အောင််််ဝေး - သေနင်္ဂဗျူဟာမြောက်အလွမ်း (နိဂုံး)

အောင််််ဝေး - သေနင်္ဂဗျူဟာမြောက်အလွမ်း (နိဂုံး)

(မိုးမခ) မတ်် ၁၁၊ ၂၀၂၀

( ၉ )

တိုင်းပြည် ငြိမ်းချမ်းအောင် လုပ်ကြစို့
မမခင်ဦးစံပယ်ရေ။
ဒေါ်အောင်ဆန်းစုကြည်လည်း
ပင်ပန်းလှပြီ။

ကတုတ်ကျင်းတွေလည်း
နက်လွန်းမက နက်လွန်းလှပြီ။

" ငြိမ်းချမ်းရေး တန်ဖိုးအတက်ဆုံး
အချိန်ဆိုတာ
ကတုတ်ကျင်းတွေ
နက်နက်တူးရတဲ့အချိန်ပေါ့" တဲ့
မမခင်ဦးစံပယ်ရယ်။

မငြိမ်းချမ်းသေးသမျှ
စစ်နဲ့ မွေးတဲ့
သွေးမြစ် တသွင်သွင်
ရာဇဝင်မှာ
ရင်ကွဲပက်လက်
ညတွေနက်ဆဲ
ခက်တယ် မမခင်ဦးစံပယ်။

အချစ်နဲ့ ငြိမ်းချမ်းရေး
တေးသစ်ချိုချို၊ မဆိုချင်ဘူလား။

အမုန်း မထား၊ နှလုံးသားမှာ
အပြုံးများ မပွင့်ချင်ဘူးလား။

နွေဦးလရောင်၊ အိမ်မိုးခေါင်
ဒေါင်းတစ်ကောင်နဲ့ ပျားရည်တစ်အိုး
ခေါင်းလောင်း မထိုးချင်ဘူးလား။

မမခင်ဦးစံပယ်ရယ်
မလွမ်းဘူးလား
ပြည်တွင်းငြိမ်းချမ်းရေး။

ငြိမ်းချမ်းရေး
မလွမ်းဘူးလား မမခင်ဦးစံပယ်။

ငြိမ်းချမ်းရေး
ပြည်တွင်းငြိမ်းချမ်းရေးဆိုတာ
ပျောက်နေတဲ့လမ်းလား။

ပြည်တွင်းငြိမ်းချမ်းရေး
ငြိမ်းချမ်းရေးဆိုတာ
ရှာမတွေ့တဲ့လမ်းလား။

ကျနော်တို့ခေတ်မှာ
ကျနော်တို့ဟာ
လမ်းပျောက်တဲ့မြိုင်လား
မမခင်ဦးစံပယ်။

"I'd lost my way on the moor for twenty years."

"ကျမ လမ်းပျောက်နေတာ
အနှစ်နှစ်ဆယ်" တဲ့

လေထန်ကုန်း * ဝတ္ထုကြီးထဲက
ကက်သရင်းအန်းရှောရဲ့ အသံ။

နှင်းသည်းလေထန် ညတစ်ည
ပြတင်းမှန်စ တံခါးဝ
ဝက်ဝံလက်နဲ့ ကုတ်ခြစ်တယ်။

မမခင်ဦးစံပယ်ရေ
ပြည်တွင်းစစ်
၁၉၄၈- ၂၀၂၀
အနှစ် ခုနစ်ဆယ်။

ကက်သရင်းအန်းရှောရယ်
ငါတို့ လမ်းပျောက်နေတာ
အနှစ် ခုနစ်ဆယ်ပါ။

အနှစ် ခုနစ်ဆယ်
ငါတို့ လမ်းပျောက်နေတာပါကွယ်။

ငြိမ်းချမ်းရေးဆိုတာ
တောလမ်းကလေးမှာ
တောပန်းဖွေးဖွေးတွေကလည်း မွှေးလို့
လေညင်းအေးချို၊ ညနေညို
ချစ်သူလည်ပင်း ခိုစီး
တေးဆို ညည်းရတဲ့
ဘဝခရီးမျိုးပဲ ဖြစ်သင့်ပါရဲ့။

