သီအိုဇော် - ‘ခါဆွန်’မြို့မှပေးသော တော်လှန်ရေးသတင်းစကား

(မိုးမခ) နိုဝင်ဘာ ၁၆၊ ၂၀၂၂

ရုရှားကျူးကျော်တပ်ဖွဲ့တွေလက်အောက်က လွတ်မြောက်သွားတဲ့ ‘ခါဆွန်’မြို့အကြောင်းကတော့ အခုတ လော နိုင်ငံတကာ သတင်း မီဒီယာစာမျက်နှာတွေပေါ်မှာ အရေးများ၊အတွေ့များတဲ့ အကြောင်းအရာတခုပဲ ဖြစ်ပါတယ်။အမှန်တကယ်လည်း ပြောသင့်၊ရေးသင့်တဲ့ ဖြစ်ပေါ်ပြောင်းလဲမှုတရပ် ဖြစ်ပါတယ်။

‘ခါဆွန်’မြို့ဟာ ယူကရိန်းနိုင်ငံ ‘ကိဗ်’မြို့တော်နဲ့ ၃၇၅မိုင်လောက် ကွာဝေးတဲ့ နိုင်ငံတောင်ပိုင်း ခါဆွန်ပြည်နယ် ရဲ့မြို့တော်ဖြစ်ပြီး ‘ခါဆွန်’ပြည်နယ်က ၂၀၁၄ခုနှစ်က ရုရှားသိမ်းပိုက်ခဲ့တဲ့ ခရိုင်းမီးယားကျွန်းဆွယ်နဲ့ ထိစပ် နေလို့ နှစ်နိုင်ငံအကြား ဂိတ်တံခါးဝပမာ အချက်အခြာနေရာဒေသလည်း ဖြစ်ပါတယ်။

အထူးစစ်ဆင်ရေး နံမည်ခံထားတဲ့ ရုရှားကျူးကျော်စစ် စတင်ခဲ့တဲ့ ဖေဖေါ်ဝါရီလ၂၄ရက်နေ့ကစပြီး ရုရှား တပ်တွေ တိုက်ခိုက်သိမ်းပိုက်ထားတဲ့ ယူကရိန်းနယ်မြေများထဲမှာ ပြည်နယ်မြို့တော်အဆင့်ဆိုလို့ ရှားရှား ပါးပါး ‘ခါဆွန်’မြို့တမြို့ပဲ ရှိပါတယ်။ဒါ့အပြင် လောလောလတ်လတ် စက်တင်ဘာ နောက်ဆုံးပတ် အတွင်းက အတင်းအဓမ္မ မသမာတဲ့ဆန္ဒခံယူပွဲပြုလုပ်ပြီး ရုရှားနိုင်ငံထဲ ဥပေဒမဲ့ ထည့်သွင်းခံလိုက်ရတဲ့ ဒေသလည်း ဖြစ်ပါတယ်။ ဒါပေမယ့် အခုလိုရယူလိုစိတ်ကြီးကြီးနဲ့ အကွက်ချကြံစည်ခဲ့တဲ့ ဒီလိုဒေသမျိုးကနေ ရုရှား တပ်တွေ ပြန်ဆုတ်ခွာသွားကြလို့ အစက ထောင်ချောက်တခုလို့တောင် သုံးသပ်မှုတွေ ရှိခဲ့ကြပါသေးတယ်။ ကျူးကျော် တပ်ဖွဲ့တွေ ‘ခါဆွန်’မြို့ကပြန်ရုပ်သွားတာမှန်ပေမယ့် ‘ခါဆွန်’ပြည်နယ်ထဲက တချို့ဒေသတွေမှာ ကျန်ရှိနေဆဲဖြစ်လို့ ရုရှားရဲ့ နောက်ခြေလှမ်းတွေကို ဆက်စောင့်ကြည့်ရပါဦးမယ်။

