Breaking News

မောင်မောင်စိုး - မြန်မာ-တရုတ်ဆက်ဆံရေးနှင့် မြန်မာ့အရေး (၃)

မောင်မောင်စိုး - မြန်မာ-တရုတ်ဆက်ဆံရေးနှင့် မြန်မာ့အရေး (၃)
(မိုးမခ) အောက်တိုဘာ ၄၊ ၂၀၂၁

တရုတ်ပြည်နှင့်တရုတ်ကွန်မြူနစ်ပါတီ 
ယနေ့တရုတ်ပြည်အား ချဉ်းကပ်သုံးသပ်မည်ဆိုပါက တရုတ်ပြည်ကွန်မြူနစ်ပါတီအခန်းကို ဦးစွာသဘောပေါက်လေ့လာရန်လိုသည်။ တရုတ်ပြည်ကွန်မြူနစ်ပါတီအားချန်လှပ်ပြီး ယနေ့တရုတ်ပြည်အား ချဉ်းကပ်ရန်မဖြစ်နိုင်ပေ။ တရုတ်ပြည်ကွန်မြူနစ်ပါတီသည် လက်ရှိအာဏာရပါတီဖြစ်သည်သာမက ရှည်ကြာသောသမိုင်းကြောင်းရှိသည့်ပါတီဖြစ်သည်။ မိုးပေါ်ကကျလာသောပါတီမဟုတ် တရုတ်ပြည်တိုက်ပွဲတိုက်ပွဲတွင်းမှထွက်ပေါ်လာသည့်ပါတီဖြစ်သည်။ တရုတ်ပြည်လက်နက်ကိုင်တော်လှန်ရေးကို အောင်မြင်စွာဆင်နွှဲနိုင်ခဲ့သည့်ပါတီဖြစ်သည်။ လက်ရှိတရုတ်ပြည်လွတ်မြောက်အောင် တရုတ်လူ့အဖွဲ့ အစည်းပြောင်းလဲအောင် ဦးဆောင်ခဲ့သည့် နိုင်ငံရေးပါတီမှာ ၁၉၂၁ တွင်စတင်ဖွဲ့စည်းခဲ့သည့် တရုတ်ကွန်မြူနစ်ပါတီ ဖြစ်သည်။ တရုတ်ကွန်မြူနစ်ပါတီ တရုတ်ပြည်၏ အဓိကပဲ့ကိုင်သူဖြစ်သည်။ တရုတ်ပြည်၏ နိုင်ငံရေး၊စီးပွါးရေး၊ကိစ္စအရပ်ရပ်ကို လက်ရှိကာလတွင် ပုံဖေါ်နေသူ၊ မူဝါဒချမှတ်နေသူမှာလည်း တရုတ်ကွန်မြူ နစ်ပါတီဖြစ်သည်။ တရုတ်ကွန်မြူနစ်ပါတီသည် ဒုတိယကမ္ဘာစစ်မတိုင်မှီကာလထိ ဂျပန်နှင့်အနောက်တိုင်းနိုင်ငံများ၏ ခွဲဝေကိုလိုနီကျွန်ပြုခံရခြင်း၊ ပဒေသရာဇ်စနစ်နှင့်စစ်ဘုရင်များ၏လက်အောက်တွင် တိုင်းပြည်ဆင်းရဲမွဲတေခဲ့သည်သာမက အစိတ်စိတ်အမွှာမွှာကွဲပြားနေခြင်း စသည့်အခြေအနေအောက်မှ တရုတ်ပြည်အား တစုတစည်းထဲဖြစ်အောင်  အားထုတ်ထူထောင်နိုင်ခဲ့သည့်ပါတီမှာ တရုတ်ကွန်မြူနစ်ပါတီဖြစ်ကာ တရုတ်ပါတီသည် တရုတ်ပြည်တွင်း၌ ဩဇာကြီးသည်။ ခေါင်းဆောင်မှုနေရာကို ရရှိခဲ့သည်။ ထို့ပြင် ၁၉၆၆ ယဉ်ကျေးမှုတော်လှန်ရေးသည် အမှားအယွင်းများ၊ ဘေးထွက်ဆိုးကျိုးများရှိသည်ဟုဆိုကြစေကာမူ ငြင်းပယ်၍မရသည့်အချက်မှာ တရုတ်ပြည်ကွန်မြူနစ်ပါတီ၏အခန်းကဏ္ဍအား ခိုင်မာစေခဲ့ခြင်းဖြစ်သည်။ 

