Breaking News

မြန်မာ့နွေဦးတော်လှန်ရေးကဗျာများ - ? ၊

Art - Than Htay Maung 

မြန်မာ့နွေဦးတော်လှန်ရေးကဗျာများ - (...?)
မိုးမခ
မေ ၂၅၊ ၂၀၂၁
- - -

ဆောင်းနှင်းငါတို့ဝေချိန် အမီ
?


ရည်းစားနဲ့အဆင်မပြေလို့ 
မိဘနဲ့အဆင်မပြေလို့
စားရေးဝတ်ရေးနေရေးအဆင်မပြေလို့
ဘာတွေရေးထားမှန်းမသိတဲ့စာအုပ်ကြီးထဲက ကျိန်စာတွေကိုအလွက်ကျက်အော်ဆိုပြီး
ခြင်းကြားထဲ ခုန်ဝင်ခဲ့ရတဲ့ကလေးတွေရဲ့ ကျောကုန်းတွေကိုနင်းပြီး
ဘယ်မှသွားစရာနေရာမရှိလို့
ဘိန်းကလွဲ အခြားစိုက်ပျိုးလို့မဖြစ်နိုင်တဲ့တောင်ကြောဆီ
မြေသြဇာသွားလုပ်ခဲ့ရတဲ့ချာတိတ်တွေရဲ့ဦးခေါင်းခွံတွေကိုနင်းပြီး
ထမင်းကြမ်းခဲကို ခရမ်းသီးစိမ်းဆားတို့မြှုပ်စားခဲ့ရတဲ့ဘဝကနေ
ကာရစ်ဗီယမ်ငါးဥဆားနယ်ကို နှစ်ချို့ဝိုင်ဖြူနဲ့မြည်းနိုင်ပြီပဲ
ကိုယ့်ဖိနပ်ပြတ်ကိုယ်တိုင်ကိုင်ခဲ့ရတဲ့ကိုယ့်မယားကို
လူးဝစ်ဗစ်တန်လက်ကိုင်အိတ်ထဲချက်လက်မှတ်ထည့်ကိုင်စေပြီး
ကိုယ့်မယားဖိနပ်ကို
သူများမယားကိုကိုင်ခိုင်းစေနိုင်ခဲ့ပြီပဲ
တော်ရောပေါ့
ကိုယ့်အဖေရေးခဲ့တဲ့ပန်းချီကားတွေကိုတိုက်မိမှာစိုးလို့ သတိထားရှောင်တိမ်းလျှောက်ခဲ့ရတဲ့အခန်းထဲကနေ
ဗန်ဂိုးပန်းချီကားချိတ်ထားတဲ့ကိုယ်ပိုင်ဟိုတယ်ထဲက
ကြောင်ချီးနံ့နဲ့ရေမွှေးနံ့သင်းနေတဲ့ရေချိုးခန်းထဲ 
ဘဝတူအိုးစားဖက်သူငယ်ချင်းတွေရဲ့ 
သွေးနဲ့ရေချိုးခဲ့ပြီပဲ
တော်ရောပေါ့
ကိုယ်ပေါင်ကြားထဲက ကိုယ့်လိင်အင်္ဂါကိုမှ ကိုယ်အားမနာ
ဘာလက်နက်မှကိုယ်တိုင်ကိုင်မထားတဲ့အမျိုးသမီးတစ်ယောက်အပေါ် 
သူမ မလုပ်ခဲ့ဖူးတဲ့ပြစ်မှုပုဒ်မတွေချိတ်ဆွဲပြီး လူသူမမြင်နိုင်အောင်ဝှက်ထားဖို့
ကိုယ့်သားကိုယ့်သမီးအရွယ်ကလေးတွေရည်ရွယ်ထားတဲ့လမ်းတွေကိုဖျက်ဆီးဖို့
ကိုယ့်မိကိုယ့်ဘအရွယ်လူအိုတွေရဲ့နေအိမ်တွေကို မီးတိုက်ဖို့
ပြီးတော့ 
သေသူရှင်သူလူသားတွေရဲ့ ငိုသံနဲ့ရယ်သံတွေကိုဖြတ်
သူ့အတွက်ဆင်ထားတဲ့ကြိုးစင်ဆီ သူ့ရဲ့တုန်နေတဲ့ဒူးတွေနဲ့လျှောက်သွားဖို့
မလုပ်ကောင်းပါဘူး
ဒါပေမဲ့
သူနောက်ကျသွားခဲ့ပြီ
မှားသွားခဲ့ပြီ
အချီကြီးသူမှားသွားခဲ့ပြီ
သူ့အမှားတွေကို ဘယ်လိုမုသားတွေနဲ့ ဘယ်လိုဆက်ကာကွယ်နိုင်ဦးမလဲ
အမှားတကာအမှားထဲ သူအမှားခဲ့ဆုံးက
သူက သိပ်ကြောက်တတ်တယ်
လူတိုင်းကို သူ့လိုပဲ ကြောက်တတ်ကြလိမ့်မယ်
အဲသလို သူထင်ခဲ့တာ 
သူညံ့ဖျင်းခဲ့တယ်
လူတိုင်းကို သူ့လိုပဲ ညံ့ဖျင်းကြလိမ့်မယ်
အဲသလို သူထင်ခဲ့တာ
ဘယ်သူသေသေ ငတေမာရင်ပြီးရောလို့
သူတစ်ကိုယ်ကောင်းဆန်ခဲ့သလို
လူတိုင်းတစ်ကိုယ်ကောင်းဆန်လိမ့်မယ်
အဲသလို သူထင်မထားခဲ့တာ
ငါတို့ဟာ နွေဦး
ငါတို့ဟာ မိုး
နွေဦးဟာ မိုးကိုလှမ်းခေါ်လိုက်တယ်
မိုးရောက်လာပြီ
အေး
ငါတို့ခေါ်လို့ ငါတို့အရောက်လာခဲ့ပြီ
တူမီးသံလို ယမ်းသံလို ထစ်ချုန်းလို့
ပင်ကြီးပင်ငယ်တွေကို ရေစင်တိုက်ကျွေးဖို့
ကြောင်ချီးကိုအရည်ဖျော် မြေသားနဲ့တစ်သားတည်းဖြစ်သွားစေဖို့
ရင်ပြင်တော်ကို ဆေးကြောဖို့
ဆောင်းနှင်းငါတို့ဝေချိန် အမီ

