မြန်မာပြည်မှာ စစ်တပ်အာဏာသိမ်းပြီး ၆လ ၂၂ ရက် မြောက်နေ့ မြင်ကွင်း

NUG ထောက်ခံရေး ရန်ကုန်သပိတ် (GSCC Page)

မြန်မာပြည်မှာ စစ်တပ်အာဏာသိမ်းပြီး ၆လ ၂၂ ရက် မြောက်နေ့ မြင်ကွင်း

(မိုးမခ) ဩဂုတ် ၂၂၊ ၂၀၂၁

ပေါက်ကွဲမှုများ ၊ သေနတ်နဲ့ ပစ်ခတ်လုပ်ကြံမှုများနဲ့ မြို့ပြပျောက်ကြား ပြီးတော့ စိတ်ဓာတ်တူမီး လုပ်အားတူမီးတွေ၏ အင်အား

အခုလပိုင်းမှာ နံနက် အိပ်ယာနိုးချိန် ရုတ်တရက် ပေါက်ကွဲသံကြားလိုက်တဲ့ အခါ စိတ်ထဲမှာ အနီးအနား တနေရာရာတော့ ပေါက်ကွဲမှု ဖြစ်ပြီလို့မှတ်ယူလိုက်ပြီး ဘယ်နှနာရီ ဘယ်နှမိနစ်လဲဆိုတာ တချက်ကြည့်ပြီး မှတ်သားထားလိုက်ပါတယ်။ အလားတူပဲ တခါတရံ သေနတ်သံလိုကြားရင်လည်း ဘယ်အရပ်မျက်နှာဘက်က ဖြစ်မလဲဆိုတာ မှန်းဆကြည့်ပြီး သတင်းတွေ၊ မြို့နယ်အလိုက် သတင်းစုံ ဖေ့စ်ဘွတ်ဂရု တွေထဲ ဝင်ပြီးရှာကြည့်မိပါတယ်။ ဘယ်နားမှာ ဘာဖြစ်သွားလဲဆိုတာ မြို့နယ်အလိုက် သတင်းစုံ ဂရုတွေမှာ အနီးဆုံး မျက်မြင်တွေ့လိုက်သူတွေက ရေးတင်တာမျိုး ရှိတာကြောင့် စေ့ငုကြည့်မိပါတယ်။

ဒီနေ့ဆိုရင်လည်း ရန်ကုန်မြို့ရဲ့ လှိုင်သာယာ တံတားအဆင်းမှာ ရဲကင်းက ရဲကို သေနတ်နဲ့ ပစ်ပြီးမောင်းပြေးသွားလို့ ရဲတဦးသေဆုံးတယ်ဆိုတဲ့ သတင်းနဲ့ မနက်မိုးလင်းခဲ့တာဖြစ်ပါတယ်။ ကိုယ်တွေနေတဲ့ မြို့တွေမှာတင်မဟုတ် မနေ့ညက စစ်ကိုင်းတိုင်း ခင်ဦးမြို့နယ်ထဲမှာ လင်မယားနှစ်ယောက် ဆိုင်ကယ်နဲ့ အခြားရွာကို ဆေးရောင်းထွက်ပြီး အပြန်ညဘက် စစ်တပ်က ပစ်ခတ်လိုက်လို့ ၂ ဦးစလုံးသေဆုံးတဲ့ သတင်းကို မနက်မိုးလင်းလင်းခြင်း ဖတ်လိုက်ရပါတယ်။