သို့ဖြစ်ရာ တရုတ်ပြည်နှင့်ပတ်သက်၍ဖြစ်စေ၊ မြန်မာတရုတ်ဆက်ဆံရေးနှင့်ပတ်သက်၍ ဝေဖန်ပိုင်းခြားမည်ဆိုလျင် တရုတ်ကွန်မြူနစ်ပါတီမှ စတင်သုံးသပ်ရန်လ်ိုအပ်သည်။ တရုတ်ပြည်တွင် တရုတ်ကွန်မြူနစ်ပါတီ၊ တရုတ်အစိုးရနှင့် တရုတ်လွတ် မြောက်ရေးတပ်မတော်ဟု အဓိကအင်စတီကျူးရှင်း ၃ ခုရှိသည့်အနက် အမြင့်ဆုံးအာ ဏာပိုင်အင်စတီကျူးရှင်းမှာ တရုတ်ကွန်မြူနစ်ပါတီဖြစ်သည်။ တရုတ်အစိုးရသည် တရုတ်ကွန်မြူနစ်ပါတီ၏ ပေါ်လစီကို‌အကောင်အထည်ဖေါ်ရသည့် အုပ်ချုပ်ရေးယန္တယားဖြစ်သည်။ တရုတ်လွတ်မြောက်ရေးတပ်မတော်သည် တရုတ်ကွန်မြူနစ်ပါတီ၏ ပေါ်လစီကို အကောင်အထည်ဖေါ်ရသည့် လက်နက်ကိုင်ယန္တယားဖြစ်သည်။ တရုတ်စစ်တပ်ကို တကယ်တမ်းကွပ်ကဲသည်မှာ တရုတ်ကွန်မြူနစ်ပါတီ ဗဟိုစစ်ကော်မရှင်ဖြစ်သည်။ တ ရုတ်ပြည်အစိုးရနှင့်စစ်တပ်သည် ကွန်မြူနစ်ပါတီ၏ မူဝါဒများကို အကောင်အထည်ဖေါ်ရသည့် ယန္တယားများဖြစ်သည်။ 

၁၉၈၀ မတိုင်မှီ လက်ဝဲပါတီများ၊ ကွန်မြူနစ်ပါတီများနှင့်ဆက်ဆံခဲ့သည်မှာ တရုတ်ကွန်မြူနစ်ပါတီအနေနှင့်ဖြစ်သည်။ အစိုးရချင်း၊ တပ်မတော်ချင်းဆက်ဆံရေးကို သီးခြားခွဲထားသည်။ ၁၉၈၀ နောက်ပိုင်း အစိုးရချင်းဆက်ဆံ‌ရေးကို ဦးစားပေးရန်ဆုံးဖြတ်ပြီးနောက် တရုတ်ပါတီအခန်းကို  နောက်ဆုတ်ခဲ့သည်။ တရုတ်မြန်မာနယ်စပ်တလျောက်ဖွင့်လှစ်ထားသည့် တရုတ်ပါတီနိုင်ငံခြားဆက်ဆံရေးဌာနများကို ပိတ်သိမ်းပြီး ဒေသန္တရအစိုးရအောက်က နိုင်ငံခြားဆက်ဆံရေးဌာနများအဖြစ်ပြောင်းလဲဖွဲ့စည်းခဲ့သည်။ ယခင်က ပြည်ပဆက်ဆံရေးတွင် ဒေသန္တရအစိုးရအားကျော်လွန်၍လုပ်ဆောင်နိုင်သည့် တရုတ်ပါတီ ဆက်ဆံရေးဌာနများ တရုတ်မြန်မာနယ်စပ်တွင်မရှိတော့ဘဲ ဒေသန္တရအစိုးရလက်အောက်ခံ နိုင်ငံခြားရေးဌာနများဖြစ်သွားသည်။ 

