အောင်ဝေး - သေနင်္ဂဗျူဟာမြောက်အလွမ်း (၄)

Aung Way in SF, Alcatraz prison. Photo - MoeMaKa

အောင်ဝေး - သေနင်္ဂဗျူဟာမြောက်အလွမ်း (၄)

(မိုုုုုုးမခ) ဖေဖော်ဝါရီီ၂၊ ၂၀၂၀

 

( ၄ )

"ခမ်းကို ချစ်ရင်
ပဲပုပ်ကိုလည်း ချစ်ရမယ်"
ရှမ်းပြည်ရောက် ဧည့်သည်ရယ်
မပြန်ပါနဲ့ကွယ်
ငယ်ငယ်တုန်းက ရုပ်ရှင်။

အနုပညာလေ
ရင်ထဲ တကယ်ရောက်ရင်
သေနင်္ဂဗျူဟာ မြောက်တာပေါ့။

ဟုတ်တာပေါ့့
ခမ်းကို ချစ်တော့လည်း
ပဲပုပ်ကို ချစ်ရတာပေါ့့။

နိုင်ငံရေးကို ချစ်တော့လည်း
ထောင်ကို ချစ်ရတာပေါ့့
ဟုတ်တာပေါ့့။

မမခင်ဦးစံပယ်ရယ်
ခမ်းကို ချစ်ရတာလည်း မလွယ်ဘူး
ပဲပုပ်ကို ချစ်ရတာလည်း မလွယ်ဘူး။

နိုင်ငံရေးကို ချစ်ရတာလည်း မလွယ်ဘူး
ထောင်ကို ချစ်ရတာလည်း မလွယ်ဘူး
မမခင်ဦးစံပယ်။

အကျဉ်းထောင်တွေဟာ
အလင်းရောင် မလာခင်က သမိုင်းကို
ပြောနေကြတယ်။

အကျဉ်းထောင်တွေဟာ
အမှောင်ထဲက သွေးနဲ့မျက်ရည်ကို
မီးမောင်းထိုးပြနေကြတယ်။

အဲဒီ အကျဉ်းထောင်တွေ
ကျနော်လွမ်းတယ် မမခင်ဦးစံပယ်။

ချစ်လှစွာသောပြည်ပြေး
အဝေးရောက်နှလုံးသားဟာ
ရွံမုန်းစရာ အကျဉ်းထောင်တွေ
ဘာကြောင့်လွမ်တာလဲ။

မစ်ရှီဂန်မဲဇာမှာ
သူဟာ နိုင်/ကျဉ်းဟောင်း
သေခြင်းကောင်း။

လွမ်းဖို့မကောင်းတဲ့အရာတွေက
လွမ်းဖို့ကောင်းနေတာ
မလွမ်းကောင်းတာတွေကို
လွမ်းကောင်းနေတာ
ကျနော်တို့တိုင်းပြည်လား။

မမခင်ဦးစံပယ်
မြန်မာပြည်ကြီးဟာ
အကျဉ်းထောင်ကြီးပဲ တဲ့။

စစ်အာဏာရှင်ခေတ်တစ်လျှောက်လုံး
အမှန်ဆုံးစကား
စကားနောက်တရားပါ။

ကျနော်တို့ဟာ
မ ဆ လ စစ်ဖိနပ်အောက်မှာ
ကျနော်တို့ဟာ
န ဝ တ
န အ ဖ စစ်ဖိနပ်အောက်မှာ
ကျနော်တို့ဟာ
နရသိန်ထောင်အတွင်းက
သူပုန်အကျဉ်းသားတွေပေါ့။

အုတ်နံရံ
ကြိုးတိုက်နဲ့ သံတိုင်ကြား
ဘဝကို တည်ဆောက်ခဲ့ကြ။

လက်ထိပ်
သံခြေကျင်းနဲ့ စစ်ခုံရုံး
ကိုယ့်အလောင်း ကိုယ်ထမ်းခဲ့ကြ။

မမခင်ဦးစံပယ်ရေ
ခမ်းကို ချစ်မိမှတော့
ပဲပုပ်ကိုလည်း ချစ်ရတော့တာပေါ့့။

ဘဝမှာ ခမ်းကို မချစ်ခဲ့မိရင် အကောင်းသား
ဒီလို သူတောင်းစားအတွေး
ကျနော်တို့ မတွေး။

ဖက်ဆစ်အမှောင်အောက်မှာ
အနေချောင်သူတွေ
ခေတ်ဆိုးကြီးထဲ
အချောင်နေသူတွေ
ကျနော်တို့ လားလားမဟုတ်။

