ဦးနွေ - ငါတို့လူငယ် ဘဝ၊ သူတို့လူငယ် ဘဝ

Art - Than Htay Maung

ငါတို့လူငယ် ဘဝ၊ သူတို့လူငယ် ဘဝ

ဦးနွေ

(မိုးမခ) မေ ၂၅၊ ၂၀၂၁

(၁)

ငါတို့ လူငယ်ဘဝသည် စစ်အုပ်ချုပ်မှုအောက်မှာ ဖြစ်သည်။ ပြောရမည်ဆိုလျှင် စစ်အုပ်ချုပ်မှု အောက်မှာ ပြားပြားဝပ် ဖြစ်သွားပြီ ဖြစ်သည်။ နေသားတကျ ဖြစ်သွားပြီ ဖြစ်သည်။ ငါတို့လူ ငယ်ဘဝသည် ကဖေးဆိုင်ထဲမှာ ဖက်ကြမ်းတစ်ပွဲ၊ ရေနွေးတစ်အိုးနှင့် ကျဆိမ့် တစ်ခွက်ကိုသောက်ကာ လမ်းမပေါ်ကို ငေးမောနေရသည်။ ကြည့်စရာဆို၍ မြဝတီ၊ မြန်မာ့အသံကလာသည့် ဇာတ်ကားများရှိသည်။ တိတ်ခွေစက်များ၊ ထိုမှတဆင့် ဒီဗွီဒီစက်များက ပြသည့် ဇာတ်ကားများရှိသည်။ ငါတို့နိုင်ငံ ဘာတွေဖြစ်ပျက်နေလဲဆိုသည်ကို သိရှိနိုင်ရန် စစ်အစိုးရကထုတ်ဝေသည့် မြန်မာ့အလင်းသတင်းစာနှင့် ကြေးမုံ သတင်းစာ ရှိသည်။ ထိုသတင်းစာနှစ်စောင်တွင် ယူနီ ဖောင်းဝတ်များသည် လက်နှစ်ဖက်ကိုနောက်ပစ်ကာ လို အပ်သည်များကို မှာကြားကြသည်။ စသဖြင့် ဘာဘာညာညာပြောသည်များ ပါရှိသည်။ ရေအား လျှပ်စစ်စီမံကိန်းများ၊ လမ်းများ၊ တံတားများ စသဖြင့် နိုင်ငံတွင် ပြုလုပ်နေသည့် စီမံကိန်းများ ပါရှိသည်။ သို့သော် ငါတို့မြို့ကလေးရှိ လမ်းများသည် ကတ္တရာလမ်း အစုတ်များနှင့် မညီမညာ ဂဝံလမ်းများသာ ရှိသေးသည်။ မီတာရှိသည့် အိမ်ဆို၍ လမ်းတစ်လမ်းမှာ အနည်းငယ်သာရှိသေးသည်။ ညဘက်ရောက်လျှင် လမ်းများသည် လမ်းမီးတိုင်များမရှိသောကြောင့် မှောင်မဲ၍နေသည်။ ထိုသို့ဖြစ်နေသည်ကို ငါတို့လူငယ်များ သည် ကျယ်ကျယ်လောင်လောင် ပြောဆို၍မရခဲ့ပေ။ ငါတို့ ငြိမ်ကုပ်စွာနေခဲ့ရသည်။

(၂)

