ဟိုက်ရှားဘား - အောင်နက် နှင့် ထိုင်ခုံ
Cartoon - Saw Ngo
အောင်နက် နှင့် ထိုင်ခုံ
ဟိုက်ရှားဘား
(မိုးမခ) အောက်တိုဘာ ၂၈၊ ၂၀၂၁
"ဟဲ့...ဟဲ့..ဟဲ့...ဘယ်လိုဖြစ်တာလဲ...ဘာလို့ ဒီလောက် ဂနာမငြိမ်ဖြစ်နေတာလဲ...'အောင်နက်'...အောက်ကို ဆင်းစမ်း..."
သခင်ကြီး 'ဦးအောင်ဆီယံ' က သူ့ခွေး 'အောင်နက်' ကို ထိုင်ခုံပေါ်မှ မောင်းချနေသည်။
အောင်နက်ကလည်း ကြိုက်သလောက်ရိုက်၊ အမှတ်ရှိသောခွေးမဟုတ်...
(ခွေးဆိုတော့ အရှက်လည်းမရှိ)
အိမ်ကို ဧည့်သည်လာပြီဆို အရှက်ခွဲပြီ...
ခွေးမို့ သူမရှက်တတ်ပေမယ့် ဦးအောင်ဆီယံက ရှက်တတ်သည်။
ဟော...အခုလည်းကြည့်...
ဧည့်သည်များ ထိုင်ခုံတွင်မထိုင်ခင် သူက အရင်ပြေး၍ တက်ထိုင်လိုက်သည်။
သူ့ကို အရေးပေးစေချင်သည်။ သူ့ကို ဂရုစိုက်စေချင်သည်။ ခွေးဖြစ်လင့်ကစား သူလူရာဝင်ချင်သည်။
"အောင်နက်...ဆင်းစမ်း"
အောင်နက်ကမဖြုံ...မဖြုံ့ ရေးချ မဖြုံ...။
အမြှီးကို လေးလေးပင်ပင် လှုပ်ယမ်း၍ မေးစေ့ကိုရှေ့လက်ပေါ်တွင်တင်ကာ မျက်လုံးကိုအသာလှန်၍ သခင်ကြီးကို မော့၍ပင်ကြည့်လိုက်သေးသည်။
ဦးအောင်ဆီယံ ဒေါသထွက်လာသည်။ နောက်ဆုံး အခန်းထောင့်တွင် ထောင်ထားသော အုန်းတံမြက်စည်းကိုယူ၍ အောင်နက်ကို ရိုက်လေတော့သည်။
"ကိန်...ကိန်...ကိန်..."
အောင်နက် အခန်းထဲမှပြေးထွက်သွားသည်။
ဧည့်သည် အားလုံး အခုမှပင်စိတ်သက်သာရာရသွားကြသည်။
'အောင်နက်' ထပ်ဝင်မလာစေရန် ဦးအောင်ဆီယံ အခန်းတခါးကို အသေအချာပိတ်လိုက်သည်...ထို့နောက် ဧည့်သည်များကို တောင်းပန်စကားဆို၍ ထိုင်ခုံတွင်ထိုင်ရန်ပြောပြီး အလုပ်ကိစ္စကိုဆက် ဆွေးနွေးကြလေသည်။
အောင်နက်က အပြင်မှာ...
အချို့ခွေးများသည် တုတ်ဖြင့်ရိုက်ချမှသာ ထိုင်ခုံပေါ်မှ ဆင်းတတ်ကြသည်...။
၂၃ အောက်တိုဘာ၊ ၂၀၂၁
-
t.me@moemaka
#MoeMaKaMedia
#WhatsHappeningInMyanmar
Posts