စစ်ရေးဗျူဟာ စစ်ဆင်ရေးနည်းပရိယာယ်တွေကို တကဏ္ဏထားလိုက်ချင်ပါတယ်။ ရုရှားတို့လက်အောက်မှာ ၈ လကျော်ကြာ နေထိုင်ခဲ့ရတဲ့ ‘ခါဆွန်’မြို့သူမြို့သားများအကြောင်းက ပိုစိတ်ဝင်စားစရာ ဖြစ်ပါတယ်။ ‘ခါ ဆွန်’ ဒေသခံတွေရဲ့ ၈၇ ရာခိုင်နှုန်းက ရုရှားနဲ့ ပေါင်းစည်းလိုတယ်ဆိုတဲ့ ဆန္ဒခံယူပွဲရလဒ် ရရှိခဲ့တယ်လို့ ကမ္ဘာကို ထုတ်ပြန်ပြီး ရက်သတ္တပတ် အနည်းငယ်အကြာမှာပဲ ပြန်ဆုတ်သွားခဲ့ရတာက အကြောင်းမဲ့တော့ ဟုတ်ဟန် မတူပါဘူး။တကယ်လို့သာ ဒေသခံများက အသာတကြည် ကျူးကျော်သူများနဲ့ ပူးပေါင်းမှုရှိပြီး စိတ်တိုင်းကျ အုပ်ချုပ်လို့သာ ရနေလို့ကတော့ ဒီအခြေအနေရောက်သွားစရာ မရှိလို့ပဲ ဆိုရပါလိမ့်မယ်။

‘ခါဆွန်’မြို့ခံများက ရုရှားကျူးကျော်သူတပ်များ စတင်ဝင်ရောက်လာကတည်းက ယူကရိန်းအလံတွေ ကိုင် ဆောင်ပြီး ရင်ဆိုင်ဆန္ဒပြပွဲတွေပြုလုပ်ကြ၊အင်အားသုံးဖိနှိပ်ခံလာရပြန်တော့ လှို့ဝှက်ပြီး ယူကရိန်း စစ်တပ် အတွက် ထောက်လှမ်းရေးသတင်းပေးတွေ အဖြစ် မြို့တွင်းကလုပ်ဆောင်ပေးကြ၊ ယုတ်စွအဆုံး ရုရှားစစ် သားတွေ ‘ရူဘယ်’ပိုက်ဆံနဲ့ စျေးလာဝယ်ရင် ရောင်းမပေးတာမျိုးနဲ့ ရတဲ့နည်းမျိုးစုံနဲ့ တုန့်ပြန်အာခံကြပါတယ်။

‘ခါဆွန်’မြို့သူမြို့သားများကသာ ရုရှားတပ်ဖွဲ့တွေအပေါ် ဒီလိုသဘောထားကြတာ မဟုတ်ပါဘူး၊ ‘ခါဆွန်’မြို့ တော်ဝန် ‘Ihor Kolykhaiev’ ကလည်း ရုရှားတို့ရဲ့ ရုပ်သေးရုပ် အဖြစ်မခံခဲ့တဲ့ နမူနာပြခဲ့ပါတယ်။ သူပြန် ပေးဆပ်ခဲ့ရတဲ့ တန်ဖိုးကကြီးတယ်လို့ ပြောရမှာပါ၊ ဇွန်လ (၂၈) ရက်နေ့ကတည်းက ရုရှားတပ်ဖွဲ့တွေရဲ့ ဖမ်းဆီး မှုခံခဲ့ရပြီး အခုထက်ထိ သတင်းအစအန ပြန်မရတော့ပါဘူး။

