မြန်မာပြည်မှာ စစ်တပ်အာဏာသိမ်းပြီး ၈ လ ၃ ရက်မြောက်နေ့ မြင်ကွင်း

မြန်မာပြည်မှာ စစ်တပ်အာဏာသိမ်းပြီး ၈ လ ၃ ရက်မြောက်နေ့ မြင်ကွင်း

(မိုးမခ) အောက်တိုဘာ ၄၊ ၂၀၂၁

ဆင်တူပုံစံအဖြစ်အပျက်များနဲ့ နေ့စဥ်သတင်းများ

ဇွန်လ၊ ဇူလိုင်လ၊ သြဂုတ်လနဲ့ စက်တင်ဘာလတွေရဲ့ နေ့စဥ်သတင်းတွေကို ဖတ်ကြည့်တဲ့အခါ ၇၀ ရာနှုန်းလောက်သော သတင်းအဖြစ်အပျက်တွေဟာ အရင်နေ့များနဲ့ အရင်သီတင်းပတ်များနဲ့ ဆင်တူရိုးမှားတွေလို ဖြစ်နေတာပါ။ 

နေ့စဥ် ဖြစ်စဥ်တွေထဲမှာ စစ်ကောင်စီတပ်တွေကို ကြားဖြတ်တိုက်ခိုက်တဲ့ သတင်း၊ အုပ်ချုပ်ရေးမှူးရုံးနဲ့ အချို့သော အစိုးရဌာနဆိုင်ရာရုံးတွေကို ဗုံးခွဲတဲ့သတင်း၊ မြို့ဝင် စစ်ဆေးရေးဂိတ်တွေကို ဗုံးခွဲတဲ့သတင်း၊ အုပ်ချုပ်ရေးမှူး၊ သတင်းပေး ၊ ဒလန်လို့ဆိုသူတွေကို သေနတ်နဲ့ ပစ်ခတ်လုပ်ကြံတာ၊ ဓါးနဲ့ထိုးတာ၊ လက်လုပ်ဗုံးနဲ့ ပစ်တဲ့ သတင်း၊ PDF တွေနဲ့ စစ်ကောင်စီတပ်တွေ တိုက်ပွဲဖြစ်တဲ့ သတင်း၊ တဖက်မှာလည်း ကျေးလက်တွေမှာ PDFတွေ ဖမ်းမိလို့ ပစ်သတ်ခံရတာ၊ အရပ်သားတွေကို PDF လို့စွပ်စွဲကာ စစ်ကောင်စီက ပစ်သတ်တဲ့ သတင်း၊ မြို့ပေါ်က လက်နက်ကိုင် ပျောက်ကျားတွေကို ဝင်စီးပြီးဖမ်းဆီးတဲ့သတင်း၊ ဖမ်းဆီးရာမှာ အချို့အသက်ဆုံးရှုံးအောင် လက်လွတ်စပယ် ပစ်ခတ်တာ လက်လွန်အောင် ရိုက်နှက်တာတွေကြောင့် ဖမ်းဆီးခံရတဲ့နေ့ သို့မဟုတ် နောက်တရက်မှာ သေဆုံးကြောင်း အကြောင်းကြားလာတဲ့ သတင်းမျိုးတွေ၊ မြို့ပြမှာ လက်နက်နဲ့ ပြန်ခုခံတိုက်ခိုက်ဖို့ ၊ ချောင်းမြောင်းပစ်ခတ်ဖို့ လုပ်ကြံဖို့ စုစည်းထားကြတဲ့ အစုအဖွဲ့တွေ အဆက်အသွယ်တွေ ဖမ်းဆီးခံကြရတဲ့ သတင်း၊ မိုင်တဲလ်ကုမ္ပဏီပိုင် ဆက်သွယ်ရေးတာဝါတိုင်တွေ ကို မီးရှို့တာ မိုင်းထောင်ဖေါက်ခွဲတဲ့ သတင်းနဲ့ စက်တင်ဘာလဆန်းမှာတော့ NUG အစိုးရက နှိုးဆော်လိုက်တဲ့ လက်နက်ကိုင် တိုက်ပွဲခေါ်သံ စတာတွေက လွန်ခဲ့တဲ့ ၃လ၊ ၄လ အတွင်း နေ့စဥ်သတင်းတွေထဲက ခေါင်းစဥ်တွေ ဖြစ်ပါတယ်။ တိုက်ပွဲတွေအပြင် စစ်ရှောင်ဒုက္ခသည် အရေအတွက်တိုးမြင့်လာတဲ့ သတင်း ရိက္ခာအခက်အခဲ စတာတွေကလည်း နေ့စဥ် သို့မဟုတ် အပတ်စဥ် သတင်းတွေထဲ နေရာယူထားကြတာဖြစ်ပါတယ်။ 

