နေသွင်ညိဏ်း - သူရဲဘောကြောင်သူများမဖြစ်ပါစေနှင့် (မင်းသားကြီး အာနိုး ရေးတဲ့စာ)

သူရဲဘောကြောင်သူများမဖြစ်ပါစေနှင့်

 (မင်းသားကြီး အာနိုး ရေးတဲ့စာ)

နေသွင်ညိဏ်း

(မိုးမခ) ဇန်နဝါရီ ၁၀၊ ၂၀၂၁

(သမ္မတရွေးချယ်ရေးအဖွဲ့ မဲမပေးခင် တစ်ရက်အလိုမှာ အီကိုနော့မစ်မဂ္ဂဇင်းမှာ မင်းသားကြီးအာနိုး (Arnold Schwarzenegger) ရဲ့ ဆောင်းပါးကို ဖော်ပြခဲ့တယ်။ ၂၀၀၃ ကနေ ၂၀၁၁ ခုနှစ်အထိ ကယ်လီဖိုးနီးယားရဲ့အုပ်ချုပ်ရေးမှူးအဖြစ် တာဝန်ထမ်းဆောင်ခဲ့ဖူးပြီး၊  ရီပက်ဘလစ်ကန်ပါတီဝင် တစ်ယောက်ဖြစ်တဲ့အာနိုးက ရီပက်ဘလစ်ကန် သမ္မတဒေါ်နယ်ထရမ့်နဲ့ သူ့ပါတီကို ပြင်းပြင်းထန်ထန် ဝေဖန်သတိပေးတဲ့ ဆောင်းပါးဖြစ်ပါတယ်။)

အမေရိကန်ပြည်ထောင်စုဆိုတာ ကျနော့်အချစ်ဦး။ အမေရိကန်မြေပေါ်မှာ ကံကောင်းထောက်မလို့ အခြေချခွင့်မရခင်ကတည်းက တမ်းတမ်းစွဲခဲ့ရတာပါ။ ကျနော်ကျောင်းသားဘ၀မှာပထမဆုံးမြင်ဖူးတဲ့ အမေရိကန်မြေပေါ်က မိုးမျှော်တိုက်ကြီးတွေ၊ ဧရာမတံတားကြီးတွေ၊ ကာဒယ်လစ်ကားကြီးတွေ၊ ပင် လယ်ကမ်းခြေ၊ ဟောလိ၀ုဒ်တို့က ကျနော့် ငယ်ကျွမ်းဆွေတွေပေါ့။ 

အမေရိကန် ပြည်ထောင်စုကို ထူထောင်ခဲ့ကြပုံ၊ နိုင်ငံ့ခေါင်းဆောင် ဖခင်ကြီးတွေရဲ့ အမြော်အမြင်ကြီးမားပုံ၊ လူတိုင်းကို အခွင့်အလမ်းတွေ ဖွင့်ပေးထားတဲ့ အကြောင်းတို့ကို သိလာတဲ့အခါမှာတော့ ညှို့ကွင်းထဲကနေ ရုန်းမထွက်ချင်လောက်အောင် အချစ်ပိုခဲ့ရတယ်။ ကံတရားက မျက်နှာသာပေးခဲ့လို့ လွန်ခဲ့တဲ့ နှစ် ၅၀လောက်ကတည်းက ဒီကို ပြောင်းရွှေ့အခြေချခဲ့တာမို့ အခုဆို နှစ်နှစ်ကာကာချစ်မိနေပါပြီ။

အခုတော့ ကျနော့်ချစ်တဲ့နိုင်ငံအတွက် တကယ်စိုးရိမ်မိလာတယ်။ ပြောင်းရွှေ့အခြေချလာသူ တစ်ယောက်၊ အမေရိကန်တစ်ယောက်၊ ရီပက်ဘလစ်ကန် တစ်ယောက်အနေနဲ့ ကျနော့်မှာ ပြောသင့်ပြောထိုက်တာကိုပြောဖို့ တာဝန်ရှိတယ်လို့လည်း ခံယူပါတယ်။ 