သေဆုံးသွားသူ သူနာပြုဆရာမ လင်မယား ၂ ဦးမှာ ၃ နှစ်အရွယ် သမီးငယ်ကျန်ရစ်ခဲ့တယ်လို့လည်း သတင်းအရ သိရပါတယ်။ စစ်အာဏာသိမ်းပြီးနောက် ဖြစ်ပွားလာတဲ့ အာဏာသိမ်းမှုကို ဆန့်ကျင် ဆန္ဒပြမှုတွေ နဲ့ ခုခံမှုတွေနောက်မှာ ဥပဒေမဲ့ သတ်ဖြတ်ခြင်း extra-judicial killing က ဆက်တိုက်ဆိုသလို ဖြစ်ပွားလာခဲ့တာ ဖြစ်ပါတယ်။ အဓိကရုဏ်း နှိမ်နှင်းတဲ့ သဘောမျိုးမဟုတ်တော့ပဲ ဆန္ဒပြသူတွေ ၊ အရပ်သားတွေ ဘာလက်နက်မှ မရှိတဲ့သူတွေကို ရန်သူသဖွယ် အသက်သေဆုံးသည်အထိ ပစ်ခတ် သတ်ဖြတ်မှုတွေ ဖြစ်ပွားခဲ့လို့ သေဆုံးသူအရေအတွက်ဟာ ၆ လကျော်ကာလအတွင်း တထောင်ကျော်လာပြီဖြစ်ပါတယ်။

ခုလပိုင်းတွေမှာတော့ လက်နက်နဲ့ အနိုင်ကျင့် သတ်ဖြတ်တာကို လက်တုံ့ပြန်တဲ့ မြို့တွေမှာ စစ်သား၊ ရဲနဲ့ အုပ်ချုပ်ရေးမှူး၊ ရာအိမ်မှူး၊ သတင်းပေး၊ ကြံ့ခိုင်ရေးပါတီစည်းရုံးရေးမှူး စသူတွေကို သေနတ်နဲ့ လုပ်ကြံသတ်ဖြတ်တာတွေ ရှိလာပါတယ်။ ပီဒီအက်အဖွဲ့တွေက လုပ်ဆောင်တယ်လို့ ထုတ်ပြန်တာတွေ ရှိသလို ဘယ်သူဘယ်ဝါ လက်ချက်မှန်းမသိပဲ သေဆုံးရမှုတွေလည်း အများအပြားရှိပါတယ်။

Extra-judicial Killing ဟာ နိုင်ငံတကာ စံနှုန်းတွေအရ လူသားတွေအပေါ် ကျူးလွန်တဲ့ ပြစ်မှုမြောက်တယ်လို့ ဆိုပါတယ်။ ယခင်က အခုလို ဥပဒေမဲ့ သတ်ဖြတ်ခြင်းကို တိုင်းရင်းသားလက်နက်ကိုင်တွေ နဲ့ ပဋိပက္ခဖြစ်ပွားရာ ဒေသတွေ၊ ၂၀၁၇ ခုနှစ်က ရခိုင်ပြည်နယ် မှာ ရိုဟင်ဂျာ လူမျိုးစုတွေ အပေါ် ကျင့်သုံးခဲ့တာဖြစ်ပြီး ဒီလို ကျင့်သုံးမှုနဲ့ နိုင်ငံတကာ တရားခုံရုံးကိုတောင် စွဲတင်ခံထားရပြီး ဖြေရှင်းနေရတာ ဖြစ်ပါတယ်။

ခု စစ်အာဏာသိမ်းအပြီးမှာတော့ ဥပဒေမဲ့သတ်ဖြတ်မှုတွေ ပိုမိုကျယ်ကျယ် ပြန့်ပြန့်ဖြစ်ပွားလာနေတာ ဖြစ်ပါတယ်။ ခုချိန်မှာ ဘယ်သူမှ တရားစွဲတင်ဖို့ တိုင်တန်းဖို့ မလွယ်ကူ လက်တွေ့မှာ မဖြစ်နိုင်တော့ လူ့အသက်တွေက ဘာမှ တန်ဖိုးမရှိသလို တဖြုတ်ဖြုတ် သေဆုံးနေကြရတာလည်း ဖြစ်ပါတယ်။

