ငြိမ်း (ပဲခူး) - အမှန်တရား
(မိုးမခ) နို၀င်ဘာ ၂၊ ၂၀၂၁
ဟိုတစ်နေ့က The Tashkent Files ဆိုတဲ့ အိန္ဒိယဇာတ်ကားတစ်ကား ကြည့်ဖြစ်တယ်။ အဲဒီဇာတ်ကားရဲ့အကြောင်းအရာကတော့ အိန္ဒိယနိုင်ငံရဲ့ အမျိုးသားခေါင်းဆောင်ကြီးတွေထဲက တစ်ဦးဖြစ်တဲ့ ဒုတိယဝန်ကြီးချုပ် ရှာစရီ သေဆုံးရတဲ့အကြောင်း စုံစမ်းစစ်ဆေးမှုကို ရိုက်ကူးထားတဲ့ ဖြစ်ရပ်မှန်ဇာတ်လမ်းတစ်ပုဒ်ပဲ ဖြစ်ပါတယ်။ ရှာစရီဟာ 1966 ခုနှစ် ပါကစ္စတန်နဲ့ သဘောတူစာချုပ်လက်မှတ်ထိုးဖို့ တာရှီကန်မှာရှိနေတဲ့အချိန် ရုတ်တရက် သေဆုံးခဲ့တယ်။ သူသေဆုံးမှုဟာ နှလုံးဖောက်မှုကြောင့်လား ဒါမှမဟုတ် အဆိပ်ခတ်ခံရတာလား မရေရာဖြစ်ခဲ့ပြီးတော့ နှစ် ၅၀ ကြာတဲ့အထိ သမိုင်းဖျောက်ခံထားခဲ့ရပါတယ်။
အဲဒီလို သမိုင်းဖျောက်ခံထားရတာကို သတင်းထောက်မလေးတစ်ယောက်အပါအဝင် နယ်ပယ်အသီးသီးက ပညာရှင်တွေစုပေါင်းကာ စုံခုံဖွဲ့ပြီး စစ်ဆေးဖော်ထုတ်ကြပါတယ်။ အဲဒီမှာပဲ တစ်ယောက်တစ်မျိုး ထင်ကြေးအမျိုးမျိုးပေးပြီး ငြင်းခုံကြရင်း မှတ်သားလောက်စရာကောင်းတဲ့ ဒိုင်ယာလော့တွေ ပြောကြတာပေါ့။ အဲဒီလိုပြောကြတဲ့ ဒိုင်ယာလော့တွေထဲက သတင်းထောက်မလေးပြောတဲ့ ဒိုင်ယာလော့တစ်ခုကို ကျွန်တော်အရမ်းပဲ ကြိုက်နှစ်သက်မိတယ်။ အဲဒီဒိုင်ယာလော့ကတော့ ဒုတိယဝန်ကြီးချုပ် ရှာစရီသေဆုံးရတဲ့အကြောင်းကို ''အမှန်တရား'' အတွက် ပြန်လည်ဖော်ထုတ်တာလို့ပြောထားတဲ့ ဒိုင်ယာလော့ပဲ ဖြစ်ပါတယ်။
အမှန်တရားဆိုတဲ့ စကားစုလေးဟာ ကျွန်တော်တို့ ခန္ဓာကိုယ်ထဲမှာ ကျွန်တော်တို့နေထိုင်ရာပတ်ဝန်းကျင်မှာ ကျွန်တော်တို့ အလုပ်လုပ်နေတဲ့ လုပ်ငန်းခွင်မှာ ကျွန်တော်တို့နိုင်ငံမှာ ရှိနေတာပဲဖြစ်ပါတယ်။ အဲဒီမှာ တချို့လူတွေဟာ အမှန်တရားအတွက် ကိုယ်ကျိုးမငဲ့ဘဲ ရဲဝံ့စွာနဲ့တိုက်ပွဲဝင်ကြတယ်။ တချို့လူတွေကျတော့ အမှန်တရားအတွက် နောက်ကွယ်ကနေ ဘယ်သူ ဘယ်ဝါဆိုပြီး အသိမခံဘဲ တိုက်ပွဲဝင်ကြတယ်။ တချို့လူတွေကျတော့လည်း အမှန်တရားဆိုတာကို မြင်နေ ကြားနေပါလျက်နဲ့ ရေငုံနှုတ် ပိတ်နေကြတယ်။ လူအမျိုးမျိုး စိတ်အထွေထွေပေါ့လေ။