ငြိမ်းချမ်းရေးခရီး
မပြီးဆုံးတဲ့ အချစ်လေ
ခေတ်ကာလရေစီးကြောင်းမှာ
မြစ်တွေဘယ်လို ပြောင်းပြောင်း
စစ်တွေ ဟောင်းပါစေ
စစ်တွေ ညောင်းပါစေ
စစ်တွေ ရှောင်းပါစေ။
အချစ်ကြောင့် မကြေ
စစ်ကြောင့် သေတာပါ
မမခင်ဦးစံပယ်။

စစ်ဆိုတာ
သွေးထွက်တဲ့နိုင်ငံရေး တဲ့။

အဲဒီသွေးတွေလည်း
မထွက်စေချင်တော့ပါဘူး
မမခင်ဦးစံပယ်ရယ်။

"စစ်ဆိုသည်မှာ အနုတ်လက္ခဏာ
ငြိမ်းချမ်းရေးသာ အပေါင်းလက္ခဏာ
စစ်ကို မလိုပါ
ငြိမ်းချမ်းရေးသာ ပေးကြပါ"

ငြိမ်းချမ်းရေးရတဲ့အခါ
ချစ်သူလမ်းကြားမှာ
အနမ်းတွေ ပွင့်လာမယ်။

ငြိမ်းချမ်းရေးရတဲ့အခါ
အမေ့မျက်ဝန်းမှာ
လရောင် ရွှန်းမြနေမယ်။

ငြိမ်းချမ်းရေးရတဲ့အခါ
စမ်းချောင်းကလေးနဲ့ အပြေးပြိုင်
နွေဦးအနိုင်ရမယ်။

ငြိမ်းချမ်းရေးရတဲ့အခါ
စာသင်ခန်းအဝမှာ
အဘမှိုင်း ကိုယ်ထင်ပြလိမ့်မယ်။

ငြိမ်းချမ်းရေးရတဲ့အခါ
အဲဒီအခါ
မငြိမ်းချမ်းစဉ်က အနိဋ္ဌာရုံတွေ
လောကနံရံပေါ်က
ကွာကျကုန်လိမ့်မယ်။

ခက်တာက
မမခင်ဦးစံပယ်ရယ်
ကျနော်တို့ မငြိမ်းချမ်းသေးတာပဲ။

ကျနော်တို့ မငြိမ်းချမ်းသေးဘူး
မမခင်ဦးစံပယ်။

ငြိမ်းချမ်းရေးကို
တောင်းယူလို့မရ
တိုက်ယူမှ ရမတဲ့။

ငြိမ်းချမ်းရေးအတွက်
တိုက်တဲ့စစ်တွေလည်း
သွေးမြစ်ထဲ တလျဉ်လျဉ်
တေးသစ် မဆင်နိုင်ပါဘူး။

ဒါပေမဲ့ မမခင်ဦးစံပယ်
စစ်မှန်တဲ့တော်လှန်ရေးတွေကတော့
ငြိမ်းချမ်းရေးကို ဆောင်ကြဉ်းနိုင်သတဲ့။

စစ်မှန်တဲ့တော်လှန်ရေး
ကျနော် ယုံကြည်တယ်။

အားတော့နာပါရဲ့
လီနင် ပဲ ကိုးကားရတော့မယ်
မမခင်ဦးစံပယ်။

မတ်ဝါဒရဲ့ အခြေခံတရားဟာ
အကြမ်းဖက်တော်လှန်ရေးဖြစ်သတဲ့။

ချစ်လှစွာသောပြည်ပြေး
အဝေးရောက်နှလုံးသားဟာ
မစ်ရှီဂန်မဲဇာမှာ
ဟိုတုန်းခါ ငယ်ခဲ့ဖူတဲ့ဘဝ
နီခဲ့ဖူးတဲ့ညတွေ
ပြန်အမှတ်ရတယ်။

