မိုးမြင့်ယံ - အချစ်ရဆုံးသော တူ တူမ များထံသို့ ပေးစာ
မိုးမြင့်ယံ
(မိုးမခ) မေ ၂၇၊ ၂၀၂၂
ပါပါးချစ်ရတဲ့ တူ တူမလေးတွေရေ ... မကြာမီဆို ကျောင်းတွေ ပြန်ဖွင့်တော့မယ်တဲ့။ တကယ်ဆို ဒီအချိန်ဟာ ပါပါးရဲ့ တူ တူမလေးတွေဟာ အဖြူအစိမ်းလေးနဲ့ မိုးစက်မိုးမှုန်လေးတွေတဖွဲဖွဲအောက်မှာ စာသင်ခန်းထဲကို ပျော်ရွှင်စွာ ရောက်နေရမဲ့ အချိန်ကာလတခုပေါ့။
ခုတော့ ဖေဖော်ဝါရီ ၁ ရက်နေ့ကစလို့ ပါပါးတို့ ပြည်သူလူထုတရပ်လုံး ကြိမ်မီးအုံးသလို လူမဆန်တဲ့ အန္ဓမိစ္ဆာတစုရဲ့ တကိုယ်စာကောင်းစားရေးဆိုတဲ့ အတ္တထူထူကြီးတွေ လွှမ်းခြုံပြီး ပြည်သူလူထုရဲ့ လွတ်လပ်တဲ့ အချုပ်အခြာအာဏာကို ဓားပြတိုက်လုယက်ယူဆောင်သွားခဲ့တာ ဒီနေ့ 24 . MAY . 2021 ဆိုရင် ရက်ပေါင်း 113 တစ်ရာတစ်ဆယ့်သုံးရက်တိတိရှိခဲ့ပြီ ။
ဒီရက်တွေအတွင်းမှာ မတရားသတ်ဖြတ်ခံရသူတွေ ဖမ်းဆီးချုပ်နှောင်ခံရသူတွေနဲ့ ပြည်သူတွေရဲ့ နေ့တွေညတွေဟာ လူမဆန်လွန်းတဲ့အမိန့်အာဏာတွေအောက်မှာ ကျီးလန့်စာစား နာကျင်ကြေကွဲရမှု့တွေနဲ့သာ ဖြတ်သန်းလာခဲ့ရတာဟာ ဘယ်လောက်များယူကြုံးမရဖြစ်ရမလဲကွယ် ။
စစ်အာဏာရှင်ဆိုတဲ့ ဆင်းရဲတွင်းကမလွတ်မြောက်နိုင်တဲ့ ထိန်းချုပ်မှုတွေအောက်မှာ ပါပါးတို့နေ့ရက်တွေဟာ မှောင်နဲ့မည်းမည်း ကုန်ဆုံးခဲ့ရဖူးတယ်လေ။
အဲ့ဒီလိုအဖြစ်မျိုးနဲ့ စနစ်ဆိုးတွေအောက်မှာ ပါပါးချစ်တဲ့ တူ တူမလေးတွေရဲ့ နေ့သစ်လေးတွေကို မဖြတ်သန်းစေချင်တာ ပါပါးရဲ့ တူ တူမလေးတွေအပေါ် ချစ်တဲ့စိတ်တခုပေါ့ ။
ခရမ်းချဥ်သီးလို မီးလုံးမှိန်မှိန်လေးတွေအောက်မှာ လူကြီးတွေရဲ့ ရေဒီယိုအသံလှိုင်းကို တိုးဖွဖွဖမ်းယူရင်း ခိုးနားထောင်ခဲ့ရတဲ့ဘဝတွေကို ပါပါး ငယ်ငယ် တူ တူမလေးတို့အရွယ်တုန်းက ကြုံခဲ့ရဖူးပြီးပြီလေ။
ကိုယ့်အိမ်ထဲမှာ ကိုယ်အိပ်နေတာတောင်မှာ ဘုရားခန်းထိ ဖိနပ်ကြီးတွေနဲ့တက်လာပြီး အပျိုမရှောင် အအိုမရှောင် ခြင်ထောင်လှမ်းပြီး ဧည့်စာရင်းစစ်တာပါဆိုတဲ့ဘဝ ။
တူ တူမလေးတွေရဲ့ ခေတ်မှာတော့ လုံလုံခြုံခြုံ အိပ်စက်ခွင့်ရစေချင်ပါရဲ့ကွယ် ။
ကလေးအတွေးနဲ့ပဲစဥ်းစားကြည့်ပါ တူ တူမလေးတို့ရယ် တူ တူမလေးတို့ကို အိမ်ကပေးလိုက်တဲ့မုန့်ဖိုးပိုက်ဆံလေးတွေကို တပါးသူက လုယက်ယူငင်သွားရင် ဘယ်လိုခံစားရမလဲဟင် ? ။
ကိုယ့်မှာရှိတဲ့အရာတွေတောင်မှ လွတ်လွတ်လပ်လပ် ပိုင်ဆိုင်ခွင့်မရှိရင် ခုရောက်ရှိနေတဲ့နေရာဆိုတာကရော နေပျော်ပါ့မလား တူ တူမလေးတို့ရယ် ။
မကြာမီဆို ကျောင်းသားတိုင် ကျောင်းအပ်နှံပြီး ကျောင်းတွေတက်ရတော့မယ်ဆိုပဲ တူ တူမလေးတို့ရေ ။