ဒါက ပြည်တွင်းက သတင်းခေါင်းစဥ်တွေ ဖြစ်ပြီး နိုင်ငံတကာမျက်နှာစာ ကမ္ဘာ့ကုလသမဂ္ဂ သံတမန်ရေး စတဲ့ကိစ္စရပ်တွေနဲ့ပတ်သက်ရင်တော့ ကုလသမဂ္ဂဆိုင်ရာ မြန်မာသံအမတ် ဦးကျော်မိုးထွန်း ကို မြန်မာကိုယ်စားပြု ဆက်လက်ထားရှိရေး မထားရှိရေး ဆုံးဖြတ်ချက်၊ နိုင်ငံတကာမျက်နှာစာမှာ NUG ကို အသိအမှတ်ပြုထားမှု ဆက်ဆံရေး စတဲ့ သတင်းတွေနဲ့ ဦးကျော်မိုးထွန်းကို ကိုယ်ထိလက်ရောက် ခြိမ်းခြောက်၊ လုပ်ကြံဖို့ စတဲ့ အကြောင်းအရာတွေက သတင်းတွေထဲ အများစုလွှမ်းမိုးနေခဲ့တာ ဖြစ်ပါတယ်။ 

စီးပွားရေး နဲ့ပတ်သက်တဲ့ သတင်းတွေမှာတော့ ဒေါ်လာစျေး၊ ရွှေစျေး တက်တဲ့သတင်းတွေက အပတ်စဥ် နေ့စဥ်ဆိုသလို နေရာယူထားကြပြီး ငွေလဲနှန်းတက်လာတာနဲ့ အတူအခြားသော ကုန်ပစ္စည်းတွေ ဆက်ပြီးစျေးမြင့်တက်လာတဲ့ သတင်းတွေက ပုံမှန်မြင်တွေ့နေကြရတဲ့ စီးပွားရေး သတင်းတွေဖြစ်ပါတယ်။ 

အောက်တိုဘာ ၃ ရက်နေ့သတင်းတွေကို ကြည့်ရင်လည်း ဒီမော့ဆိုမှာ ကရင်နီပီဒီအက်ဖ် နဲ့ စစ်ကောင်စီ တပ်တွေတိုက်ပွဲဖြစ်တဲ့ သတင်း၊ ပုလဲမြို့နယ်၊ ဂန့်ဂေါမြို့နယ်မှာ စစ်ကောင်စီယာဥ်တန်းတွေကို PDF တွေက မိုင်းဆွဲတိုက်ခိုက်တဲ့ သတင်း၊ ခင်ဦးမြို့နယ်ထဲက ပျဥ်ထောင်ရွာမှာ စစ်ကောင်စီတပ်က ဝင်ပစ်သတ်လို့ အရပ်သားတွေ သေဆုံးရတဲ့ သတင်းနဲ့အတူ PDF တပ်ဖွဲ့ဝင်တွေက ပျူစောထီးအဖွဲ့ဝင်တွေလို့ဆိုသူ ၃ ဦးကိုသတ်ဖြတ်လိုက်တဲ့ သတင်းတွေ ဖြစ်ပါတယ်။ 

