ဆားပုလင်းသာပိန် - ရာဇဝတ်အိုးထဲမှာ သာဝကိုထားရစ်ခဲ့ (သာဝဒိုင်ယာရီ-၃)
ဆားပုလင်းသာပိန် - ရာဇဝတ်အိုးထဲမှာ သာဝကိုထားရစ်ခဲ့ (သာဝဒိုင်ယာရီ-၃)
(မိုးမခ) မေ ၂၁၊ ၂၀၂၁ကဲ … ဘယ့်နှယ်ရှိစ၊ မဲစာရင်းစစ်နည်းကိုသင်ကြားချင်လွန်းလို့ နိုင်ငံတကာကနေပြီးတော့ ကမ္ဘာကြီးရဲ့ ရှာမှရှား တစ်ခုတည်းသောမဲစာရင်းစစ်တဲ့ စစ်တပ်ဆီကိုလာရောက်လေ့လာဆည်းပူးကြလိမ့်မယ်ဆို ပြီး သာဝနဲ့ ခွက်ခွက်လန်တို့တစ်သိုက် စိတ်ကူးယဥ်အိပ်မက်ခဲ့ကြတဲ့အကြောင်း သာဝဒိုင်ယာရီ(၁) မှာ ရေးခဲ့စဥ်က ဆားပုလင်းသာပိန်ကပဲ တကယ်မရှိတဲ့ သာဝဒိုင်ယာရီကို ဇာတ်လမ်းထွင်လုပ်ကြံပြီး ချဲ့ ကားရေးသားထားသယောင်ယောင် တိုးတိုးတစ်ဖုံ ကျယ်ကျယ်တစ်မျိုး စွပ်စွဲပြောခဲ့ကြသူများ အခု တော့ ဘာများပြောချင်ကြသေးသလဲ။
ဒီရက်ပိုင်း YouTube နဲ့ Facebook မှာ ရွှေမြန်မာများ တဝေါ ဝေါနဲ့ရယ်သံမစဲ ဖြစ်ခဲ့ရတဲ့ သာဝရဲ့တပည့်ကျော်တစ်ယောက် ပြည်သူ့ဘဏ္ဏာနဲ့ဆင်ပေးထားတဲ့ အကျအနဝတ်ထားတဲ့ယူနီဖေါင်းကိုမှ အားမနာ၊ “မဲစာရင်းစစ်နည်း မြန်မာ့တပ်မတော်ဆီ သွားသင်ပါ အုံး” ဆိုပြီး အမေရိကန်ပြည်သူများက ဝိုင်းတောင်းဆိုနေကြတယ်ဆိုတဲ့အကြောင်း၊ ပေါက်ပန်းလေး ဆယ် ပြောနေတာကိုမြင်ရကြားရပြီးတဲ့နောက်မှာ အနှီပုဂ္ဂိုလ်များ ဆားပုလင်းသာပိန်ကို ဝန်ချ တောင်းပန်ချင်စိတ်တွေ တဖွားဖွားပေါ်လာနိုင်ပါတယ်။ အပြစ်မယူလိုပေမယ့် ခေတ်ကာလများ ကောင်းခဲ့ရင် “ကဲ … အစကတည်းက ငါရေးခဲ့ပြောခဲ့သားပဲ”ဆိုပြီး ရင်ကော့ခေါင်းမော့ပြီးမြို့မဂီတဝိုင်း ကြီးနဲ့ လူအမြင်ပိုကပ်လေအောင်၊ ပွဲခံလိုက်ချင်ပါသေးတယ်။ အော် အရင်ကတော့ မြို့မအသင်းကြီး နဲ့ဆိုရင် ဂုဏ်ရှိန်ဝင့်ထည်၊လူမြင်တင့်တယ်ခဲ့ကြတာ၊ အခုတော့သာဝနဲ့ပေါင်းမှ မြို့မငန်းကြီးခမျာ မြို့ပြင်က မြောင်းထဲကူးခတ်ရမယ့်ကိန်းဆိုက်ပြီ၊ အင်းလေ တစ်နိုင်ငံလုံးတောင် သာဝလက်ချက်နဲ့ အချိန်တိုလေးအတွင်းမှာ ပြောင်းပြန်ဇောက်ထိုးဖြစ် သွားခဲ့သေးတာပဲ။
တကယ်တော့ သာဝအကြောင်းက နှမ်းစေ့လောက်လေးတွေးမိရုံနဲ့တင် ဧဝရက်တောင်လောက်စိတ် ညစ်ညူးစရာကောင်းလှပါတယ်။ဒါ့ကြောင့်မို့ ရေးလက်စ ဖြစ်ပင်ဖြစ်သော်ငြားလည်း နေ့တဓူဝမြင် သိကြားနေရသည်များက အော်ဂလီဆန် စက်ဆုပ်ရွံရှာစရာများ ဖြစ်နေသည့်အတွက် စိတ်ကုန်လာ ပြီး သာဝတို့တစ်တွေအကြောင်း ဆက်မရေးမိခဲ့တာဖြစ်ကြောင်း တစ်ဆက်တည်းဝန်ခံလိုပါတယ်။ ဒါ့အပြင် သာဝဟာ သူ့အကြောင်း ရေးတဲ့သူများကိုလည်း ငွေသားရှားပါးတဲ့ခေတ်ကာလမှာ ငွေကုန် ကြေးကျပိုများစေလို့ပါ။ အကြောင်းကတော့ သာဝနာမည် တစ်ခါရေးပြီးတိုင်း လက်သန့် ဆေးရည် သုံး၊ သာဝနာမည် တစ်ခါပြောပြီးတိုင်း ခံတွင်းသန့်ဆေးရည်သုံးနေရလို့ပါ။ ဆောင်းပါးတစ်ပုဒ်ဆိုရင်ပဲ အတော်အကုန်အကျ များလှပါတယ်။
