လူလူ - မနှင်းဆီနှင့်စကားစမြည်

Sir Gerald Festus Kelly, lissllewellyn.com

*မနှင်းဆီနှင့်စကားစမြည်***

လူလူ

(မိုးမခ) ဇွန် ၁၀၊ ၊၂၀၂၀

နန်းတော်ရှေ့သီချင်းတွေထဲမှာဝဲခွင့်မရှိခဲ့တဲ့

ဟင်္သာတစ်ကောင်ပါ မနှင်းဆီ။

မူးများမူးမလားလို့

အိမ်ရှေ့မင်းထန်းတောထဲမှာ

စိတ်နှစ်ပြီး ဂန္တဝင်တွေသောက်ခဲ့မိရဲ့ 

ခေတ်နဲ့စနစ်ကြား

လင်းလိုက် မှောင်လိုက်နဲ့

မနုဿစိတ်ရိုင်းတွေထကြွလာလေတိုင်း

ရီဝေရီဝေနဲ့မန္တလေးကိုပွေ့ဖက်နှုမ်းရှုံ့ရင်း

မန္တလေးကိုချစ်တဲ့ ဟောဒီရင်ဘတ်ကြီးနဲ့

ဂန္တဝင်မြို့သားတစ်ယောက်

မော်ဒန်တွေထဲ ငုပ်လျှိုးခဲ့လိုက်တယ် ။

မနှင်းဆီရေ

ဆံဖြူသွားကျိုးဖို့ ဇရာနဲ့စာချုပ်ချုပ်ထားတဲ့

မန္တလာရဲ့ဟင်္သာတစ်ကောင်ပေါ့  

ဒီဟင်္သာရဲ့ နှုတ်ဖျားမှာကိုက်ချီလာတာ

သံလွင်တစ်ခက် အောင်သပြေတစ်ခက်

မဟုတ်ခဲ့တောင် 

ရသစုံကဗျာတစ်ခက်တော့ဖြစ်ကောင်းဖြစ်မယ်။

မနှင်းဆီရေ

တကယ်တော့ မန္တလာကိုချစ်တဲ့စိတ်နဲ့

ဒီဟင်္သာချီလာတဲ့ ကဗျာတစ်ခက်ဟာ

နိဗ္ဗာန်တစ်ဝက်စာပါပဲ ။ 

           

မနှင်းဆီရေ

ဝဲပျံခဲ့ဖူးပါရဲ့

ကြည်စင်တဲ့အပြုံးများ

ရိုးသားခြင်းအတိနဲ့ဖူးပွင့်ခဲ့သော မြို့လေးသို့ ။

မနှင်းဆီရေ

ကျက်စားခဲ့ဖူးပါရဲ့

ဝါကြွားပလွှားခြင်းမရှိ အရှိတရားတွေနှင့်

ပွင့်လင်းလွန်းသောမြို့လေးမှာပေါ့။

မနှင်းဆီရေ 

ဒီမြို့လေးဟာချစ်ခင်တတ်လွန်းတဲ့

ကူညီဖေးမခြင်းများနှင့်

လူပီသသောမြို့လေးပေါ့။

မနှင်းဆီရေ

မြတ်နိုးရလွန်းတဲ့ ဒီမြို့လေးဟာ

အတုမရှိသော မဟာမြတ်မုနိဘုရားရှင်

တန်ခိုးတော်အောက်မှာ

ရင်ငွေ့ခိုလှုံနေတဲ့မြို့လေးပေါ့။

မနှင်းဆီရေ

ကြည်နူးရဖူးပါရဲ့

စာအံသံတွေခြိမ့်ခြိမ့်ညံလို့

ဆည်းလည်းရှိုက်သံတွေလွင့်ပျံ့နေေသာ

အဲဒီမြို့လေးရဲ့ 

ချစ်စရာဓလေ့တွေကြားမှာထဲမှာပေါ့ ။

မနှင်းဆီရေ

တကယ်ဆိုအဲဒီမြို့လေးဟာ

လေးစားရလွန်းတဲ့

နန်းတော်ရှေ့ဆရာတင်

ဂုဏ်တင်ခဲ့သောမြို့လေးပေါ့ ။

သက္ကရာဇ်တွေချီပိုးလို့

အဲဒီမြို့လေးထဲ

မန္တလာဖွားဟင်္သာတစ်ကောင်

အိပ်မက်တွေထမ်းပိုးရင်းပျံဝဲခဲ့  ။

မနှင်းဆီရေ

ဟင်္သာတစ်ကောင့်ရဲ့ ရင်အံဝှက်ထဲ

စာပေဂီတအနုရသများစွာစီးဆင်းဖို့

မန္တလေးကတိတ်တဆိတ် 

ပြုစားခဲ့လေရဲ့ ။

မနှင်းဆီရေ

နှုတ်ဆက်ခဲ့ပါရဲ့

ဟင်္သာတစ်ကောင်ရဲ့

ရင်ဘတ်ထဲထည့်ကာသုတ်ချီလာတဲ့

ရွှေခြေကျင်းသံတွေညံခဲ့သောမြို့လေး

ငွေငန်းမြို့မနှင့် ပဏာရသောမြို့လေး

နောက်ဆုံးမင်းနေပြည် 

တည်ခဲ့လေသောမြို့လေး

အဲ့ဒီမြို့လေး

အုတ်ကျစ်ကျော်အေး မန္တလေးလို့

သတင်းမွှေးခဲ့တယ် ဆိုတာ

တစ်လောကလုံးဆီပျံဝဲဖြန့်ကျက်ဖို့

ဟင်္သာငယ် ခရီးဆက်ပါရစေအုံးလေ ။

မနှင်းဆီရေ

နွေတွေ မိုးတွေ ဆောင်းတွေ 

အချိန်ကိုတွယ်ဖက်လို့

ဟောင်းနေသစ်နေဆဲပဲလေ ။

မနှင်းဆီရေ

ရှေးခေတ်ရှေးအခါက

၇ တောင်ကို တစ်တာလို့တွက်သတဲ့

တာပေါင်း ၂၄၀၀ ရှိတဲ့မန္တလေးဟာ

ယဉ်ကျေးပျူငှာသောရင်ဝယ်သားတွေနဲ့

စည်ပင်ရွှင်လန်းလို့

သာယာပြန့်ပြူးတဲ့အရပ်ဒေသဖြစ်ခဲ့ရဲ့လေ

အခုတော့

တာပေါင်း ၂၄၀၀ ရှိတဲ့မန္တလေးဟာ

ပိုးပုရွက် ဖြူနီနက်တွေ

ဟိုတစ်ကွက်ဒီတစ်ကွက်အိမ်ဖွဲ့လှိုက်စားခြင်းများမှာ

နာလို့ဖျားလို့ပေါ့ 

တကယ်တော့ မနှင်းဆီရေ 

မန္တလေးဟာ မန္တလေးပဲဆိုပေမယ့်

မန္တလေးကိုချစ်တဲ့စိတ်က

မန္တလေးအငွေ့အသက်တွေပြယ်စပြုလာတဲ့

မန္တလေးကို 

မန္တလေးလို မန္တလေးပဲဖြစ်စေချင်ခဲ့တယ်ဆိုတာ

မန္တလေးလည်း ရိပ်စားမိမယ်ထင်ရဲ့ ။

လူလူ

(4-11-2018)11:45Am