အလားတူ ဂန့်ဂေါမြို့နယ် ထယ်လှော်ရွာမှာလည်း နေအိမ်တွေမီးရှို့ခံရတဲ့ သတင်းကလည်း ယနေ့သတင်းတွေထဲက ဖတ်ရှုနေကြရတဲ့ သတင်းမျိုးတွေထဲက သတင်းပဲ ဖြစ်ပါတယ်။ 

စစ်ကိုင်းတိုင်းနဲ့ မကွေးတိုင်းထဲက သတင်းတွေလိုပဲ တိုက်ပွဲဖြစ်ပြီး စစ်ကောင်စီတပ်တွေက လူနေအိမ်တွေကို ဖျက်ဆီးမီးရှို့တဲ့ သတင်းတွေလည်း တနင်္သာရီတိုင်း သရက်ချောင်းမြို့နယ်ထဲက တောင်ပျောက်တိုက်နယ်မှာ ဖြစ်ပွားခဲ့တာ ြဖစ်ပါတယ်။ ပြီးခဲ့တဲ့ ရက်အတွင်း ပီဒီအက်ဖ်တွေနဲ့ စစ်ကောင်စီတပ်တွေ တိုက်ပွဲ ဖြစ်ပွားပြီးနောက်မှာ ကျေးရွာထဲက လူနေအိမ်တွေ ဖျက်ဆီးခံရတာ ပစ္စည်းတွေ ယူဆောင်သွားတာ နေအိမ်မီးရှို့တာတွေ ဖြစ်ပွားခဲ့တာ ဖြစ်ပါတယ်။ 

စီးပွားရေး နဲ့ပတ်သက်တဲ့ သတင်းတွေမှာတော့ ပြီးခဲ့တဲ့ ရက်အနည်းငယ်မှာ အမြင့်ဆုံးဖြစ်ခဲ့တဲ ဒေါ်လာနဲ့ မြန်မာငွေလဲနှုန်း၊ ရွှေစျေးနှုန်းတွေ အနည်းငယ်ပြန်ကျဆင်းခဲ့တဲ့ သတင်းတွေဖတ်ရှုရမှာ ဖြစ်ပါတယ်။ ဒေါ်လာနဲ့ ရွှေစျေးနှုန်းတွေ အနိမ့်အမြင့် တက်လိုက်အနည်းငယ်ကျလိုက်ကစားနေရာက အနည်းငယ်ပြန်ကျပေမယ့် လောင်စာဆီပေါ် သက်ရောက်တဲ့ ဂယက်ကတော့ မငြိမ်သေးသလို လောင်စာဆီစျေးက တတိတတိ မြင့်တက်နေဆဲ ဖြစ်ပါတယ်။ တလီတာကို ကျပ် ၁၅၀၀၊ ၁၆၀၀ လောက်ထိ ရန်ကုန်မြို့မှာရောက်ရှိနေပြီး နယ်မြို့တွေမှာတော့ လောင်စာဆီရောက်ရှိမှု ပမာဏ နည်းလာတာ၊ စျေးနှုန်းမြင့်တက်လာခြင်းကြောင့် အရင်းအနှီး ငွေပိုလိုအပ်လာပြီး ဝယ်ယူပြီးပြန်ရောင်းချနိုင်တဲ့ ပမာဏလျော့ကျလာတဲ့ အကြောင်းတွေကြောင့် ရန်ကုန်စျေးထက် သိသိသာသာ မြင့်တက်နေပြီး အချို့သော အစွန်အဖျားကျတဲ့ဒေသတွေမှာ ရန်ကုန်စျေးထက် ၂ ဆနီးပါးထိ မြှင့်ပြီးရောင်းချနေကြတဲ့ သတင်းတွေဖတ်ရှုရမှာ ဖြစ်ပါတယ်။ 