ဒီဒေသကပြန်ဆုတ်ခွာသွားတဲ့ ရုရှားတပ်ဖွဲ့အင်အားဟာ သုံးသောင်းနဲ့ လေးသောင်းကြားရှိတယ်လို့ ခန့်မှန်းကြ ပါတယ်။အင်အားတဝက်ခန့်က ‘ခါဆွန်’မြို့တွင်းနဲ့ မြို့အနီးအနားမှာ တပ်စွဲခဲ့ကြတယ်လို့ ဆိုပါတယ်။ဒီတော့ စစ်သည် တစ်သောင်းခွဲ-နှစ်သောင်းလောက်က ‘ခါဆွန်’မြို့တဝိုက်မှာရှိတယ် ဆိုတဲ့သဘောပါ။ ’ခါဆွန်’မြို့ မူလလူဦးရေက သုံးသိန်းပတ်ဝန်းကျင်ရှိပြီး ရုရှားတွေဝင်လာတဲ့အခါ တော်တော်များများ မြို့ကိုစွန့်ခွာသွား ကြရပါတယ်။ အတိအကျစာရင်းမရနိုင်ပေမယ့် လေးပုံတပုံလောက်ပဲ ကျန်နေရစ်တယ်လို့ ခန့်မှန်းကြပါ တယ်။ ဒီအတွက် ရုရှားစစ်သားနဲ့ ‘ခါဆွန်’မြို့သားအချိုးက (၁:၅)ရှိတယ်လို့ အကြမ်းဖျင်း ဆိုနိုင်ပါတယ်။ အင်အားမနည်းလှတဲ့ ကမ္ဘာ့ဒုတိယ စစ်အင်အားကြီးနိုင်ငံက ရန်သူကျူးကျော်သူတွေနဲ့ နီးနီးကပ်ကပ် နေရတဲ့ ဒုက္ခအတိုင်းအတာကို ပိုမြင်စေနိုင်ဖို့အတွက် တွက်ချက်ပြနေရခြင်း ဖြစ်ပါတယ်။

ပိုမြင်သာအောင် တမျိုးတွက်ကြည့်ပါဦးမယ်၊ရန်ကုန်မြို့လူဦးရေကို ငါးသန်းနဲ့ပဲထားပြီး တွက်ကြည့်ကြပါစို့၊ အထက်က အချိုးအစားနဲ့ဆိုရင် အနီးကပ် လက်နက်ကိုင် ရန်သူအင်အားက တစ်သန်း ရန်ကုန်မြို့ ပတ်ဝန်း ကျင်မှာ ရှိနေမှာပါ။ လှုပ်မရ လှည့်မရတဲ့အနေအထားမျိုး ဖြစ်နေပါလားလို့ မြင်လာခဲ့ရင်တော့ ‘ခါဆွန်’ မြို့ သားတွေ ရင်ဆိုင်ကြုံတွေ့ခဲ့ရတဲ့ အကျပ်အတည်းကို ပိုပြီးသဘောပေါက်နိုင်ပြီလို့ ထင်ပါတယ်။

ဒါပေမယ့် ဘယ်လိုကျဥ်းထဲကျပ်ထဲရောက်ရောက် ‘ခါဆွန်’မြို့သူမြို့သားတွေဟာ ဦးမကျိုး ပြားပြားဝပ်မသွား၊ ရန်သူနဲ့အသာတကြည် ပူးပေါင်း ဆက်ဆံမသွားတာကိုတွေ့ရပါတယ်။ မဟုတ်လို့ကတော့ ကမ္ဘာကို ကြေညာထားတဲ့အတိုင်း ‘ခါဆွန်’ပြည်နယ်တခုလုံးနီးပါးက ရုရှားနိုင်ငံနဲ့ပဲ အတူနေချင်ပါတယ်ဆိုတဲ့ ‘ကရင်မလင်’ရဲ့ အတိအလင်း ထုတ်ပြန်ထားချက်နဲ့ သွေဖည်တဲ့ ဆုတ်ခွာမှုကို ဆုံးဖြတ်ဖို့ ခက်ခဲပါလိမ့်မယ်။ ဒီလို ကြီးမားတဲ့ စစ်ဗျူဟာအပြောင်းအလဲ ဆုံးဖြတ်ချက်အတွက် တခြားအကြောင်းအချက်တွေလည်း ရှိဦးမှာပါ၊ ဒါပေမဲ့ ‘ခါဆွန်’ဒေသခံတွေရဲ့ မယိမ်းမယိုင် ကြံ့ကြံ့ခံနေနိုင်မှုကလည်း အဓိကအချက်တရပ်အနေနဲ့ ပါဝင်နေပါ လိမ့်မယ်။