ခေါင်းစဥ်အသစ် တိုးချဲ့ဖြစ်သွားရတဲ့ အကြောင်းလည်းတစ်လက်စတည်း ပြောရပါအုံးမယ်။ “သာဝ ဒိုင်ယာရီ”အခန်းဆက်ဟာ သာဝရဲ့ ချာတူးလန်အတွေး၊ ပေါချာချာအကျင့်၊ ခပ်ညစ်ညစ်အကွက် ခပ်ယုတ်ယုတ် လုပ်ရပ်တို့ကို လက်ဝယ်ကောက်ရထားတဲ့ ဒိုင်ယာရီထဲကနေ ကောက်နှုတ်ပြီးအတတ် နိုင်ဆုံး ဖတ်ရှုစဖွယ်ဖြစ်အောင် ကြိုးစားပြင်ဆင်ရေးသားထားခြင်းဖြစ်ပါတယ်။ ပြဿနာကတော့ တစ်တိုင်းပြည်လုံးက သာဝရဲ့ ညစ်စုတ်စုတ်အမူအကျင့်တွေကို တစ်ရက်ပြီးတစ်ရက်တိုးပြီး စာရေး သားသူ ထက်တောင်ပိုပြီး အလိုလိုနေရင်းသိလာကြခြင်းပါ။ “မဖတ်မီက သိနှင့်ပြီ” ဆိုသလိုမျိုး ဖြစ် လာပါတယ်။ လူအတော်များများအတွက် အာဆီယံအစည်းအဝေးမစခင်ကတည်းကအစည်းအဝေး အပြီးထုတ်ပြန်မယ့်ဘုံသဘောတူညီချက်ကို ကြိုသိနေကြသလိုမျိုးပေါ့။
နောက်တစ်ခုက သာဝရဲ့ မူရင်းဒိုင်ယာရီပါးလှပ်လှပ် မှာရေးစရာကလည်း သိပ်များများစားစားမရှိတော့လို့ နောက်ဆက်ရေးရ မယ့် ဇာတ်လမ်းအတွက် နိဒါန်းပျိုးထားခြင်းလည်း ဖြစ်ပါတယ်။ ဒါ့ကြောင့် “သာဝဒိုင်ယာရီ” ကို အနားပေးချိန်တန်ပြီလို့ စိတ်ကူးလိုက်ရတာပါ။ ဒါ့အပြင် သာဝရဲ့အော့နှလုံးနာစရာလုပ်ရပ်တွေက လည်း တစ်နေ့ထက်တစ်နေ့ ပိုတိုးများလာ၊ဆိုးရွားလာလေတော့”သာဝဒိုင်ယာရီ” ဆိုတဲ့ နာမည်ဟာ ပေါ့ပျက်ပျက် ဖြစ်လာရပါတယ်။ ဒါ့ကြောင့် သာဝကို ပစ်ပစ်နှစ်နှစ်၊ ချိုးချိုးဖဲ့ဖဲ့၊ နစ်နစ်နာနာ၊စုတ် ပြတ်သတ်လေရအောင် ရေးသားစေလိုတဲ့ အများဆန္ဒကို အားရဝမ်းသာ ဖြည့်ဆည်းပေးရာ လည်းရောက်၊ ရာဇဝတ်မှုမျိုးစုံ တစ်နေ့တစ်မျိုး မရိုးရလေအောင်ကျူးလွန်နေတဲ့ သာဝနဲ့ ပိုလည်း လိုက်ဖက်တဲ့ ဒီခေါင်းစဥ်သစ်ကိုထပ်မံရွေးချယ်ခဲ့ရခြင်းလည်းဖြစ်ပါတယ်။ ဒီတစ်ပတ်တော့ သိပ်မကျန်တော့တဲ့ ဒိုင်ယာရီနောက်ဆုံးလက်ကျန်စာမျက်နှာများကို ရှင်းထုတ်လိုက်ပါအုံးမယ်။
လူတိုင်းကသာဝကို အစီအစဥ်ကျကျနနနဲ့ သေသေသပ်သပ် ပြင်ဆင်လုပ်ကိုင်တတ်သူလို့ ယောင် လို့တောင် ဆက်စပ်မစဥ်းစားမိခဲ့ကြပါဘူး။ ဒီတစ်ခါတော့လွဲသွားပြီလို့ အားနာနာနဲ့ပြောရပါလိမ့် မယ်။ သာဝဒိုင်ယာရီရဲ့ နောက်ဆုံးအခန်းမှာ ဟင်ကနဲ ဟာကနဲ မထင်မှတ်တာတွေဖြစ်လာစရာတော့ မရှိပါဘူး။ ပြည်သူအများစုလိုပဲ သာဝကိုယ်တိုင်လည်းသဘောတူလက်ခံလို့ထားပါ။ ဘာ့ကြောင့် လဲဆိုရင်တော့၊ သာဝတစ်ယောက် တရားရုံးရှေ့မှောက်မှာလျှောက်လှဲဖို့ ကြိုတင်ပြင်ဆင်ရေးသား ထားချက်များသာဖြစ်လို့ပါပဲ။ ပြည်သူလူထုကြီး ပျော်ကြပါတော့။ သာဝကိုယ်တိုင်အနှေးနဲ့အမြန်ဆို သလို ဒီလမ်းကိုလျှောက်ရမှာတွက်ထားပြီးပါပြီ။
