မိတဆိုး- မိုးမင်းသိမ်း မြန်မာပြန်သည်
မိတဆိုး
မိုးမင်းသိမ်း -မြန်မာပြန်
Chinese Cinderella - Adeline Yen Mah
#တန်ဖိုး - ၃၅၀၀ ကျပ်
#စာမျက်နှာ - ၂၆၃
ကမ္ဘာတစ်လွှား နာမည်ကြီး HBO ရုပ်သံစီးရီးတစ်ဖြစ်တဲ့ GOT ထဲမှာ တီရီယွန် ဆိုတဲ့ ဂျပုလေးက ပြောဖူးတယ်။ ကိုယ့်ကို မွေးဖွားခဲ့ရလို့ မိခင်သေဆုံးသွားခဲ့ရင် မိမိ ဖခင်နဲ့တကွ ကိုယ့်ထက်ကြီးတဲ့ မောင်နှမတွေက အဲဒီကလေးဟာ ဂြိုဟ်ကောင်ပဲလို့ သတ်မှတ်ကြတယ်တဲ့ ။ ဘာကြောင့် အဲလိုအယူအစွဲတွေ ကြီးကြတာလဲ ၊ မွေးလာတဲ့ ကလေးကရော တကယ်ပဲအပြစ်ရှိသလား ။ စဉ်းစားစရာကောင်းတဲ့ မိသားစုတွင်း ပြဿနာတစ်ခုပါပဲ ။
တျန်ကျင်းမြို့က လူလတ်တန်းစား မိသားစုတစ်ခုက ငါးယောက်မြောက်သမီးအဖြစ် မွေးဖွားလာတဲ့ အက်ဒီလင်းယန်ရဲ့ အဖြစ်ကလည်း အဲလို ထပ်တူထပ်မျှပဲ ။
ဒီစာအုပ် မိတဆိုးဟာ တရုတ်စာရေးဆရာမ အက်ဒီလင်းယန်မားရဲ့ ကိုယ်တိုင်ရေးဝတ္ထုဟန် အတ္ထုပ္ပတ္တိ စာအုပ်တစ်အုပ် ဖြစ်ပါတယ် ။ လျစ်လျူရှုခံရပြီး မိဘရဲ့ ချစ်ခင်မြတ်နိုးခြင်းမခံကြရတဲ့ ကမ္ဘာအနှံ့ကကလေးငယ်များအတွက် သီးသန့်အမှာစကားပါးချင်လို့ ဒီစာအုပ်ကို ရေးသားရခြင်းဖြစ်တယ်လို့ စာရေးဆရာမက ဆို ထားပါတယ် ။
အက်ဒီလင်းယန်ကို မွေးပြီး မကြာခင် မေမေဆုံးပါးသွားလို့ အစ်မကြီးနဲ့အစ်ကိုသုံးယောက်က သူ့ကို အပြစ်ဖို့ကြပြီး လုံးဝ ခွင့်မလွှတ်ကြဘူးတဲ့ ။ မွေးကတည်းက မေတ္တာမရခဲ့တဲ့ဘဝမျိုးမှာ အက်ဒီလင်းယန် ရှင်သန်လာရတယ်။ သူ့ကို နားလည်မှုပေးပြီး စောင့်ရှောက်ခဲ့သူကတော့ သူ့မေမေနဲ့ ရှန်ဟိုင်းက ဘဏ်တိုက်တစ်ခုမှာ အတူတူလုပ်ခဲ့ဖူးတဲ့သူ ၊ သူ့ဖေဖေရဲ့ အစ်မကြီးလည်း ဖြစ်သူ ၊ မိသားစုအပေါ် အနွံအတာခံပြီး အရှက်အကြောက်ကြီးတဲ့အပျိုကြီး။ အက်ဒီလင်းယန်က ကြီးကြီး ပါပါလို့ ခေါ်ခံရတဲ့သူပေါ့ ။
မိထွေးဖြစ်သူရဲ့ နှိမ်ချဆက်ဆံမှု ၊ အစ်မကြီးနဲ့ အစ်ကိုသုံးယောက်ရဲ့ အနိုင်ကျင့်မှုတွေကို သည်းခံပြီး ကျောင်းစာဘက်မှာတော်အောင် သူကြိုးစားခဲ့တယ်။ အတော်ဝေးလှတဲ့ကျောင်းကို ဆယ့်နှစ်ရာသီ ခြေလျင်သွားပြီး ကျောင်းတက်ခဲ့ရတယ် ။ နေပူပူ ၊ မိုးရွာရွာ ၊ မုန်တိုင်းကျကျ ကျောင်းကို ခြေလျင်ပဲ သူသွားခဲ့တယ် ။ သူဟာ ကျောင်းတက်ရတာကို ပျော်ရွှင်နေတယ် ။ ဘာဖြစ်လို့လဲ ဆိုတော့ သူ့မိသားစုအိမ်ဟာ ငရဲဘုံ ဖြစ်နေပြီး ကျောင်းကတော့ သူ့အတွက် သုခဘုံပမာ ဖြစ်နေလို့ပါပဲ ။ သနားစရာကောင်းတဲ့ အက်ဒီလင်းယန်ရဲ့ ငယ်ဘဝပေါ့။ .
