မြန်မာ့နွေဦးတော်လှန်ရေးကဗျာများ (၁)- ဇာနည်

Image- Crd

မြန်မာ့နွေဦးတော်လှန်ရေးကဗျာများ 

မိုးမခ

ဇူလိုင် ၆၊ ၂၀၂၁

-

"ငါ့မြို့လေး.."

ဇာနည်

ပဲခူးရိုးမတောင်တန်းကြီးတွေရဲ့

ကျောရိုးနံဘေးကမြို့လေး..

သူရဲကောင်းတွေရဲ့ဝိညာဉ်တွေအကြောင်း

ညအိပ်ရာဝင်ပုံပြင်တွေနားထောင်ခဲ့ရတဲ့မြို့လေး..

ပေါလ်ဂေါ်ဂင်ရဲ့စုတ်ချက်တွေနဲ့

အနာဂတ်ကိုခပ်ကြမ်းကြမ်းခြယ်မှုန်းခဲ့တဲ့မြို့လေး..

လူမိုက်တွေပေါပြီး

လူလိမ်မာတွေနဲပါးတဲ့မြို့လေး...

ရှင်မောဂ္ဂလာန်ဇာတ်တော်ထဲက

ခိုးသားနှစ်ရာ့ငါးဆယ်နေထိုင်တဲ့မြို့လေး...

မီးတောက်ဆန်ချက်အရက်နဲ့

တော်လှန်ကဗျာတွေကိုအမြည်းလုပ်ခဲ့ဖူးတဲ့မြို့လေး...

တဝမ်းတခါးလှဖို့ထက်

နေ့တဓူဝ တဝမ်းဝဖို့ပဲ ဦးစားပေးခဲ့တဲ့မြို့လေး...

ရှားရှားပါးပါးအပျော်တွေနဲ့

တနှစ်တခါတောဘုရားပွဲလေးရှိတဲ့မြို့လေး...

လူနေခြုံကြား စိတ်နေဘုံဖျား

စာသမား ကဗျာသမားတွေမခေါင်းပါးတဲ့မြို့လေး...

အဲ့ဒီမြို့လေးဟာ

ဒီနွေဦး ခေတ်ပေါ်ရာဇဝင်တောလားမှာ

မော်ဒန် တော်လှန်တွေနဲ့

ကျော်ပြန်သပေါ့ ကပ်သုံးပါး...။ ။

-

(ဇာတိမြို့လေးမှမြို့ပြပြောက်ကျားများသို့)

၅-၇-၂၁

-

Join Us @ MoeMaKa Telegram

t.me@moemaka

#MoeMaKaMedia

#WhatsHappeningInMyanmar