မြန်မာပြည်မှာ စစ်တပ်အာဏာသိမ်းပြီး ၃လ ၂၄ ရက် မြောက်နေ့ မြင်ကွင်း

မြန်မာပြည်မှာ စစ်တပ်အာဏာသိမ်းပြီး ၃လ ၂၄ ရက် မြောက်နေ့ မြင်ကွင်း

(မိုးမခ) မေ ၂၄၊ ၂၀၂၁

ဒီနေ့ သတင်းတွေကတော့ ကယားပြည်နယ်က တိုက်ပွဲအရှိန် မြင့်တက်လာနေတာ ၊ မငး်တပ်မြုိ့က ထောင်နဲ့ ချီတဲ့ စစ်ဘေးရှောင်တဲ့သူတွေ တောင်တွေ တောတွေထဲမှာ မိုးရေတွေထဲ အမိုးအကာ ကောင်းကောင်းမွန်မွန်မရှိပဲ နေနေကြရဆဲ၊ မြို့ပေါ်မှာ ကျန်ရစ်ခဲ့သူတွေ ရဲ့ ကံကြမ္မာ၊ မြုိ့ပေါ်က အိမ်တွေ ဆိုင်တွေ ဖောက်ထွင်းပြီး တန်ဖိုးရှိတာတွေ ယူဆောင်သွားကြတဲ့အကေြာင်း၊ ဒေါ်အောင်ဆန်းစုကြည်၊ ဦးဝင်းမြင့်နဲ့ ဒေါက်တာမျိုးအောင်တို့ကို သီးခြားစီမံထားတဲ့ တရားရုံး နေရာမှာ လူကိုယ်တိုင် ရုံးထုတ်တဲ့ သတင်းတွေ က ဒီနေ့ လူစိတ်ဝင်စားကြတဲ့ သတင်းတွေ ဖြစ်ပါတယ်။

တနေ့က မိုးဗြဲရဲစခန်းသိမ်းယူစဥ်က ဖမ်းဆီးခံရသူ ခုခံပစ်တဲ့ ရဲအချို့ကို ကရင်နီပြည်သူ့ကာကွယ်ရေး တပ်ဖွဲ့တွေက သတ်လိုက်တဲ့ အကြောင်းရေးသားထားတဲ့ ဆိုရှယ်မီဒီယာကပို့စ် တွေနဲ့ပတ်သက်လို့လည်း ကာတွန်းရေးလာကြတာတွေ ရှိသလို ဂျီနီဗာ ကွန်ဗန်းရှင်းနဲ့ ပတ်သက်တဲ့ လိုက်နာရမယ့် စည်းမျဥ်းစည်းကမ်းအကြောင်းတွေလည်း ရေးနေကြတာ ဖတ်ရှုရပါတယ်။

မြန်မာနုိင်ငံဟာ လက်နက်အားကိုးနဲ့ စစ်တပ်က အာဏာသိမ်းရာက မြန်မာနိုင်ငံဟာ လက်နက်ကိုင် ပဋိပက္ခအနေအထားတင်မဟုတ်တော့ပဲ ပြည်တွင်းစစ် ချောက်ထဲကိုတရက်ကို တထစ်တထစ်နဲ့ တဖြည်းဖြည်း ကျဆင်းနေပြီလို့ ဆိုရတော့မယ့် အနေအထားဖြစ်ပါတယ်။

ပြည်နယ် တခုကနေ နှစ်ခု၊ တိုင်းဒေသကြီး တခုကနေ နှစ်ခု စသဖြင့် လက်နက်စွဲကိုင် တိုက်ခိုက်ကြတာ ပြီးခဲ့တဲ့ ဧပြီလကစလို့ ခု မေလအတွင်း မျက်စေ့ရှေ့မှာ တွေ့နေရပါပြီ။ လက်နက်စွဲကိုင်ပြီး တပ်ဖွဲ့အသွင်နဲ့ မတိုက်သေးတဲ့ မြို့တွေမှာလည်း နေ့စဥ်လိုလို လက်လုပ်ဗုံးတွေ အသံဗုံးတွေ ကွဲနေတာမို့လို့ မြန်မာပြည်ကြီးက စစ်ကောင်စီ ဆွဲချခဲ့တဲ့ ချောက်ကမ်းပါးထဲ ကျဆင်းနေပြီလို့ပဲ ဆိုချင်ပါတယ်။