ကျနော်ဟာ ယိုယွင်းပျက်စီးမှုကြောင့် ဒီမိုကရေစီကိုလွှတ်ချလိုက်ရတဲ့နိုင်ငံမှာ ကြီးပြင်းအရွယ်ရောက်လာရပြီး အကျိုးဆက်တွေကို ခံစားခဲ့ဖူးပါတယ်။ ဒီအပေါ်မှာ ကျနော်အစွဲကြီးလွန်းတယ်လို့ ထင်ချင်ရင်လည်း ထင်ပါ။ ဒါပေမယ့် ဘယ်သူမဆို ကျနော့်လိုကြုံဖူးရင် ကျနော့်လိုပဲ စိတ်ပူမယ်ဆိုတာတော့ ကျနော်ပြောရဲပါတယ်။ 

ဒုတိယကမ္ဘာစစ်ကြီးပြီးလို့ နောက်ထပ် ၂ နှစ်အကြာ ၁၉၄၇ ခုနှစ်မှာကျနော့်ကိုမွေးပါတယ်။ ဩစတြီးယားနိုင်ငံမှာ အငတ်ဘေးဆိုက်နေချိန်ဖြစ်ပါတယ်။ ကျနော့်ပတ်ဝန်းကျင်မှာ ယောကျာ်းရင့်မာတွေဟာ သူတို့သမိုင်းမှာ အဆိုးယုတ်ဆုံးအစိုးရနဲ့ပူးပေါင်းပါဝင်ခဲ့ဖူးတဲ့အတွက် သိမ်ငယ်စိတ်ကို အရက်နဲ့မေ့ပျောက်ဖို့ကြိုးစားနေကြတယ်။ သူတို့ဟာ ဂျူး ၆ သန်းကိုသတ်ပစ်ပြီး၊ နောက်ထပ် အပြစ်မဲ့ပြည်သူ ၅ သန်းကို ညှင်းပန် နှိပ်စက်ခဲ့ကြတဲ့စနစ်ဆိုးကြီးရဲ့ အစိတ်အပိုင်းဖြစ်ခဲ့ကြတယ်မဟုတ်လား။ ဒီအတွက်လည်း ကမ္ဘာစစ်ကြီး ဖြစ်ခဲ့ပြီး လူပေါင်း ၇၅ သန်း သေဆုံးခဲ့ရတယ်။ သူတို့ အားလုံးဟာ အစွန်း ရောက် ဂျူးဆန့်ကျင်ရေးသမားတွေမဟုတ်သလို၊ နာဇီတွေလည်း မဟုတ်ခဲ့ကြပါဘူး။ တော်တော်များများဟာ  မကောင်းမှုထဲ ခြေလှမ်းကျွံမှန်းသိဖို့ အချိန်မရအောင် အခြေအနေက လွယ်ကူလွန်းခဲ့တယ်လေ။

အမေရိကန်ပြည်ထောင်စုမှာတော့ ဒီလောက်ဆိုးရွားတဲ့အခြေအထိမရောက်နိုင်မှန်း ကျနော်သိပါတယ်။ ဒါပေမယ့် အတ္တစိတ်တွေ၊ သံသယတွေက ပရဟိတနဲ့မျှော်လင့်ချက်တွေအပေါ်မှာ လွှမ်းမိုးသွားမယ်ဆိုရင် ကြောက်မက်ဖွယ်ရာအကျိုးဆက်တွေဖြစ်လာနိုင်တာကိုတော့ သင်ခန်းစာယူဖို့ ကောင်းတယ်ပါတယ်။ ကံကြမ္မာဆိုးထဲ ခြေလှမ်းမကျွံစေချင်ပါဘူး။