"မတ်ဝါဒရဲ့ အခြေခံတရားဟာ
အကြမ်းဖက်တော်လှန်ရေးဖြစ်တယ်"

နှလုံးသားနံရံမှာ ဓားထစ်
ဗော်လ်ရှီဗစ်ဖြစ်ဖူးတဲ့
နွေဦးမျှော်ညတွေ။

တံတားအောက်မှာ
ခေတ်တွေ စီးဆင်းသွားခဲ့ကြပြီ။

တံတားပေါ်မှာ
စနစ်တွေ ပျံသန်းနေတုန်း။

မမခင်ဦးစံပယ်ရယ်
ဒီနေ့ တော်လှန်ရေးက
အကြမ်းမဖက်တဲ့တော်လှန်ရေး။

မမခင်ဦးစံပယ်ရယ်
အကြမ်းမဖက် တော်လှန်ရေးဆိုတာ
ဒေါ်အောင်ဆန်းစုကြည်တော်လှန်ရေးပေါ့
လက်နက်မကိုင်တဲ့တော်လှန်ရေး။

မမခင်ဦးစံပယ်ရယ်
အကြမ်းမဖက် တော်လှန်ရေးဆိုတာ
စိတ်ဓာတ်တော်လှန်ရေး
ဒီမိုကရေစီတော်လှန်ရေးပေါ့။

ကျနော်တို့ ယုံကြည်ခဲ့ကြတယ်
မဟတ္တမဂန္ဒီ
မာတင်လူသာကင်း
နယ်လ်ဆင်မင်ဒဲလား။

ဒေါ်အောင်ဆန်းစုကြည်လည်း
ယုံကြည်ခဲ့မှာပဲလေ
ကျနော်တို့ကလည်း
ဒေါ်အောင်ဆန်းစုကြည်ကို ယုံကြည်ခဲ့တာပဲလေ။

၈-၈-၈၈
ကျနော်တို့ရဲ့
အကြမ်းမဖက်တော်လှန်ရေး။

၈-၈-၈၈
ကျနော်တို့ရဲ့
ဒီမိုကရေစီတော်လှန်ရေး။

၈-၈-၈၈
ကျနော်တို့ရဲ့
လူထုအရေးတော်ပုံ။

မမခင်ဦးစံပယ်ရယ်
လွမ်းလို့မကုန်တဲ့ အလွမ်းတွေ
သေနင်္ဂဗျူဟာမြောက်ပါရဲ့။

သြဂုတ်လရဲ့ မျက်ရည်တွေ
ကျနော် လွမ်းတယ်။

စစ်စခန်းကနေ
လမ်းပေါ်ထွက်လာတဲ့ စစ်သားတွေ
ကျနော် လွမ်းတယ်။

ရွှေတိဂုံအနောက်မုခ်မိန့်ခွန်း
ကျနော် လွမ်းတယ်။

ခွပ်ဒေါင်းအလံနီနီ၊ ရင်ပြင်နီက
၇ ကြိမ်မြောက် ဗ က သ (ဗကသများအဖွဲ့ချုပ်)ညီလာခံ
ကျနော် လွမ်းတယ်။

စက်တင်ဘာ(၁၈)ရက်
သွေးနဲ့ မျက်ရည်အလိမ်းလိမ်း
အာဏာသိမ်းတဲ့
စစ်တပ်အစိမ်း။

မှောင်မှောင်ပိန်းပိန်း ညနေခင်း
ယမ်းနံ့ ညှီနံ့ တသင်းသင်း
စစ်ချီသီချင်းတွေ
အား- မုန်းလိုက်တာ။

