ယူအန်စင်မြင့်၊ နိုင်ငံတကာနဲ့ အိမ်နီးချင်းဆက်ဆံရေး အတိုင်းအတာတွေ

မြန်မာနွေဦး ခရိုနီကယ် - ဒီဇင်ဘာ ၁၉ မြင်ကွင်း

(မိုးမခ) ဒီဇင်ဘာ ၂၀၊ ၂၀၂၃

    

ယူအန်စင်မြင့်၊ နိုင်ငံတကာနဲ့ အိမ်နီးချင်းဆက်ဆံရေး အတိုင်းအတာတွေ

ယူအန်က United Nations Population Fund ကုလ၏ လူဦးရေဆိုင်ရာရန်ပုံငွေအဖွဲ့၏ တာဝန်ခံ နေပြည်တော်ကို ရောက်ရှိနေပြီး သူက မြန်မာပြည်က အမျိုးသမီး၊  ကိုယ်ဝန်ဆောင်တွေ၊  ကလေးသူငယ်တွေအတွက် အထောက်အကူလုပ်ငန်းတွေ လုပ်ဖို့ ၊ လိင်ပိုင်းဆိုင်ရာနဲ့ အကြမ်းဖက်မှုတွေ ကာကွယ်တားဆီးဖို့ အလုပ်တွေ လုပ်ဖို့ ဖြစ်တယ်လို့ သူ့ X တွစ်တာကနေ ရေးသားထားတာ တွေ့ရပါတယ်။ ယူအန်၏ အဖွဲ့အစည်းအများအပြားဟာ စစ်ကောင်စီ၏ ယန္တရားများနဲ့ ဆက်သွယ်လုပ်ကိုင်နေဆဲ ဖြစ်တာကို တွေ့နေရပါတယ်။ စစ်ကောင်စီကိုယ်တိုင်ကလည်း အစိုးရတရပ်လို လုပ်ကိုင်လည်ပတ်နေရတာတွေကို ဟန်မပျက်ဆောင်ရွက်ဖို့ အစွမ်းကုန် အားထုတ်နေပြီး တိုင်းရင်းသားလက်နက်ကိုင်မဟာမိတ်များ၏ ၁၀၂၇ စစ်ဆင်ရေးနောက်ပိုင်းမှာ စစ်ကောင်စီကိုယ်တိုင်က သတင်းထုတ်ပြန်ချက်တွေ အကြိမ်ပေါင်း ၈၀ ကျော် ရှိလာတယ်လို့ DVB သတင်းတရပ်က ထောက်ပြတာလဲ ရှိပါတယ်။

သည်နေ့သတင်းတွေထဲမှာ ယူအန်က မြန်မာပြည်ရဲ့ သံအမတ်ကြီးအဖြစ် နွေဦးတော်လှန်ရေး၏ ပြယုဂ်တဦးဖြစ်တဲ့ ဦးကျော်မိုးထွန်းကိုပဲ ဆက်လက်ထားရှိမယ်လို့ သည်သက်တမ်းမှာလည်း ဆုံးဖြတ်လိုက်တယ်လို့ ဆိုပါတယ်။ ကုလသမဂ္ဂ အထွေထွေညီလာခံမှာ မြန်မာနိုင်ငံအတွက် ကိုယ်စားပြုခွင့်အတွက် စစ်ကောင်စီရဲ့ တတိယအကြိမ်မြောက် ကြိုးပမ်းမှု ကျရှုံးခဲ့ပြီး ပြည်သူလူထုနဲ့ တစ်သားတည်း ရပ်တည်ခဲ့တဲ့ သံအမတ်ကြီး ဦးကျော်မိုးထွန်း ဆက်လက်ကိုယ်စားပြုခွင့် ရရှိခဲ့တယ်လို့ သိရပါတယ်။ NUG အစိုးရ၏ ကိုယ်စားလှယ်တဦးအဖြစ် ကုလသမဂ္ဂနိုင်ငံရေးစင်မြင့်မှာ ရပ်တည်နေတာဟာ မြန်မာပြည်သူတွေ၏ စစ်အာဏာရှင်လက်အောင်မှာ ရင်ဆိုင်နေရတဲ့ အရေးကိစ္စမှန်သမျှကို ပြည်သူတွေအတွက် ဖော်ထုတ် တင်ပြနေခွင့်ရတဲ့ အကျိုးက အလွန်ကြီးမားတယ်လို့ NUG နိုင်ငံခြားရေးဝန်ကြီး ဒေါ်ဇင်မာအောင်က အင်တာဗျူးတခုမှာ ပြောကြားလိုက်ပါတယ်။ မြန်မာသံတမန်တွေအားလုံးဟာ မြန်မာပြည်သူတွေအတွက် ရပ်တည်သင့်တယ်၊ ဦးကျော်မိုးထွန်းကို စံပြုသင့်တယ်လို့လည်း သူက ထောက်ပြလိုက်ပါသေးတယ်။ 