အတန်းပိုင်ဆရာမနဲ့အဆင်ပြေရင် အတန်းမတက်လည်း စာမေးပွဲဆိုတာ အောင်တဲ့ခေတ်ကို ပြန်ရောက်တော့မယ်လေ။ စာမေးပွဲဆိုတာကလည်း မဖြေတဲ့သူနဲ့ သေတဲ့သူသာ ကျရှုံးကျန်ခဲ့တဲ့စနစ်မျိုးပေါ့ကွယ် ။
ပါပါးတခုပြောပြမယ် တူ တူမလေးတို့ရေ ပါပါးရဲ့ ဖေဖေက SEA MAN မေမေက ဆန်လုပ်ငန်းလုပ်တယ် ပါပါးတို့ မောင်နှစ်မတွေဟာ မပူမပင်မကြောင့်မကျနဲ့ ဘဝကိုဖြတ်သန်းလာခဲ့ရတယ်လိုဆိုမှာပေါ့ကွယ်။ ပါပါး ၈ တန်းနှစ်မှာ ပညာရေးကိုစိတ်မဝင်စားတော့လို့ ကျောင်းထွက်ပြီးလေလွင့်နေခဲ့တာ သုံးနှစ်ကွဲ့၊ နောက်တော့ တူ တူမလေးတို့အဖွားက စာမေးပွဲပြန်ဖြေခိုင်းလို့ အပြင်ကနေဝင်ဖြေခဲ့တယ် ပါပါးအောင်လာတယ် ။
ဒီလိုနဲ့ ပါပါးကိုးတန်းတက်တော့ အသက်က ၁၈ နှစ်ပိုက်ဆံပဲရှာမယ်ဆိုတဲ့အတွေးနဲ့ ပါးပါး ကျောင်းကိုတစ်လနှစ်လတက်ပြီး CDC - PASSPORT လုပ်ခဲ့တယ်။
ရည်ရွယ်ချက်က တူ တူမလေးတို့ရဲ့ ဖိုးဖိုးလို SEA MAN လုပ်မယ်ဆိုတဲ့စိတ်ကူးပေါ့ ဒါပေမဲ့ အသက်ကလည်း ငယ်လွန်းသေးတဲ့ ပါပါးအတွက် ကုသိုလ်ကံက ဒီနိုင်ငံရဲ့အပြင်ကို ပေးမထွက်ခဲ့ဘူးလေ၊ အဲ့ဒီနှစ်မှာပဲ သင်္ကြန်အပြီးမှာ ပါပါးကိုးတန်းကို အပြင်က ဝင်ဖြေဖြစ်တယ် တူ တူမလေးတို့ စဥ်းစားကြည့်လေ တစ်လနှစ်လပဲကျောင်းတက်ခဲ့တဲ့ ပါပါးအဖြစ်ကို ဒါပေမဲ့ အောင်စာရင်းထွက်တော့ ပါပါးနာမည်ပါလာခဲ့တယ်ကွဲ့ ။
ပါပါးဆိုလိုချင်တဲ့အဓိပ္ပါယ်ကို တူ တူမလေးတို့ သဘောပေါက်မယ်ထင်ပါရဲ့ ။
ဒီလိုမိစ္ဆာတွေရဲ့လက်အောက်က ပညာရေးစနစ်ဆိုတာ တူ တူမလေးတို့ရဲ့အဖေက ဦးဘဖြစ်ပြီး အမေက ဒေါ်မြဖြစ်နေဦးမှာပဲလေ My teacher name is Daw Hla . ကနေ ပိုပြီးတက်လာမှာမှ မဟုတ်တာလေ ။
အဲ့တော့ နည်းပညာတွေထွန်းကားနေပြီးဖြစ်တဲ့ IT ခေတ်ကြီးမှာ တူ တူမလေးတို့သိချင်တာမှန်သမျှကို Secrth တချက်နှိပ်ရုံနဲ့ရနေတာကို ဒီ ကျွန် ပညာရေ စနစ်အောက်ကို ပါပါးချစ်တဲ့ တူ တူမလေးတွေ တိုးဝင်မှာမဟုတ်ဖူးဆိုတာ ပါပါးယုံကြည်ပါရစေကလေးတို့ရေ ။
စာလည်းရှည်သွားပြီ တူ တူမလေးတို့ရေ အမှောင်ကမ္ဘာရဲ့တဖက်မှာ လင်းလက်တောက်ပတဲ့အနာဂတ်တွေဟာ တူ တူမလေးတို့ကိုစောင့်ကြိုနေတယ်ဆိုတာကိုတော့ တူ တူမလေးတို့ရဲ့နှလုံးသားထဲမှာ ရဲဝံ့စွာယုံကြည်ထားလိုက်ပါလို့ပြောရင်း ပါပါးရဲ့စာကို အဆုံးသတ်လိုက်ပါတယ်။
ပါပါးချစ်တဲ့ တူ တူမလေးတွေနဲ့တကွ တတိုင်းပြည်လုံးမှာရှိတဲ့ ကလေးလေးတွေအားလုံး ကျွန်ပညာရေးစနစ်ကနေ လွတ်မြောက်နိုင်ကြပါစေလို့ ပါပါးက ဆန္ဒပြုလိုက်ပါတယ်ကလေးတို့ရယ် ။
ချစ်ခြင်းမေတ္တာများဖြင့်
တူ တူမလေးတို့ရဲ့ ပါပါး
မိုးမြင့်ယံ
2452021 ( 01 : 08 ) pm .
-
Join Us @ MoeMaKa Telegramt.me@moemaka
#MoeMaKaMedia
#WhatsHappeningInMyanmar
Posts
