ခန့်ဝါငြိမ်း - ပိန်းပိတ်လို့မှောင်
ပိန်းပိတ်လို့မှောင်
ခန့်ဝါငြိမ်း
(မိုးမခ) စက်တင်ဘာ ၃၀၊ ၂၀၂၂
အဲဒါ
သွေးကွက်တွေမဟုတ်ဘူး
အမှောင်ကိုအန်တုခဲ့တဲ့
ဖယောင်းတိုင်နီလေးတွေ
အရည်ပျော်ကျထားတာ။
အမှောင်နက်နက်နေ့တွေထဲမှာ
လင်းနေတဲ့နှလုံးသားတွေတွေ့ရတယ်
ဆက်တောင့်ထား
အလင်းဖွေးဖွေးနေ့တွေထဲမှာ
မှောင်နေတဲ့နှလုံးသားတွေတွေ့ရတော့မယ်။
နိုင်ငံပုပ်စော်နံနေတာဟာ
သေပြီးသားလူတွေဆီကလား
မဟုတ်ဘူး
မသေသေးတဲ့လူတွေဆီက။
အို...
သူရဲကောင်းအပေါင်းတို့
သင်တို့ဟာ
အစိမ်းသေတွေမဟုတ်ဘူး
အကျက်သေတွေ
သင်တို့တဘဝလုံးကိုကျက်အောင်ချက်ပြီး
နိုင်ငံနဲ့ပြည်သူကိုကျွေးမွေးခဲ့သူတွေ။
ရောင်နီဆိုတာလာစမြဲမို့လား
မိုးစင်စင်လင်းမှ
အတူအိပ်လို့အတူအိပ်မက်ကြမယ်
အခုတော့
တူမီးကိုင်သူကိုင်ကြ
ဂါထာရွတ်သူရွတ်ကြ
မအလ မအလ။ ။
-
t.me@moemaka
#MoeMaKaMedia
#WhatsHappeningInMyanmar