အမုန်းနဲ့ ပဲ
ပုန်းရ ရှောင်ရ၊ တိမ်းရတဲ့ညတွေ
ကျနော် လွမ်းတယ်။

အလွမ်းက ကူးစက်တယ်
မမခင်ဦးစံပယ်။

အလွမ်းကူးစက်၊ သွေးကူးစက်လို့
အိပ်မက်က
တက္ကသိုလ်ရိပ်သာလမ်းဘက် ရောက်သွားတယ်။

မ ဆ လ တစ်ခေတ်မှာ
ရွတတဖြစ်သူတွေ
နေရစ်ခဲ့ကြတော့။

ငြိမ်ပိ ** တစ်ခေတ်မှာ
ငြိမ်ကြည့်ဖြစ်နေတဲ့သူတွေ
နေရစ်ခဲ့ကြတော့။

မမခင်ဦးစံပယ်ရယ်
ကျနော်တို့ဟာ
တရားသေဝါဒသမားတွေလည်း
မဟုတ်ရပါဘူး။

ခေတ်ကာလခြားတော့
မတ်ဝါဒသမားတွေလည်း
အရေးတော်ပုံနဲ့ အတူ ရွေ့လျား
စစ်အာဏာရှင်စနစ်ဖြုတ်ချရေးမှာ
အရေးတော်ပုံတပ်သား
ဒီမိုကရေစီဝါဒသမားတွေ ဖြစ်ကြပေါ့။

ငယ်ငယ်တုန်းက ကွန်မြူနစ်
ကြီးလာတော့ ဒီမိုကရက်။

ဒီမိုကရေစီတော်လှန်ရေးမှာ
ကြွေးကြော်လှုပ်ရှား
အကြမ်းမဖက်သမား။

ဒါပေမဲ့ မမခင်ဦးစံပယ်ရယ်
အကြမ်းမဖက်လည်း
ကျနော်တို့အိပ်မက်က
သွေးတွေ ပန်းထွက်တယ်။

သူတို့က အကြမ်းဖက်တယ်
စစ်တပ်က အကြမ်းဖက်တယ်
မမခင်ဦးစံပယ်။

"တိုင်းပြည်ရဲ့ ဝမ်းဗိုက်ကို
မီးလောင်တိုက်သွင်းတဲ့အခါ

ကျနော်ချစ်တဲ့လွယ်အိတ်ကလေးဟာ
အိမ်နံရံထက်မှာ ကျန်ခဲ့ပေါ့" တဲ့
ကျနော် လွမ်းတယ်။

"ဘဝမှာ ပွဲကြည့်သူဟူ၍ မရှိ
ကားလိပ်လည်း ပွင့်ပြီ
လူသားအပေါင်းတို့
ခင်ဗျားတို့ကို ကျနော်ချစ်ခဲ့တယ်
နိုးနိုးကြားကြားရှိကြလော့" တဲ့

ကျနော် လွမ်းတယ်။
"ဆူးစူး၍လျှင်၊ အပ်နဲ့ထွင်သည်
အသင် ဘာပြောချင်သနည်း" တဲ့
ကျနော် လွမ်းတယ်။

အလွမ်းက ကူးစက်တယ်
မမခင်ဦးစံပယ်။

အလွမ်းကူးစက်၊ သွေးကူးစက်လို့
အိပ်မက်က
ရွှေဝါရောင်တော်လှန်ရေးထိပ် ရောက်သွားရဲ့
မမခင်ဦးစံပယ်။

သင်္ကန်းတွေ သွေးစွန်းတဲ့တိုင်းပြည်ပါ
မမခင်ဦးစံပယ်။
ရန်-ငါ မပြတ်လို့
သံဃာ အသတ်ခံရတဲ့တိုင်းပြည်ပါ
မမခင်ဦးစံပယ်။