ငါတို့လူငယ်ဘဝက ကဖေးဆိုင်များသည် ငါတို့ ၏ ဒုတိယအိမ်များ ဖြစ်ကြသည်။ ငါတို့သည် နံ နက်မိုးလင်းပြီဆိုသည်နှင့် ကဖေးဆိုင်များမှာ ဆုံတွေ့ကြသည်။ ငါတို့ ကျားရွှေ့ကြသည်။ သီချင်းနားထောင်ကြသည်။ လမ်းသွားလမ်းလာများကို ငေးမောရင်း ဖက်ကြမ်းဆေးလိပ်များကို တစ်ဖွာပြီးတစ်ဖွာ ရှိုက်ခဲ့ကြသည်။ ငါတို့မကျေပ်နပ် သည်များကို ပေါက်ကွဲကြသည်။ သို့သော် ငါတို့ ၏ ပေါက်ကွဲသံများသည် ငါတို့အနီးနားတွင်သာ ပျောက်ဆုံး၍သွားကြသည်။ ငါတို့လူငယ်ဘဝသည် ဖုန်းဆက်ချင်လျှင် ကြိုးဖုန်းများကို အား ကိုးခဲ့ကြရသည်။ ထို့ကြောင့် အဝေးက ဘော်ဒါများကို ဖုန်းဆက်ချင်လျှင် သူတို့အိမ်များ၏ အနီးမှာရှိသည့် ကြိုးဖုန်းရှိသည့်အိမ်ကို ဖုန်းဆက်ပြီး ခေါ်ခိုင်းကြရသည်။ ငါတို့လူငယ်ဘဝက ဟန်းဖုန်းများသည် အခွင့်ထူးခံ လူတန်းစားများနှင့် ပိုက်ဆံချမ်းသာသည့် လူတန်းစားများအတွက်သာ ဖြစ်သည်။ ငါတို့လူငယ်ဘဝက အင်တာနက်များ၊ facebook များကို ငါတို့ မသိခဲ့ကြပေ။ ငါတို့ သည် စာအုပ်များကို တစ်အုပ်ပြီးတစ်အုပ် အ ငမ်းမရ ဖတ်ရှုခဲ့ကြသည်။ ဘိုဘို၊ တွတ်ပီ စသည့် ကာတွန်းစာအုပ်များ၊ သိုင်းဝတ္ထုစာအုပ်များ၊ မင်းမြတ်သူရ၊ မင်းသိင်္ခ ဝတ္ထုစာအုပ်များကို ဖတ်ရှုခဲ့ ကြသည်။ ထိုစာအုပ်များကို စာအုပ်အငှါးဆိုင် လေးများမှ ငှါးရမ်းဖတ်ရှုခဲ့ကြခြင်း ဖြစ်သည်။

(၃)

ငါတို့လူငယ်ဘဝက ၂၀၀၇ ရွှေဝါရောင်တော်လှန် ရေးဖြစ်ပွါးခဲ့သည်။ သံဃာတော်များ ငြိမ်းချမ်းစွာ စီတန်းလှည့်လည်ကြသည်။ စစ်အာဏာရှင် များသည် အကြမ်းဖက်ဖြိုခွဲခဲ့ကြသည်။ ထိုအ ချိန်တုန်းက ငါတို့လူငယ်များသည် ကဖေးဆိုင်ထဲမှာဖြစ်သည်။ ထိုသို့ဖြစ်နေသည်ကို ဟိုလူပြော ဒီလူပြောနှင့် ငါတို့သိခဲ့ကြသည်။ ငါတို့သည် လမ်းထိပ်သို့ပင် ထွက်ပြီး မကြည့်ခဲ့ကြရပေ။ ငါတို့လူ ငယ်ဘဝက ရေဒီယိုများကိုလည်း နားထောင်ခဲ့ကြရသည်။ ပြည်ပသို့ထွက်ပြေးတိမ်းရှောင်နေ ကြရသည့် ငါတို့နိုင်ငံက နိုင်ငံရေးသမားများ၏ အသံများကို ကြားခဲ့ကြရသည်။ စစ်အာဏာရှင် များ၏ ရက်စက်ကြမ်းကြုပ်မှုများကို သိခဲ့ကြရ သည်။ ငါတို့လူငယ်ဘဝက စစ်အာဏာရှင်များကို တော်လှန်နေကြသည့် ငါတို့ရှေ့က မျိုးဆက်များ သည် အဖမ်းအဆီး အထိန်းအသိမ်းခံထားရပြီ ဖြစ်သည်။ ပြည်ပသို့ ထွက်ပြေးတိမ်းရှောင်နေကြရပြီဖြစ်သည်။ တောခိုနေကြရပြီ ဖြစ်သည်။ ငါတို့ လူငယ်ဘဝက စစ်အာဏာရှင်များသည် အခြား နိုင်ငံများနှင့် ယှဉ်လျှင် အလွန်အင်မတန်မှ ခေတ်နောက်ကျအောင် ငါတို့ကို ပြုလုပ်ထားသော ကြောင့် ပြန်လည်တွန်းလှန်ချင်သော်လည်း ငါတို့လူငယ်များသည် အားမတန်၍ မာန်လျှော့ထားကြရသည်။ ထို့အတူပင် ငါတို့ မိဘများသည်လည်း စစ်အာဏာရှင်၏ မကောင်းကြောင်းများကို ကျယ်လောင်စွာ မပြောရဲကြပေ။

