မောင်သော်တာ - ဗော်လံတီယာနတ်သား
ဗော်လံတီယာနတ်သား
မောင်သော်တာ
(မိုးမခ) အောက်တိုဘာ ၂၊ ၂၀၂၀
ကောင်းကင်ဘုံကခုန်ချလာတာမဟုတ်ဘူး၊ ကောင်းကင်ဘုံကိုပုတ်နှိုးနေကြတာ
ဥုံ ဖွ ဆိုပြီးကိုယ်ရောင်ဝါဝင်း ထင်လင်းမြင်စေသူတွေပေါ့
ကြောက်စိတ်တွေနဲ့ချောက်ထဲကိုသူတို့အသက်လေးတွေဖဲ့ချပေးနေကြတယ်
ဆွဲတက်ခဲ့ဖို့သူတို့ရဲ့ခေါ်သံတွေ
သူတို့ကိုယ်တိုင်သူတို့ရဲ့အရေပြားကသူတို့အတွက်ကျည်ကာဝတ်စုံလို
အိမ်မှာပဲနေကြဖို့လမ်းရဲ့အလျားအတိုင်းဆက်သွားနေကြတယ်
ရှေ့တန်းတိုက်စစ်ထဲမရောက်တရောက်ကြားမှာ
သူတို့လူလည်းကိုယ့်ဘက်သား၊ ကိုယ့်လူလည်းကိုယ့်ဘက်သားဆိုတဲ့စိတ်နဲ့
သူ့ဆွေသူ့မျိုး
သူ့မိသူ့ဖ၊ သူ့သွေး သူ့သားလိုမှတ်စိတ်နဲ့
ဘုရားဟောတဲ့သံသရာကြောထဲကဆွေမျိုးတွေကိုရှာဖွေဆွဲထုတ်နေကြတယ်
အနီးဆုံးပစ်မှတ်တွေရှေ့ကိုထွက်ကာကွယ်ပေးနေကြတယ်
ကြပ်နေတဲ့ဘဝတွေချည်းထဲမှာညှပ်နေတဲ့သူတွေကိုအရင်ဆွဲထုတ်ကြ..ဆိုပဲ
လက်ခမောင်းခတ်မပြဘဲလက်မောင်းသွေးကိုဖောက်တိုက်ကြမယ်..ဆိုပဲ
ရန်သူ့လက်ထဲကကိုယ့်ရဲဘော်ကိုကယ်တင်ဖို့
တပ်ရင်းတစ်ရင်းလုံးသတ်ကွင်းထဲပြေးဝင်ကြမယ်ဆိုပဲ
ဘယ်သူရဲကောင်းအမှတ်တံဆိပ်မှမလိုပါဘူး..ဆိုပဲ
ရေတံခွန်ပေါ်ကအပြိုင်ခုန်ချလိုက်တဲ့ချွေးစက်တွေလိုပဲ
နေလုံးကြီးကျောခိုင်းနေမှရောင်စဉ်ခုနစ်ဖြာ ဖြာလို့လေ
သူတို့ရုပ်ခန္ဓာကိုမြေမှုန့်လိုထုချေပြီးဒုက္ခတွင်းတွေကိုဖို့ပေးနေကြတယ်
ဘယ်သူဘယ်ဝါရယ်လို့အသိအမှတ်မခံကြဘူး
ဘယ်အလံ ဘယ်ဆိုင်းဘုတ်ရယ်လို့လည်းပြေးမထူကြတဲ့နတ်သားတွေပဲ
သူတို့ရဲ့နှလုံးသားကဘုရားလောင်းပါရမီဖြည့်ကျင့်သလို
လောကကြီးအတွက်
ကမ္ဘာမြေအတွက်
ငြိမ်းချမ်းရေးအတွက်သက်သက်ပဲတဲ့
လက်ခုပ်သံတွေနဲ့သူတို့ကိုဂုဏ်ပြုဖို့
ခင်များရဲ့လက်ကိုစက္ကန့် ၂ဝ ကြာအောင်ဆေးကြောသန့်စင်လိုက်ပါလေ
မောင်သော်တာ
30.9.2020