ဒါပေမယ့် သာဝဟာလျှော့ တွက်လို့မရတဲ့ သာဝပါ။ ဒီသာဝပါပဲ ဒန်ပေါက်ရော ၊ဖာလူဒါရော၊ လက်ဖက်ပွဲရော အစုံအလင်ပြန် ကျွေးနိုင်ချေရှိတဲ့ လက်နက်ကိုင်အဖွဲ့အစည်းများကြတော့ အိမ်က ကိုယ်တိုင်လုပ်လာတဲ့ ငှက်သိုက်စွပ်ပြုတ်သွားပို့ပေးတာ၊ ဒီ သာဝ ပါပဲ ထိုင်းဝန်ကြီးချုပ်ဟောင်း ဗိုလ်ချုပ်ကြီး ပရမ် တင်ဆူလာနွန်ဒါရှိစဥ် အခါက သူ့ကို မွေးစားသားအဖြစ်သတ်မှတ်ပေးဖို့ ပတ်ချွဲနပ်ချွဲ ပြောခဲ့တာ။ ဒီသာဝ ပါပဲ “ကျနော် ကတော့ ပြည်သူ့ ဆန္ဒနဲ့ထွက်ပေါ်လာတဲ့ရလဒ်ကိုလက်ခံရမှာ။ ဒါကတော့ဘယ်လိုမှငြင်းပယ်လို့မရဘူး လက်ခံရမှာပဲ” လို့ မဲရုံကပြန်အထွက်မှာပြောတုန်းကပြောခဲ့ပြီး နောက်တော့မှ အာဏာသိမ်းတာလိုလို၊ ထိန်းတာလို လိုပေါက်တတ်ကရပြောပြီး ရူးချင်ယောင်ဆောင်ခဲ့တာ။ ပြောချင်တာက ဒီသာဝဟာ မျက်နှာပြောင် နဲ့ ပြောချင်တာပြော၊လုပ်ချင်တာလုပ်တတ်သူ၊ စစ်ဝတ်စုံကြီးဝတ်ပြီး မူယာမာယာအပြည့်နဲ့ ပလီတိ ချောက်ချက် ပြောတတ်သူ၊ ကုန်ကုန်ပြောရရင် တစိုးတစိမှ ယုံကြည်ဖို့မကောင်းတဲ့သူ ဆိုတာကိုမေ့ မထားကြဖို့ပါ။
စကတည်းကယဥ်သကို လို့ဆိုရမယ့်ပုံပါပဲ၊ သာဝရဲ့ ပြင်ဆင်လျှောက်လှဲချက်ဟာ ICC လို အထင်က ရ တရားရုံးမှာမဆိုထားနဲ့၊ ယုတ်စွအဆုံး လမ်းဘေး အငြိမ့်ထဲက တစ်ခန်းရပ်ပြဇာတ်မှာပါတဲ့ တရားရုံးရဲ့ စီရင်လျှောက်ဆိုတဲ့အခန်းမှာ သုံးဖို့တောင်အဆင့်မမီတာကိုတွေ့ရပါတယ်။ ဥပဒေဘာသာရပ်ကို တဝက်တပျက် မည်ကာမတ္တသာ သင်ခဲ့ဘူးတဲ့ သာဝကို အပြစ်ဆိုနေရင်တော့အပိုပဲဖြစ်မှာပါ။ ထူးဆန်းတာက တရားရုံးလျှောက်လှဲချက်ထက်စာရင် ကုမ္ပဏီတစ်ခုရဲ့ ရှေ့စီးပွားရေးလုပ်ငန်းအစီအစဥ်နဲ့တောင်ပိုတူနေပါသေးတယ်။ ကမ္ဘာကျော်လျှောက်လှဲချက်များဆိုပြီး ထုတ်ဝေရေးသားလေ့ရှိတဲ့ နိုင်ငံတကာစာအုပ်တိုက်တွေဆီက ကမ်းလှမ်းချက်များမရမှာကို သဘောပေါက်ထားပြီးဖြစ်တဲ့ သာဝဟာ သူကိုယ်တိုင် ရေးသားထုတ်ဝေဖြန့်ဖြူးဖို့ ကြံထားပါတယ်။ ဒါဟာလည်းသိပ်အံ့အားသင့်စရာ တော့မဟုတ်ရပါဘူး၊ တိုးတက်ယဥ်ကျေးပြီးလူသားဆန်တဲ့လူ့အဖွဲ့အစည်းအတွက် ဘယ်လိုမှနေရာ ပေးလို့မရနိုင်သော “အာဏာဆိုတာ သေနတ်ပြောင်းဝကထွက်တယ် - ပုံ မစတ” ဆိုတဲ့စကားလို “ အသပြာ ဆိုတာ သေနတ်ပြောင်းဝကထွက်တယ် - ပုံ မအလ” ဆိုပြီး သမိုင်းတွင်ကျန်လောက် အောင် ပိုက်ဆံရှာဖို့ပဲ သာဝခေါင်းထဲရှိတာမို့လို့ပါ။