၂၄-၅-၂၀၂၁
-
ကာကော ဖက်နဲ့ထုပ်ထားတဲ့ညစာ


မမိတချက် မိတချက်
ရေဒီယိုထဲကထွက်လာတဲ့ငြိမ်းချမ်းရေးစကားများ
သစ်ပင် တောတောင်တွေ တုန်လှုပ်သွား
ထမိန်ကျွတ်ပြီးလွတ်လာသလား
ကြယ်ပွင့်ပါသော ချိုးငှက်များ
လျှိုမြှောင်တောလမ်း ခရီးကြမ်းကြီး
မှိုတွေ့ မှိုချိုး မျှစ်တွေ့ မျှစ်ချိုး 
ကိန်းခန်းနဲ့ တာယာတွေ စိမ်းလန်းတဲ့ မြန်မာပြေ
သဘက်စောင်ခေါင်းပေါင်းထဲ ကင်းမီးကောက်ထည့်ပေါင်းထားတဲ့လူ
အဟာရချို့တဲ့နေတဲ့ ဖိနပ်သဲကြိုးကို ကြိုးချည်ပြီး
ဓားမောက်ဖြစ်နေတဲ့ ဓားမကို ခါးမှာထိုးထဲ့ပြီး
လမ်းပြမြေပုံကို စိတ်တွက်နဲ့ တဒိတ်ဒိတ်ခုန်လို့
ရောက်တော့မှာပါလို့ အားပေးရင်း အားတင်းကာ
ဖားဥစွဲနေတဲ့ ဗလာစီယာက ပျောက်ဆုံးသွားတဲ့မြစ်တစင်းကိုထုပ်ပိုးကာ
နို့ချောင်းပိတ်နာရီတွေမှာ ကြယ်လေးတွေက မှိတ်တုတ် မှိတ်တုတ်
ဆာလောင်နေတဲ့ ခွေးဟောင်သံကတဝုတ်ဝုတ်
အားကုန်တော့မဲ့ဘက်ထရီမီးက  စနစ်တကျဆုတ်ခွာဖို့ အသင့်
အိုးနင်းခွက်နင်းလရောင်မှာ စမ်းချောင်းထဲ လက်ဆေးပြီး
မျက်ရည်ပေါလော တာလပေါ ချောင်စီး
ကိုယ့်ဖက်ထဲ ကိုယ် ဘူဖေးတဲ့ညစာ မျှစ်စားသူများပန်းချီကား
မလုံခြုံသော်လည်း မပြိုကွဲသေးတဲ့ဘဝတွေ
သူတို့သည် မျက်စေ့တဖက်ဖြင့် အစာကို၄င်း
ကျန်တဖက်ဖြင့် ရန်သူကို၄င်း။

သန်းဌေးမောင်
မေ၊ ၃၁၊ ၂၀၁၈
+ ကာကော = ကျီးလန့်စာစား

-

t.me@moemaka
#MoeMaKaMedia
#WhatsHappeningInMyanmar