စိုးလူမောင် - ရိုး မ ရ နံ့
စိုးလူမောင်
(မိုးမခ) နိုဝင်ဘာ ၂၃၊ ၂၀၂၂
* ရိုးမဟာ
သူ့သဏ္ဌန် သူ့ဟန်ပန်
သူ့ဋ္ဌာန်နဲ့သူ
လူ့သမိုင်းမှန်ကူကွက်ထဲ
အနက်ရှိုင်းဆုံး
လှိုင်းတခုဖြစ်ခဲ့ဖူးရဲ့ ။
* တောင်ပေါ်စပ်က
ငှက်မျိုးစုံအော်သံ
ချိုးကူသံ၊ ဝဲပျံ ပျားသံများ
နားဆတ်ဆတ် နှစ်ချို့များစွာ ။
* ခုများ
တောင်ခိုးတောင်ငွေ့ပါးရှား
နိုင်လွန်သားတောအုပ်သစ်ပင်
ရသကင်းမဲ့နေတဲ့
တောကြီးတန်းကွန်ရက်
ချွေးစက်သွေးစက်မျက်ရည်တွေ
တောင်ယာလယ်လုပ်၊ ဓားမခုတ်
ကျွဲပခုံးတို့ထက်
စစ်ပဒေဿရစ်လက်သစ်တို့
သွေးစုတ်ညစ်ပတ်
အသံကောင်းဟစ်ခဲ့ကြ၊
တောပြုန်း တောင်ပြုန်း
လယ်ဆုံးယာဆုံး
လယ်ပျက်ယာပျက်၊ ဘဝပျက်
လယ်ပစ် ယာပစ်
ဘဝပစ်သွားကြ
နှစ်တို့ချီကြာမြင့်ခဲ့ပြီ ။
* ဟိုတချိန်က
မြရာပင် မြရာတော
သစ်ရာပင် သစ်ရာတော
တခါတလေ
မျှစ်စို့ထူထူပေါတဲ့ဝါးတောအုပ်
တချို့ငှက်ပစ်ရင်း၊ ပျားဖွတ်ရင်း
ကျော့ကွင်းထဲဆင်းလာတဲ့
တောဝက်တကောင်
အမဲလိုက်ခွေးဟောင်သံ
အကူအညီနဲ့
ဦးလေးရင်ရဲ့ဟင်းစားဟာ
မီးခိုးတလူလူ
တရွာလုံးသင်းပျံ့မွှေးကြိုင်သွားလေရဲ့။
* ရိုးမအခြေနဲ့ အလှမ်းမဝေး
အုတ်ဖိုမြို့တောဘူတာလေးဟာ
တပ်မခွန်ခွန်တံဆိပ်နဲ့
အသစ်စက်စက်ဂျီသရီးမောင်းပြန်များ
စစ်ရောင်ဖိနပ်စိမ်းတွေ
စစ်ရထားတွဲကထွက်ကျလာလိုက်တာ
ဘူတာဝန်းကျင်တရပ်လုံး
နေရာချင်းထပ် ပျားပန်းခပ် ။
* « နင် ဗကပ
ဗကပ ဒေါက်တိုင်
ဗကပ ဒလျှိူ «
ဦးလေးရင် ဟာ
အစိမ်းပုတ်တို့ဖြန့်ကျက်
ရက်နစ်ဆယ်အလွန်
လှံစွပ် ဓားသွားထက်
အသက်ကိုစတေး ၊
^ မသိဘူး»ဘူး ငြင်းချက်များနဲ့ ့
အညတြ ရိုးမတပ်သား
ကြားရသူရွာသားတိုင်း
«တောက်»ခေါက်သံတွေနဲ ့
မျက်ရည်လည် ။
* ဦးလေးရင်ဟာ
ဦးလေးဟိုလိုပဲ၊ ကိုယ်ကျိုးမငဲ့
ရွာကျိုးအတွက် ဇောင်းပေးလုပ်
တောင်ယာလယ်လုပ်ကျွမ်း
တောလိုက်လဲကျွမ်းတယ်၊
အိမ်ဆိုင်လေးနဲ့ တတုံးထွန်
လယ်သမားဖြစ်တယ်၊
အလုပ်အားရင်စာအုပ်ကိုင်တယ်
တခါတလေ ညအမှောင်
ထီးထီး ထွက်ခွာတတ်တယ်
ဦးလေးရင်ကိုမုန်းတဲ့ရွာသား မရှိ။
* ၆၄ ရင်ဘတ်နဲ့ဦးလေးရင်
ရဲရဲမြင်တာက
စစ်ဓနရှင်တွေအပေါ်
ပြတ်သားခါးသီးခြင်းပဲ ။
*နှစ်ငါးဆယ်ကျော်ခဲ့ပြီ ဦးလေးရင်
တချက်တချက် လွမ်းတသတာကလွဲလို့
ဦးလေးရင်အတွက်
ဆုမတောင်းပန်းမကပ်
ဒီကျေးလက်ဇာတ်လမ်းတွေ
ဟောင်းဆွေးမသွားသေး
ကျုပ်တို့သွေးကြောထဲမှာ
တစစ်စစ်။
* တဆစ် တနှံ တစေ့
တဆစ်ကတရုံဖြစ်
တနှံက တနံတလျားဖြစ်
တစေ့က တတောဖြစ်
သစ်ဆန်းညီညွတ်ကြ
ငါတို့ချစ်တဲ့ငါတို့လေ
ငါတို့ရှုမယ်၊
ငါတို့ချစ်တဲ့ငါတို့မြေ
ငါတို့ပြန်ယူမယ်။
* အဖိုးအခပေးလွန်းကြီးမားခဲ့တဲ့
ပဲခူးရိုးမ
ပြန်လည်နိုးထလင်းလက်ကြ
ပြန့်ကြဲရာအရပ်ကဦးညွှတ်ကြ
ရှင်သန်ခြင်းနိယာမသစ်မှာ
ရိုး မ မြစ်တွေ ဖျာထွက်
စီးဆင်းမယ်၊စီးဆင်းကြစေမယ် ။ ။
စိုးလူမောင်
** ပဲခူးရိုးမ ရွှေတလေးချောင်းဖျားဒေသ မစေ့စပ်စတမ်းတိုက်ပွဲဝင်ရင်း ကျဆုံးသွားခဲ့ကြသော ဗိုလ်မင်းဒင်နဲ့အတူ ရဲဘော်မူကာဂျီ၊ ဗိုလ်မျိုးအံ့တို့မြုပ်နှံရာနေရာသို့ တခုတ်တရရောက်ရှိခဲ့လျက် .....
ရိုးမ၊ အရှေ့ခြမ်း၊ အနောက်ခြမ်း တနံတလျားတို့တွင် ကြီးမြတ်စွာကျဆုံးသွားခဲ့ကြသော ရဲဘော်ကြီး/ငယ်အပေါင်းအား အလေးထား အလေးနီလျက် .....အမှတ်ပြု ရေးသားခြင်း တစုံမျှသာ ။
-
t.me@moemaka
#MoeMaKaMedia
#WhatsHappeningInMyanmar
Posts