‘ခါဆွန်’မြို့လွတ်မြောက်သွားပြီးတော့ ‘Sky News’ တီဗီအင်တာဗျူးတခုမှာ ‘ခါဆွန်’မြို့ခံ တဦးဖြေဆိုချက် က လည်း မှတ်သားစရာပါ။ ‘ဒီလိုနေ့မျိုးပြန်ရောက်လာမယ် ခင်ဗျားထင်ခဲ့ဖူးသလား’ဆိုတဲ့မေးခွန်းကို ‘စစချင်း ကျူးကျော်ခံလိုက်ရတဲ့ နေ့ကတည်းကပဲ’လို့ ပြန်ဖြေကြားခဲ့တာပါ။ ‘Norman Copeland’ရေးသားတဲ့ ‘Psychology and The Soldier’ဆိုတဲ့ ၁၉၄၂ခုနှစ်ထုတ် အမေရိကန်တိုက်ခိုက်ရေးတပ်ဖွဲ့တွေနဲ့ပတ်သက်တဲ့ စိတ်ပညာရှုထောင့် စာအုပ်ဟောင်းတအုပ်ထဲက စာပိုဒ်တပိုဒ်ကို ပြန်အမှတ်ရမိသွားစေခဲ့ပါတယ်။ ’ရှုံးနိမ့်ခြင်း ဆိုတာ ရုပ်ပိုင်းဆိုင်ရာနဲ့ ဆုံးဖြတ်ရတာမဟုတ်၊ စိတ်ပိုင်းဆိုင်ရာခံယူချက်သာဖြစ်တယ်၊ ရှုံးပြီလို့အသိမဝင် မ ချင်း ဘယ်တော့မှမရှုံးဘူး’ ဆိုတဲ့ စကားရပ်ကိုပါ။ ‘ခါဆွန်’မြို့သားတွေဟာ ရုရှားတို့တမြို့လုံးကို သိမ်းပိုက် လိုက်ပေမယ့်လည်း ‘ငါတို့ရှုံးသွားပြီ’ဆိုတဲ့အသိဝင်မလာခဲ့။ ’ဒါဟာအခိုက်အတန့်ဖြစ်တယ်၊ ငါတို့ပြန်နိုင်ကို နိုင်ဦးမှာ’ဆိုတဲ့ ‘အောင်စိတ်’ပဲ စိတ်ထဲရှိနေကြသူတွေ ဆိုတာကို သိခွင့်ရလိုက်တဲ့ အင်တာဗျူးပါ။

လတ်တလော ‘ခါဆွန်’အခြေအနေနဲ့ ဆက်စပ်ပြီးဥပမာပြု ကောက်နုတ်ရေးသားရပေမယ့် တနိုင်ငံလုံးမှာရှိတဲ့ ယူကရိန်းပြည်သူတွေရဲ့ ရုရှားကျူးကျော်မှုအပေါ် အမြင်က မခြားနားလှပါဘူး။သူတို့တန်ဖိုးထားတဲ့ လွတ်လပ် မှု၊ ဒီမိုကရေစီနဲ့ လူ့အခွင့်အရေးတို့ကို ဘယ်နည်းနဲ့မှအထိအပါး မခံလိုကြတာက သိသာထင်ရှားပါတယ်။ ‘Kyiv International Institute of Sociology’ က အောက်တိုဘာလ (၂၁-၂၃)ရက်နေ့ အတွင်း ပြုလုပ်ခဲ့တဲ့ စစ်တမ်းမှာ ဖြေဆိုသူ(၈၆) ရာခိုင်နှုန်းက ဘယ်လောက်ပဲ ဗုံးကြဲပစ်ခတ်ဖျက်ဆီးမှုတွေ ဆက်ခံနေရပါစေ၊ စေ့ စပ် ညှိနှိုင်းဖို့မလိုပဲ စစ်ဆက်တိုက်ကြမယ်လို့ သဘောထားပေးခဲ့ကြပါတယ်။