စာအုပ်ရိုက်ဖို့ စက္ကူတင်သွင်းရေး၊ ရိုက်နှိပ်ရေး၊ ဖြန့်ဖြူးရေးအားလုံးအတွက် ကုမ္ပဏီ၊ပုံနှိပ်လုပ်ငန်း၊စာအုပ်တိုက်များ အစီအစဥ်တကျတည်ထောင် ထားမှာဖြစ်ပါတယ်။ အကွက်စေ့ပုံများကတော့ ရောင်းမကုန်တဲ့စာအုပ်များအတွက် ပိသာချိန်နဲ့ ပြန် ရောင်းဖို့၊ဆေးလိပ်ဖင်စီခံတို့၊အကြော်ထုပ်တဲ့နေရာမှာသုံးဖို့အထိအမြော်အမြင်ကြီးစွာစီစဥ်ထားပါတယ်။ စာအုပ်နံမည်ကလည်း ဖလန်းဖလန်း ပါပဲ၊ နံမည်ကျော် ဝတ္ထုခေါင်းစဥ်ကို ခပ်တည်တည်ကူး ယူလိုက်တယ် “ သာဝတစ်ယောက်ရဲ့ ဖွင့်ဟဝန်ခံချက်” ဆိုပဲ၊ လာ လာချည်သေးရဲ့။
ငွေနောက်လိုက်တဲ့ သာဝအကြောင်းပြောနေရတာနဲ့ လိုရင်းမရောက်နိုင်ဖြစ်ရပြန်ပါတယ် ။ ဒီ သာဝရဲ့ ပြင်ဆင်လျှောက်လှဲချက်တွေက သာဝဒိုင်ယာရီမပျောက်ခင်၊ အချိန်အားဖြင့် သာဝရဲ့အာဏာလုပွဲ လား၊ အာဏာခိုးပွဲလား၊ အာဏာအနုကြမ်းစီးပွဲလား၊ကြိုက်သလိုခေါ်ဝေါ်နိုင်တဲ့ နေ့ရက်မတိုင်မီအ ချိန်က ရေးထားတာဆိုတာလေးကို အရင်သတိပေးလိုပါတယ်။
ပြီးခဲ့တဲ့” သာဝဆန္ဒထွက်ပြခြင်း” က စလို့ “သာဝဒိုင်ယာရီ(၂) “ အထိရေးထားသမျှဟာ ဘောလိဝုဒ်ရုပ်ရှင်လိုပဲ ဘယ်နေရာက စကြည့် ကြည့် အဆို၊အက၊အရယ်၊အငို စတဲ့ ရသတစ်ခုမဟုတ်တစ်ခု ပေးမှာဖြစ်ပြီး ပထမဆောင်းပါးကနေ အဆုံးအထိ အစဥ်အတိုင်းဖတ်ရင်တော့ ကိုရီးယားဇာတ်လမ်းတွဲများလို အရသာရှိရှိဖြစ်လေအောင် သူမတူတဲ့ရေးသားခြင်းအနုပညာနဲ့ ဖန်တီးထားတယ်ဆိုတာကိုတော့ ကြော်ငြာလေးဝင်ချင်ပါတယ်။ တစ်ခါတစ်လေတော့ ရှေ့နောက်ဖြစ်စဥ်လေးတွေ ပြန်စစ်ကြည့်ဖို့ လိုနိုင်ပါတယ်။ အာဏာမသိမ်းမီနဲ့ အာဏာသိမ်းပြီးခါစမို့သာ သာဝလျှောက်လှဲချက်ကို တရားရုံးက လက်ခံကောင်းလက်ခံနိုင်တာပါ။ နောက်ပိုင်းကာလများအရတော့ တစ်ခါတည်းစီရင်ချက်ချသင့်ပါတယ်၊ ဘာကြောင့်အချိန်ကုန်ခံပြီး လျှောက်လှဲခွင့်ပေးရအုံးမှာလဲ။
တကယ်လည်းသာဝက တရားခွင်မှာ အချိန်ဆွဲ၊အချိန်ကုန်စေချင်တာပါ။ သူ့ကိုခုခံကာကွယ်ပေးမယ့် ရှေ့နေအဖွဲ့ မှာ တရုပ်နဲ့ရုရှားရှေ့နေတွေ ထည့်ထားပါတယ်၊ သာဝတစ်ယောက် တရုပ်နဲ့ရုရှား အားကိုး တာများဆန်းသလားကွာ လို့ပြောချင်ကြပါလိမ့်မယ်။ ဒီတစ်ကြိမ်တော့ သာဝရည်ရွယ်ချက်က အချိန် ဆွဲချင်လို့ပါ သူကမြန်မာလိုပြော၊ စကားပြန်က တရုပ်လိုပြန်ပေး၊ တစ်ခါတရုပ်ရှေ့နေပြောတာကို ရုရှားဘာသာပြန်၊ နောက်ဆုံး ရုရှားရှေ့နေက