သော်မိုးသစ် - ရက်စက်မှုက သရဖူဆောင်းထားတယ်
ရက်စက်မှုက သရဖူဆောင်းထားတယ်
သော်မိုးသစ်
(မိုးမခ) စက်တင်ဘာ ၂၄၊ ၂၀၂၂
အခုတလောက
ရက်စက်မှုဟာ သရဖူဆောင်းတယ်ဆိုတာမျိုး...
မိုးပေါ်ကနေ
မိုးစက်မိုးပေါက်တွေ မကျဲပက်ပေးဘူး
အဲဒီအစား...
ကျည်မိုးတွေရွာကျတယ်
လေထဲကနေ
အောက်စီဂျင်သန့်သန့်မရှုရှိုက်ရဘူး
အဲဒီအစား
ယမ်းနံ့နဲ့ သွေးညှီနံပဲလာတော့တယ်...
ကျောင်းမှာသင်ဖူးတဲ့
သင်ပုန်းကြီးထဲမှာတော့
'က' ကြီးကလေးငယ်ချစ်စဖွယ်...လို့ဆိုတယ်
ခုတော့
'က' ကြီးကို ကျည်ဆန်အဖြစ်
စာလုံးပြန်ပေါင်းကြရတော့မယ်...
စက္ခုဝိညာဏ်ပျောက်ဆုံးသွားရှာတဲ့ ကမ္ဘာကြီး...
သောတဝိညာဏ်ပျောက်ဆုံးသွားတဲ့ ကမ္ဘာကြီး...
အခုတလောဟာ
ရက်စက်မှု သရဖူဆောင်းတယ်ဆိုတာမျိုးပဲ...
'ဗ' ဗလကြီးက ဆင်ပြောင်ကို မစီးတော့ဘူး...
'ဗ' ဗုံးဆံသာ တည့်တည့်မှန်သွားခဲ့ပြီ။ ။
-
t.me@moemaka
#MoeMaKaMedia
#WhatsHappeningInMyanmar