မောင်လူမွှေး - ခေါ်သံများ
မောင်လူမွှေး - ခေါ်သံများ
မိုးမခ ၊ ဩဂုတ် ၂၅ ၊ ၂၀၂၅
စစ်ကောင်စီက သူတို့ မစိုးမိုးနိုင်တော့တဲ့ နယ်မြေတွေမှာ အင်တာနက်လိုင်းတွေ ဖြတ်တောက်ထားတာ နှစ်ချီကြာခဲ့ပြီ ဖြစ်တယ်။ ဒီတော့ အင်တာနက် သုံးချင်ရင် Starlink ရှိတဲ့နေရာကိုသွားပြီး တစ်နာရီကို တစ်ထောင် ပေးသုံးကြရတယ်။ နှစ်နာရီကို ထောင့်ငါးရာ။ သုံးနာရီကို နှစ်ထောင်။ တစ်နေကုန်သုံး သုံးထောင် ဆိုတာတွေက မောင်လူမွှေး နေတဲ့နေရာက Starlink အင်တာနက် အသုံးပြုခ နှုန်းထားတွေ ဖြစ်တယ်။
ဒီလို နာရီကြာလေ ဈေးနှုန်းချိုသာလေ ရှိရာမှာ တစ်နာရီပဲ အသုံးပြုလေ့ရှိတဲ့သူတွေ ရှိပါတယ်။ အဲဒီသူတွေကတော့ ကိုယ့်သားသမီး နိုင်ငံခြားကို ရောက်နေကြသူတွေ ဖြစ်တယ်။ နိုင်ငံခြားကို ရောက်နေတဲ့ သားသမီးတွေနဲ့ အင်တာနက်ကနေ Video Call လာရောက်ပြောဆိုသူတွေဟာ အမျိုးသမီးတွေ အများစုဖြစ်တယ်။
"တနေ့က သားက ငါ သနပ်ခါးမလိမ်းဘဲနဲ့ သူ့ကို ခေါ်တော့ အမေက နေမကောင်းတာလား။ ဘာဖြစ်တာလဲလို့ တတွတ်တွတ် မေးနေတော့တာ။ ဘာမှ မဖြစ်ပါဘူး ပြောတာလည်း သူက မယုံဘူး။ ဒါနဲ့ မနေ့ကစ ငါလည်း သနပ်ခါးမှုန့်နေအောင် လိမ်းခဲ့တော့တာ။ မနေ့ကတော့ အဲဒီလိုနေစမ်းပါ အမေရဲ့။ သားက ဒီလိုမြင်ရမှ စိတ်ချမ်းသာတာတဲ့ သြ" မလေးရှားက သူ့သားနဲ့ လှမ်းစကားပြောဖို့ ရောက်လာတဲ့ အမျိုးသမီးတစ်ဦးက သူ့လို ဘဝတူအဖော်တွေကို လှမ်းပြောလိုက်တယ်။
သားအမိနှစ်ယောက်ရဲ့ ချစ်ခြင်းမေတ္တာအကြောင်းဟာ ကြားရတာ ချိုမြပါတယ်။ ဒါပေမဲ့ သားတွေကလည်း အမေကို ကျန်းမာရေး ဂရုစိုက်ဖို့ မှာကြ၊ အမေတွေကလည်း နိုင်ငံခြားမှာ သားသမီးတွေကို ကောင်းကောင်းဂရုစိုက် နေထိုင်ကြဖို့ မှာကြနဲ့ အဲဒီလို အသံတွေ များလာပြီဆိုရင် ရင်ထဲမှာ တင်းကျပ်ဆိုနင့်သလို မောင်လူမွှေး ခံစားရတတ်ပါတယ်။
အထူးသဖြင့် အမေဖြစ်သူနဲ့ နိုင်ငံခြားက သမီးမိန်းကလေးတွေနဲ့ စကားပြောတဲ့အခါ အဆင်ပြေတာ ကြားရတဲ့အခါမှာတောင် ဝမ်းသာ၊ ဝမ်းနည်းဖြစ်ရပါတယ်။ မိဘတွေအိမ်မှာ ရေတွင်းလေး တူးဖို့အရေး၊ အခင်းကွက် ပြန်ရွေးဖို့အရေး၊ နွားကလေးတွေ ဝယ်ဖို့အရေး၊ မွေးနေ့ပွဲလေးတွေက အစ လုပ်ဖို့အရေးကို ရေခြားမြေခြားက ဘာသာစကား၊ ဓလေ့ထုံးစံ မတူသူတွေရဲ့ မျက်နှာကို နေ့စဥ်အရိပ်တကြည့်ကြည့်နဲ့ အလုပ်လုပ်နေရှာကြပါကလားလို့ ဝမ်းနည်းပြီး မိဘတွေ ထိုက်သင့်သလောက် အဆင်ပြေတဲ့အတွက်တော့ ဝမ်းသာရတာ ဖြစ်ပါတယ်။