ဒါကိုကြည့်ရင် ယူကရိန်းပြည်သူအများစုဟာ ပူးပေါင်းဖို့ နေနေသာသာ၊ ညှိနှိုင်းဖို့တောင် အာသီသမရှိကြတော့တာကို တွေ့ရပါတယ်။ ရုရှားကျူးကျော်သူတွေ ယူကရိန်းမြေပေါ်မှာ လုံးဝခြေချကျန်မနေရစ်ဖို့က သူတို့ရဲ့ အဓိကဆန္ဒဖြစ်ပါတယ်။ ဒီစစ်တမ်းမတိုင်မီ စက်တင်ဘာလက ‘ဇလန်းစကီး’ရဲ့ ရုရှားကို ရည်ညွှန်းပြောကြားမှုမှာလည်း ယူကရိန်းပြည်သူတွေရဲ့ ဆန္ဒကို ထင်ဟပ်တာတွေ့ရပါတယ်။ ‘Without you’ ဆိုတဲ့ စကားလုံး ထပ်ခါတလဲလဲ သုံးစွဲထားတဲ့ ထုတ်ပြန်ချက်မှာ ‘ဂက်စ်၊ လျှပ်စစ်မီး၊ရေ၊စားစရာ မရှိတာကို အလေးမထားဘူး၊ ငါတို့မြေပေါ်မှာ မင်းတို့ ရုရှားတွေ မရှိဖို့ပဲ ရွေးချယ်လိုက်ပြီ’လို့ အဓိပ္ပာယ်ရတဲ့ ထိထိမိမိ စကားလုံးတွေနဲ့ သတိပေးပြောကြားခဲ့တာပါ။

ဖျက်အားပြင်းလက်နက်တွေသုံး၊စစ်ရာဇဝတ်မှုတွေကျူးလွန်၊နျူးကလီးယားလိုလက်နက်မျိုးနဲ့တောင် ခြိမ်း ခြောက်ခံရတဲ့ အခြေအနေကြုံကြရလည်း ယူကရိန်းပြည်သူတွေဟာ ‘ဇလန်းစကီး’အစိုးရရဲ့ ဦးဆောင်မှု အောက်မှာ တစုတစည်းနဲ့ ရုရှားကျူးကျော်သူတွေကို ရင်ဆိုင်ခဲ့ကြတာ ဒီစစ်ပွဲ စတင်ကတည်းကပါ။

ဒီလို ဆိုလိုက်ခြင်းဟာ ‘ဇလန်းစကီး’အပေါ် အားလုံးက ရာနှုန်းပြည့် အကောင်းမြင်ကြတယ်၊ထောက်ခံကြတယ်လို့ ပြောတာတော့ မဟုတ်ပါဘူး။ ပါတီစုံဒီမိုကရေစီနိုင်ငံတခု ဖြစ်တဲ့ ယူကရိန်းနိုင်ငံမှာ ‘ဇလန်းစကီး’ တို့ပါတီနဲ့ သဘောထားချင်း မတိုက်ဆိုင်တဲ့ ပါတီများလည်း ရှိပါတယ်။ဒီနေရာမှာ ရေးခဲ့ဖူးတဲ့ ‘ယူကရိန်းအချစ်ဇာတ်လမ်း သန့်သန့်လေးတစ်ပုဒ်’ ထဲက လက်ထပ်ပြီးတာနဲ့ ယူကရိန်းဒေသကာကွယ်ရေး တပ်ဖွဲ့ကို သွားလက်နက်ထုတ်ပြီး သူတို့ချစ်တဲ့ နိုင်ငံကို ကာကွယ်ကြတဲ့ ‘ယရီနာ အာရီယက်ဗာ’တို့ အကြောင်းကို ထုတ်နုတ် ဥပမာပေးလိုပါတယ်။