ဘာသာပြန်ကတဆင့် အင်္ဂလိပ်လို ရုံးတော်ကိုဦးတိုက် လျှောက်၊ တရားသူကြီးပြန်ပြောတဲ့အခါကြရင်လည်း ခုနလိုပဲတဆင့်ပြီးတဆင့်နဲ့ နောက်ဆုံးသာဝဆီ ပြန်ရောက်လာ။တွေးကြည့်တာနဲ့တောင် အတော်ကြီးစိတ်ရှည်သည်းခံရမှာပါ၊ သာဝစိတ်ကူးထား တဲ့အတိုင်းဆို အမှုက သူ့တစ်သက်ပြီးတော့မှာမဟုတ်။ ICC က တရားသူကြီးတွေက သာဝထင်သ လိုအချဥ်မှ မဟုတ်တာ၊ သာဝရဲ့ ဥာဏ်နီဥာဏ်နက်တွေကို ဘယ်သူကလက်ခံမှာလဲ။ ဒီလိုပါပဲ သာဝက တော့ အမြဲတမ်း တွက်ရေးမှာ စက်သူဌေး ပဲလေ၊ အာဏာသိမ်းတုန်းကလည်း အဲဒီလိုပဲ၊ နောက်ဆုံး အချိန်လွန်တော့မှ တွက်ကြည့်စက်မရှိပါလား ဆိုပြီး သိလိုက်ရတာ။
ဒီအစကနဦးကြားနာချက်မှာ သာဝအဓိကထားပြောချင်တာက သူဟာအာဏာသိမ်းဖို့ လုံးဝ လုံးဝ မစဥ်းစားမိခဲ့ပါဘူးဆိုပြီး ဗြောင်လိမ်ဖို့ ကြိုးစားကြည့်ခြင်းပါ။ ကြိုတင်ကြံရွယ်မှုဆိုတာဟာအပြစ်ကို ပိုမိုကြီးလေးစေတယ် ဆိုပြီး သာဝနားလည်ထားပါတယ်။သာဝလျှောက်လှဲမှာက သူဟာပင်စင်ယူ ပြီးရင် ဝါသနာပါတဲ့ အနုပညာနယ်ပယ်ကို ခြေစုံပစ်ဝင်ရောက်လှုပ်ရှားဖို့သာ ရည်ရွယ်ထားခဲ့တယ် ဆိုပဲ။ အဲဒါကြောင့် ပင်စင်ယူရမယ့်အချိန်ကို လက်ချိုးပြီးမျှော်နေသူပါတဲ့။သူပြောတဲ့အနုပညာ ဆို တာ ရုပ်ရှင်ကိုဆိုလိုကြောင်း၊ မြန်မာပြည်မှာ ဗိုလ်ချုပ်ရုပ်ရှင်ဆိုပြီး ဂုဏ်ပြု ရိုက်ကူးကြတဲ့အစဥ် အ လာရှိကြောင်း၊သို့ပါသော်လည်း သူ့လိုဗိုလ်ချုပ်အကြောင်းကိုတော့ မည်သူကမျှ စာရိပ်စက အကုန် အကျခံပြီး တခုပ်တရ ရုပ်ရှင်ရိုက်ကြမှာမဟုတ်လို့ သမီးဖြစ်သူကိုရုပ်ရှင်ကုမ္ပဏီ အရင်ထောင် ပေးထား ကြောင်း၊ နံမည်ကျော်အနုပညာရှင်များကိုလည်း ဘုံးထားတဲ့ပိုက်ဆံတွေပေးပြီး စာချုပ်နှစ် ရှည်ချုပ် ထားပြီးဖြစ်ကြောင်း၊ သူပင်စင်ယူပြီးလျှင် ယူပြီးချင်း နံမည်ကြီးမင်းသားတစ်ယောက်နဲ့ တွဲဖက်ရိုက်ကူးဖို့လည်းစီစဥ်ပြီးဖြစ်ကြောင်း။ မိန်းမနဲ့ သားသမီးများက ရှက်လွန်း၍ ထိုဇာတ်ကားနံမည်ကိုပြောင်းစေလိုသော်လည်း တိုင်းသိပြည်သိ သူ့ရဲ့ နံမည်ဖြစ်လို့ ပြောင်းမှာမဟုတ်ပဲ အခုရုံးတော်မှာသက်သေခံတစ် ရပ်အနေနဲ့ တင်သွင်းလိုကြောင်း၊ ဇာတ်ကားနံမည်ကတော့ “မင်းက နေတိုး ငါကမအလ” ( အနုပညာ ဓါတ်ခံရှိသူ သာဝစိတ်ကြိုက် နဘေကာရန်နဲ့ ရွတ်ဆိုခေါ်ဝေါ်ပေးပါ ရန်) ဖြစ်ပါကြောင်း။ ဆိုလိုတာကတော့ သာဝက သူဟာ ပင်စင်ယူပြီး ရုပ်ရှင်ရိုက်ဖို့သာစိတ်အားသန် သူဖြစ်ကြောင်း၊အာဏာသိမ်းဖို့ဆိုတာ ယောင်လို့တောင် မစဥ်းခဲ့ပါကြောင်း လေးနက်စေရန်ရည်ရွယ် ချက်ရှိရှိနဲ့ လျှောက်လှဲလိုက်ခြင်းပါ။