(၄)

ငါတို့လူငယ်ဘဝက နာဂစ်မုန်းတိုင်းနှင့်လည်း ကြုံ ခဲ့ရသည်။ ထိုမုန်တိုင်းကြောင့် ငါတို့ နိုင်ငံသားများ အတုံးအရုံးသေကြေပျက်စီးခဲ့ကြသည်။ ဝမ်းနည်းပူဆွေးခဲ့ကြသည်။ ထိုသို့ဖြစ်နေချိန်တွင် စစ်အာဏာရှင်များသည် ၂၀၀၈ ဖွဲ့စည်းပုံအခြေခံ ဥပဒေကို သူတို့စိတ်ကြိုက် ရေးဆွဲခဲ့ကြသည်။ ထိုဥပဒေဖြင့် အုပ်ချုပ်မှုအောက်တွင် ငါတို့လူငယ်ဘဝများ ကုန်ဆုံးခဲ့ကြသည်။ ငါတို့သည် Generation Y များ ဖြစ်သည်။

(၅)

သူတို့ လူငယ်ဘဝသည် အင်တာနက်ကဖေးဆိုင် ထဲမှာဖြစ်သည်။ ကမ္ဘာကြီးကို သူတို့ငုံ့ကြည့်နေကြသည်။ သူတို့ အင်တာနက်ဂိမ်းများဖြင့် စစ် တိုက်နေကြသည်။ သူတို့ လမ်းလျှောက်လျှင် ခေါင်းငုံ့ပြီး လမ်းလျှောက်ကြသည်။ သူတို့သည် နားကြပ်တပ်ပြီးလမ်းလျှောက်ကြသည်။ သူတို့လူငယ်ဘဝသည် အီးလ်ဘုတ်စာအုပ်များကို အများအားဖြင့်ဖတ်ရှုကြသည်။ သူတို့သည် facebook စာမျက်နှာ များပေါ်တွင် သူတို့ မကျေ နပ်ချက်များကို ကျယ်ကျယ်လောင်လောင်ပေါက် ကွဲကြသည်။ အင်စတာဂရမ်၊ တွစ်တာ များလည်း သုံးကြသည်။ ငါတို့လူငယ်များ အလုပ်အား၍ facebook ပေါ်တက်လာသည့် အခါတိုင်း သူတို့ ၏ facebook အကောင့်များသည် အမြဲစိမ်း ၍ နေသည်။ ထို့ကြောင့် facebook ကို အလွန်အကျွံသုံးသူများဟု သူတို့ကို ငါတို့ မှတ်ယူခဲ့ကြသည်။ သူတို့လူ ငယ်ဘဝသည် ဆိုင်ကယ်တဝီဝီနှင့်ဖြစ် သည်။ လမ်းမများပေါ်တွင် ဆိုင်ကယ်ကို တဗြူးဗြူး တဗြဲဗြဲဖြင့် လီဗာကို အသားကုန်ဖုတ်ပြီး မောင်းနေကြသည်။ သူတို့ကို ငါတို့ သိပ်ကြည့် ၍မရ ဖြစ်ခဲ့ကြသည်။ သူတို့လူငယ်ဘဝသည် ငါ့တို့အမြင်တွင် ထူးဆန်းသည့် ပန့်ကေများကိုလည်း ဆံပင်ပုံစံညှပ်ထားကြသည်။ သူတို့ခေါင်းကိုကြည့်လိုက်လျှင် တစ်ခေါင်းလုံးထိုးထိုးထောင်ထောင်ဖြင့် ငါတို့ မျက်လုံးထဲတွင် အကြည့်ရသိပ်ဆိုးခဲ့သည်။