တိတိကျကျပြောရရင် ‘ယရီနာ’ရဲ့ ‘Fox News’ နဲ့ အဲဒီတုန်းက အင်တာဗျူး ပြောကြားချက်အကြောင်းပါ။ ‘ယ ရီနာ’ ဆိုတဲ့ ( ၂၁)နှစ် အရွယ် ယူကရိန်း ဂျန်ဇီကောင်မလေးက ‘European Solidarity Party’ ကို ကိုယ်စား ပြုတဲ့ ‘ကိဗ်’မြို့တော်ကောင်စီရဲ့ ရွေးကောက်ခံ ကော်မတီအဖွဲ့ဝင် တဦးဖြစ်ပါတယ်။ကိဗ်မြို့တော်ကောင်စီမှာ အ နိုင်ရပါတီ(၇)ခုရှိပြီး သူမတို့ပါတီက (၂၀.၅၂) ရာခိုင်နှုန်းနဲ့ အများဆုံး ရွေးချယ်ခံထားရတာပါ။ ‘ဇလန်း စကီး’ရဲ့ ပါတီက (၇.၅၃) ရာခိုင်နှုန်းနဲ့ နံပါတ်(၅)အဆင့် ရွေးချယ်ခံပါတီ ဖြစ်ပါတယ်။

သူမ ပြောကြားချက်ထဲမှာ’ ကျမတို့ပါတီနဲ့ ‘ဇလန်းစကီး’တို့ပါတီကြားမှာ နိုင်ငံရေးငြင်းခုံ သဘောထားကွဲလွဲမှု အများအပြားရှိကြပါတယ်၊ ဒီအတွက် ကျမအနေနဲ့ သူ့ရဲ့နိုင်ငံရေးအမြင်ကို ချီးကျူးပြောဆိုစရာ မရှိပါဘူး။ ဒါပေမဲ့ အခုအချိန်မှာ သူ့ကို ကျမ ဝေဖန်ဖို့ အခွင့်မရှိပါဘူး၊ သူဟာ အကောင်းဆုံး လုပ်ဆောင်နေပါတယ်။ သူက ကျမတို့တိုင်းပြည်ကို ကာကွယ်နေတယ်၊ သူ့အလုပ် သူလုပ်နေတယ်၊ သူဟာ တကယ်ပဲလည်း အလုပ်ကောင်းကောင်းလုပ်နေပါတယ်။ ဒါ့ကြောင့် နိုင်ငံရေးချောက်ချဖို့ အချိန်မဟုတ်ဘူးလို့ပဲ ပြောချင်ပြီး ကျမတို့နိုင်ငံရဲ့သမ္မတတယောက်အနေနဲ့ သူ့ကို ကျမ ထောက်ခံပါတယ်’ လို့ ဆိုခဲ့ခြင်းပါ။ နိုင်ငံရေး ခံယူချက် ကွဲလွဲသူတဦးရဲ့ အမြင်က စိတ်ဝင်စားစရာ ကောင်းလှပါတယ်။

အနောက်အုပ်စုရဲ့ ပံ့ပိုးမှု ဘယ်လိုပဲရှိရှိ နျူးကလီးယားလက်နက်ပိုင်ရှင် စစ်အင်အားကြီးနိုင်ငံတခုကို ရင် ဆိုင်နေရတာ ယူကရိန်းနိုင်ငံအတွက် လွယ်တဲ့ကိစ္စတော့ မဟုတ်ပါဘူး။ဒီလိုအချိန်မှာ အစိုးရအဖွဲ့ကို ဦးဆောင်နေရတဲ့ ‘ဇလန်းစကီး’အတွက်လည်း ပြသာနာပေါင်း သောင်းခြောက်ထောင်မကရှိမှာပါ။ အစိုး ရရှေ့နေချုပ် Irina Venediktova၊ယူကရိန်းလုံခြုံရေးတပ်ဖွဲ့ အကြီးအကဲ Ivan Bakanov တို့အပါအဝင် အချို့ လုံခြုံရေးတာဝန်ခံ ဗိုလ်ချုပ်ကြီးများကို ရာထူးကဖယ်ရှားခဲ့ရတာတွေကလည်း အစိုးရအဖွဲ့ရဲ့ အကျပ် အတည်းများကို မြင်သာစေပါတယ်။

ဩဂုတ်လတုန်းက ‘ဇလန်းစကီး’ရဲ့ ဝါရှင်တန်ပို့စ် သတင်းစာ အင်တာဗျူးမှာ ပြောကြားခဲ့တဲ့ အမေရိကန် အစိုး ရဆီကရတဲ့ ရုရှားကျူးကျော်လာနိုင်မှု ထောက်လှမ်းရေးသတင်းတွေကို ပြည်သူတွေ ထိပ်လန့်တကြား ဖြစ် မှာစိုးလို့နဲ့ စီးပွားရေးရိုက်ခတ်မှုတွေ ရှောင်ရှားနိုင်ဖို့ တိုင်းပြည်ကို သူချမပြခဲ့ဘူးဆိုတာကလည်း ပြည်သူတွေ ကြား ဝေဖန်စရာတွေ ဖြစ်ခဲ့ပါသေးတယ်။