တနေ့တနေ့ စစ်ကောင်စီကို ဆန့်ကျင်သူ၊ လက်နက်မဲ့ ငြိမ်းချမး်စွာ ဆန့်ကျင်သူ ဖြစ်ဖြစ် လက်နက်နဲ့ ဆန့်ကျင်သူဖြစ်ဖြစ် ဖမ်းဆီး ရိုက်နှက်တဲ့ အကြောင်း၊ အသက်သေဆုံးသွားတဲ့ အဖြစ်တွေလည်း ေန့စဥ် နဲ့အမျှ ထွက်ပေါ်နေပါတယ်။ ဒီနေ့ နောက်ဆုံးသိရတဲ့ သတင်းကတော့ ပဲခူးတိုင်း ဘုရားကြီးက နိုင်ကျဥ်းဟောင်း ၊ အေဘီအက်စ်ဒီအက်ဖ် အဖွဲ့ဝင်ဟောင်း ကိုစိုးမိုးလှိုင် ကို ဖမ်းဆီးသွးပြီး ၂ ရက်ကျော်အကြာ သေဆုံးကြောင်း အလောင်းလာယူဖို့ အကြောင်းကြားခဲ့တဲ့သတင်း ဖြစ်ပါတယ်။

အဲဒီလို အသက်ဆုံးရှုံးသည်အထိ တရားဥပဒေမဲ့ လက်လွန်ခြေလွန် စစ်မေး သတ်ဖြတ်နေတဲ့ အကြောင်း အာဏာသိမ်းပြီး မကြာခဏ မြင်ကွင်းကဏ္ဍမှာ ရေးသားမှတ်တမ်းတင်နေရတာဒါဇင်နဲ့ ရှိနေပါပြီ။

ခု စစ်အာဏာသိမ်းပြီး ၃ လကျော်အကြာ ဆန္ဒပြသူနဲ့ အခြား အရပ်သားစုစုေပါင်း ၈၀၀ နီးပါး သေဆုံးခဲ့ရတဲ့အဖြစ် ၃ ေထာင်ကျော် ဖမ်းဆီးချုပ်နှောင်ခံထားရတဲ့ အဖြစ်တွေက ဆက်သွယ်ရေး နည်းပညာ တိုးတက်လာတဲ့ အခု ၂၀၂၁ ခုနှစ်လိုကာလမှာ အဖြစ်အပျက် အများစုကို လူထုက ကိုယ်တိုင်မျက်စေ့နဲ့ မြင်တွေ့ရသလို ဓါတ်ပုံတွေ၊ ဗီဒီယိုတွေမှာ မြင်ရတဲ့နောက် စိတ်ခံစားမှု မခံမရပ်နိုင်မှုနဲ့ ခုလို လက်နက်ကိုင် လမ်းကြောင်းဆီ ဦးတည်သွားတာလို့ ကောက်ချက်ချရင် မှားမယ် မထင်ပါ။

၈၈၈၈ အရေးတော်ပုံကာလက လူပေါင်း ၃ ထောင် နီးပါး အသက်ဆုံးရှုံးခဲ့ရပေမယ့် အဲဒီဖြစ်စဥ်တွေကို တနုိင်ငံလုံးက မမြင်တွေ့ခဲ့ကြရပါဘူး။ ခု ၂၀၂၁ အရေးေတာ်ပုံမှာတော့ ကျဆုံးခဲ့ရသူ အသက်ပေးခဲ့ရသူ တယောက်ချင်းတယောက်ချင်းရဲ့ ဓါတ်ပုံတွေ အားလုံးနီးနီး မှတ်တမ်းမှတ်ရာနဲ့ ရှိပြီး အဖြစ်အပျက်ဖြစ်ပျက်တိုင်း နေ့တွင်းချင်း မဟုတ်ေတာင် နောက်တရက်အတွင်း တနုိင်ငံလုံးကို ပျံ့နှံ့ပြီး ဖြစ်ပါတယ်။

ဒီအချက်တွေက စစ်ကောင်စီရဲ့ အာဏာသိမ်းမှုကို ညင်သာတဲ့အာဏာသိမ်းမှု မဟုတ်ကြောင်း သက်သေပြတဲ့ အချက်တွေ ဖြစ်ပါတယ်။ အစပိုင်းရက်အနည်းငယ်သာ ညင်သာတဲ့ အာဏာသိမ်းမှု အသွင် ယူဖို့ကြိုးစားတာတွေ့ရပေမယ့် ငြိမ်းချမ်းစွာဆန္ဒပြမှုက တနိင်ငံလုံးနီးပါး မြို့ရော တောပါ မကျန် လမ်းပေါ်ချီတက်ကြတဲ့ နောက်ပိုင်း ဘာမဆို မလုပ်ရဲတာမရှိဘူးဆိုတဲ့ စစ်ခေါင်းဆောင်တွေရဲ့ သရုပ်သကန် ပေါ်ထွက်လာခဲ့တာလည်း ဖြစ်ပါတယ်။