ဒီနေ့ တခြားသတင်းတွေထဲမှာ ဂျပန်နိုင်ငံတိုကျိုမြို့ မြန်မာသံရုံးက ဝန်ထမ်း ၂ ဦး စီဒီအမ်လုပ်ခဲ့ကြလို့ သူတို့နေရာကို အစားထိုးဖို့ စစ်ကောင်စီအစိုးရက စေလွှတ်တဲ့သံဝန်ထမ်း ၂ ဦးကို ဂျပန်အစိုးရက ဗီဇာထုတ်မပေးသေးပဲ ဆိုင်းငံ့ထားတဲ့ သတင်းပဲ ဖြစ်ပါတယ်။

ဂျပန်နိုင်ငံအနေနဲ့ စစ်ကောင်စီအစိုးရကို အစိုးရတရပ်အဖြစ် အသိအမှတ်မပြုသေးပဲ စစ်ကောင်စီက အာဆီယံ သဘောတူညီချက်ကို လိုက်နာဖို့ နဲ့အခြားနိုင်ငံရေး ဖြစ်ပေါ်တိုးတက်မှုတွေ ရှိလာအောင် ဖိအားပေးတဲ့ လုပ်ရပ်ဖြစ်တယ်လို့ ယူဆရပါတယ်။

ဒီသတင်းက နွေဦးတော်လှန်ရေးမှာ ပါဝင်သူ ထောက်ခံသူတွေ အတွက်အားတက်စေတဲ့ သတင်းလည်း ဖြစ်ပါတယ်။

နောက်ထပ် သတင်းတပုဒ်ကတော့ ဖားကန့်မြို့တဝိုက်မှာ အင်တာနက် လိုင်းတွေ၊ မိုဘိုင်းအင်တာနက် ဝန်ဆောင်မှုတွေကို မနေ့ညက စလို့ဖြတ်တောက်ထားတယ်လို့ သိရပါတယ်။ မြစ်ကြီးနားမြို့လည်း မနေ့ည နှောင်းပိုင်းကစလို့ မနက်ထိ အင်တာနက်တွေ ပြတ်တောက်နေခဲ့တယ်လို့ သိရပါတယ်။ စစ်ရေးအရ လှုပ်ရှားမှုတွေ ၊ သတင်းအချက်အလက် စီးဆင်းမှုတွေကို ဖြတ်တောက် သွားစေရန် ရည်ရွယ်ပြိး အခုလို အင်တာနက်ကို ဖြတ်တောက်တာလို့ ယူဆရပါတယ်။ ယခင် ၂၀၁၈-၁၉ ခုနှစ်တွေ အန်အယ်လ်ဒီအစိုးရလက်ထက် ရခိုင်ပြည်နယ်ထဲက စစ်ပွဲတွေ အရှိန်စတင်မြင့်လာချိန်မှာ အင်တာနက်ကို လနဲံနှစ်နဲ့ချီပြီး ဖြတ်တောက်ခဲ့ပါတယ်။ အခုတကြိမ်လည်း စစ်ရေး ပဋိပက္ခမြင့်လာတဲ့ဒေသတွေ မှာ အခုလို အင်တာနက်ကို ဖြတ်တောက်သွားတာတွေ လုပ်ဖို့ ဝန်မလေးကြောင်း တွေ့ရမှာ ဖြစ်ပါတယ်။

နောက်သတင်းတပုဒ်ကတော့ ဇွန်လနှောင်းပိုင်းကတည်းက စလို့ ပရိသတ်က ချစ်ခင်တန်ဖိုးထားသူတွေ၊ နိုင်ငံအကျိုး လူထုအကျိုးလုပ်ဆောင်ခဲ့ကြတဲ့ နိုင်ငံရေးသမားတွေ ၊ စာပေပညာရှင် ၊ အနုပညာရှင်တွေ တဖြုတ်ဖြုတ်ကြွေ လွင့်နေကတဲ့အထဲ ဒီနေ့ဆို ၁၉၈၀ ခုနှစ်ပိုင်းလောက်က စတီရီယို ခေတ်ဦးမှာ လူငယ်တွေ ကြိုက်နှစ်သက်တဲ့ တေးသီချင်းတွေကို ရေးဖွဲ့ သီဆိုခဲ့သူ ဆလိုင်းဂျွန်သင်ဇမ်း ကိုဗစ်ကူးစက်ရောဂါ ခံစားရပြီး ကွယ်လွန်သွားတယ်ဆိုတဲ့ သတင်းကြားသိရခြင်းပဲ ဖြစ်ပါတယ်။