နိုင်ငံရေးအကျဉ်းသားဆိုတာ
နိုင်ငံတော်က ဂုဏ်ပြုရမယ့်
မင်းသားတွေတော့ မဟုတ်ဘူးပေါ့့။

မမခင်ဦးစံပယ်
ဒါပေမဲ့
ကျနော် ဂုဏ်ယူတယ်။

နိုင်ငံရေးအကျဉ်းသား ဖြစ်ရတာ
နိုင်ငံရေးသူတောင်းစား ဖြစ်ရတာထက်တော့
သိက္ခာရှိပါတယ် မမခင်ဦးစံပယ်။

တိုင်းပြုပြည်ပြု
အင်အားစု ဆိုတာ
လူထုပဲ
လူထုထဲမှာ
ကျနော်တို့ ပါတယ်။

အလုပ်သမား၊ လယ်သမား၊ ကျောင်းသား
တပ်ပေါင်းစုမှာ
ကျနော်တို့ ပါတယ်။

စာပေနဲ့ အနုပညာ
ယဉ််ကျေးမှုစစ်မျက်နှာမှာ
ကျနော်တို့ ပါတယ်။

"အင်အားတက်ကြွ၊ တိုးတက်လှသည့်
ပင်မရေစီးမြစ်တကား" တဲ့
ရေစီးထဲမှာ
ကျနော်တို့ ပါတယ်။

"ကြွေးကြော်စူးရဲ၊ အားမာန်ခဲတဲ့
တိုက်ပွဲထဲက ပြည်သူလေ" တဲ့
တိုက်ပွဲထဲမှာ
ကျနော်တို့ ပါတယ်။

"ကိုယ့်ပခုံးပေါ် တင်ပေးလိုက်တဲ့
သမိုင်းတာဝန်" တဲ့
သမိုင်းထဲမှာ
ကျနော်တို့ ပါတယ်။

"တစ်ပွင့်ကြွေရင်၊ နှစ်ပွင့်ဝေမယ်
ကြွေတာကိုက ပွင့်ခြင်းပဲ" တဲ့
ပွင့်ခြင်းထဲမှာ
ကျနော်တို့ ပါတယ် မမခင်ဦးစံပယ်။

ဥပမာ
ဒဂုန်တာရာ ထောင်ထဲဝင်သွားတယ်
ထောင်ထဲကနေ
ဒဂုန်တာရာတွေ အများကြီးထွက်လာတယ်။

ဥပမာ
ဗန်းမော်တင်အောင် ထောင်ထဲဝင်သွားတယ်
ထောင်ထဲကနေ
ဗန်းမော်တင်အောင်တွေ အများကြီးထွက်လာတယ်။

ဥပမာ
မြသန်းတင့် ထောင်ထဲဝင်သွားတယ်
ဥပမာ
လူထုဦးလှ၊ လူထုဒေါ်အမာ ထောင်ထဲဝင်သွားတယ်
ထောင်ထဲဝင်သွားတယ်

ထောင်ထဲဝင်သွားတယ်

ထောင်ထဲဝင်သွားတယ်။

သမိုင်းအမှန်တရား ထောင်ထဲဝင်သွားတယ်
ထောင်ထဲကနေ
သမိုင်းအမှန်တရားတွေ အများကြီးထွက်လာရဲ့
မမခင်ဦးစံပယ်။

အဲဒီ အများကြီးထဲမှာ
သစ္စာဖောက်တွေ မပါဘူး
သူရဲကောင်းတွေပဲ ပါတယ်။
အဲဒီ အများကြီးထဲမှာ
အခွင့်ထူးခံတွေ မပါဘူး
စွန့်လွှတ် အနစ်နာခံသူတွေပဲ ပါတယ်။

အဲဒီ အများကြီးထဲမှာ
ရေစုန်မျှောချသူတွေ မပါဘူး
ရေဆန်လမ်းကို ဖြတ်သန်းသူတွေပဲ ပါတယ်။

လွမ်းတယ်
မမခင်ဦးစံပယ်။

ဆန်ဖရန်စစ္စကို
ဂိုးလ်းဒင်းဂိတ်တံတားပေါ်က လှမ်းကြည့်ရင်
ကမ္ဘာကျော် အယ်လ်ကာထရက်ဇ် * အကျဉ်းထောင်ဟောင်းကြီး
မလွမ်းကောင်း လွမ်းကောင်း မြင်ရမယ်။
သူရို့စခန်း သူရို့လမ်းမှာတော့
နိုင်ငံရေးအကျဉ်းသားဆိုတာ မရှိ
မသိ။