နိုင်ငံတကာဆက်ဆံရေးမှာ နွေဦးတော်လှန်ရေးအင်အားစုများနဲ့ NUG အစိုးရတာဝန်ရှိသူများက စစ်ကောင်စီနဲ့ နှိုင်းယှဉ်ရင် များစွာ အသာစီးရနေတယ်လို့ သုံးသပ်နိုင်ပြီး ပြည်တွင်း စစ်ရေးလှုပ်ရှားမှုတွေမှာလည်း ၁၀၂၇ စစ်ဆင်ရေးနဲ့အတူ နွေဦးအင်အားစုများ၊ PDF များ၊ ERO များက တိုက်ပွဲတွေမှာ ပြည်သူလူထု၏ ထောက်ခံမှုတွေနဲ့အတူ အားသာမှုရှိနေတယ်လို့ ဆိုနိုင်ပါတယ်။ နိုင်ငံတကာပိတ်ဆို့အရေးယူမှုတွေကြောင့် နိုင်ငံခြားငွေအကြပ်အတည်း၊ စစ်လက်နက်ဝယ်ယူဖြည့်ဆည်းနိုင်ရေး အကျပ်အတည်းက အဆိုးထဲကနေ ပြန်တက်လာနိုင်စရာ မရှိတော့ဘူးလို့ အကဲခတ်တွေက မှတ်ချက်ပေးပါတယ်။ 

တလောက အမေရိကန်၏ အစိုးရအစီရင်ခံစာတခုမှာ PDF တွေကို အကြမ်းဖက်လို့ သတ်မှတ်သုံးနှုန်းတာကို ပြည်တွင်း ပြည်ပ မြန်မာအရေးအဖွဲ့အစည်းတွေက ကန့်ကွက်စာတွေ ပို့ကြလို့ အမေရိကန်အစိုးရကိုယ်တိုင်ကနေ သူတို့အာဘော်မဟုတ်ဘူးလို့ အတိအလင်း ပြန်ရှင်းရသလို၊ စစ်ကောင်စီ၏ တောင်းဆိုမှုကြောင့် တရုတ်နိုင်ငံအစိုးရက မြန်မာပြည်မြောက်ပိုင်းမဟာမိတ်ညီနောင် ၃ ဖွဲ့ကို အပစ်အခတ်ရပ်ဖို့ ကြားဝင်စေ့စပ်တဲ့ဆီမှာလည်း မြန်မာအဖွဲ့အစည်းတွေကပဲ မြန်မာပြည်တွင်းရေးမှာ မြန်မာပြည်သူတွေ၏ အကျိုးစီးပွားကိုသာ မျက်နှာမူဖို့ သတိပေးတောင်းဆိုတဲ့ ထုတ်ပြန်ချက် ထွက်လာတာလဲ တွေ့ရပါတယ်။ မြန်မာပြည်သူတွေက စစ်အာဏာရှင်အမြစ်ပြတ် ချေမှုန်းရေးနဲ့ မြန်မာပြည်နိုင်ငံရေးမှာ စစ်တပ်၏ အခန်းကဏ္ဍ လုံး၀ဥဿုံ ဖယ်ရှားရေးကို တညီတညွတ်တည်း ဆန္ဒရှိနေတာကိုလည်း တရုတ်အစိုးရကိုယ်တိုင်က ရိပ်မိနေပြီလို့လည်း မျှော်လင့်နိုင်ပါတယ်။

VOA သတင်းမှာတော့ တရုတ်ပြောခွင့်ရက တင်းမာမှုတွေ ဖြေလျော့ရေးကိုသာ ဦးတည်ပါတယ်လို့ ပြောတာ တွေ့လိုက်ရပါတယ်။ တရုတ်နိုင်ငံရပ်တည်ချက်က တသမတ်တည်းရှိပြီး မြန်မာနိုင်ငံတွင်း အစုအဖွဲ့တွေကြား မြေပြင်မှာတင်းမာမှုလျော့စေဖို့ တတ်နိုင်သမျှထိန်းထိန်းသိမ်းသိမ်းကိုင်တွယ်ကြဖို့နဲ့ သဘောတူထားပြီးသားတွေကို အလျင်အမြန်အကောင်အထည်ဖော်နိုင်ကြဖို့ တရုတ်အနေနဲ့မျှော်လင့်တယ်လို့ တရုတ်နိုင်ငံခြားရေးဌာန ပြောခွင့်ရသူ Wang Wenbin က ပြောပါတယ်လို့ ရေးထားပါတယ်။