နိုင်ငံခြားမှာ အိမ်ရှင်နဲ့ အဆင်မပြေဖြစ်တဲ့ မိန်းကလေးတွေနဲ့ မိဘတွေ စကားပြောတဲ့ အသံတွေကို ကြားရတဲ့အခါမှာတော့ ကြေကွဲစရာပေါ့။ အဆင်မပြေလို့ နိုင်ငံခြား ရောက်နေတဲ့ မိန်းကလေးက ငို။ သည်ဘက်က အမေတွေ၊ အဒေါ်တွေက ရောက်တုန်းရောက်ခိုက် စုမိဆောင်းမိဖြစ်ခဲ့အောင် သည်းခံလုပ်ခဲ့ဖို့ ဝိုင်းပြောကြနဲ့ လုံးချာလည်လိုက်ပြီး နေကြပါတော့တယ်။ နောက်ဆုံး ဘယ်လိုမှ သည်းမခံနိုင်တော့လို့ ရှိတဲ့ပစ္စည်းတွေရောင်း သိန်းတစ်ရာကျော် အကုန်ခံပြီး ကိုယ့်သားသမီးကို ပြန်ခေါ်ရတဲ့သူတွေလည်း အနည်းငယ်ရှိကြပါတယ်။
နောက်ခေါ်သံတွေကတော့ ကလေးတစ်ယောက် ဒါမှမဟုတ် ကလေးနှစ်ယောက်ကို လက်ဆွဲပြီး လာတဲ့ အမျိုးသမီးတွေရဲ့ ခေါ်သံ ဖြစ်ပါတယ်။ သူတို့ဟာ နိုင်ငံခြားကို ရောက်နေတဲ့ သူတို့ယောကျ်ားဖြစ်သူနဲ့ စကားပြောကြတာ ဖြစ်ပါတယ်။ သူတို့ကတော့ Starkink အင်တာနက်သုံးတဲ့အချိန်ကို ၂ နာရီလောက် ယူတတ်ကြပါတယ်။ ပါးနပ်တဲ့ အမေတွေဟာ သူတို့ကလေးတွေကို အဖေဖြစ်သူနဲ့ စကားပြောခိုင်းကြတယ်။ သားအဖတွေ အလွမ်းပြေစေ၊ ရင်းနှီးစေသလို ကိုယ့်ယောကျ်ားကိုလည်း ထိန်းထိန်းသိမ်းသိမ်းနေဖို့ သတိပေးရာရောက်ပေတာကိုး။ ဒီခေါ်သံတွေဟာလည်း တကွဲတပြား နေကြရတဲ့ မိသားစုတွေရဲ့ ခေါ်သံမို့ သန်းရွှေခေတ် စစ်အာဏာရှင်စနစ်ကြောင့် ငယ်စဥ်က မိသားစုတကွဲတပြားစီ နေခဲ့ရတဲ့ မောင်လူမွှေးကို စိတ်ထိခိုက်စေပါတယ်။ အခုခေါ်သံတွေကတော့ အာဏာရူး လူယုတ်မာ မင်းအောင်လှိုင်ကြောင့် တကွဲတပြားစီနေရတဲ့ မိသားစုတွေပေါ့။
နိုင်ငံခြားပြီး တကွဲတပြားစီနေကြရတဲ့ အမေနဲ့ သားသမီး ခေါ်သံတွေ၊ မိန်းမနဲ့ ယောက်ျားသား ခေါ်သံတွေ၊ လူမမယ်သားသမီးတွေနဲ့ အဖေ၊ အမေတွေရဲ့ ခေါ်သံတွေဟာ နေ့စဥ် ပွက်လောညံနေတာပါ။
"နောက်ဆို ရွာမှာ အလှူလုပ်ရင် ကွမ်းတောင်ကိုင်မယ့်သူတောင် ရှိပါ့မလားမသိ ဆရာရယ်" လို့ အိမ်ခြေရှစ်ဆယ်ဝန်းကျင်ရွာလေးတစ်ရွာက အုပ်ချုပ်ရေးမှူးက မောင်လူမွှေးကို ရင်ဖွင့်ပါတယ်။
စစ်အာဏာသိမ်းပြီးနောက် နိုင်ငံခြားကို လူငယ်တွေ ထွက်ခွာကြတယ်။ အာဏာသိမ်းစစ်တပ်က စစ်မှုထမ်းဥပဒေ ပြဋ္ဌာန်းလိုက်တော့ လူငယ်တွေပိုပြီး နိုင်ငံခြားထွက်ကြပြန်တယ်။ နောက်ဆုံး အကြမ်းဖက်စစ်တပ်က လွတ်မြောက်နယ်မြေတွေကို ဗုံးလိုက်ကြဲနေတော့ ကျန်တဲ့ လူငယ်တွေ ထပ်ထွက်ကြပြန်တယ်။
အာဏာသိမ်းစစ်တပ်ရဲ့ ဗုံးကြဲသံတွေရဲ့ အခြားတစ်ဖက်မှာ ဝမ်းနည်းကြေကွဲဖွယ် ခေါ်သံပေါင်းများစွာဟာ အဓိပ္ပာယ်များစွာနဲ့ ထွက်ပေါ်နေဆဲဖြစ်တယ်။ စစ်အာဏာရှင် ပြုတ်မကျမချင်းတော့ မိသားစုအချင်းချင်း ခေါ်သံတွေဟာ ပဲ့တင်ထပ်နေကြရဦးမှာဖြစ်ပါတယ် ခင်ဗျာ။
t.me@moemaka
Please show your support, donate with Zelle
#MoeMaKaMedia
#WhatsHappeningInMyanmar
Posts
