အောင်ဝေး - ဒေါ်အောင်ဆန်းစုကြည်ဘွဲ့ ကဗျာအချို့

အောင်ဝေး - ဒေါ်အောင်ဆန်းစုကြည်ဘွဲ့ ကဗျာအချို့

(မိုးမခ) ဇွန် ၁၈ ၊ ၂၀၂၃

ဤကဗျာများဖြင့် ၂၀၂၃ ဇွန် ၁၉ တွင် ကျရောက်မည့် ဒေါအောင်ဆန်းစုကြည်၏ (၇၈) နှစ်ပြည့်မွေးနေ့ကို ကြိုဆိုဂုဏ်ပြုအပ်ပါသည်။

စံပယ်နွေဦး

စံပယ်နှစ်ပွင့်

ညက ပွင့်တယ်။

တစ်ပွင့်

ဘုရားတင်တယ်။

တစ်ပွင့်

ဒေါ်အောင်ဆန်းစုကြည် တင်တယ်။  ။

~ ~ ~ ~ ~ ~ ~ ~ ~ ~ ~ ~ ~ ~ ~ ~

အမေ့ယာ

ရွာပြင်မိုးချုပ်

ခွေးသားအုပ်။

ခွေးအုပ်ထိုးဟောင်

မိုးလရောင်။

မိုးလရောင်

ရိုး တောင်ခြေရင်း။

အဘိုး မာပါစေ

အဘွား သာပါစေ

ရွာအခြေ မြေတလင်းမှာ

ကောက်ဦးနံ့သင်း။   ။

~ ~ ~ ~ ~ ~ ~ ~ ~ ~ ~ ~ ~ ~ ~ ~

ခမ်းနားတဲ့ လရောင်

သူက

ငါတို့ရင်အုံက လှံကို

နုတ်ပေးခဲ့။

ငါတို့က

သူ့နောက်ကျောစိုက်နေတဲ့ ဓားကို

မေ့လို့။

ကျေးဇူးတရား ဆိုတာ

ခမ်းနားတဲ့ လရောင်။

နောက်ဖေးလမ်းကြားက

ခွေးတွေကတော့

ဟောင်နေဦးမှာပဲ။   ။

~ ~ ~ ~ ~ ~ ~ ~ ~ ~ ~ ~ ~ ~ ~ ~

အမတနှင်းဆီ

နတ်ဆိုးက

ကျောက်တုံးနဲ့

ဖိသတ်တယ်။

နွေဦးပေါက်တော့

ကျောက်တုံးက

ပန်းပွင့်လာသတဲ့။

ကမ္ဘာပေါ်မှာ

နောက်တစ်ပွင့်မရှိတဲ့

ပန်း။   ။

~ ~ ~ ~ ~ ~ ~ ~ ~ ~ ~ ~ ~ ~ ~ ~

ဓမ္မကဗျာ

--------------

အမိန့်နဲ့

အာဏာနဲ့

အဆိပ်ကို

မျိုခိုင်းလို့ရတယ်။

ဒါပေမဲ့-

အမိန့်နဲ့

အာဏာနဲ့

အတိတ်ကိုတော့

ဖြိုခိုင်းလို့မရဘူး။

မှတ်ထား...

နေပြည်တော်

မာရဝိဇယနဲ့

၆ ကီလိုမီတာအကွာမှာ

ဆော့ခရတ္တိရှိတယ်။   ။

အောင်ဝေး

Join Us @ MoeMaKa Telegram

t.me@moemaka

#MoeMaKaMedia

#WhatsHappeningInMyanmar

Join Us @ MoeMaKa Telegram
t.me@moemaka
#MoeMaKaMedia
#WhatsHappeningInMyanmar