ဝင်းမင်းခိုင် - ဘယ်တော့မှ
ဝင်းမင်းခိုင်
(မိုးမခ) ဖေဖော်ဝါရီ ၄၊ ၂၀၂၄
ငကန်းနေရာမှာငစွေကိုအစားထိုးပြီး
အပိုင်းဘယ်လောက်ထိဆက်ရိုက်ဖို့
စဉ်းစားနေသလဲဒါရိုက်တာ
သံပုရာသီးနှစ်ခြမ်းကိုဘယ်အခြမ်းကပိုချဉ်သလဲလို့
တွေးတောနေဖို့ရာငါတို့မှာအချိန်မရှိဘူး
ခေါင်းဖက်ကပြပြပန်းဖက်ကပဲပြပြ
ခေါင်းနဲ့ပန်း၂ ခုပေါင်းထားတဲ့ဒင်္ဂါးတချပ်ဖြစ်တယ်ဆိုတာ
ငါတို့နောကြေနေကြပြီ
ဒီအရပ်မှာဒီဇာတ်ကကျောရိုးတခုထဲပဲဆိုတာလဲ
ကလေးကအစကြိုသိနေကြပြီ
တကယ့်အဖြစ်ပျက်တွေက
စိတ်ကူးယဉ်တာထက်ပိုဆန်းကြယ်သတဲ့
အို
စိတ်ကူးယဉ်တတ်ကြသူတို့
မင်းတို့စိတ်ကူးယဉ်တာထက်ပိုဆန်းကျယ်တဲ့အထွဋ်ထိပ်ကို
ငါတို့ခြေချနိုင်ခဲ့ပြီ
အို
အလိုကြီးလို့ပျက်စီးမှုကျောက်ဆောင်ပေါ်
သောင်တင်သွားသူတို့
ဗုဒ္ဓရဲ့စကားခဏငှားပြောရရင်
မင်းတို့ကိုငါတို့မြင်ပြီ
နောက်ထပ်တဖန်တည်ဆောက်ခွင့်ဘယ်တော့မှရလိမ့်မယ်မဟုတ်
၂၆.၁.၂၄
-
t.me@moemaka
#MoeMaKaMedia
#WhatsHappeningInMyanmar
Posts