နိုင်ငံရေးမှာ တရက်၊ တမနက်ဟာ ရှည်ကြာလွန်းတယ်လို့ ဆိုတဲ့အတွက် ကြိုတင်ခန့်မှန်းရခက်ပေမယ့် အ ခုအချိန်အထိတော့ ယူကရိန်းပြည်သူများဟာ ‘ဇလန်းစကီး’နဲ့ သူ့ရဲ့အစိုးရအဖွဲ့ကို နားလည်မှုပေးကာ အပြည့် အဝ ထောက်ခံနေကြဆဲပါ၊ စုစုစည်းစည်း စိတ်ဓာတ်ပြင်းပြစွာနဲ့လည်း ရုရှား ကျူးကျော်တပ်တွေကို တိုက် ထုတ်နေကြပါတယ်။ ဒီလိုအနေအထားကို ဆက်လက်တွေ့မြင်နေရခြင်းဟာ အနောက်နိုင်ငံများအတွက် သူတို့ရဲ့ ကူညီမှုကို ဆက်လက် ချိန်ဆပံ့ပိုးပေးဖို့ တွန်းအားတရပ်လည်း ဖြစ်စေပါတယ်။

ဒီလိုကာလမှာ ပြစ်မျိုးမှဲ့မထင် စင်းလုံးချောအစိုးရ အဖွဲ့မျိုးတော့ ဖြစ်နိုင်မှာ မဟုတ်ပေမယ့် ပြည်သူတွေက အဓိကနဲ့ သာမညကို ခွဲခြားထားကြပုံပါပဲ။ မျိုသိပ်သင့်တာများကို မျိုသိပ်ထားကြကာ အခုအချိန်မှာတော့ ရုရှားကျူးကျော်သူများကိုသာ အာရုံစိုက် ရင်ဆိုင်တွန်းလှန် နေကြပါတယ်။

ဖော်ပြခဲ့သလိုမျိုး စိတ်ခံစားမှုကို ရှေ့တန်းမတင်၊ တည်ငြိမ်ရင့်ကျက်စွာနဲ့ အပြစ်ရှာစိတ်ကို ထိန်းချုပ်ကြ တဲ့၊ရန်သူနဲ့ပူးပေါင်းဖို့ကို ခါးခါးသီးသီးငြင်းဆန်ကြတဲ့၊ရန်သူဘယ်လိုပဲ အားကြီးပါစေ တရားတဲ့ ငါတို့ ဘက်က သာ တနေ့ကျအနိုင်ရမှာပဲ ဆိုတဲ့ ပြင်းပြတဲ့’အောင်စိတ်’ ကို ပိုင်ဆိုင်ကြတဲ့ ယူကရိန်းပြည်သူတွေကြောင့်သာ ရက်ပိုင်းအတွင်း ဒီနိုင်ငံကိုသိမ်းပိုက်ပြမယ် ဆိုတဲ့ ကမ္ဘာ့ဒုတိယစစ်အင်အားအကြီးမားဆုံး နိုင်ငံကြီးဟာ သူ့ နိုင်ငံသား သောင်းပေါင်းများစွာရဲ့ အသက်တွေကို စတေးရ၊ နိုင်ငံရဲ့ စီးပွားရေး ပျက်စီးယိုယွင်းရ၊ နိုင်ငံတကာအလယ်မှာ ဂုဏ်သိက္ခာမဲ့ မျက်နှာပျက် ကျန်ရစ်ခဲ့ရတာပဲ မဟုတ်ပါလား။

သီအိုဇော်

Join Us @ MoeMaKa Telegram
t.me@moemaka
#MoeMaKaMedia
#WhatsHappeningInMyanmar