ပြည်တွင်းစစ်မီး ပိုကျယ်ပြန့်လာမယ့် အလားအလားတွေ ထွက်ပေါ်လာပြီး မြို့တွေမှာ ေပါက်ကွဲမှုတွေ နေ့စဥ်လို ဖြစ်လာနေတာကြောင့် အမေရိကန် နိုင်ငံက သူ့နုိင်ငံသားတွေကို အမြန်ဆုံး ထွက်ခွာဖို့ အကြံပြုချက်လည်း ပြီးခဲ့တဲ့ ရက်ပိုင်းက ထုတ်ပြန်ခဲ့တာ တွေ့ခဲ့ပါတယ်။ မြန်မာနိုင်ငံသားတွေ အဖို့တော့ မကြာခင် ပိုကျယ်ပြန့်လာနိုင်တဲ့ ပြည်တွင်းစစ်မီးအတွက် မှန်းဆ ပြင်ဆင်ထားရတော့မယ့် အနေအထားဖြစ်နေတယ်လို့ ကောက်ချက်ချမိပါတယ်။

ဒီနေ့ အဖို့ အခြားသတင်းတွေကတော့ လာမယ့်လ ၁ ရက်နေ့ဖွင့်မယ်လို့ ကြေညာထားတဲ့ စာသင်ကျောင်းတွေမှာ ကျောင်းသားတွေ ကျောင်းအပ်တာကို စတင်လက်ခံတဲ့နေ့ဖြစ်ပါတယ်။ ဆန္ဒပြမှုနည်းတဲ့ ရခိုင်ပြည်နယ် စစ်တွေလိုမျိုးမှာ အခြားရခိုင်ပြည်နယ်မြို့တွေမှာ ကျောင်းအပ်သူများတာ တွေ့ရပေမယ့် ရန်ကုန်လိုမျိုး၊ မန္တ လေးလိုမျိုးမှာ ကျောင်းအပ်တဲ့ မိဘ အတော်များများက စစ်ကောင်စီရဲ့ ကျောင်းပညာရေးကို ဆန့်ကျင်တာရော လုံခြုံရေး အာမခံချက်မရှိတာကြောင့် ရန်ကုန်မှာ ကျောင်း အပ်နှံသူ နည်းတာတွေ့ရမှာ ဖြစ်ပါတယ်။

မိုးမခနဲ့ NUG နိုင်ငံခြားရေးဝန်ကြီး ဒေါ်ဇင်မာအောင်နဲ့ အင်တာဗျုးစဉ် သူပြောတဲ့စကားကို ကောက်နုတ်ပြရရင် - နွေဦးတော်လှန်ရေးမှာ အားလုံးတန်းတူရည်တူ တိုက်ပွဲဝင်ကြရတယ်။ စွန့်လွှတ်စွန့်စားကြရတယ်။ ဘယ်သူကမှ ခေါင်းတလုံးမြင့်နေတယ်လို့ မရှိဘူး။ နိုင်ငံရေးသမားမို့လို့ သူတို့ကတော့ဖြင့် တော်လှန်ရေးမှာ ရှေ့ကပါတယ်။ ခေါင်းတလုံးမြင့်တယ်လို့ ပြောလို့မရတော့ဘူး။ အားလုံး အတူတကွ ရင်ဘောင်တန်းပြီး တိုက်ကြ တွန်းလှန်နေကြတာလို့ ပြောသွားပါတယ်။

မှန်ပါတယ်။ သည်နွေဦးတော်လှန်ရေးမှာ လှည်းနေလှေအောင်းမြင်းစောင်းမကျန် လူထုကြီးတရပ်လုံး ညီညာထကြွ တော်လှန်ပုန်ကန်နေကြတာပါ။ ဘယ်သူကမှ ထူးပြီး တော်နေ တတ်နေ ဦးဆောင်နေ သာနေတယ်လို့ ပြောမရလောက်အောင် စုပေါင်းညီညွတ် စုပေါင်းခေါင်းဆောင်မှုတွေနဲ့ ချီတက်နေကြတာ အလွန် ထင်ရှားပါတယ်။ အဲသည်တော်လှန်ရေးမှာ ကိုယ့်တာဝန်ကိုယ်ကျေပွန်အောင် ထမ်းဆောင်နေကြတာမို့ မပါလိုက် မကျန်လိုက်ရ မရှိရအောင် ဆက်ချီတက်ကြဖို့ တိုက်တွန်းလိုက်ပါကြောင်း။

Join Us @ MoeMaKa Telegram
t.me@moemaka
#MoeMaKaMedia
#WhatsHappeningInMyanmar