အမှန်တရားအတွက် ရဲဝံ့စွာတိုက်ပွဲဝင်ကြတဲ့ လူတွေကတော့ ၈၈ အရေးအခင်းက ပြည်သူတွေလို့ ကျွန်တော် ထင်မြင်ယူဆမိပါတယ်။ အဲဒီထဲမှာ ကျွန်တော်တို့နိုင်ငံမှာနေထိုင်ကြတဲ့ လူတန်းစားအလွှာအသီးသီးက ပြည်သူတွေပါဝင်ကြတယ်။ အဲဒီမှာ တချို့လည်း တိုက်ပွဲဝင်ရင်း နိုင်ငံခြားကိုထွက်ပြေးကြရ ထောင်ထဲမှာ သေဆုံးကြရ မိတကွဲ ဖတကွဲ သားတကွဲ မယားတကွဲနဲ့ အမှန်တရားအတွက် အပင်ပန်းအဆင်းရဲခံခဲ့ကြပါတယ်။ အဲဒီအချိန်တုန်းက ကျွန်တော်မမွေးတဲ့အတွက် အမှန်တရားအတွက် ရဲဝံ့စွာတိုက်ပွဲခဲ့ကြတဲ့ ပုံရိပ်လေးတွေကို အခုပြန်ရှာကြည့်လိုက်တဲ့အခါ တွေ့လိုက်ရတဲ့ ကျွန်တော့်မှာ ကြက်သီးဖြန်းဖြန်းထမိပါတယ်။
ပြီးတဲ့အခါ အခုလက်ရှိအချိန်မှာလည်း မအလရဲ့ စစ်အာဏာသိမ်းမှုကိုတော်လှန်ရင်း အမှန်တရားအတွက် တရားစွဲဆိုခံ အဖမ်းဆီးခံအသက်အသေခံပြီး စစ်အာဏာရှင်လက်အောက်ကနေ လွတ်မြောက်ဖို့ ပုံစံအမျိုးမျိုးနဲ့ တိုက်ပွဲဝင်နေကြတဲ့ ကျွန်တော်တို့ပြည်သူတွေဟာလည်း ရှိနေဆဲပါပဲ။ အောင်မြင်ပါစေ၊ အမှန်တရားက အနိုင်ရပါစေလို့ ဘုရားရှိခိုးတဲ့အခါတိုင်း ကျွန်တော်ဆုတောင်းပေးပါတယ်။
အမှန်တရားအတွက် နောက်ကွယ်ကနေ တိုက်ပွဲဝင်တဲ့လူတွေထဲကမှ ကျွန်တော်ဖတ်ခဲ့ဖူးတဲ့ စာအုပ်ကလေးထဲမှာပါတဲ့ ရှင်းဒလားဆိုတဲ့ ပုဂ္ဂိုလ်တစ်ယောက်ကို ညွှန်ပြချင်ပါတယ်။ အဲဒီပုဂ္ဂိုလ်ကတော့ ဂျာမန်စက်မှုလုပ်ငန်းရှင်တစ်ယောက်ပဲ ဖြစ်ပါတယ်။ သူက ဒုတိယကမ္ဘာစစ်အတွင်းမှာ ဂျူးလူမျိုးတွေကို ဂျာမန်တွေရဲ့ အဆိပ်ငွေ့ခန်းတွေထဲမရောက်အောင် ကယ်တင်ခဲ့တဲ့ ပုဂ္ဂိုလ်တစ်ယောက်ပဲ ဖြစ်ပါတယ်။ အဲဒီပုဂ္ဂိုလ်ဟာ ဂျူးလူမျိုးတွေကို ဂျာမန်တွေကဖမ်းဆီးပြီး သတ်တော့မယ်ဆိုရင် ဂျာမန်အရာရှိတွေကို လာဘ်ထိုးကာ သူ့စက်ရုံထဲကို အလုပ်သမားတွေအဖြစ်ဝင်ရောက်စေပြီး တစ်ဖက်လှည့်နဲ့ ကင်တင်ခဲ့တယ်။ အဲဒီပုဂ္ဂိုလ်ကြောင့်ပဲ ဂျူးလူမျိုးတွေရဲ့ အသက်ပေါင်းမြောက်မြားစွာကို ရှင်သန်စေခဲ့ပါတယ်။ ဒီလိုနဲ့ ဒုတိယကမ္ဘာစစ်ပြီးဆုံးသွားတာ့ ရှင်းဒလားကို အစ္စရေးနိုင်ငံက တခမ်းတနားဂုဏ်ပြုခဲ့တယ်။ ပြီးတဲ့အခါ ကျွန်တော့်မှာ အဲဒီစာအုပ်ကလေးကို ရင်တထိတ်ထိတ်နဲ့ ဖတ်ရှုခဲ့ရပါတယ်။ အဲဒီလိုဖတ်ရှုနေရင်း ကျွန်တော့်မှာ အခက်အခဲအကျပ်အတည်းတွေနဲ့ ဘယ်လောက်ပဲ ပြည့်နှက်နေပါစေ တချိန်မှာ အမှန်တရားက အနိုင်ရတာပဲဆိုတာကို သိလာခဲ့ရပါတယ်။
အရေးတော်ပုံ အောင်ရမည်။
t.me@moemaka
#MoeMaKaMedia
#WhatsHappeningInMyanmar
Posts
