ပီတာဂလန့် - စွမ်းဆောင်ရည်မြင့်မားသူ ပုကျယ်
စွမ်းဆောင်ရည်မြင့်မားသူ ပုကျယ်
ပီတာဂလန့်
(မိုးမခ) ဇူလိုင် ၅၊ ၂၀၂၂
ပုကျယ်ဆိုတဲ့ငနဲရဲ့ ကြောင်ချေးအဖြစ်နာမည်ကျော်ခဲ့တဲ့ ပုဂ္ဂလိကဘဝ စွမ်းဆောင်ရည်မြင့်ပုံတွေကို ပရိသတ်ကြီးလည်း အတော်သိထားကြပြီးပြီမို့ ထားလိုက်ပါတော့။ မပြောတော့ပါဘူး။ အာဏာစသိမ်းတဲ့ ၂၀၂၁ ဖေဖော်ဝါရီ ၁ ရက်နောက်ပိုင်း ဒီငနဲ ပုကျယ်ရဲ့ သြချယူရလောက်တဲ့ စွမ်းဆောင်ရည်တွေအကြောင်းတော့ "ရယ်လိုက်ရတာဖတ်ဖတ်မော ရင်ဘတ်နောက်က ကျော" ဆိုတာလို ဖြစ်နေရပုံတချို့ကို ပြောပြချင်တာပါ။
မိတ်ဆွေများမှတ်မိကြမယ် ထင်ပါရဲ့။ ဟိုတံတားကိစ္စအကြောင်းလေ။ ဒီလိုပြောလိုက်ပြီဆိုရင် NLD အစိုးရလက်ထက်တုန်းကလည်း ဟော်လေးတကြိုး ဟိုးလေးတကြော် ဖြစ်ခဲ့ရပုံတွေပါ တွဲမြင်လာကြမယ် ထင်ပါတယ်။ သည်တုန်းကလည်း မော်လမြိုင်-ဘီလူးကျွန်းချောင်းဆုံ ကူးတဲ့ သံလွင်မြစ်ဖြတ်တံတားကို "ဗိုလ်ချုပ်အောင်ဆန်းတံတား" လို့ အမည်ပေးလိုက်လို့ NLD အစိုးရကို ဒေသခံတွေကော အခြား ပြည်သူအများစုကပါ ဝေဖန်စောကြောခဲ့ကြပုံကို မှတ်မိကြအုံးမှာပေါ့။
အဲသည်အညှာကို ကိုင်ပြီး သူ့ကိုယ်သူ ပါးရည်နပ်ရည်ရှိသူလို့ ကြွားချင်ပုံရတဲ့ ပုကျယ်ရဲ့ နယ်ထွက်ခရီးစဥ်အစမှာတွင် ဒေသခံနဲ့ ပြည်သူအများစုရဲ့ စိတ်ဆန္ဒကို အလေးထားလေဟန် သရုပ်ဖမ်းပြီး ဒန်းစီးပြလိုက်ပါတယ်။ အဟက် ဘာတဲ့ "ဗိုလ်ချုပ်အောင်ဆန်းတံတား (သံလွင်) ကို "သံလွင်တံတား (ချောင်းဆုံ)" ဟု အမည်ပြောင်း ဖွင့်လှစ်ပေးလိုက်သည်တဲ့။
နောက်တခု ရှိပါသေးရဲ့။ ရန်ကုန်မြို့မှာ လူငယ်ထုရဲ့ နှလုံးသည်းပွတ်လို့ တင်စားအပ်တဲ့ လှည်းတန်းလမ်းဆုံနဲ့ တဆက်တည်းလို ဖြစ်သွားပြီဖြစ်တဲ့ ဂျန်းရှင်းစကွဲ ရှော့ပင်စင်တာအဝင်ထိပ်၊ ရန်ကုန်ပညာရေးတက္ကသိုလ်ရှေ့က လူကူးမြေအောက်ဥမင်လမ်းကိုလည်း ထိုနည်းလည်းကောင်းပင် နှမ်းဖြူးပြလေပါရောလား။ ဥမင်ဖြတ်လမ်းက ပြီးတာဖြင့် ကြာကြာလှပါပြီ။ NLD အစိုးရ သက်တမ်းကုန်ခါနီးအချိန်မှာကတည်းက