မိုးမခအနုပညာရေးရာ - သန်းထိုက်(မြန်မာစာ) '' ဆရာ ဝင်းဖေမြင့်( WPM) ''
Artist: Than Htaik.Bur
ဆရာ ဝင်းဖေမြင့်(WPM)
သန်းထိုက်(မြန်မာစာ)
အောက်တိုဘာ ၂၁၊ ၂၀၂၁
၁၉၈၅မှာ ရန်ကုန်ရောက်တော့ ... ကွန်ပျူတာက မြန်မာပြည်မှာ ဂရပ်ဖစ်အလုပ်အတွက် မပေါ်သေး ...၊ ကိုစိုးမြင့်က 'ခရေ'အော့ဖ်ဆက်ကာလာခွဲ လုပ်ငန်းလုပ်နေသည်၊ သူက မိမိကို အကူအညီများစွာပေးခဲ့သည်။ သူနှင့်ဆက်စပ်ကာ ဖလင်လုပ်ငန်းလုပ်သော ပန်းချီမျိုးသန့်အောင်နှင့် ခင်မင်ခဲ့ရသည်။
* ပန်းချီအလုပ်ကို အရူးအမူးဖြစ်နေသော မိမိကို သူငယ်ချင်းက 'ဆရာဖေ (WPM)နှင့်တွေ့စေချင်ကြောင်း ... သူက အနုပညာကို ရင်ထဲ ... အသည်းထဲနစ်ဝင် စွဲလမ်းလုပ်နေသူ ပန်းချီဆရာ...'
* ဆရာဖေနှင့် သိကျွမ်းကာ ... ယခင်သူနေထိုင်ရာ ... ၈မိုင်နားက ရဲဘော်ဟောင်းရပ်ကွက်သို့ ... မကြာမကြာရောက်သွားဖြစ်သည်။
ရောက်သည်နှင့် လက်ဖက်ရည်ဆိုင်ခေါ် ကျွေးမွေးပြီး ... စျေးမှာ အသီးအနှံ စားစရာများဝယ်သည်။ အိမ်ရောက်သည်နှင့် အသီးအနှံများ ပြင်ဆင် ... ဆေး ပိတ်များ နေရာချကာ ...
' ကဲ ခင်ဗျားရေးတော့ ' ဆိုသည်၊ သူက တနေရာမှာ ရေးသည်၊... ရေးနေကြရင်း ... သူအထဲဝင်သွားသည်၊ ... ပြီး ဆက်ရေးပြန်သည်၊
နေ့ခင်းကြတော့ ထမင်းစားကြစို့ဆိုကာ ... အထဲ နောက်ဖေး ထမင်းစားခန်းကိုခေါ်သွားသည်။
* နံနက်ခင်း လက်ဘက်ရည်သောက်အပြီး ပန်းချီရေးဖို့ အသီးအနှံ ဝယ်သည်ထင်မိခဲ့သည်၊ နေ့လယ်ခင်း ဟင်းချက်စရာပါ ဝယ်လာတာ သိရသည်။ ပန်းချီရေးဖို့ပြင်ဆင်နေတာကြည့်တော့ ... သူရေးဖို့ထင်သည်။ တကယ်တော့ မိမိအတွက်ပြင်ဆင်ပေးခြင်း ...၊ ရေးနေရင်း သူထွက်သွားတာက ... နေ့လည်စာအတွက် ချက်ပြုတ်နေခြင်း ...၊ မိသားစုပမာပါ။
* ဆရာဖေက မိမိကို တပည့်တဦးလို ဆက်ဆံခဲ့ခြင်းမဟုတ်...၊ သူငယ်ချင်းမိတ်ဆွေအဆင့်လည်းမဟုတ် ...၊
ညီငယ်တယောက်လို ချစ်ခင် စောင့်ရှောက်ခဲ့ခြင်းပါ။
* ဆရာဖေနှင့် လောကနတ်ပြခန်းရောက်သည်။
'ဆရာပေါ်ဦးသက်'က မန္တလေးနှင့် ရန်ကုန် အသွားအပြန်လုပ်ကာ ... ရန်ကုန်ရောက်လျှင် လောကနတ်မှာတည်း ... ပန်းချီကားများ ... စာအုပ်အဖုံးများ ရေးနေသည်၊
ဆရာဖေက ဆရာပေါ်ကို ဆရာရင်းတဦးပမာ လေးစားသည်၊ မိမိကိုလည်း ... ဆရာပေါ်ထံ အပ်ပေးသည်၊ ဆရာပေါ်ကလည်း မိမိကို အတတ်ပညာ ...အယူအဆ သင်ပြပေးသည်။ သူငယ်ချင်းကိုမျိုးသန့်အောင််နှင့် ဆက်စပ်ပြီး .... ဆရာဖေ... ဆရာရွှေ(ကိုရွှေအောင်သိမ်း) ... ဆရာ ကြီးမြင့်စော...ဆရာ မြသောင်း ... ဆရာတေဇာလင်း(GV Art Centre)... ဆရာသြ ... ဆရာ ခင်မြင့်အောင် ... ဆရာ ဦးကျော်လေး၊ ဆရာများစွာ သိခဲ့ရသည် ။
* ချစ်ခင်လေးစားအပ်သော ဆရာများပါ ... ... ...
Artist: Than Htaik.Bur
Title: Sayar Win Pe Myint(WPM)
Size: 21x16in
Medium: Acrylic
Collection: Ko Maung Maung Pyone
-
t.me@moemaka
#MoeMaKaMedia
#WhatsHappeningInMyanmar