ဒီနေရာမှာ စဥ်းစားစရာဖြစ်လာတာက ဤသို့ဆိုသော် ဘယ်လိုပုံ ဘယ်လိုနည်းနဲ့ ဖေဖေါ်ဝါရီလ(၁) ရက်နေ့ အာဏာလုယက်ပွဲကြီးဖြစ်လာခဲ့ရသနည်း ဆိုတာကိုပါ။ အခြားသူတွေမှာအဖြေမရှိပေမယ့် သာဝတစ်ယောက်မှာတော့ရှိပါတယ်။ သာဝကဆိုပါတယ်၊ ပြင်းပြသောအာသီသ မရှိခဲ့သော်ငြား လည်း ထိုအခြေအနေသို့ မရောက်ရောက်အောင် တွန်းပို့ပေးခဲ့တဲ့ အရာများရှိခဲ့ပြီး သူ့အနေနဲ့ ဘက် မလိုက်တမ်း၊ တရားမျှတမှုအပြည့်နဲ့ ထုတ်ဖေါ်ပြောပြလိုပါသတဲ့၊ တရားသူကြီးများရဲ့ရှေ့ရောက်မှ တရားမျှတမှုကို သိပ်တန်ဖိုးထားပြနေသော သာဝပါ။
ပထမအချက်အနေနဲ့ တပည့်ကျော် ဇော်မဲလုံးရဲ့ သတင်းစာရှင်းလင်းပွဲမှာပြောကြားသွားချက်ကိုထောက်ပြပါတယ်။ ဇော်မဲလုံးက “ တပ်မတော်အ နေနဲ့ နိုင်ငံတော်တာဝန်ကိုယူမယ်လို့လည်း မပြောဘူး၊ မယူဘူးလို့လည်းမပြောဘူး” လို့ပြောခဲ့တာပါ။ အာဏာသိမ်းမယ်၊မသိမ်းဘူး ပြောလို့မရကြောင်း ဆိုတာမျိုးပါ။ စကားကို ဟိုလိုလို ဒီလိုလိုနဲ့ ဟုတ် သည်လည်းမပြော၊မဟုတ်ဘူးလည်းမပြော၊ မတင်မကျ ပြောဆိုလိုက်ခြင်းပါ။ သာဝက ဒါနဲ့ပတ် သက်ပြီး သူ့အနေနဲ့မျှမျှတတပြောလိုတာက “ခက်တင်မောင်းနင်းစကား” လို့ဆိုရမယ့် ဒီစကားပြော နည်းကို မဒမ်သာဝ က သူတို့ဆရာတပည့်နှစ်ယောက်ကို သင်ပေးခဲ့တယ်ဆိုတာပါ။ သာဝဒိုင်ယာရီ(၂) ကိုဖတ်ရှုဖူးသူများ သတိရကြမှာပါ၊
မီဒီယာများရဲ့မေးခွန်းတွေကို လည်လည်ပတ်ပတ်ပြန်ဖြေနိုင်ဖို့ တက္ကသိုလ်မှာမြန်မာစာပြခဲ့ဖူးတဲ့ မဒမ်သာဝကို “စကားကြီးဆယ်မျိုး” ကိုသင်ပေးဖို့ ပြောခဲ့တာလေ။ ပြဿနာက မဒမ်သာဝက မြန်မာစာကထိကဟောင်းသာ ဆိုတယ် အဲဒီ စကားကြီးဆယ်မျိုးကိုလုံးဝ သတိ မရတော့ဘူး။ စျေးအကြီးဆုံးဒီဇိုင်နာအိတ် ဆယ်မျိုးဆိုရင်သာ ရွှတ်ကနဲပဲ။ မရမကပြန်စဥ်းစား လေ့လာတော့မှ “ခက်တင်မောင်းနင်းစကား” တစ်ခုပဲ ပြန်ပေါ်လာတယ်။ အဲဒါနဲ့ သာဝတို့နှစ်ယောက် ကို ဒီစကားပြော နည်းကိုပဲသင်ပေးလိုက်နိုင်တယ်။ ဇော်မဲလုံးလည်း မီဒီယာမေးတိုင်း သင်ထားသလို ဝေ့လည်ကြောင်ပတ်တွေဖြေနေမိတာ အာဏာသိမ်းမယ့်ကိစ္စနဲ့ပတ်သက်တဲ့မေးခွန်းမှာတစ်နိုင်ငံလုံး အုံးအုံးကြွက်ကြွက် ဖြစ်သွားတော့တာပါပဲ။