တရုတ်ပြည်တွင် တရုတ်ကွန်မြူနစ်ပါတီက အခရာဖြစ်သည့်အားလျော်စွာ နိုင်ငံတကာဆက်ဆံရေးနှင့်ပတ်သက်၍ အဓိကကိုင်တွယ်သည်မှာ တရုတ်ကွန်မြူနစ်ပါတီ နိုင်ငံတကာဆက်ဆံရေးဌာနကြီးဖြစ်သည်။ မူဝါဒနှင့်ပေါ်လစီချမှတ်သည့်ဌာနဟု ဆိုရမည်။ သို့သော် တရုတ်ပြည်ပါတီသည် ပေါ်လစိီချမှတ်ရာတွင် တရုတ်အစိုးရနှင့် တရုတ်စစ်တပ်၏ သဘောထားကို ရယူလေ့ရှိသည်ကိုတွေ့ရသည်။ ထူးခြားသည့်အခြေအနေမျိုးရောက်တိုင်း၊ အခြေအနေအပြောင်းအလဲရှိတိုင်း ၎င်းတို့၏ပေါ်လစီကို ပြန် လည်လေ့လာသုံးသပ်လေ့ရှိသည်။ ဤသို့သုံးသပ်တိုင်း တရုတ်ကွန်မြူနစ်ပါတီသည် ၎င်းတို့၏ မဟာဗျူဟာစဉ်းစားမှုကိုအခြေခံပြိး လက်တွေ့အကောင်အထည်ဖေါ်မည့် အစိုးရနှင့်စစ်တပ်တို့၏ လက်တွေ့အခြေအနေအားလေ့လာသုံးသပ်ချက်၊ ရှုဒေါင့်အသီးသီးမှသုံးသပ်ချက်များတင်ပြကြသည်များကို  စုစည်းသုံးသပ်ပြီး ပေါ်လစီချမှတ်လေ့ရှိသည်ကို တွေ့ရသည်။ 

၁၉၇၇ တွင် မြန်မာပြည်နှင့်ပတ်သက်၍ တရုတ်တို့ပေါ်လစီအပြောင်းတခုစတင်ပြီးနောက် ၁၉၈၈/၈၉ မှစ၍ မြန်မာပြည်အခြေအနေ အပြောင်းအလဲဖြစ်သွားသည်။ မြန်မာပြည် ပြည်တွင်း၌ မဆလ အစိုးရ ပြုတ်ကျပြီး နဝတ အစိုးရတက်သည်။ ၁၉၉၀ ရွေး ကောက်ပွဲပြုလုပ်ပြိးသော်လည်း လွှတ်တော်ခေါ်ပေးခြင်းမရှိခဲ့။ တရုတ်မြန်မာစပ်တလျောက် တရုတ်တို့၏ စိတ်ချရသော မဟာမိတ်ဖြစ်ခဲ့သည့် ဗမာပြည်ကွန်မြူနစ်ပါတီပြိုကွဲသွားသည်။ထိုအခြေအနေများအောက်တွင် တရုတ်တို့သည် မြန်မာနှင့် ပတ်သက်၍ ပေါ်လစီတရပ်ချမှတ်ရန် ပြန်လည်လေ့လာသုံးသပ်မှုပြုခဲ့သည်။ တရုတ်အစိုးရကတော့ အစိုးရချင်းဆက်ဆံရေး၊ ကူးသန်းရောင်းဝယ်မှု၊ မြန်မာနိုင်ငံနှင့် စီးပွါးဆက်ဆံသည့်အပေါ်မှ ရမည့်အကျိုးအမြတ်များကို အဓိကသုံးသပ်တွက်ချက်သည်။ တရုတ်စစ်တပ်အနေနှင့် ထိုစဉ်က မြန်မာနယ်စပ်လုံခြုံရေးတာဝန်ရှိသည့် စစ်ချွမ်းစစ်ဒေသမှ အရာရှိကြီးများပါသော အဖွဲ့တဖွဲ့သည် မြန်မာပြည်မြောက်ဖျားမှသည် တောင်ဖက် လာအို-မြန်မာနယ်စပ်တလျောက် ကွင်းဆင်းသည်။ နယ်စပ်လုံခြုံရေးအခြေအနေကို ကြည့်ရှုသည်။ တရုတ်စစ်တပ်ကတော့ သူတာဝန်ရှိသည် တရုတ်မြန်မာနယ်စပ်လုံခြုံရေးရှုဒေါင့်မှအမြင်ကို တင်ပြသည်။ အဆိုပါ အစိုးရနှင့်စစ်တပ်က တင်ပြသည့် အချက်အလက်များကို တရုတ်ပါတီကသုံးသပ်ပြီး ပေါ်လစီအချောရေးဆွဲသည်။ ထို့နောက် ထိုပေါ်လစီကို တရုတ်အစိုးရနှင့် တရုတ်စစ်တပ်က အကောင်အထည်ဖေါ်ရသည်။ ဤသည်မှာ တရုတ်ကွန်မြူနစ်ပါတီ၊ တရုတ်အစိုးရနှင့် တရုတ်စစ်တပ်တို့၏ ဆက်နွယ်ပုံဖြစ်သည်။ တရုတ်ကွန်မြူနစ်ပါတီ၏ နိုင်ငံရေးအမြင်၊ သေနင်္ဂဗျူဟာအမြင်ပေါ်အခြေခံပြီး အစိုးရနှင့်စစ်တပ်တို့၏လက်တွေ့ပိုင်းနှင့်ပေါင်းစပ်၍ ပါတီ၊ အစိုးရနှင့်စစ်တပ်တို့ အခိုင်အမာကျင့်သုံးမည့် ပေါ်လစီများကို  ဆုံးဖြတ်ချက်ချ၍အ‌ကောင်အထည်‌ဖေါ်ကြသည်။ သို့ဖြစ်ရာ တရုတ်တို့၏မြန်မာပေါ်ထားရှိသည့် အခိုင်အမာပေါ်လစီအား သုံးသပ်တွက်ချက်လိုပါက ထိုအချက်ကို ထည့်သွင်းစဉ်း စားရန် လိုပါသည်။ 

