သက်တန့်နွေဦး — နိုင်ငံရေးအသိဖြင့် ကျွန်ဇာတ်သွင်းသူများ

သက်တန့်နွေဦး — နိုင်ငံရေးအသိဖြင့် ကျွန်ဇာတ်သွင်းသူများ
(မိုးမခ) နိုဝင်ဘာ ၁၁၊ ၂၀၂၆

နွေဦးတော်လှန်ရေးကြီး ပေါ်ပေါက်လာပြီးနောက် တပ်မတော် (စစ်ကောင်စီ) ကို တုံ့ပြန်ရန်အတွက် ပြည်သူ့ကာကွယ်ရေးတပ်ဖွဲ့ (PDF) များကို ဒေသအသီးသီးတွင် ဖွဲ့စည်းခဲ့ကြသည်။ ဤတော်လှန်ရေးလက်နက်ကိုင်တပ်ဖွဲ့များအတွင်းသို့ လူငယ်လူရွယ်များစွာ ဝင်ရောက်လာကြသော်လည်း တော်လှန်ရေးကာလ ရှည်ကြာလာသည်နှင့်အမျှ PDF တပ်ရင်းတပ်ဖွဲ့များအတွင်းမှ တပ်စွန့်ခွာထွက်ပြေးခြင်း (တပ်ပြေး) ပြဿနာများနှင့် ၎င်းတို့၏ နိုင်ငံရေးအတွေးအခေါ် ထုတ်ဖော်ပြောဆိုမှု၊ ဇာတ်ခင်းပြောဆိုမှုများသည် ယခုအခါ အမှန်တကယ်ပင် စိတ်ဝင်စားဖွယ်နှင့် ဝေဖန်ဖွယ် အကြောင်းအရာများ ဖြစ်လာခဲ့သည်။

စစ်အာဏာရှင်ကို တော်လှန်ရန် ရည်ရွယ်ချက်ဖြင့် ဝင်ရောက်ခဲ့ကြသော်လည်း PDF တပ်ရင်းတပ်ဖွဲ့အချို့မှ ရဲဘော်များ လက်နက်စွန့်၍ ထွက်ပြေးရခြင်း သို့မဟုတ် ထွက်ခွာလာရခြင်းတွင် အကြောင်းရင်းမျိုးစုံ ရှိတတ်သည်ဆိုသော်လည်း အခြေခံအားဖြင့် သိပ်မကွဲပြားကြပေ။ အချို့သော PDF တပ်ရင်းများတွင် ခေါင်းဆောင်လုပ်သူများက ဒီမိုကရေစီနည်းလမ်းတကျ မရှိဘဲ စစ်အာဏာရှင်စနစ်ထက်ပင် ဆိုးရွားသော အမိန့်ပေးအာဏာရှင်ဆန်မှု၊ ကိုယ်ကျိုးရှာမှုနှင့် ရဲဘော်များအပေါ် လူမဆန်စွာ ဖိနှိပ်ဆက်ဆံမှုများ ရှိလာခြင်း၊ တော်လှန်ရေးရိက္ခာနှင့် လက်နက်ခဲယမ်းများကို အလွဲသုံးစားလုပ်ခြင်းကြောင့် ရိက္ခာနှင့် လက်နက်ခဲယမ်း အလုံအလောက် မရရှိဘဲ အလွန်အမင်း ဆင်းရဲပင်ပန်းစွာ ရင်ဆိုင်ရသည့်အခါ စိတ်ဓာတ်ကျဆင်းလာပြီး စွန့်ခွာထွက်ပြေးလိုစိတ် ဖြစ်ပေါ်လာခြင်း၊ တိုင်းပြည်နှင့် လူထုအတွက်ဆိုသည့် မူလရည်မှန်းချက်မှ လွဲချော်ကာ မိမိအတွက် အကျိုးစီးပွားရှာဖွေမှုများ၊ အုပ်စုဖွဲ့ရန်ဖြစ်ပွားမှုများနှင့် ရာဇဝတ်မှုဆန်သည့် လုပ်ရပ်များကို မြင်တွေ့လာရသဖြင့် တော်လှန်ရေးအပေါ် ယုံကြည်ချက် ကုန်ဆုံးသွားခြင်းတို့သည် အများဆုံး ဖြစ်ပေလိမ့်မည်။

PDF တပ်ရင်းမှ ထွက်ပြေးလာသူအချို့သည် မိမိတို့၏ အမှားများကို ဖုံးကွယ်ရန် သို့မဟုတ် တစ်ဖက်ဘက်သို့ ခိုလှုံရန်အတွက် နိုင်ငံရေးသီအိုရီများ၊ အတွေးအခေါ်အယူအဆများကို ထုတ်ဖော်ပြောဆိုကာ ဇာတ်ခင်းတတ်ကြသည်လည်း ရှိပေသည်။ တပ်ထဲတွင် ရှိစဉ်က မည်သည့်ဝါဒကိုမျှ စိတ်မဝင်စားဘဲ ကိုယ်ကျိုးရှာမှု သို့မဟုတ် စည်းကမ်းဖောက်ဖျမှုကြောင့် ထွက်ပြေးလာရသော်လည်း အပြင်ဘက်သို့ ရောက်သည့်အခါ လက်ရှိ PDF ခေါင်းဆောင်များ၏ နိုင်ငံရေးလမ်းစဉ် မမှန်တော့သည့်အတွက်ဟု ခေါင်းစဉ်တပ်ကာ နိုင်ငံရေးအတွေးအခေါ်ကြီးများဖြင့် မိမိကိုယ်ကို ဖြူစင်အောင် ဇာတ်ခင်းပြတတ်ကြသည်။ အချို့သော တပ်ပြေးများသည် မိမိတို့၏ အတွေ့အကြုံများကို အခြေခံကာ တော်လှန်ရေးတပ်ဖွဲ့များအတွင်း မမှန်မကန် လုပ်ကြံပြောဆိုမှုများ၊ တစ်ဖက်သတ် စွပ်စွဲချက်များ ပြုလုပ်ခြင်းဖြင့် လူအာရုံစိုက်မှုကို ရယူရန်နှင့် ကိုယ်ကျိုးစီးပွားရှာဖွေရန် ဇာတ်နာပြတတ်ကြသည်။