သမ္မတဒေါ်နယ်ထရမ့်ဟာ ရွေးကောက်ပွဲ (ဒီမိုကရေစီ) အပေါ် ကျနော်တို့ယုံကြည်မှုပျက်အောင် လုပ်ဆောင်နေတယ်။ ရာစုနှစ်ချီ သက်တမ်းရှည်နေပြီဖြစ်တဲ့ အမေရိကန်တန်ဖိုးတွေကို ပြတင်းပေါက်ကနေလွှင့်ပစ်ဖို့လုပ်နေတယ်။ ဒီလို လုပ်ရပ်မျိုးကိုပါတီစွဲမထားဘဲ နိုင်ငံရေးခေါင်းဆောင်တွေအားလုံးက မဖြစ်မနေ ရှုတ်ချရမယ်။ 

ရွေးကောက်ပွဲမသာမှုဆိုတဲ့ စွပ်စွဲချက်တွေကိုလည်း တရားရုံးတွေက ပယ်ချခဲ့တယ်။ (အမှုပေါင်း ၅၉ မှုကို တရားရုံးချုပ်အပါအဝင် တရားရုံးတွေက ပယ်ချခဲ့ပြီးဖြစ်ပါတယ်။) တရားရေးဌာနနဲ့ ရွေးကောက်ပွဲကော်မရှင်အဆင့်ဆင့်ကလည်း ပယ်ချခဲ့ကြပါတယ်။ ရွေးကောက်ပွဲမှာ ဘယ်သူအနိုင်ရသလဲဆိုတာကို ထပ်မေးစရာမလိုတာတောင် မပြီးနိုင်မစီးနိုင် ဆက်လုပ်နေတာက ဉာဏ်နည်း၊ မိုက်မဲ၊ အောက်တန်းကျ လှတယ်။ 

ပေါက်ကြားလာတဲ့ဖုန်းပြောဆိုမှုမှတ်တမ်းထဲမှာ ဂျော်ဂျီရာ ပြည်နယ်အတွင်းဝန် Brad Ra􀂝ensperger (ရွေး ကောက်ပွဲဆိုင်ရာ အဆင့်မြင့်ဆုံး အရာ ရှိ၊ ရီပက်ဘလစ်ကန်) ကို သမ္မတထရမ့်က ဖုန်းဆက်ပြီး မဲ ၁၁၇၈၀ ကို ရှာပေးစမ်းပါလို့တောင်းဆိုတာမျိုးဟာ အမေရိကန်သမိုင်းမှာ အကျည်းတန်လှတယ်။ တောင်ကယ်လီဖိုးနီးယားပြည်နယ်တက္ကသိုလ်မှာ ကျနော်ထူထောင်ထားတဲ့အဖွဲ့အစည်းက အရင်လတုန်းက မစ္စတာ Ra􀂝en- sperger ကို  Democracy Action Hero သူရဲကောင်းဆုကို ချီးမြှင့်ခဲ့ပါတယ်။ အမေရိကန်တန်ဖိုးတွေကိုကာကွယ်တဲ့ အဆင့်မြင့်အရာရှိတွေကို ပေးအပ်လေ့ရှိတဲ့ ဆုကို အရင်လက မပေးခဲ့ရင် အခုလောက်ဆိုရင် သူ့ကိုဆုပေးဖို့ ကျနော် ကြိုးပမ်းမှာပါ။ သူဟာ ထရမ့်ရဲ့ အမေရိကန်မဆန်တဲ့လုပ်ရပ်ကို ပြတ်ပြတ်သားသား ဆန့်ကျင်ခဲ့တဲ့သူရဲကောင်းစစ်စစ်ဖြစ်လို့ပါပဲ။ 