တရုတ်ကွန်မြူနစ်ပါတီ မူဝါဒအပြောင်းအလဲ 
တရုတ်ပါတီ၏ ၁၉၇၆ ခုနှစ် မော်စီတုန်းကွယ်လွန်ချိန်ထိ ကိုင်စွဲထားသည့်မူဝါဒမှာနိုင်ငံတကာပစ္စည်းမဲ့များနှင့် အဖိနှိပ်ခံပြည်သူများသွေးစည်းကြဖြစ်သည်။ ၁၉၇၇ မှ စတင်ပြောင်းလဲသွားသည်မှာ ကမ္ဘာ့ပြည်သူများ သွေးစည်းညီညွတ်ကြဖြစ်သည်။ တလျောက်လုံးစွဲကိုင်ထားသည့် လူတန်းစားအမြင်အား စွန့်လွှတ်လိုက်ပြီး အမျိုးသားအကျိုးစိးပွါးကိုရှေ့ရှုသည့်အမြင်ကို ပြောင်းလဲစွဲကိုင်သည်။ ပါတီချင်းဆက်ဆံရေးအား အစိုးရချင်းဆက်ဆံရေးနောက်သို့ပို့လိုက်သည်။ ပါတီချင်းဆက်ဆံရေးတွင်လည်း  လက်ဝဲပါတီများနှင့်ဆက်ဆံရေးနေရာတွင် ထိုတိုင်းပြည်နိုင်ငံ‌ရေးနယ်ပယ်တွင်ရှိသည့် အရေးပါသည့် နိုင်ငံရေးပါတီအားလုံးနှင့်ဆက်ဆံရေးထူထောင်သည်။ နိုင်ငံတကာသို့ လက်ဝဲဝါဒ တင်ပို့ဖြန့်ဖြူးရာမှ ကွန်ဖြူးရှပ်စင်တာများထူထောင်ပြီး တရုတ်စာ၊ တရုတ်စကား၊ တရုတ်ယဉ် ကျေးမှုများဖြန့်ဖြူးသည်။ လက်ဝဲစကားများ၊ နိုင်ငံရေးစကားများ သိပ်မပြောတော့။ ထို့ပြင် ချစ်ကြည်ရေး၊ ကူညီရေးအသင်းအဖွဲ့များကို အစိုးရမဟုတ်သောအဖွဲ့အစည်းပုံစံနှင့်ဖွဲ့စည်းပြီး နိုင်ငံတကာတွင် အကူအညီပေးရေးလုပ်ငန်းများဆောင်ရွက်ပြီး သက်ဆိုင်ရာတိုင်းပြည်၏လူထုအားချဉ်းကပ်သည်။ 

