ဝင်းမင်းခိုင် - မသိခြင်းဝင်္ကဘာ

Art ~ Than Htay Maung

မသိခြင်းဝင်္ကဘာ

ဝင်းမင်းခိုင်

(မိုးမခ) မတ် ၆၊ ၂၀၂၆

ဒါဘယ်လိုကုထုံးလဲငါနားမလည်ဘူး

ဗမာပြည်ကလူမမာကို

အမေရိကန်ကသမားတော်က

ဇွန်း(Zoom)ခေါ်ပြီးကိုယ်တိုင်ခွဲစိတ်တဲ့ကုထုံး

လန်ဒန်မှာအပင်စိုက်ပြီး

ရန်ကုန်မှာသီးပွင့်စေတဲ့နည်းပညာ

အော်စလိုမှာအနွေးထည်ဝတ်ပြီး

ပူတာအိုကလူတွေကို

အအေးဒဏ်ကကာကွယ်ပေးမယ့်စေတနာ

ဩဇီမှာစားပြီး

မန္တလေးကဆာလောင်မှုကိုဖြည့်ဆည်းမယ့်

လူသားချင်းစာနာမှုအကူညီ

မြစ်ကြီးနားကကုန်တွဲတွေကို

မော်လမြိုင်မှာရပ်ထားတဲ့ခေါင်းတွဲက

ရပ်ထားရင်းဆွဲခေါ်မယ့်သယ်ယူပို့ဆောင်ရေး

ဒါဘယ်လိုအတွေးခေါ်လဲငါမသိဘူး

မြေပြင်မှာရှိတဲ့ပြဿနာတိုင်းကို

မြေပြင်မှာမရှိတဲ့လူသားတွေက

စွန့်လွှတ်မှုအနန္တနဲ့

အဝေးကဦးဆောင်ဖြေရှင်းပေးနေတဲ့

ထူးဆန်းအံ့ဩဖွယ်ပုံရိပ်များ

၂၇.၂.၂၆

-

Join Us @ MoeMaKa Telegram
t.me@moemaka
Please show your support, donate with Zelle
Zelle to moemaka.org@gmail.com "MoeMaKa Multimedia"
Like and Subscribe MoeMaKa YouTube Channel
youtube.com/@moemaka
Like us on MoemaKa Facebook
Follow us on X
X.com/MoeMaKa
#MoeMaKaMedia
#WhatsHappeningInMyanmar