ခန့်ဝါငြိမ်း - နေညိုညိုပလွေအိုအိုတေးသံ
နေညိုညိုပလွေအိုအိုတေးသံ
ခန့်ဝါငြိမ်း
(မိုးမခ) ဩဂုတ် ၂၊ ၂၀၂၂
အကုန်လုံးထွက်ပြေးသွားကြတော့
ရွာခွံလေးသာကျန်ရစ်ခဲ့။
အိမ်နဲ့အဘိုးနဲ့အအိုပြိုင်တာ
အဘိုးနိုင်တယ်ဆိုတဲ့ပုံပြင်လေး
ရှိရာနေရာကလွဲလို့။
အဘိုးက
သင်္ချိုင်းကိုခြေတဖက်လှမ်းနေပါပြီ
ကျန်တဲ့ခြေတစ်ဖက်မလှမ်းနိုင်သေးတာ
လေဖြတ်ထားလို့ဆိုတဲ့ဟာသလေး
ရှိရာနေရာကလွဲလို့။
အဘိုးမှာ
လက်နက်ဆိုလို့
အိုနေတဲ့တောင်ဝှေးလေး
တချောင်းပဲရှိတာပါ။
ဘာပစ္စည်းလေးနဲ့
လာကန်တော့တာဖြစ်ဖြစ်
ဆုတွေအများကြီးပေးတတ်တဲ့
အဘိုးဟာ
သွေးအိုင်ထဲမှာ
အားတင်းပြီးဆုတွေပေးနေရှာတယ်
ကျည်ဆံနဲ့လာကန်တော့သူတွေကို။ ။
-
t.me@moemaka
#MoeMaKaMedia
#WhatsHappeningInMyanmar
Posts