ဒီလို အဖြစ်အပျက်တွေကို စစ်ကောင်စီက ကိုင်တွယ်ဖြေရှင်းမှုက စျေးနှုန်းမြင့်တက်နေမှုအပေါ် သိသိသာသာ အကျိုးသက်ရောက်မှုမမြင်ရ သေးပါဘူး။ ယနေ့ထပ်မံထွက်ပေါ်လာတဲ့ ဗဟိုဘဏ် ညွှန်ကြားချက်တခုကတော့ နိုင်ငံခြားပို့ကုန်က ရရှိတဲ့ နိုင်ငံခြားငွေတွေ သတ်မှတ်ကာလထဲ ဘဏ်ထဲပြန်ဝင်လာရမှာ ဖြစ်ပြီး ပြန်ဝင်ပြီးခဲ့အခါ ရက် ၃၀ အတွင်း သုံးစွဲတာ သို့မဟုတ် နိုင်ငံခြားငွေ လိုင်စင်ရ ဘဏ်တွေကို ထုတ်ရောင်းရမယ်ဆိုတဲ့ သတ်မှတ်ချက် ထုတ်ပြန်ပြီး ပို့ကုန်ကရတဲ့ နိုင်ငံခြားငွေတွေ စျေးကွက်ထဲမြန်မြန်ဆန်ဆန် ဝင်လာအောင် ရည်ရွယ်တဲ့ စည်းကမ်းသတ်မှတ်ချက် ထုတ်ပြန်လိုက်တာ တွေ့ရပါတယ်။ 

နိင်ငံခြားငွေလဲနှုန်းနဲ့ ရွှေစျေး မြင့်တက်တာဟာ ပြည်သူတိုင်းနဲ့ တိုက်ရိုက် မသက်ဆိုင်ဘူးလို့ ယူဆစရာ ရှိကောင်းရှိပေမယ့် လက်တွေ့ဘဝမှာတော့ လောင်စာဆီ၊ သယ်ယူပို့ဆောင်ရေး ၊ ဆေးဝါးစတာတွေ အပေါ်ကို ချက်ခြင်း သက်ရောက်မှုရှိနေပြီး ဆန်၊ အသားငါး၊ ဟင်းသီးဟင်းရွက်လိုမျိုးတွေကတော့ သိသိသာသာ စျေးနှုန်းမြင့်မလာသေးတာ တွေ့ရပါတယ်။ သို့ပေမယ့် လောင်စာဆီ စျေးတက်ခြင်းဟာ ကုန်ပစ္စည်းသယ်ယူပို့ဆောင်ရေး စိုက်ပျိုးရေး ထွက်ကုန်တွေ အပေါ် သက်ရောက်မှုရှိနေပြီ ဖြစ်လို့ ကုန်စျေးနှုန်းတွေ တဖြည်းဖြည်းထပ်မံ မြင့်တက်လာမယ့်အလားအလာက ရှောင်လွှဲလို့မရတဲ့ အနေအထားဖြစ်လာနေပါတယ်။ 

လက်နက်ကိုင် ပဋိပက္ခ၊ မြို့ပေါ် တိုက်ခိုက် ပစ်ခတ်မှုတွေ၊ ပေါက်ကွဲမှုတွေ အာဏာနဲ့ စစ်အင်အား အလွန်အကျွံသုံး အုပ်ချုပ်မှုတွေ အရောင်းအဝယ် အသက်မွေးဝမ်းကျောင်းမှုအပေါ် ထိခိုက်မှုတွေ ပိုပြီးရှိလာနိုင်ပြီး လူသားချင်းစာနာမှု အကူအညီ အရေးပေါ် ရိက္ခာအကူအညီလို နေစရာ ဆေးဝါး အကူအညီတွေ ပိုလိုအပ်လာနိုင်ခြေရှိနေပါတယ်။ ဒီအရေးတွေအတွက် ဘယ်သူတွေ ဘယ်အဖွဲ့အစည်းတွေက ကြိုတင်တွေးဆပြီး ပြင်ဆင်ထားကြသလဲ ဘယ်လို မူဝါဒတွေ ချမှတ်ထားကြသလဲဆိုတာတော့ ရေရေရာရာ သဲသဲကွဲကွဲ မရှိသေးတာတွေ့ရပါတယ်။

Join Us @ MoeMaKa Telegram
t.me@moemaka
#MoeMaKaMedia
#WhatsHappeningInMyanmar