(၆)

သူတို့လူငယ်ဘဝသည် ဟန်းဖုန်းကိုယ်စီနှင့် ဖြစ် သည်။ သူတို့ကို ကြည့်လိုက်လျှင် အမြဲလိုလိုဟန်း ဖုန်းတစ်လုံးဖြင့် အလုပ်ရှုပ်၍ နေသည်။ သူတို့ သည် တစ်ယောက်နှင့်တစ်ယောက် တစ်နေရာရာ မှာတွေ့ဖို့ ချိန်းသည့်အခါ ဟန်းဖုန်းဖြင့် ဆက်ကြသည်။ သူတို့လူငယ်ဘဝသည် ဂီတမျိုးစုံကို နားဆင်ခံစားနေကြပြီဖြစ်သည်။ သူတို့နား ထောင် ကြသည့် ဂီတများကို ငါတို့ မကြိုက်ကြပေ။ တ ဒုန်းဒုန်း တဒိုင်းဒိုင်းအသံများ၊ ပါးစပ်က စက်သေ နတ်ပစ်သလို အသံများ၊ စသည့် အသံများ သည် ငါတို့နားထဲသို့ အပ်ပေါင်းမြောက်များစွာ ဝင်ရောက်သကဲ့သို့ စူးစူးရှရှခံစားရသဖြင့် ငါတို့ ကြိုက်နှစ်သက်မှုမရှိခဲ့ပေ။ ထို့ကြောင့် ငါတို့သည် သူတို့ကို သိပ်အမြင်မကြည်ခဲ့ပေ။ သူတို့လူငယ်ဘဝသည် စီးကရက်ကို ပါးစပ်တွင် တေ့ထားပြီး တစ်ယောက်နှင့်တစ်ယောက် စကားပြောကြသည်။ သူတို့ကို ကြည့်လိုက်လျှင်လည်း စီး ကရက် ကိုယ်စီသောက်နေကြသည်။ ငါတို့ မျက်လုံးထဲတွင် ဘယ်လိုပင် ကြည့်ကြည့် ဒေါင့်မတည့်ခဲ့ပေ။ သူတို့လူငယ်ဘဝသည် ကွမ်းလေးတမြုံ့မြုံ့နှင့် ဖြစ်သည်။ သူတို့ပါးစပ်များ အမြဲလိုလိုပင် ရဲပတောင်းခတ်နေသည်။ သူတို့သည် ကွမ်းကို ဆေးဖြင့် စားနေကြပြီ ဖြစ်သည်။ သူတို့လူငယ်ဘဝသည် အတွဲကိုယ်စီနှင့်ဖြစ်သည်။ သူတို့လူငယ်ဘဝသည် တစ်ယောက်နှင့်တစ်ယောက်စကား ပြောဆိုကြရာ တွင် လွတ်လွတ်လပ်လပ် ကျယ်ကျယ်လောင်လောင် ပြောဆိုကြသည်။ လွတ်လပ်မှု၏ အရသာကို သူတို့ခံစားကြသည်။ လွတ်လပ်မှုကို သူတို့မြတ်နိုးကြသည်။ သူတို့ကို ချုပ်ချယ်လျှင် သူတို့ မကြိုက်ကြပေ။

(၇)