ဒါပေမဲ့
မြန်မာပြည်က အကျဉ်းထောင်တွေ
ကျနော် လွမ်းပါရဲ့။

ကျနော်တို့ အနာဂတ်ကို
သေနတ်နဲ့ ပိတ်လှောင်ထားခဲ့တဲ့
အကျဉ်းထောင်တွေ ကျနော် လွမ်းပါရဲ့။

ဂျူးလိယက်ဖူးချစ်ရဲ့
ကြိုးစင်ပေါ်ကမှတ်တမ်း
မလွမ်းဘူးလား။

ဗိုလ်ကြီးအုန်းကျော်မြင့်ရဲ့
နေဝင်း-စန်းယု ဖြုတ်ချရေးစိတ်ဓာတ်
မလွမ်းဘူးလား။

ရဲဘော် ဆလိုင်းတင်မောင်ဦးရဲ့
ညီမလေးမလှမြိုင်
မလွမ်းဘူးလား။

ဒဏ်ရာအနာတရနဲ့
ကန္တာရနှစ်တွေကို
မလွမ်းဘူးလား မမခင်ဦးစံပယ်ရယ်။

တကယ်တော့
ခက်ခဲနက်နဲတဲ့ ခေတ်ပေါ်ကဗျာတစ်ပုဒ်ကို
ခံစားမှုနဲ့ နားလည်သလိုမျိုး။

စစ်အစိုးရ အကျဉ်းထောင်တွေကို
နာကြည်းမှုနဲ့ လွမ်းတယ်။

နာကြည်းမှုဟာ
အလွမ်းရဲ့ဋီကာပေါ့့။

စစ်အစိုးရ အကျဉ်းထောင်တွေဟာ
အရက်စက်ဆုံး
ဖက်ဆစ်ငရဲခန်း။

ဒီ ငရဲခန်း ဖက်ဆစ်လမ်းမှာ
ကြယ်တွေလည်း အကြွေကြမ်းခဲ့။

ဥပမာ
မောင်သော်က

ဥပမာ
မစိမ်းပင်

နောက်ဆုံးရင်ခုန်သံ
နောက်ဆုံးအိပ်မက်
နောက်ဆုံးထွက်သက်အထိ
ဖက်ဆစ်ငရဲခန်းကို အန်တုခဲ့။

မမခင်ဦးစံပယ်ရယ်
စစ်ကျွန်ခေတ်မှာ
စစ်မှန်တဲ့ သမိုင်းအမှန်တရားတွေ
မြစ်ရေအလျဉ်လို
ကျနော်တို့ တသွင်သွင်စီးခဲ့ကြတာပါ။

"ပြည်သူချစ်လျှင်၊ ကမ္ပည်းတင်မည်" တဲ့
ရင်ထဲမြစ် က
ရေစီးသန်ရဲ့။

ရေစီးသန်သန်
ရင်ဘတ်နဲ့ ခံရင်
ခံတဲ့ ရင်ဘတ်
ဗြန်းဗြန်း ကွဲမတဲ့။

လွမ်းများလည်း လွမ်းပါရဲ့
မမခင်ဦးစံပယ်ရယ်
ကျနော်တို့ဟာ
ကျနော်တို့ ခေတ်မှာ
ခမ်းကိုလည်း ချစ်ခဲ့ကြပါပြီ
ပဲပုပ်ကိုလည်း ချစ်ခဲ့ကြပါပြီ။

ခမ်းကိုလည်း လွမ်းခဲ့ကြပါပြီ
ပဲပုပ်ကိုလည်း လွမ်းခဲ့ကြပါပြီ။

စစ်အစိုးရခေတ်
လူထုအစိုးရခေတ်
ခေတ်မြိုင်လယ်မှာ
အလွမ်းမှလွဲ၍ အခြားဆုံးရှုံးစရာ မရှိ
နိုင်ငံရေးအကျဉ်းသား မရှိ(မရှိ)တဲ့နေ့
ဘယ်နေ့လဲ
မမခင်ဦးစံပယ် ဖြေပါ။ ။

အောင််််ဝေးး
(ဖေဖော်ဝါရီ ၁၊ ၂၀၂၀)
* Alcatraz prison