ဇန်နဝါရီ ၆ ရက်နေ့မှာ သမ္မတရွေးချယ်ရေးအဖွဲ့က မဲတွေကိုရေတွက်တဲ့အချိန်မှာ ခေါင်းဆောင်တွေအတွက် ရွေးချယ်ရမယ့်အချိန်ဖြစ်ပါတယ်။ ကျနော် သရုပ်ဆောင်ခဲ့တဲ့ Terminator ရုပ်ရှင်တစ်ကားရဲ့အမည်က စီရင် ချက်ချမည့်နေ့  “Judgment Day”  ဖြစ်ပါတယ်။ ဒါက ဟောလိဝုဒ်ပါ။ ဒါပေမယ့် ဇန်နဝါရီ ၆ ရက်နေ့ စီရင်ချက်ချမယ့်နေ့ကျတော့နိုင်ငံရေးသမားတွေနဲ့ ဆိုင်ပါတယ်။ မဲဆန္ဒရှင် ပြည်သူတွေဘက်က ရပ်တည်မလား။ ဒါမှမဟုတ် ကိုယ့်ပါတီနဲ့ အတ္တသမား သမ္မတဘက်က လိုက်မလားဆိုတာကို ရွေးချယ်ရမှာ ဖြစ်ပါတယ်။ 

ဇန်နဝါရီလ ၆ ရက်နေ့ကျရင် ပြည်သူ့လူထုရဲ့ ဆန္ဒကို ဆန့်ကျင်ချင်တဲ့ ကျနော့်ပါတီ (ရီပက်ဘလစ်ကန်) က ပုဂ္ဂိုလ်များရှိခဲ့ရင် တခါတည်းပြောချင်တာကတော့ ကျနော်တို့မြေးတွေခေတ်အထိ ခင်ဗျားတို့ကို ဗီလိန်တွေအဖြစ်သိနေကြလိမ့်မယ်။ ခင်ဗျားတို့ဟာ အမေရိကန်ပြည်ထောင်စုနဲ့ အမေရိကန် ပြည်သူတွေရဲ့ဆန္ဒကို ဆန့် ကျင်သူတွေအဖြစ် သမိုင်းမှာ နာမည်ဆိုးတွင်ရစ်ကြလိမ့်မယ်ဆိုတာပါပဲ။ တဘ၀လုံး ရှင်နေလျက်နဲ့သေကြရလိမ့်မယ်။ 

တခါက ဂျွန်အက်ဖ် ကနေဒီ ရေးခဲ့တဲ့  ရဲဝံ့စွန့်စားကြသူများ (Profiles in Courage) စာအုပ်ဟာ ကျနော့် အနှစ်သက်ဆုံး စာအုပ်တစ်အုပ်ဖြစ်သလို ပြည်သူလူထုအကျိုးကို သယ်ပိုးဖို့အတွက် ကျနော့်ကို လမ်းပြပေးခဲ့ပါတယ်။ ကျနော်တို့ နိုင်ငံရေးသမားတွေသာ လမ်းမှားကို လျောက်ပြီး မဲဆန္ ဒရှင်တွေကို ဆန့်ကျင်ကြမယ်ဆိုရင် နောက်ဆက်တွဲသမိုင်းရေးထိုးရလိမ့်မယ်။ ဒါပေမယ့် စာအုပ်နာမည်ကိုတော့ သူရဲဘောကြောင်သူများလို့ နာမည်ပေးပြီး နိုင်ငံ့အရေးထက် ပါတီအရေးကိုဦးစားပေးကြသူတွေ၊ ဒီမိုကရေစီထက် ခြေပုန်းခုတ်မှုတွေနောက်ကို လိုက်ကြသူတွေ၊ ပြည်သူ ၈၁ သန်းအရေးထက် လူတစ်ယောက်ကိုဦးထိပ်ထားတဲ့ခေါင်းဆောင်တွေအကြောင်းကို ရေးရလိမ့်မယ်။  