ဒုတိယအချက်က ရုရှားကြီးလာလည်တာနဲ့ ပတ်သက်ပါတယ်။ ထင်သားပဲလို့ အပြောမစောလိုက်ပါနဲ့ အုံး။ သာဝက ရုရှားကြီးနဲ့ဘာတွေပြောကြတယ်ဆိုတာ ရိပ်ဖမ်းသံဖမ်းတောင် မဟရဲရှာပါဘူး။ သူ ပြောချင်တာက ရုရှားကြီးက သူ့ကိုကုန်ပစ္စည်းစျေးနှုန်းတွေပါတဲ့ ကတ်တလောက်တွေပေးလိုက်လို့ သာဝက အိမ်ကိုယူလာခဲ့သတဲ့။ ဘာပစ္စည်းတွေဖြစ်နိုင်မလဲ ဆိုတာတော့ ကိုယ့်ဖါသာ စဥ်းစားကြပါ။ ပိုက်ဆံရဖို့အတွက်ဆိုရင် အမြဲအကွက်ချောင်းနေတဲ့ အဖေတူ သားသမီးနှစ်ယောက်က ကတ်တ လောက် တွေလှန်ပြီး ပွဲခမြိုးမြိုးမြက်မြက်ရနိုင်တာမျိုးကို အငမ်းမရရှာကြလေရဲ့။ သူတို့မောင်နှစ်မ မျက်စိကျသွားတာက တင့်ကားအသစ်တွေဖြစ်နေလို့ သာဝက ဝင်ပြောလိုက်တယ်၊ ဂိုဒေါင်ထဲမှာအစီး ရေတော်တ်ေများများ ရှိနေသေးတယ်လို့။ အဲဒီမောင်နှစ်မက ဝင်ပြောတယ် ဂိုဒေါင်ထဲမှာသာရှိတာ၊ မောင်းလို့ ရောရသေးရလား၊ မရတော့ရင် အသစ် မှာရအောင်ပြောနေလို့ သာဝက ဒါဆိုလမ်းပေါ် ထွက်မောင်းခိုင်းလိုက်မယ်လို့ ပြောလိုက်တယ်။ ဒီလိုနဲ့ တင့်ကားတွေလမ်းပေါ်ထွက်လာပြီးတဲ့နောက် အုံးအုံးကြွက်ကြွက် ထပ်ဖြစ်ပြန်ပါလေရော။ ကုလသမဂ္ဂ ကရော၊ သံရုံးတွေကရော ကြေငြာချက် တွေ ထုတ်ပြီးရွေးကောက်ပွဲရလဒ်ကို လေးစားဖို့ဆိုလား ဘာလားပြောကြလေရဲ့၊၊တကယ်တော့ သာဝက သူတို့ဘာဘာညာညာထင်သလို မစဥ်းစားခဲ့မိပါဘူး။ ဇော်မဲလုံးက မဒမ်သာဝသင်ထားသလို ပြောမိတာရယ်၊ သာဝတို့သားအဖတစ်တွေ ရုရှားကြီးဆီက ပွဲခမျှော်မိတာရယ် သွားတိုက်ဆိုင်မိရုံ လေးပါ။
တတိယအချက်ကတော့ ခွက်ခွက်လန်တို့အဖွဲ့ရယ်၊ သာဝတို့ရဲ့ အမာဂိုဏ်း၊ အပျော့ဂိုဏ်း၊မကျက်တ ကျက်ဂိုဏ်း၊ မမှည့်တမှည့်ဂိုဏ်း တွေစုပြီး သာဝကို ဝိုင်းပြောလာကြတယ်။ ပြည်တွင်းရော ပြည်ပက ပါ မယုံကြတော့ဘူး၊ အာဏာသိမ်းတော့မယ်ပဲထင်ကုန်ကြပြီ၊၊ ဒီတော့ချော်လဲရောထိုင် မထူးဇာတ် ခင်းပြီး အာဏာသိမ်းလိုက်ပါတော့လို့ ဆိုလာကြတယ်။ ဒီတော့သာဝက ဒိုင်ယာရီထဲမှာ မင်နီနဲ့သေ ချာမျဥ်းတားပြီး သူပြန်ပြောတာကို မှတ်တမ်းတင်ထားသတဲ့၊ သူ့အပြောပေါ့လေ၊ သူပြောလိုက်တာ က အာဏာသိမ်းဖို့လုံးဝလုံးဝစိတ်မပါသော်လည်း ဒီလောက်ဝိုင်းပြောနေကြရင် အဆုံးအဖြတ်ပေး မယ့်ပြိုင်ပွဲတစ်ခုလုပ်ကြမယ်။သာဝရှုံးရင် အားလုံးစိတ်တိုင်းကျအာဏာသိမ်းပေးမယ်။ သာဝနိုင်ရင် တော့ သာဝစိတ်တိုင်းကျပေါ့ ဆိုပြီး သဘောတူလိုက်ကြတယ်။ ဒီလိုသိလိုက်ရလို့ သာဝရှုံးသွားတယ် မထင်ပါနဲ့၊ သာဝက အာဏာမသိမ်းချင်တဲ့သူဆိုတော့ အရိုးကြေကြေ အရေခမ်းခမ်း အသက်ကိုပဓာ န မထားပဲပြိုင်တဲ့ အတွက် ပွဲအပြီးမှာ သာဝနိုင်သွားသတဲ့။
