Breaking News

ဆာသော်ဒိုး - က မ က လ

က မ က လ
ဆာသော်ဒိုး
မိုးမခ 
ဇူလိုင် ၈၊ ၂၀၂၁


     ငယ်ငယ်တုန်းက သီရိခေတ္တရာဆိုတဲ့ပြည်မြို့မှာ ကြီးပြင်းခဲ့ရတာ။ ညနေတိုင်းပဲဘောလုံးကန်ဖြစ်တယ်။ 

ဘောလုံးပွဲရာသီဆို "ဗလီ" ကွင်းမှာ မြို့နယ်ပြိုင်ပွဲတွေ ဝန်ကြီးဌာနပြိုင်ပွဲတွေဆို မလွတ်တန်းကြည့်ခဲ့ကြတာပေါ့။ ပဲခူးတိုင်းလက်ရွေးစဉ်အသင်းကြီးအတွက် ပြည်မြို့ကလည်း အတော်များများ နှစ်စဉ် အရွေးခံရတယ်။
     အဲသည်တုန်းက ဘောလုံးပွဲတွေမှာအဆဲအခံရဆုံးသူကတော့ ကွင်းလယ်ဒိုင်လူကြီးတွေပါပဲ။ ဒိုင်လူကြီးက တစ်သင်းသင်းကိုဘက်လိုက်နေုပြီဆိုရင် ပွဲကြည့်ပရိသတ်တွေက အားရပါးရ ညီညီညာညာကို ဝိုင်းဝိုင်းဆဲကြတာ။

     တခါတခါ ပွဲကစားချိန်စေ့နေပေမယ့်ပွဲသိမ်းဝစီမမှုတ်ဘဲ ဆက်ကန်ခိုင်းနေပြီဆိုဝိုင်းဆဲကြပြီး "အင်ဝမ်းချွန် . . . အင်ဝမ်းချွန်" လို့ ဝိုင်းအော်ပြီး အချက်ပေးခဲ့ကြတယ်။ "အင် ဝမ်းချွန်" ဆိုရင် "ဒိုင်လူကြီးရေ နာရီကြည့်တော့၊ အချိန်ကျော်နေပြီဟ" ဆိုတဲ့ အဓိပ္ပာယ်ပဲ။

     "အင်ဝမ်းချွန်" ဆိုတာ ပြည်ကလမ်းမတော်နဲ့ တရုတ်တန်းလမ်းထောင့်မှာတည်ရှိတဲ့ ရှေးခေတ်ဟောင်းအဆောက်အအုံကြီးရဲ့ဟိုးအပေါ် နဖူးစည်းမှာရှိတဲ့ လှည်းဘီးလောက်နာရီကြီးဘေးမှာ ရေးထားတဲ့ကုမ္ပဏီအမည် အင်္ဂတေစာလုံးကြီးပေါ့။ အဲသည်နာရီကြီးက "ရပ်" နေတာ နှစ်ပေါင်းများစွာ။

     ဒီရက်ပိုင်း ဖေ့စ်ဘုတ်ဖွင့်လိုက်တော့ မိုးမွှန်အောင်ဆဲရေးတိုင်းထွာခံလိုက်ရတဲ့ပုဂ္ဂိုလ်လျှော်တယောက်ကိုမြင်ရပြီး "အင်ဝမ်းချွန်" ကို သတိရမိတယ်။

     ဖေ့စ်ဘုတ်ပေါ်က ဆဲနည်းပေါင်းစုံဟာ မှတ်လောက်သားလောက်တွေချည်းပဲ။ "အရွှင်ဓာတ်" လည်း ပါတယ်ခင်ဗျ။ အဆဲခံပုဂ္ဂိုလ်လျှော်သာ တပြည်လုံးက လူထုမေတ္တာအဆဲသန်းပေါင်းကုဋေကုဋာကို ကိုယ်တိုင်ကိုယ်ကျဖတ်ရှုရရင် တခါထဲ သွေးတွေတက်ပြီး အသက်ထွက်သွားနိုင်တယ်။

     "အဆဲပဒေသာ" ကိုမြင်ရပြီးတဲ့အခါ ဆရာသော်တာဆွေ့ကို သွားသတိရမိပြန်ပါတယ်ခင်ဗျ။ 

တခါတုန်းက ဆရာသော်တာဆွေရဲ့အိမ်နားနီးချင်းတွေထဲမှာ တရုတ်မိသားစုနဲ့ ကုလားမိသားစု ရှိကြပါသတဲ့။
     တနေ့တော့ အဲသည်နှစ်အိမ် ရန်ဖြစ်ပြီး တယောက်နဲ့တယောက် အော်ဟစ်ဆဲဆိုနေကြတယ်တဲ့။ တရုတ်ကြီးကလည်း တရုတ်လို ကွိစိကွစ.. ဆဲ၊ ကုလားကလည်း ကုလားလို ကွစကွိစိ ..ဆဲ။ အဲဒါကို ဆရာသော်တာဆွေက ကြားနေမြင်နေရတာပေါ့။

     တရုတ်လို ကုလားလိုဆိုတော့ ဘယ်လိုတွေတိုင်းထွာပြီး ဆဲရေးနေတယ်တော့ ဘယ်သိရမလဲ။ နာရီဝက်လောက်ရှိတော့ အဲသည်နှစ်ယောက် ဘာစိတ်ကူးပေါက်တယ်မသိ၊ ကုလားလို တရုတ်လိုကနေပြီး ဗမာလိုကြီးတွေနဲ့ပယ်ပယ်နယ်နယ် "တွယ်" ကြပါရောတဲ့ ခင်ဗျ။

     " မ အ လ "
     " န မ လ "
     " င လ မ သ "
     " မ မ စ ပ "
     " မ မ လ လ "
     " က မ က လ "
     " မ အ လ "

     အဲသည်အခါကျမှပဲ ပတ်ဝန်းကျင်ကလူတွေလည်း ဘာသာပြန်မလိုဘဲ နားလည်ကြပါတော့သတဲ့။ အဲသလိုနဲ့ နောက်ထပ်ဆယ့်ငါးမိနစ်လောက် "ဗမာလို" တွယ်ပြီးနားသွားကြပါသတဲ့။

     နောက်နေ့ကျတော့ အဲသည်နှစ်ယောက်လည်ပင်းဖက်ပြီး ပြန်တဲ့သွားတာမြင်ရပါသတဲ့။ ဒါနဲ့ ဆရာသော်တာဆွေလည်း အဲသည် နှစ်ကောင်ကို ရေနွေးသောက်ဖို့ အိမ်ထဲလှမ်းခေါ်လိုက္ပါသတဲ့။

     " မင်းတို့နှစ်ကောင် တရုတ်လို ကုလားလို ဆဲနေရာကနေ ဘယ်လိုဖြစ်ပြီး ဗမာလိုကြီး ထပြီးတော့ ဆဲကြတာလဲဟ "
     " ဟာ . . . ဆရာကြီးကလည်း . . . ဗမာလိုဆဲရတာက ပျစ်ပျစ်နှစ်နှစ်ရှိပြီး အရသာလဲ ပိုရှိလို့ဗျ . . . ဟားဟားဟား "
     " ဟား ဟား ဟား ဟား ဟား ဟား "

                   ဆာသော်ဒိုး
                   5-7-21(Mon) 4:20 Pm
-
Join Us @ MoeMaKa Telegram
t.me@moemaka
#MoeMaKaMedia
#WhatsHappeningInMyanmar