လင်းလက်နွေဦး - သမိုင်းသင်ရိုးသစ်
လင်းလက်နွေဦး - သမိုင်းသင်ရိုးသစ်
(မိုးမခ) ဧပြီ ၅၊ ၂၀၂၁
အာဏာဟာ
မျိုးရိုးလိုက်ခဲ့တော့
တော်လှန်ရေးဟာ
တစ်နိုင်ငံလုံး ကူးစက်ခဲ့ပြီ။
မျိုးရိုးလိုက်တဲ့ မကူးစက်ရောဂါဟာ
သေရာပါပဲ မဟုတ်လား
ဒီလိုနဲ့
အာဏာရူးသုတ်ပိုးဟာ
ဦးနှောက်ထဲ သန္ဓေစွဲနေသလို
အာဇာနည်တွေရဲ့ အရိုးကလည်း
ထ ထ တွန်နေရတယ်။
'လူယုတ်မာတစ်ယောက်ပေါ်တိုင်း
တကမ္ဘာလုံး အလုပ်ရှုပ်ရတယ်'
တို့ဆီမှာ
သားသမီးမြေးမြစ်တီတွတ်
အသီးတစ်ရာ အညှာတစ်ပြွတ်ပေါ့လေ။
ဒီလိုနဲ့
ခေတ်သစ်မြန်မာ့သမိုင်းကို
သွေးနဲ့ သားနဲ့
ချွေးနဲ့ အားနဲ့
(ဒို့တတွေ)
ကိုယ်တိုင်ရေးထိုးခွင့် ရခဲ့တယ်။
လင်းလက်နွေဦး
၂.၄.၂၀၂၁( နေ့လည် ၁၂:၅၄)
#MoeMaKaMedia
#WhatsHappeningInMyanmar