ကလေးအရွယ်ကတည်းက ဖိနှိပ်ချုပ်ချယ်မှုတွေ ၊ အနိုင်ကျင့်မှုတွေကို ကြိတ်မှိတ်သည်ခံခဲ့ပြီး အကောင်းဘက်ရောက်အောင် ကြိုးစားခဲ့လို့ အက်ဒီလင်းယန်ဟာ ရှာမှရှားတဲ့ စိတ်ဓာတ်ကြံ့ခိုင်တဲ့ မိန်းကလေးတစ်ယောက်လို့ဆိုရမှာပဲ ။ သူ့လိုမျိုးအဖိနှိပ်ခံရတဲ့ကလေးတွေကို ဘဝအပေါ် အဆိုးမမြင်စေဘဲ အကောင်းဘက်ကိုရောက်စေချင်တဲ့ စေတနာနဲ့ သူ့ရဲ့ လျို့ဝှက်တဲ့ ငယ်ဘဝကို အရင်းအတိုင်းရေးသားပြခြင်းလည်း ဖြစ်ပါတယ်တဲ့ ။
မတရား ဖိနှိပ်ညှဉ်းပန်းသူတွေနဲ့ ကြုံတွေ့ နေရပေမဲ့ မိမိဟာ အဖိုးထိုက်တန်သူဖြစ်ပြီး တစ်မူထူးခြားသူ ဖြစ်တယ်လို့ ကိုယ့်ကိုယ်ကိုယ် ယုံကြည်ထားစေချင်ပါတယ်လို့လည်းစာရေးဆရာမက အားပေးထားပါတယ် ။
"အပြုသဘောဆောင်သည့် အိပ်မက်တစ်ခုက အဖျက်သဘော ဆောင်သည့် ပကတိအခြေအနေ ထောင်ပေါင်းများစွာတို့ထက် ပို၍ အရေးပါ အရာရောက်သည် " လို့ အက်ဒ်ဒီလင်းယန်က အားပေးစကား ပြောကြားလိုက်ပါတယ် ။
တရုတ်ပြည်နောက်ခံဝတ္ထုတွေဆို ယဉ်ကျေးမှုတော်လှန်ရေးခေတ် နောက်ခံတွေ ၊ ကွန်မြူနစ်ပါတီ နောက်ခံဇာတ်လမ်းတွေနဲ့ ဖတ်ရတာများပါတယ် ။ ဒီ မိတဆိုးစာအုပ်ကတော့ သာမန်ပြည်သူ ကလေးတစ်ယောက် မိသားစု ဖိနှိပ်မှုအတွင်း ဖြတ်ကျော်မှု တစ်မူထူးခြားစွာ ဖတ်ရှုရမှာ ဖြစ်ပါတယ်။ ဘာသာပြန် ဆရာ မိုးမင်းသိမ်းရဲ့ ချောမွေ့တဲ့ဘာသာပြန်လက်ရာနဲ့အတူ မိတဆိုးဝတ္ထုကို ခံစားကြည့်ကြပါစို့ ။
-
အိမ်အရောက်ပို့ (Door to Door) စနစ်ဖြင့် မှာယူလိုသူများအတွက်
Wun Zinn To Home (ဖုန်း - 09 96 999 8500) ၊ Pann Satt Lann Books (09 788 397540) တို့တွင် ဝယ်ယူရရှိနိုင်ပါ သည်။
#ဆက်သွယ်ရန် - 09450623383 ၊ 0945062338