ပြီးစီးနေပြီးသား ဖြစ်ပါတယ်။ ဖွင့်ပွဲလုပ်ဖို့သာ ကျန်တော့တာပါ။ NLD အစိုးရကလည်း ကိုဗစ်ပြဿနာ၊ ရွေးကောက်ပွဲကိစ္စ စတာတွေနဲ့ ဆက် တိုက်ဆိုသလို လုံးပမ်းခဲ့ရလို့က တကြောင်း၊ နောက်ပြီးသကာလ ရွေးကောက်ပွဲကလည်း အရပ်သားအစိုးရ တတိယသက်တမ်းမှာ ဒုတိယအကြိမ်အစိုးရ ထပ်ဖြစ်ရမှာကြောင့် ဖွင့်ပွဲလှလှဖြစ်ဖို့လည်း မျှော်မှန်းပုံရတာလည်း တစ်ကြောင်း စသဖြင့်တွေကြောင့် ဖြစ်ပုံရပါတယ်။ မြေအောက်ဥမင်ထဲမှာ စျေးဆိုင်ခန်းတွေ ဘာတွေနဲ့ အတော်သားနားအောင် လုပ်ထားပုံလည်း ရပါတယ်။
အဲသည် မြေအောက်ဥမင်ကိုလည်း ပုကျယ်က သူ့အစွမ်းအစလို့ သတင်းမျက်နှာစာမှာ ပုံမှားထင်အောင် ဖွင့်ပွဲတွေဘာတွေ အသေအချာလုပ်ပြီး ကောက်စားပြလိုက်ပါတယ်။ လူရယ်စရာပိုကောင်းသွားတာက အဲသည်ဥမင်ဖြတ်လမ်းကြီးကို အခုချိန်ထိ ဘယ်ပြည်သူတဦးတယောက်ကမှ ဖြတ်သန်းသွားလာခွင့် မရဖူးသေးတာပါပဲ။ ဖွင့်ပွဲလုပ်ပြီးတာနဲ့ အပေါက်နှစ်ဖက်ကို ဘန် ကာလုပ် ပိတ်ပြီး ပုကျယ်ရဲ့ "နှင်ရာသွား စေရာနေ ခွေးလေခွေးလွင့်တွေ" စောင့်ကြပ်နေတာပဲ တွေ့ရပါတယ်။
NLD အစိုးရဟာ အလုံးစုံ ပြည့်ဝကာ ချီးကျူးရမယ့် အစိုးရတရပ်အခြေအနေမျိုး မဟုတ်သေးစေကာမူ တိုင်းပြည်ထူထောင်ရေးကိစ္စ တော်တော်များများကို စီမံကိန်းချ ပြုလုပ်နေတာကို သာမန်ပြည်သူတယောက်ရဲ့ အမြင်အရပင် ထင်ရှားစွာ တွေ့နေရပါတယ်။ ဥပမာတွေထဲက မြင်သာတာတစ်ခုဖြစ်တဲ့ထဲမှာ ဒလဘက်ကမ်းနဲ့ ရန်ကုန် ဘုန်းကြီးလမ်းဘက်ကမ်းကို ဆက်သွယ်ပေးဖို့ တောင်ကိုရီးယားရဲ့ ပံ့ပိုးကူညီမှုနဲ့ တည်ဆောက်နေတဲ့ တံတားကြီးလည်း ပါပါတယ်။ ဒလဘက်ခြမ်းမှာလည်း မြို့သစ်စီမံကိန်လို ပလန်တွေ ရှိပြီးသားပါ။ ပုကျယ်က ဒီတံ တားစီမံကိန်းကြီးကို ဝင်နှမ်းဖြူးကာ အပြီးသတ် ကြွားလုံးထုတ်ချင်နေပုံရပါတယ်။ သည်တော့ ပုကျယ်ဟာ နေ့စဥ် ဒလဘက်ခြမ်းနဲ့ ရန်ကုန်ဘက်ခြမ်း ဇက်ကူးပြီး ရှင်သန်လှုပ်ရှားကြရတဲ့ ပြည်သူတွေကို နေ့တဝက်ကျော်ကျော်လောက် သွားလာခွင့်ပိတ်ကာ ဒုက္ခပေးပြီး စီမံကိန်းနေရာကို နှမ်းဖြူးဖို့အရေး လာကြည့်သွားပါသေးတယ်။