အနုပညာရှင် ၊ အဆိုတော်တွေ ၊ စာပေသမားတွေ၊ နိုင်ငံရေးသမားတွေ တနေ့တနေ့ နှုတ်ဆက်ထွက်ခွာသွားကြတာကို ကြားသိမြင်တွေ့နေရတာကိုက ကြားသိရသူတိုင်းစိတ်ထဲ နှမြောတသ ကြေကွဲဖွယ် ဖြစ်ပါတယ်။

ပြည်ပက မြန်မာတွေနဲ့ ပြည်တွင်းက မြန်မာတွေ အားလုံးက နိုင်တဲ့ဘက်က တော်လှန်ရေးကို ထောက်ခံအားပေးမှုတွေ ပြသကြတယ်။ အထင်ရှားဆုံးဥပမာတွေကတော့ နွေဦးထီနဲ့ ယုံကြည်ချက်ခြေတလှမ်း ကံစမ်းမဲတွေ ဖြစ်ပါတယ်။ ဆန်ဖရန်ဘေးဧရိယာမြန်မာကွန်မြူနီတီတခုတည်းကို နီးနီးကပ်ကပ်မြင်နေရလို့ သူတို့ ထည့်ဝင်လှုဒါန်းမှုဟာ သည်တရက်တည်းကို ဒေါ်လာ ၂သောင်း ရှစ်ထောင် ရှိတယ် ပြောပါတယ်။ ကံစမ်းမဲ လက်မှတ်ကနေ ကံစမ်းချင်တာထက် မြန်မာပြည်၏ လွတ်မြောက်ရေးကံကြမ္မာအတွက် ဝိုင်းဝန်းပြီး ပြိုင်တူတွန်းနေကြတာ ဖြစ်ပါတယ်။ မြန်မာပြည်မြောက်ပိုင်း ချင်းပြည်နယ်၊ စစ်ကိုင်းတိုင်းတွေမှာ ကျေးလက် ပီဒီအက်ဖ် ပြောက်ကျားတွေရဲ့ တူမီးတွေလိုပဲ နိုင်ငံတကာက မြန်မာတော်လှန်ရေးထောက်ခံသူတွေဟာ သူတို့ရဲ့ ရရာငွေကြေး၊ အသိဉာဏ်ပညာ၊ အသိပညာ အတတ်ပညာတွေကို တယောက်တလက် စိတ်ဓာတ်တူမီးတွေ လုပ်အားတူမီးတွေ စွဲကိုင်ပြီး ပစ်ကူပေးကြတာနဲ့ အလားသဏ္ဍာန် တူပါတယ်။ သည်လို မြေပြင်က တူမီး အွန်လိုင်းက တူမီး လေလှိုင်းက တူမီးတွေနဲ့တောင် စစ်ကောင်စီဟာ ဆောက်တည်ရာမရ သွေးပျက်နေတာ ဆိုတော့ တကယ့်ကို အင်အားကြိးပြည့်စုံတဲ့ လက်နက်တွေ တပ်ဆင်ပြီးသွားတဲ့ တော်လှန်သောပြည်သူတွေနဲ့ ရင်ဆိုင်ရတဲ့နေ့မှာ စစ်ကောင်စီဟာ အရိုးအသားတောင် ရှာလို့ရမှာ မဟုတ်ပါဘူး။ စစ်ကောင်စီနဲ့ အပေါင်းအပါတွေ အမြန်ဆုံး လက်နက်ချပြီး ပြည်သူကို ဒူးထောင်အညံ့ခံရမယ့်အချိန် မဝေးတော့ပြီလို့ ဆိုချင်ပါတယ်။

Join Us @ MoeMaKa Telegram
t.me@moemaka
#MoeMaKaMedia
#WhatsHappeningInMyanmar