မာလာမေ - ဖိနပ်တရံရဲ့အသံ
ဖိနပ်တရံရဲ့အသံ
မာလာမေ
(မိုးမခ) စက်တင်ဘာ ၁၄၊ ၂၀၂၂
"ခေတ်ဆိုးခေတ်ကျပ်ကြီးထဲ
ကျမက မျက်နှာမွဲပါ
စျေးဗန်းခေါင်းပေါ်တင်ထားရတဲ့
ကျမနောက်ကို ကုန်စျေးနှုန်းတွေက
ထက်ကြပ်မကွာ လိုက်လာတယ်
အကြွေးတွေလည်း လည်ပင်းကျော်လာ
ကျမ တင်းမခံနိုင်တော့ဘူး
မွန်းကျပ်လှပြီ
ရေမွန်းရင်မွန်းပါစေတော့
လူမမယ်သမီးလေးလက်ကို ဆွဲကာ
ကျမ ....."
"အထွေထွေဒုက္ခတွေကြားထဲမှာ
ခွေးတစ်ကောင် ချောင်ပိတ်ရိုက်ခံရသလို
ဘဝမျိုးဖြစ်နေပါပြီ
လမ်းသွားရင်လည်း ဖုန်းစစ်
ညကျရင်လည်း ဧည့်စစ်
ကျနော်က ၅ မျဥ်းစောင်းလေ
ကုမ္ပဏီက အလုပ်လည်း ပြုတ်
ပြန်စရာရွာလည်း ပျက်ပြီ"
"ကျနော်က ယဥ်ကျေးပြီး
ဘာသာတရားကိုင်းရှိုင်းတဲ့သူတစ်ယောက်ပါ
ဟုတ်တာ မဟုတ်တာ အသာထား
အဖန်ငါးရာငါးကမ္ဘာဆိုတာတွေလည်း
တွေးမနေအားတော့ပါဘူး
ကျနော် လွတ်မြောက်ဖို့
နိစ္စဓူဝဒုက္ခတွေက တွန်းပို့နေလို့
အခု ကျနော့်ဘဝ အေးမြသွားပါပြီ"
ပိုင်ရှင်မဲ့သွားတဲ့
ဖိနပ်တရံကို ရိုက်စစ်ရင်
အဲသလို စကားလုံးတွေပဲ
ထွက်ကျလာမှာပါ။
၃၀ - ၈ -၂၀၂၂
-
t.me@moemaka
#MoeMaKaMedia
#WhatsHappeningInMyanmar
Posts