ထူးဆန်းအံ့သြဖွယ်ရာ ပုကျယ်ရဲ့ အစွမ်းတွေ ရှိပါသေးတယ်။ ရန်ကုန်မြို့ပြသပိတ်တိုက်ပွဲမှာ လူ စုလူဝေးနဲ့ လမ်းလျှောက်ဆန္ဒပြပွဲတွေကို ပြောက်ကျားနည်းသုံးကာ အခွင့်သာရင် သာသလို စွန့်စွန့်စားစား လုပ်ကြရတယ်။ အဲသည်အထဲမှာ လူအများမြင်သာစေတဲ့ လူကူးခုံးကျော်တံတားတွေမှာ ဘန်နာတွေ ချိတ်ဆွဲပြီး ဆန္ဒထုတ်ဖော်ကြတာမျိုးတွေဟာလည်း နည်းလမ်းတခုအဖြစ် ပါပါတယ်။ အဲသည်အခါမျိုးမှာ ပုကျယ်တို့လို အာ ဏာရှင်ဆိုတဲ့ စောက်ရူးတွေဟာ ထုံးစံအတိုင်း ရွှေဉာဏ်တော်စူးရောက်ကြတယ်။ ပြည်သူလူထု အန္တရာယ် ကင်းကင်း သွားလာစေရမယ့် လူကူးခုံးကျော်တံတားတွေကို ပိတ်ပစ်လိုက်တယ်။ ဖြတ်သန်းသွားလာခွင့်မပြုတဲ့။ ဖြစ်ရပုံများရယ်။
ပုကျယ်ရဲ့ "နှင်ရာသွား စေရာနေ ခွေးလေခွေးလွင့်တွေ" စစ်ကြောင်းလိုက်ချီကာ ပီဒီအက်ဖ်တွေ၊ တိုင်းရင်းသားအဖွဲ့တွေရဲ့ ခုခံထိုးနှက်ချက်ကြောင့် လှလှပပ ခံစားနေကြရတာကလည်း ပုကျယ်ရဲ့ စွမ်းဆောင်ရည်မြင့်မားပုံတွေထဲက ရှားပါးအရည်အချင်းပါပဲ။ တဖြည်းဖြည်းနဲ့ ကျဆုံးခန်းဆီစိုက်ဆင်းနေတဲ့ ပုကျယ်တို့တသိုက် ထွက်ပေါက်ရှာနေကြပုံကလည်း သူ့အဘတွေ ဖန်တရာတေအောင်သုံးဖူးလှတဲ့ နှစ်သုံးလေးဆယ်က ကလီရှေးနည်းတွေချည်း ဖြစ်နေလေရဲ့။
ဟန်ဆောင်ပန်ဆောင်ငြိမ်းချမ်းရေးစကားဝိုင်း၊ ဖွဲ့စည်းပုံအခြေခံဥပဒေ ပြင်ဖို့၊ လူသုံးများတဲ့ "ဖက်ဒရယ်ပြည်ထောင်စု" လို စကားလုံးကို တွင်တွင်သုံးဖို့၊ အာဆီယံ ဘာညာသာရကာ ဟိုက ဒီကလာ လူရာဝင်လေမလားလို့ အကုသိုလ်အတုံးလိုက်အတစ်လိုက်နဲ့ ပုဝင်တဲ့အရပ် ပိုထွက်လာမလားလို့ ရင်ချီပြ၊ နိုင်ငံရေးမှာ မဖြစ်နိုင်တာ မရှိဘူး ဘာညာ ဗလာ ဗလာ စတာ စတာတွေဟာ ပုကျယ်ရဲ့ မြင့်မားတဲ့ စွမ်းဆောင်ရည်တွေပဲဆိုတာ ပြောရင်း ရယ်၊ ရယ်ရင်း ပြောရင်း ပုကျယ်ရဲ့ အဝီစိကုန်းဆင်းကို အားပါပါနဲ့ ဝိုင်းတွန်းလိုက်ကြပါစို့လား။
ပီတာဂလန့်
t.me@moemaka
#MoeMaKaMedia
#WhatsHappeningInMyanmar