သို့ဖြစ်ရာ တည်ဆဲအစိုးရအား ဆန့်ကျင်ပုန်ကန်နေသည့် လက်ဝဲပါတီများအ‌ကူအညီပေးနေမှုများအားရပ်တန့်လိုက်သဖြင့် အစိုးရများနှင့် အဆင်ပြေလာသည်။ မြန်မာပြည်တွင်လည်း ရန်ကုန်၊မန္တလေးစသည့်မြို့ကြီးများတွင် ကွန်ဖြူးရှပ်စင်တာများ ဖွင့်လှစ်လာခဲ့သည်။ တရုတ်စာပေနှင့်ယဉ်ကျေးမှုဖြန့်ဖြူးသည်ကို ဦးစားပေးလုပ်ကိုင်သည်။ ထို့ပြင် အစိုးရချင်း ဆက်ဆံရေးဖြင့် မြန်မာအစိုးရအား အကူအညီအချို့ (ဆေးရုံ၊ စာသင် ကျောင်း၊ တံတားဆောက်လုပ်လှူဒါန်းခြင်း၊ ယနေ့ကာလတွင် ကိုဗစ်ကာကွယ်ဆေးနှင့် ကျန်းမာရေးထောက်ကူပြုပစ္စည်းများ လှူဒါန်းခြင်း) တိုက်ရိုက်ပေးအပ်သည်။ တရုတ်တို့က အစိုးရမဟုတ်သော အဖွဲ့အစည်းများ (NGO) ဟု ခေါ်ဆိုသည့် တရုတ်နိုင်ငံဆင်းရဲ နွမ်းပါးမှုလျှော့ချရေးဖေါင်ဒေးရှင်း China Foundation for Poverty Alleviation (CFPA )၊ China Foundation for Peace and Development တရုတ်ပြည်ငြိမ်းချမ်းရေးနှင့်ဖွံ့ဖြိုးရေးဆိုင်ရာ ထောက်ပံ့ရေးအဖွဲ့အစည်း (CFPD) စသည့် အဖွဲ့အစည်းများနှင့် မြန်မာနိုင်ငံဆိုင်ရာ တရုတ်သံရုံးတို့ ပူးပေါင်း၍ မြန်မာပြည်တွင်းအကူအညီပေးရေးအစီအစဉ်များပြုလုပ်သည်။ ထို့ပြင် မြန်မာပြည်၌ရင်းနှီးမြှုပ်နှံထားသော တရုတ်ကုမ္ပဏီကြီးများကလည်း ကူညီထောက်ပံ့ရေးအစီအစဉ်များကို သီးခြားဖြစ်စေ တရုတ်သံရုံးနှင့်တွဲ၍ဖြစ်စေပြုလုပ်သည်ကိုတွေ့ရသည်။ 

ဤသည်မှာ နှစ်နိုင်ငံ အစိုးရချင်းဆက်ဆံရေးပေါ်အခြေခံ၍ နှစ်နိုင်ငံကုန်သွယ်ရေးတိုးမြှင့်လုပ်ဆောင်ခြင်း၊ မြန်မာပြည်တွင်း၌ ရင်းနှီးမြှုပ်နှံမှုများပြုလုပ်ခြင်းတို့နှင့် ယှဉ်တွဲ၍မြန်မာလူထုအား ချဥ်းကပ်စည်းရုံးသည့် တရုတ်ကွန်မြူနစ်ပါတီ၏ ပုံစံသစ်ဖြစ်သည်။ နိုင်ငံရေးအရ မြန်မာပြည်တွင်းရှိ အရေးပါသည့် နိုင်ငံရေးပါတီများ၊ အင်အားစုများကိုထိတွေ့ဆက်ဆံသည်။ ဤကား ခေတ်သစ် တရုတ်ပါတီချဉ်းကပ်သည့် နိုင်ငံရေးပုံစံသစ်ဖြစ်သည်။ 

ဆက်လက်ဖေါ်ပြပါမည်။ 
မောင်မောင်စိုး

Join Us @ MoeMaKa Telegram
t.me@moemaka
#MoeMaKaMedia
#WhatsHappeningInMyanmar