၂၀၂၁ ခုနှစ် ဖေဖော်ဝါရီလ ၁ ရက်နေ့တွင် အသက် ၆၅ နှစ်အရွယ်ရှိသည့် စစ်အာဏာရှင်တစ်ယောက်ဦးဆောင်ပြီး ငါတို့နိုင်ငံ၏အာဏာကို ငါတို့ပြည်သူများ၏လက်ထဲမှ အတင်းအဓမ္မသိမ်းယူလိုက်သည်။ ငါတို့သည် ခံပြင်းစွာ ဒေါသထွက်ခဲ့ကြသည်။ ငါတို့သတင်းများကြည့်ကြသည်။ ထိုအချိန်တွင် သူတို့လူငယ်များထဲက တစ်ယောက်သည် အပြင်မှ အိမ်သို့ ပြန်လာခဲ့သည်။ အချိန် အားဖြင့် နံနက်ဝေလီဝေလင်း အချိန်ဖြစ်သည်။ သူသည် သူ၏ တက်ဘလက်ဖုန်းကို ဖွင့်လိုက် သည်။ တက်လာသည့် သတင်းများကြောင့် ဟာခနဲ ဟင်ခနဲ သူဖြစ်သွားသည်။ ထို့နောက် တက်ဘလက်ဖုန်းဖြင့် စစ်အာဏာရှင်ကို တော်လှန်သည့် လိုဂိုတစ်ခုကို သူဆွဲလိုက်သည်။ မကြာမီ သူတို့လူငယ်များ လမ်းပေါ်ထွက်လာကြသည်။ ကြွေးကြော်သံများနှင့် ဖြစ်သည်။ ငါတို့ အံ့သြမိသည်။ ထို့နောက် ဝမ်းသာမိသည်။ သူတို့လူငယ်ဘဝသည် စစ်အာဏာရှင်ကိုတော်လှန်ရင်း နေ့ရက်များကို ဖြတ်သန်းနေကြသည်။ သူတို့လူငယ်ဘဝ သည် စစ်အာဏာရှင်ကို နည်းလမ်းပေါင်းစုံဖြင့် တော်လှန်နေကြသည့် မြန်မာ့နွေဦးတော် လှန်ရေးတွင် ရှေ့တန်းမှပါဝင်ရင်း ဖမ်းဆီးရိုက်နှက်ခံနေရသည်။ ကြွေလွင့်နေကြသည်။ သို့သော် သူတို့ သည် ယခုအချိန်ထိ မကြောက်မရွံ့ နောက်မဆုတ်ဘဲ ဆက် လက်တိုက်ပွဲဝင်နေကြဆဲ ဖြစ်သည်။

(၈)

သူတို့လူငယ်ဘဝသည် တိုင်းပြည်အတွက် စစ်အာဏာရှင်ကိုတော်လှန်းရင်း နေ့ရက်တိုင်းလိုလိုပင် ကျဆုံးနေကြရသည်။ ငါတို့သည် သူတို့သတ္တိနှင့်ယှဉ်လျှင် သူတို့နောက်မှာပင် ဖြစ်သည်။ သူတို့ လူငယ်ဘဝသည် စစ်အာဏာရှင်ကို တော်လှန်းရင်း နေ့ရက်များကို တစ်ရက်ပြီးတစ်ရက်ဖြတ် သန်းကာ ကုန်ဆုံးနေကြရသည်။ မျိုးဆက်မှားပြီး ရန်စမိပြီဟူသော စကားစုလေးသည် သူတို့ကို ရည်ညွှန်းခြင်း ဖြစ်သည်။ သူတို့လူငယ်ဘဝသည် ငါတို့လူငယ်ဘဝထက် ပိုပြီးလွတ်လပ်သလို ပိုပြီး တီထွင်ကြံဆမှုများရှိသည်။ သူတို့သည် ငါတို့ထက် ပိုပြီးရဲရင့်သည်။ ပိုပြီးသန်မာသည်။ သူတို့ သည် Generation Z များ ဖြစ်ကြ၏။ အရေး တော်ပုံ အောင်ရမည်။

ဦးနွေ

Join Us @ MoeMaKa Telegram
t.me@moemaka
#MoeMaKaMedia
#WhatsHappeningInMyanmar