ဆု ဘိုး မိ - ညရေးညတာ များ
ညရေးညတာများ
ဆု ဘိုး မိ
(မိုးမခ) ဇူလိုင် ၁၃၊ ၂၀၂၁
¤
ညှို့ငင်မှုကိုခံစားလို့မရသေးဘူး •••၊
ကိုယ်ကိုယ်တိုင်ပျောက်ဆုံးနေတဲ့
အလုံပိတ်တံခါးတွေရဲ့နောက်မှာ
လရောင်ကို
ဘယ်လိုအတွေးနဲ့ကောက်ယူနိုင်ပါမလဲ
အသက်ဝဝရှုချင်တယ် ။
¤
မိုးစက်မှုန်တွေလည်းနာဖျားလို့ •••၊
ပန်းရောင်စုံတွေပွင့်နေသလား
သစ်ရွက်လေးတွေစိမ်းစိုနေပြီလား
အလှအပအားလုံးဝေဝါးစေတဲ့အထိ
ကြေမွနေတဲ့ မြို့ရိုးထက်မှာ
နွေဦးကိုသာပြတ်ပြတ်ထင်ထင်လွှင့်ထားရတုန်း
အဲဒီရက်တွေကိုမုန်းတယ် ။
¤
လိုလိုချင်ချင်တော့ဘယ်ဟုတ်ပါ့မလဲ •••၊
ဘွဲ့နှင်းသဘင်နဲ့ ကြိုးစင်
ဆေးထိုးအပ်နဲ့ သေနပ်
အလဲအထပ်တွေကမတန်တဆ
အနာဂတ်ကိုဗလက္ကာယပြုခံရတဲ့အခါ
ရုန်းကန်ခြင်းတွေရေတံခွန်လိုသွန်ချ
စိတ်ဟာချွေးဒီးဒီးကျတယ် ။
¤
လေကောင်းလေသန့် သိပ်ငတ်တာပဲ •••၊
တရားတော်တွေပွားရင်း
မတရားလော်မာမှုချည်းထွန်းကားတဲ့မြေမှာ
အညွှန်းကောင်းတဲ့ဆေးတွေဟာ
ဘေးထွက်ဆိုးကျိုးတွေနဲ့
နာနာကျည်းကျည်း ပြုံးတယ်
ပြီးတော့ -
နာနာကျင်ကျင် ရယ်တယ် ။
¤
နေ့ရက်တွေကထုံပေပေနိုင်လာပြီ •••
တရေးနိုးတာတောင် အိပ်မပျော်သေးဘူး
မတရားသဖြင့်တွေက
လက်တွေ့ကျကျစိန်ခေါ်လာတဲ့အခါ
ကျိန်စာက ပုန်ကန်မှု ဆိုရင်
သစ္စာတိုင်ခြင်းသာ သန္နိဋ္ဌာန်ပဲ
ဒါ့ထက်နက်စရာမရှိတဲ့ ညဉ့်မို့ထင်ပါရဲ့
ညဟာ.. ပီပီသသ ရင့်မှောင်လာတယ် ။
¤
အ'ကာလနဲ့အုပ်မိုးခံထားရတာပါ
ငါတို့ဟာ..
ငွေထဲမှာ ငွေကိုပြန်ရှာနေရ
လေထဲမှာ လေကိုပြန်ရှာနေရ
လူထဲမှာ လူကိုပြန်ရှာနေရ
နတ်ဘုရားတွေထဲမှာတန်ခိုးရှင်ကိုပြန်ရှာနေရ ။
ခွင့်မတူ မညီမျှ ဝါဒမဖြူစင်တဲ့အရပ်မှာ
လောကပါလအိပ်မောကျနေတဲ့အခါ
နတ်ဆိုးဟာဒုက္ခကိုပွဲလယ်တင့်စေခဲ့တာမျိုး
ငါတို့ - ကိုယ်တိုင်စီးချင်းထိုးခဲ့ကြရပြီ ။
'ခွင့်ပြုပါ'
လူပီသစွာ ရှင်သန်နိုင်မှုကိုသာ
ငါတို့ ရိုကျိုးပါရစေ ။
လူသားဆန်တဲ့ အုပ်ချုပ်ခြင်းကိုသာ
ငါတို့ ကိုးကွယ်ပါရစေ ။
လူဖြစ်ခွင့်ရခြင်းရဲ့ လွတ်မြောက်မှုကိုသာ
ငါတို့ ယုံကြည်ပါရစေ ။
လူကို လူကစောင့်ရှောက်နိုင်တဲ့ တိုင်းပြည်ကိုသာ
ငါတို့ ချစ်မှုပြုပါရစေ ။
ဤမှန်သောဆန္ဒစကားကြောင့်
•••
ငါတို့၏ပညတ်တော်များအတွင်းမှ
သင်သည်လည်းလွတ်လပ်ပါစေသား
သင်သည်လည်းလွတ်မြောက်ပါစေသား
အပယ်လေးပါး၊ ကပ်သုံးပါး၊ ရပ်ပြစ်ရှစ်ပါး၊
ရန်သူမျိုးငါးပါး၊ ....၊.....၊
ထူးခြားပြည့်စုံစွာဖြင့်
အခါခပ်သိမ်း၌
တလုံးတဝတည်း
ကောင်းချီးပေးတော်မူခြင်းခံနေရသော
..
..
ပြည်ထောင်စု
မြန်မာနိုင်ငံတော် ...။
ဆု ဘိုး မိ
-
t.me@moemaka
#MoeMaKaMedia
#WhatsHappeningInMyanmar
Posts