ဒါဆိုရင် ဘာ့ကြောင့်အာဏာသိမ်းပွဲဖြစ်ခဲ့ ရသလဲဆိုရင် နည်းနည်းတော့ရှင်းပြရပါမယ်။ သာဝရှုံးမှ အာဏာသိမ်းပွဲဖြစ်မှာပါ၊ အခုကသာဝနိုင်လို့ သာဝအလိုကျအာဏာထိန်းပွဲ ဖြစ်သွားရသတဲ့။ သူ့အကြောင်းပြချက်နဲ့သူကတော့ဟုတ်နေတာပါပဲ။ ပြောဖို့ကျန်သွားတာတစ်ခုက ဘာပြိုင်ပွဲနဲ့ဆုံးဖြတ်လိုက်ကြတာလဲဆိုတာကိုပါ။ စာဖတ်သူများ အ လွန်သိချင်နေကြတာအပြစ်မပြောသာပါဘူး။ သာဝတို့အကြိတ်အနယ် ပြိုင်ကြတာက ကျား ဗိုလ်ဆွဲကြခြင်းဖြစ်ပါတယ်၊ ဗိုလ်၊ကျား၊သေနတ် ဆွဲကြတာပါ။ အနောက်တိုင်းမှာတော့ Rock Paper Scissors ကစားနည်းလို့ခေါ် ပါတယ်။ အာဏာမသိမ်းချင်တဲ့သာဝ အပြင်းအထန်ကြိုးစားပေးခဲ့လို့ အနိုင်ရခဲ့တာပါ။ သရေများဖြစ်နေရင် တူတူပုန်းတမ်းဆက်ကစားကြမယ်ဆိုပါတယ်။
ဒိုင်ယာရီရဲ့နောက်ဆုံးစာပိုဒ် ရောက်လာပါပြီ။သာဝက သူ့ရဲ့လျှောက်လှဲချက်ကိုဘယ်လို နိဂုံးချုပ်ခဲ့ သလဲဆိုတာ အားလုံးကသိချင်နေကြမယ်ထင်ပါတယ်။ အထက်ကဖေါ်ပြခဲ့တဲ့အတိုင်း သာဝဟာ အာဏာသိမ်းဖို့ဆိုတာကို အိပ်မက်တောင်မမက်ခဲ့ဘူးကြောင်း။ အာဏာသိမ်းဖို့ အကြောင်းအရာတွေ တွန်းပို့လာခဲ့တာတောင် ရဲရဲဝန့်ဝန့်ရင်ဆိုင် ဆန့်ကျင်ခဲ့တဲ့အတွက် အာဏာသိမ်းတဲ့အဆင့်အထိ ရောက်မသွားပဲ အာဏာထိန်းတဲ့အဆင့်မှာပဲ ရပ်တန့်စေနိုင်ခဲ့ကြောင်း။ ဒါ့ကြောင့်သူ့မှာ အပြစ်ဆိုလို့ မြူတစ်မှုန် သဲတစ်ပွင့်မျှလောက်ပင်မရှိကြောင်း လျှောက်လှဲခဲ့ပါတယ်။ တကယ်လို့အာဏာထိန်းခဲ့ရ တဲ့အတွက် အပြစ်ဆိုတာရှိခဲ့ရင်လည်း ထိုအပြစ်များဟာသူနဲ့လုံးဝဆက်နွယ်မှု့မရှိပဲ ဖေါ်ပြခဲ့သလို ဇော်မဲလုံး၊ မဒမ်သာဝ၊ သားသမီးနှစ်ယောက်၊ခွက်ခွက်လန်တို့ပါတီ၊ ဒေါ်စိန်အေးကျောင်းဆင်း အမာ ဂိုဏ်း၊အပျော့ဂိုဏ်း၊ မကျက်တကျက်ဂိုဏ်း၊ မမှည့်တမှည့်ဂိုဏ်း အားလုံးမှာသာအပြစ်ရှိပါကြောင်း ပြောဆိုရေးသားခဲ့ပါတယ်။
သာဝတစ်ယောက်ဟာ နိုင်ငံအတွက်လည်းမဟုတ်၊ ပြည်သူအတွက်လည်းမဟုတ်၊ တပ်မတော်အတွက်လည်းမဟုတ် ဆိုတာ အများနည်းတူသိထားပါတယ်။ ပြီးတော့အားလုံးတွက်ထားသလို သာဝ ဟာ မိသားစုအကျိုးစီးပွားကိုသာကြည့်သောသူဖြစ်လို့ အနည်းဆုံး မဒမ်သာဝအတွက်၊ သားသမီး နှစ်ယောက်အတွက်တော့ ဖြစ်လိမ့်မယ်လို့ ထင်ခဲ့မိပါတယ်။ အခု သာဝဒိုင်ယာရီအပြီးမှာ သိလိုက်ရ တာက သာဝဟာ သာဝ အတွက်ပဲဆိုတာကိုပါ။ အားလုံးကို အပြစ်ပုံချပြီး ကိုယ်လွတ်ရုန်းခဲ့လေသူပါ။ ဒီသာဝလိုလူမျိုးကိုတော့ ရာဇဝတ်အိုးထဲမှာ ယက်ကန်ယက်ကန် နဲ့ ထွက်မရအောင်ထားရစ်ခဲ့လိုက် မယ်ဆိုရင် စာဖတ်သူအားလုံး လက်ခုပ်တီးသံတဖြောင်းဖြောင်း၊ လက်ခေါက်မှုတ်သံတရွှီရွှီနဲ့ သဘော တူညီကြလိမ့်မယ်လို့ ထင်မိပါတယ်။
(ဆားပုလင်းသာပိန်)
Join Us @ MoeMaKa Telegram
t.me@moemaka
#MoeMaKaMedia
#WhatsHappeningInMyanmar