်းချီကားများသည်လည်း ... ဆရာ့ဘဝ အထင်ကရပန်းချီကားများဖြစ်လာသည်။
သည်နောက်ပိုင်း ဖလင်ကင်မရာဖြင့် ညရှုခင်းများရိုက်ပြီး ... ကိုသန့်ဇင် Orient Gallery မှာ ' Yangon Night' ပြပွဲလုပ်ခဲ့သည်။
ဖိလစ်မောရစ်ကုမ္ပဏီ စပွန်စာလုပ်ပေးသောပြိုင်ပွဲတခုမှာ ဆရာ့ 'Yangon Night' ကားတကားက ဆုတခုရသည်။
Yangon Night ကားများသည်လည်း ဆရာ့ဘဝအမှတ်တရများအဖြစ် ကိုယ်စားပြုကားများ ဖြစ်လာသည်။
၈၈ နောက်ပိုင်း ဆရာနှင့်တခြားဆရာများရေးသော စျေးကားများကို နှစ်သက်၊ စျေးများ ဓာတ်ပုံရိုက်လျှင် စျေးကောင်စီ၊ ထောက်လှမ်းရေးများက သတင်းထောက်ထင်ကာ စစ်မေးခံရသည်။
ညဘက်ဆို ပိုဆိုးလှပေါ့။
ထောက်လှမ်းရေးလည်း ကြောက်ရ၊ အဆာပြေရောင်းသော မုန့်ဖက်ထုပ်သည်ကိုလည်း ကြောက်ရ။ ကင်မရာကိုင်ကာ ဓာတ်ပုံရိုက်ရတာ ပတ်ဝန်းကျင်ကြောက်ရ။ သည်လို စွန့်စွန့်စားစားမှတ်တမ်းယူပြီး ပန်းချီကားဖြစ်အောင် အားထုတ်ရင်း ရပ်တည်ဖို့ကြိုးစားရင်းဖြင့် ပန်းချီဆရာ 'ဆရာ ကြီးမြင့်စော'ကို ... ပြည်တွင်းပြည်ပ အသိအမှတ်ပြုလာကြသည်။
ရန်ကုန်ည ရှုခင်းများက ပြည်သူပိုင်မဟုတ်။ ပန်းချီဆရာများစွာ ရေးခွင့်ရှိသည်။
သို့သော် ... ဆရာ့ 'Yangon Night' ကားများသည် ' ဆရာ ကြီးမြင့်စောရေးဟန်' ဖြင့် အမှတ်တရလက်ရာများဖြစ်လာသည်။
Yangon Night ကားများကို တခြားပန်းချီဆရာများရေးခွင့် မရှိတော့ပြီလား ... ။
ကိုမောင်မောင်ပြုံး share ထားသော ပို့စ်မှာ ... ' ဦးဝင်းဖေက ... ပန်းချီကားများကိုတိုက်ရိုက်ကူးယူရေးကြသည်မှာ ပန်းချီဆရာများအလေ့အကျင့်တခုပါ။ တချို့က မိမိကားကို ပြန်ကူးရေးသည်က မိမိထက်ကောင်းသည်။ ဒါပေမယ့် လက်မှတ်ကို 'ဝင်းဖေ'ဟု မထိုးသင့်ပါ ...'
ပန်းချီကား အတုအစစ်ပြဿနာများ ...
ဆရာကြီး၏ပန်းချီကားမြင်ကွင်းအတိုင်း၊ ဆရာ့ရေးဟန် ဓား(Knigft)အတိုင်း ညကား၊ အထူးသဖြင့် ရန်ကုန်ညများ မရေးသင့်ပါ။
ရေးသူ၏ရေးဟန်အတိုင်းသာ ဖြစ်သင့်ပါသည်။
ပိုဆိုးသည်က လက်မှတ်က 'Kyee Myintt Saw' ထိုးထားခြင်း ...။
ဆရာမင်းယုဝေ ရေးသော ' ပထမ မြန်မာများ ' ထဲမှာ ... Yangon Night'ကားများကို အခက်အခဲများစွာကြားမှ ဖန်တီးခဲ့သော ... 'Yangon Night'' ကားဖြင့် အောင်မြင်လာခဲ့သော၊ ဆရာ ကြီးမြင့်စော' ကိုလည်း နောက်ထပ် 'ပထမမြန်မာများ' စာရင်းမှာ ထပ်ထည့်သင့်သည်ဟု ကျနော် ဆိုချင်သည်။
Artist : Than Htaik.Burmese
Title : Artist Sayar Kyeemyintt Saw
Medium : Acrylic
Size : 21x16 in
Collector : Ko Ko Maung Maung Pyone
-
t.me@moemaka
#MoeMaKaMedia
#WhatsHappeningInMyanmar
Posts