နှလုံးသားထဲ သွေးချောင်းစီး
လမ်းမကြီး နစ်ပြီ။

မိုးကြီးတစ်မ ရွာချ
လောကကြီး နစ်ပြီ။

သွေးက မတိတ်တော့ဘူးလား
မမှိတ်မသုန်ပဲ
အရေးတော်ပုံ ရင်ခုန်ခဲ့ပါတယ်
မမခင်ဦးစံပယ်။

အရေးတော်ပုံ ယုံကြည်ခဲ့ပါတယ်
မမခင်ဦးစံပယ်။

မစ်ရှီဂန်မဲဇာမှာ
အသည်းနာ ကမ္ဘာမကြေ
လွမ်းကြွေးတွေ တင်တယ် မမခင်ဦးစံပယ်။

မကြားဝံ့ မနာသာ
နားနဲ့ မနာ၊ ဖဝါးနဲ့ နာပါဦး
မမခင်ဦးစံပယ်။

"တော်လှန်ရေးရဲ့ အခြေခံပြဿနာဟာ
အာဏာပြဿနာဖြစ်တယ်" တဲ့
လီနင်ရဲ့ စကား။

နိုင်ငံရေးဆိုတာ
အာဏာအရေး
အာဏာအရေးဆိုတာ
နိုင်ငံရေးပဲ
ကျနော်တို့ အာဏာရမှဖြစ်မယ်
မမခင်ဦးစံပယ်။

စစ်အာဏာရှင်စနစ် အပြီးတိုင်ဖြုတ်ချဖို့
ကျနော်တို့ အာဏာရမှဖြစ်မယ်
မမခင်ဦးစံပယ်။

ဒီနေ့နိုင်ငံရေးဟာ
ငြိမ်းချမ်းရေးကြိုးပမ်းတဲ့ နိုင်ငံရေးပဲ။

စစ်မှန်တဲ့ငြိမ်းချမ်းရေးရဖို့
ပြည်သူတွေ အာဏာရမှဖြစ်မယ်
မမခင်ဦးစံပယ်။

ကျနော်တို့ခေတ်မှာ
ကျနော်တို့ဟာ
စစ်ကို မလိုလားကြပါဘူး။

စစ်ဗိုလ် စစ်မယားတွေ
လွှတ်တော်ထဲ
ထိုင် ထ လုပ်နေမယ့်အစား
တန်းလျား ပြန်ကြပါတော့လား။

အခုအချိန်မှာ
ပြည်တွင်းငြိမ်းချမ်းရေးကလွဲရင်
ဘယ်အနမ်းမှ မနွေးဘူး
ဘယ်ပန်းမှလည်း မမွှေးဘူး။

တိုင်းပြည်အေးချမ်းအောင်သာလုပ်ကြစို့
မမခင်ဦးစံပယ်ရေ။

ဒေါ်အောင်ဆန်းစုကြည်လည်း
ပင်ပန်းလှပြီ။

ပြည်သူတွေလည်း
ဆင်းရဲလှပြီ။

ငြိမ်းချမ်းရေးဆိုတာ
လွမ်းရင် လွမ်းသလောက်
ပွင့်တဲ့ပန်း။

စစ်တန်းလျားမှာ ပွင့်ပွင့်
ခေတ်ကမ်းပါးမှာ ပွင့်ပွင့်
အချစ်နဲ့ပွင့်ရင်
ပွင့်တဲ့ပန်းတိုင်း
ငြိမ်းချမ်းရေးနဲ့ ၊ စိမ်းလန်းမွှေးမြ
လှပနေမှာပါပဲ မမခင်ဦးစံပယ်။ ။


(ပြီးပါပြီ)
(မတ် ၆၊ ၂၀၂၀)
* Emily Bronte's "Wuthering Heights"(1847)
** နိုင်ငတော်ငြိမ်ဝပ်ပိပြားမှုတည်ဆောက်ရေးအဖွဲ့( န ဝ တ )