ဂျော့ချ်ဝါရှင်တန်ရာထူးကနေအနားယူတဲ့အချိန်မှာ နောက်ဆုံးအဖြစ် သူရေးသားခဲ့တဲ့နှုတ်ခွန်းဆက်မိန့်ခွန်းဟာ ကျနော်တို့သမိုင်းတစ်လျောက်လုံး ပဲ့တင်ထပ်နေပါတယ်။ ပါတီနောက်ခံမရှိတဲ့ တစ်ဦးတည်းသမ္မတဖြစ်တဲ့ ဂျော့ချ်ဝါရှင်တန်က နိုင်ငံရေးပါတီတွေရဲ့အန္တရယ်ကို သတိပေးခဲ့ပါတယ်။  

“ မည်သည့်ခေတ်၊ မည်သည့်တိုင်းပြည်မှာမဆို ပါတီတွေ တစ်ဘက်ကတဖက်ကို အနိုင်ရဖို့ကြိုးစားရင်း၊ အာဃာတတွေ ကြီးထွားလာကာ၊ ပြင်းပြင်း ထန်ထန်သဘောထားကွဲလွဲကြမည်ဆိုလျှင် အဆိုးရွားဆုံး ပြစ်မှုကျူးလွန်ခြင်းဖြစ်ပြီး ကြောက်မက်ဖွယ်ရာ အာဏာရှင်စနစ်နှင့် ခြားနားတော့မည်မဟုတ်ပါ။ နောက်ဆုံးတွင် အာဏာရှင်စနစ်အောက်သို့ ပြန်လမ်းမရှိ ကျရောက်သွားလိမ့်မည်။ မတည်ငြိမ်မှုုနှင့် စိတ်ပျက်ဖွယ်ရာ အချိန်ကြာလာသည်နှင့် အမျှ လုံခြုံရေးသည်  ဦးစားပေး ဖြစ်လာပြီး အကြွင်းမဲ့ အာဏာနှင့် တုံ့ပြန်မည့် အာဏာရှင်ကို တောင့်တလာကြလိမ့်မည်။ သို့နှင့် အင်အား ပိုကြီးသောဘက်မှခေါင်းဆောင်သည် ပြိုင်ဖက်တွေထက် ပို၍စွမ်းရည်ရှိခြင်း၊ သို့မဟုတ် ပို၍ အခွင့်အရေးသာသောအခြေအနေတွင် ပြည်သူလူထု၏ လွတ်လပ်ခွင့်ပျက်ယွင်းနေမှုသည် သူ့အာဏာတက်လမ်းအတွက် အခွင့်အရေးဖြစ်လာလိမ့်မည်။ ” 

ကျနော်တို့ ရီပက်ဘလစ်ကန် ပါတီအနေနဲ့ ပါတီစွဲနဲ့တိုက်ခိုက်မှုတွေကို နောက်ခြေတစ်လှမ်းဆုတ်ပြီး ရွေး ကောက်ပွဲရလဒ်ကို လက်ခံရမယ့်အချိန်ဖြစ်ပါတယ်။ နိုင်ငံအကျိုးထက် ပါတီရဲ့အကျိုးကိုဦးစားပေးဖို့ ဘယ်လိုမှမသင့်ပါဘူး။ ကျနော်တို့အားလုံးဟာ အမေရိကန်တွေဆိုတာကို ဘယ်တော့မှမမေ့သင့်ပါဘူး။ 

နိုင်ငံရေးအာဏာဆိုတာ ပြည်သူဆီကနေ နိုင်ငံရေးသမားတွေဆီကိုဆင်းသက်တယ်ဆိုတာ ဘယ်တော့မှမမေ့ပါနဲ့။  အခုဆိုရင် ပြည်သူတွေဟာ သူတို့ခေါင်းဆောင်ကို မဲပေးရွေးချယ်လို့ ပြီးခဲ့ကြပါပြီ။

နေသွင်ညိဏ်း

https://www.facebook.com/photo?fbid=1216372508779835&set=a.199697357114027 မှ ယူပါသည်။