Radio NUG အင်တာဗျုးမှာ ဒေါ်ဇင်မာအောင်၏ ပြောဆိုမှုကတော့ မြန်မာ့အရေးကို နိုင်ငံတကာက ကြားဝင်ဆောင်ရွက်တဲ့ဆီမှာ ဆေးမြီးတိုတွေနဲ့ မဟုတ်ဘဲ စစ်အာဏာရှင်စနစ် ဖယ်ရှားရေးနဲ့ ဖယ်ဒရယ်ပြည်ထောင်စုထူထောင်ရေးကိုသာဦးတည်တဲ့ စနစ်ပြောင်းလဲရေးကိုသာ ဦးတည်သင့်တယ်လို့ ဆိုလိုက်ပါတယ်။ နယ်စပ်ဒေသနေရာ ဒေသတခုအတွင်းသပ်သပ်မှာ အပစ်အခတ်ရပ်စဲလိုက်ရုံနဲ့ ပြဿနာတွေကို ဖြေရှင်းရာ မရောက်ဘူးလို့ ထောက်ပြသွားပါတယ်။ အိမ်နီးချင်းနိုင်ငံတွေအတွက်လည်း အကျိုးမရှိဘူး၊ ငြိမ်းချမ်းရေးကိုလည်း ဖော်ဆောင်နိုင်မှာ မဟုတ်ဘူးလို့လည်း ဝေဖန်လိုက်တာ တွေ့ရပါတယ်။

နိုင်ငံတကာမှာ အာဏာရှင်တွေ လက်ယာအစွန်းရောက်တွေ ခေါင်းထောင်နေတဲ့ နိုင်ငံရေးတင်းမာမှုတွေ တိုးနေတယ်လို့ ဆိိုနိုင်ပါတယ်။ စစ်မက်ဖြစ်ပွားမှုတွေမှာ နယ်နမိတ်မဲ့ အကြမ်းဖက်စစ်ပွဲတွေဟာ ယူကရိန်း၊ ပါလစ္စတိုင်းတို့အပြင် အိမ်နီးချင်းတွေဆီကို သက်ရောက်လို့ လာနေပါတယ်။ ရုရှားခေါင်းဆောင်ပူတင်ကိုယ်တိုင်ကလည်း ယူကရိန်းစစ်ပွဲ အနိုင်တိုက်ရေးနဲ့ အမေရိကန်နဲ့ ဥရောပသမဂ္ဂတို့အပေါ်မှာ နိုင်ငံရေး စီးပွားရေး မျက်နှာစာတွေမှာ အသာစီးရဖို့ ဆက်လက်အားထုတ်မယ်လို့ ဆက်ပြီး ခြိမ်းခြောက် ပြောဆိုလိုက်ပါတယ်။ အမေရိကန်တို့ အနောက်အုပ်စုတွေကလည်း ရုရှားကျုးကျော်စစ်ကို ထိထိရောက်ရောက် တားမြစ်နိုင်တာ မရှိသလို ယူကရိန်းအစိုးရကိုလည်း ကတိပေးသလို အကူအညီတွေ မထောက်ပံ့နိုင်တဲ့ အကြပ်အတည်းတွေ မြင်နေရပါတယ်။ အစကတည်းက မြန်မာပြည်ဟာ ပြည်ပ၏ အကူအညီတွေနဲ့ တော်လှန်ရေးလုပ်ခဲ့ရတာမဟုတ်ဘဲ ကိုယ့်ပြည်တွင်းအား၊ ပြည်ပရောက် မြန်မာတွေ၏ အား၊ နွေဦးတော်လှန်ရေးမြေပြင်အင်အားတွေ ပြည်သူ့ထောက်ခံမှုတွေနဲ့ တော်လှန်ခဲ့ကြတာမို့လို့ အခုလို ကမ္ဘာကြီး၏ အစွန်းရောက်တွေအင်အားကြီးတွေအချင်းချင်း ပဋိပက္ခတွေနဲ့ တစိတ်တပိုင်းတော့ ကင်းလွတ်ခွင့်ရတာ တော်သေးတယ်လို့ ဆိုနိုင်ပါတယ်။ အနောက်နိုင်ငံတွေ၏ ဩဇာစွက်ဖက်မှုတွေကနေ အမှီအခိုကင်းနေသလို အရှေ့ကတရုတ်နိုင်ငံရဲ့ ဩဇာကိုလည်း အားကိုးမျော်လင့်မှု မရှိခဲ့တာကြောင့် မြန်မာ့အရေးဟာ ကိုယ့်ကြမ္မာကိုယ်ဆက် ဖန်တီးနေဖို့သာပဲလို့ ဆိုနိုင်ပါတယ်။ ဒါက ကံဆိုးလား ကံကောင်းလားဆိုတာကတော့ နွေဦး၏ ခေါင်းဆောင်တွေ အင်အားစုတွေကိုယ်တိုင်ပဲ ဆုံးဖြတ်ကြရမှာ ဖြစ်ပါတယ်။

Join Us @ MoeMaKa Telegram
t.me@moemaka
#MoeMaKaMedia
#WhatsHappeningInMyanmar