PDF တပ်ရင်းမှ ထွက်ပြေးလာသူများ၏ ဇာတ်ခင်းပြောဆိုမှုများနှင့် ပတ်သက်၍ ပြည်သူများအနေဖြင့် အချို့သော ရဲဘော်များမှာ အမှန်တကယ်ပင် တပ်ရင်းအတွင်းရှိ မတရားမှုများနှင့် အကျင့်ပျက်ခြစားမှုများကို သည်းမခံနိုင်၍ ထွက်လာကြပြီး အမှန်တရားကို ရဲရဲဝံ့ဝံ့ ထုတ်ဖော်ပြောဆိုကြသော်လည်း အချို့မှာမူ ခက်ခဲချိန်တွင် လက်နက်စွန့်၍ ထွက်ပြေးကာ အခွင့်အရေးရရန်အတွက်သာ ဇာတ်ခင်းနေကြခြင်းဖြစ်ကြောင်း သတိပြုစရာ ရှိသည်။ တော်လှန်ရေး ရုန်းကန်နေရချိန်တွင် ခက်ခဲမှုကို မရင်ဆိုင်ဘဲ ထွက်ပြေးလာပြီးနောက် နိုင်ငံရေးအတွေးအခေါ်ဆန်ဆန် ဇာတ်ခင်းလာသူများကို လူထုကရော၊ တော်လှန်ရေးအင်အားစုများကပါ သံသယဖြင့် ကြည့်ရှုလေ့ရှိကြပြီး စကားလုံးလှလှများနှင့် ဇာတ်ခင်းပြနေရုံထက် လက်တွေ့တွင် မည်မျှ ရိုးသားဖြောင့်မတ်သလဲဆိုသည့် အချက်ကသာ အဓိကတိုင်းတာချက် ဖြစ်သည်။

တကယ်တော့ PDF တပ်ရင်းများမှ တပ်စွန့်ခွာထွက်ပြေးလာခြင်းနှင့် ၎င်းတို့၏ နိုင်ငံရေးအတွေးအခေါ် ထုတ်ဖော်မှု၊ ဇာတ်ခင်းမှုများသည် တော်လှန်ရေးခရီးလမ်း၏ ကြမ်းတမ်းမှုနှင့် လူသားတို့၏ အကျင့်စရိုက်အမျိုးမျိုးကို ဖော်ပြနေသည့် မှန်တစ်ချပ်ပင် ဖြစ်ပေသည်။ တော်လှန်ရေးကို ထိခိုက်စေရန် သို့မဟုတ် ကိုယ်ကျိုးအတွက် ဇာတ်ခင်းနေသူများကို လူထုက တဖြည်းဖြည်း သိရှိနားလည်လာကြမည်ဖြစ်ပြီး စစ်မှန်သော ရိုးသားမှုနှင့် တာဝန်ယူမှုတို့ကသာ အဆုံးတွင် ရပ်တည်နိုင်မည် ဖြစ်သည်။

တစ်ဖက်တွင်လည်း မြန်မာပြည်တွင် ကြောက်စရာအကောင်းဆုံး ရောဂါဆိုးသည် HIV ရောဂါလည်း မဟုတ်သလို AIDS ရောဂါလည်း မဟုတ်ပါ။ “နိုင်ငံရေးအသိ” ဆိုသည့် စကားကို ပြောကာ ရောမခေတ် ကျွန်ဇာတ်သွင်းနေသည့် ရောဂါသည် တကယ်တော့ ပို၍ ကြောက်ဖို့ကောင်းသည်။ ကင်ဆာရောဂါဆိုးထက် အကျင့်ဆိုးများ ကူးစက်ပျံ့နှံ့နေခြင်းသည် ကြောက်စရာအကောင်းဆုံး ရောဂါဆိုးတစ်ခု ဖြစ်သည်။ ထို့ကြောင့် နိုင်ငံရေးကို အကြောင်းပြုကာ ကိုယ်ကျိုးစီးပွားရှာဖွေနေသည့် စနစ်ဆိုးကို အတူတကွ တွန်းလှန်ရမည် ဖြစ်သည်။

အမှောင်ထုများ မည်မျှကြီးစိုးပါစေ၊ အချိန်တစ်ခုရောက်လျှင် အလင်းသစ်များ ရောက်လာသကဲ့သို့ ကျွန်ုပ်တို့သည် အာဏာရှင်ကို ဖြုတ်ချနိုင်ရန်အတွက်သာမက အာဏာရှင်စနစ်ဆိုးနှင့် အကျင့်ပျက်ခြစားနေသော ဒီအာဏာရှင်ဝိုင်း (သို့မဟုတ်) စနစ်တစ်ခုလုံးကိုပါ ပြုပြင်နိုင်အောင် ကြိုးစားရမည် ဖြစ်သည်။

သက်တန့်နွေဦး

Join Us @ MoeMaKa Telegram

t.me@moemaka

Please show your support, donate with Zelle

Zelle to moemaka.org@gmail.com "MoeMaKa Multimedia"

Like and Subscribe MoeMaKa YouTube Channel

youtube.com/@moemaka

Like us on MoemaKa Facebook

Follow us on X

X.com/MoeMaKa

#MoeMaKaMedia

#WhatsHappeningInMyanmar